好多人仲未知道點解劉Sir會叫劉Sir。其實好簡單：咪因為佢真係阿sir囉，真係曉教書架。好多原因到頭來脫離教育界，不過仍然具專業資格，有學校肯收隨時可以變番阿sir誤人子弟，但當然真係咁容易同咁好撈，五六年前已經返左去啦。

雖然幾近從未正式進入過教育界，註冊教師身份令我今時今日仍然有資格投票選功能組別，甚至好似今日11/12/11參加選舉委員會投票。今次第一次有機會選特首選委，先知一票可以選30個人，雖然俾盡你只控制得到30/1200（唔使講都知其他最少幾百個唔係自動當選紅底人士就係大商家有錢佬啦），加明知乜都係睇北京頭，但票總是要投，公民責任之餘仲有好多野不投不快。

首先，見到教聯。得閒留意一下時事，會見到而家左派好鍾意將泛民一方龐大或知名度高組織照抄成一個赤化版複製品，藉此混淆視聽同時拉攏票源，愛護香港力量已經係柒中之柒，報紙話社工界仲整左個親中版社民連，而教聯的出現就係為左同教協對著幹。我從來支持教協，又諒佢益過我唔少平價薯片蝦條餅乾雜食，同絕對唔想俾土共上位一定會投票撐佢地，不過唔投左仔同唔知係唔係隱形左派的獨立候選人，好似都湊唔夠填三十個人名。

羅飯焦分再蒲頭先最灰。想當年入師範到幾年後畢業出黎，正是香港教育界最低點：縮班、殺校、新入職教師減人工（佢當然相反年年勁加啦）、先要求所有英文教師通過基準試（更想知羅飯焦分本人過唔過到）、等你過左又改例話都未夠仲要補多張cert即係畢完業都唔代表教得書要兼讀多兩三年、果陣教席已經超難搵會唔會半工讀進修緊時俾人殺出黎祝君好運、過到都唔好咁開心大量官僚行政加垃圾過垃圾的教改政策令理應教書的你做到似教師助理多過似教師，如果教著間學校係瀕臨殺校邊緣當埋你sales噉使捽數捽到你嘔。香港地做先生一向做到死，但真正將本地教育糟蹋到成為今時今日人人都講大議題，全靠羅飯焦分一人之力，可想而知佢幾勁／幾廢 － 順帶一提，當年報紙插佢插得最勁一樣係自己身為教育策劃高官，搞到香港教育食晒屎之後送晒全部仔女出外國讀書。劉Sir懶一回事但畢業後過埋基準試都搵唔到教席你冇得話完全唔關羅飯焦分事，曾幾何時（前羅氏執政年）師範畢業生本職就業率、畢業生順利入行比率可以好高，而我地屆畢業生係有史以黎最難搵工之一。最經典一幕係兩個先生做到跳樓，回應是

「真係咁大壓力咁辛苦，就唔會只得兩個先生跳樓咁少啦。」

故事未完笑料停不了，先生校內跳樓自殺人數上升，班官提供的解決問題，係每間學校派幾個帳篷，「再有先生跳樓的話用黎遮住，廢事俾學生見到條屍。」如此謬策以為只得大陸庸諗得出做得到。當時港官形象未似而家衰到貼地，最差只係問責班子出任何問題都唔需要問責同廿三條，羅飯焦分卻是語不驚人死不休加唔整死香港教育唔心息果隻，都算香港高官們的反公關同官僚極致化先驅，同期只有葉劉夠同佢鬥，難怪做得到特首班底。但唐陣營更合適，兩者一樣一擔擔。

係點投都冇用，係上次區議會票站我屋企隔籬超方便今次反而遠到仆街，係下個香港特首一係古惑仔一係戇鳩仔，只係一舊屎同兩舊屎之別，我都會去投。起碼叫出過力。

講開又講，每次區議會選舉投票，我都會帶晒身份證、通知書成疊野去票站，但票站姐姐一定係話「唔使咁多野，俾身份證我就得。」其他野你就算塞俾佢佢都唔會睇唔會理，仲要擺個「阻住我做野過主啦」款出黎俾你睇，堂堂選舉可以隨便成噉，實在非常兒戲。再睇睇選舉委員會投票，通知書就寫到明一定要帶埋張通知書去證明自己組別身份先可以投票，我地選民／平民百姓根本冇say只叫做出力幫手做場show，反而執到咁正按番正常程序做野。從其寬嚴之別，可看出邊一邊選舉政府控制得到邊個唔得。

延伸閱讀1：庫斯克的床《投票給蒼井空的意義》

http://kursk.xanga.com/757404043/%e6%8a%95%e7%a5%a8%e7%b5%a6%e8%92%bc%e4%ba%95%e7%a9%ba%e7%9a%84%e6%84%8f%e7%be%a9/

延伸閱讀2：《我除左講恭喜之外，都唔知應該講乜野好：美孚告急︰民建聯一上場即向反地霸居民報復，祥達/新世界馬上來開工﹗》

https://www.facebook.com/matto.lausir/posts/290900497597635

https://www.facebook.com/note.php?note_id=10150931201770193