前排突然好多人講起自製WiFi訊號增強器，因為「報紙講」，香港外面一早WOW!到iMOM，唔使問都知蘋果，得蘋果記者最鍾意拎幾個禮拜甚至幾個月前網絡舊聞當開心大發現推上報。自己一直以黎冇試，因為屋企部router冇天線唔知點整，點知就係咁蹺，報紙吹到恆一恆果排，俾我執廚房時搵到卷陳年鍚紙，屋企冇幾可會用我唔拎黎玩都遲早俾人掟落垃圾桶，就返公司搵左塊紙皮土製左呢舊野出黎。

我張床同隻router距離唔算好遠，但中間隔左一幅牆三個組合櫃，撻上床想駁WiFi上網有難度，最抵死床尾勉強可以有一格訊號但床頭幾乎一定斷線，想訓住覺上網就要個人頭尾調轉訓先得。就整左呢個巨型WiFi訊號導向儀，個router冇天線的話，成部野圍住晒應該掂喇卦？測試左兩個禮拜，結果呢個發現係失敗既，除左心理上有幫助實際上完全冇改善。唔知係咪卷錫紙太舊或太薄？上Youtube睇鬼佬整，都係用好厚身的錫紙。所以懶再研究，想整好過而家就要換個有天線router，但與其都係換直頭加多幾舊水買部勁router就乜都唔使煩啦。

搞一大餐唯一得著係，而家先知錫紙英文名叫aluminum foil，原來錫紙唔係鍚做的。