每週一相片大行動

2011 Week 36



「KFC亞皆老街分店,R.I.P.」


星期二晚去朗豪坊睇《牛仔大戰外星人》,黎搵飯食先知道兩日前執左。KFC亞皆老街舖真係坎苛,本來開新之城地庫好地地,跟住俾Murder King食左搬去女人街街口,點知個半月前西洋菜街總舵執笠,而家連佢都閂埋,全旺角得番非常唔聚腳又極度多人的新世紀廣場同朗豪坊對出兩間。好鬼唏噓。


一直支持KFC,因為主要對手麥記太唔長進,就算唔講價錢點樣加到跑贏通漲,唔講份量點樣縮水又唔出新野食,堂食環境已經衰過人幾條街啦啦。以前好唔鍾意去新之城雞記,就係同麥記一樣又迫又多人又嘈,俾你搵到位坐都要排三四個字隊買野食,搬去女人街街角一樓之後開心好多,雖然新舖好細個,門口窄之餘俾街邊檔遮晒,好多人見到間舖但連點樣上去都唔知相當唔方便,唔緊要方便我就得,正因咁難上去永遠超少人,連繁忙時間食飯時段都可以一個人霸成張六人檯想坐幾耐就幾耐,幾年黎只遇過一次成團自由行包場迫住要走。


加上裝修好開大燈超光猛加全街景玻璃窗,好多時屋企冇飯開,放工都會走黎女人街KFC幫襯,邊睇書邊食雞姿姿悠悠,有時好似呢晚噉等睇戲或者等下場,中間攝時間咪走上黎,唔食野齋坐都冇人趕又唔會突然間多人到迫你走。黎到一定有位加可以揀位,一個人食盡先三十幾,坐到你鍾意先走都得冇人會煩你,旺角區邊度搵丫茶餐廳都唔得啦。


雖然生意差地段更差預佢遲早執,冇諗過會咁早嘛,而家蒲點得番九龍城廣場雞記,全場近二百個位香港冇幾多間KFC有咁大,但永遠坐唔夠三分一大家唔使爭,而且九場一向頹爆你擺明入去混吉絕對冇問題,經常見到成班中學雞做功課、大堆人玩魔法卡打PSP、菲傭圍埋打牙骹、阿婆入去拎杯水坐成日避暑,有時星期六日屋企無聊天氣又熱,會行兩三個字去九場同班阿婆爭冷氣涼,坐低慢慢聽歌睇書舒舒服服嘆世界,有多張梳化的話就是寫意人生了。


所以見到亞皆老街雞記執左,作為大fans真係好灰。九龍城廣場分店千祈唔好歷史重演呀。對附近舊區居民黎講,已經唔止一間食肆咁簡單,而是一份生活與精神寄託。




每週一相片大行動.綱要




Sir個網

lau-sir.com


Sirblog

http://hk.myblog.yahoo.com/lausirisual