每週一相片大行動

2011 Week 34
a.k.a. "Then Chicken Weeken"

Day 4




「深水土步喜喜喜喜美食:可能係全香港最好食既雞軟骨串。」


十分鍾意食雞,去掃街都鍾意搵雞食,除左麥樂雞(我鍾意街邊熟食檔麥樂雞更甚於麥記「tr00」麥樂雞),另一最愛是雞軟骨,夠韌好好趙又夠肉食,一串好多粒感覺比魚蛋牛丸之類幾啖就冇抵食,就算去放題人人叫壽司魚生我都係瘋狂雞軟骨,但日式炸物好易食炸粉多過食肉食骨同太乾,都係街頭食法最惹味。不過好難遇到好食,旺角咁多檔差唔多試晒,一係太油一係太鹹一係太貴/太少,一直掃到深水土步,終於搵到間合我心意。亦相信係香港最好食雞軟骨串。


舊區永遠是最好的,黃金對出福榮街桂林街交界囍囍美食,是現今難得仍然價廉物美小食檔,要讚我寫多幾千字都得,但今個星期是「Then Chicken Weeken」食雞主題週,就講番主角雞軟骨串啦。大大串絕對俾足料,落單先炭爐即燒燒足個半字,旺角人流多大多數檔口求快落鑊炸,太油已經失去風味,就算肯用炭爐都冇幾可咁好心機同你慢慢燒,囍囍夠晒火喉之餘又冇油,牌面已經贏晒,當然你要唔介意等一兩個字至有得食啦。燒完之後阿姐問「辣唔辣?」話辣你就大鑊喇,拎三樽粉出黎猛咁倒倒到成串都係幾種色撈埋,一入口嘩頂我唔講喇你自己落去買串試啦正到我都冇野好講。


唔止好食,最緊要物超所值極度抵食。在此一舊臭豆腐可以幾年間由五六蚊件升到十一二蚊件的時代,旺角雞軟骨串亦與時並進賣到$12-14喇,囍囍大串夾好食居然仲賣緊$8,我唔會奢求仲搵得到五六蚊一串,但咁高質素其實要我俾旺角價都心甘命抵,俾八蚊就有得食直頭賺左啦。而家出親深水土步,實會特登走黎幫襯一食就兩三串,跟住實會好順路落一個街口貢茶買杯布丁珍珠奶茶,所以每次蒲呢頭都好高消費。為左囍囍雞軟骨串,或者我應該黎深水土步住或者返工,反正我咁愛舊區。不過應該好快食到破產。


高登炸雞,快研究小學雞軟骨!」



2011 Week 34 a.k.a. "Then Chicken Weeken"


Day 1:[wow到hihi]劉Sir大戰高登炸雞


Day 2:KFC怒刷一桶


Day 3:挑戰麥記18件麥樂雞


Day 4:深水土步喜喜喜喜美食:
可能係全香港最好食既雞軟骨串




每週一相片大行動.綱要




Sir個網

lau-sir.com


Sirblog

http://hk.myblog.yahoo.com/lausirisual