每週一相片大行動

2011 Week 34
a.k.a. "Then Chicken Weeken"

Day 3




就算身為KFC特大fans,仍需承認諷刺地有時老本行都唔夠非主賣雞之麥記鬥,好似脆香雞翼絕對比巴辣雞翼好食,同KFC一直開發唔到一款小食可以同麥樂雞媲美抗衡。兩樣都係我的最愛,我老豆一樣,成日得閒無事落麥記買幾盒上黎齊齊嘆,不過自從麥記價錢密密加此景已不復再,大佬長做特價之雙牛芝堡$8可以當正餐,麥樂雞同雞翼純粹用黎攝牙罅但係價錢貴一半有多,點食得起呀大佬?


始終由細到大超鍾意食麥樂雞,麥記終於生性俾個藉口我再幫襯:禮盒裝回歸了。以往有時候會無端端某地區某時段低調出party裝,可惜好難遇,對上亦係第一次係2002年六月頭,時值學期尾要屈蛇溫書考試趕功課,大埔巴士總站麥記出左25件麥樂雞餐同15件雞翼餐,立即每樣叫一個拎返宿舍三條友分,果舖都算經典 - 經典在劉Sir一個人食左半盒麥樂雞加十隻雞翼隊多杯大汽水都未飽(話時話,當年話落超級廣場熟食檔一人一隻燒春雞之雄圖大計都未達成過)。可能party裝實在太戇居,等左成九年先再出禮盒裝$30十八件,又有機會挑戰。


但所謂「挑戰」根本全無挑戰性,平日我連足六兩都可以一次食兩個,麥樂雞講過攝牙罅嗟,好耐以前已經打孖兩盒上起碼都叫九件,而家加多六件同食多幾粒糖冇乜分別,我亦有信心就算食兩盒18件都冇問題,大前提千祈唔好叫餐,因為薯條好易滯一包大薯條夠抵兩盒雞,根本麥記餐要食得飽全靠薯條而唔係其他任何野。食就梗係食得開心啦,大盒裝有咁多件仲多樣野玩可以砌野,本身想砌金字塔但得十八件砌出黎唔夠壯觀(似乎下次真係要買兩盒),粗粗地整住架戰艦啦只好。同研究跟埋果四隻醬,根據麥記翻炒當創新傳統四隻「新」醬應該出過晒,因為咁多年黎冇幾多款新醬我唔覺得on9,同向來唔多點醬鍾意淡食,反正無聊,試試四隻醬咩料。


芝麻醬:聽到個名都知死得,邊個諗到用芝麻整麥樂雞醬咁笨柒?諗住會似芝麻糊黑色點知一開係米黃色,完全食唔出芝麻味,得沙律醬味...


蜜糖芥末醬:又係個名已經話你知完全唔夾的奇怪口味。稀到水噉,亦同水一樣淡然無味,冇蜜糖冇芥末又唔係醬,想點?


蒜蓉辣椒醬:似買雞翼俾果隻辣醬,好茶樓feel,我記得以前食過加覺得OK,冇事順利過關。


芝士醬:對佢期望好大,味道唔差,可惜唔夠濃,太淡,真失敗。


早知叫佢俾四包燒烤醬我好過啦,食左十幾年只有燒烤醬同咖哩醬最無敵,曾幾何時返屋企食飯會買盒麥樂雞加料,就係為左整盒咖哩醬撈飯,好可惜係要吊高黎賣一年可能得兩三個星期有咖哩醬。做marketing果班唔掂。


雞就食完,抵唔抵先?不妨計計數:


我明白而家乜叉都貴,但可接受價位是個半一舊麥樂雞,出面煎釀三寶檔賣麥樂雞六蚊起碼四件啦,而且我更鍾意街邊檔貨色因為皮更薄炸出黎脆得多雞肉味又濃,麥記僅贏在燒烤醬。要一次食十八件唔係食唔到只係寡過頭(最死醬唔掂),平時六件或九件都肯咁平,雙牛芝堡之外麥記會多番樣野令我肯幫襯番。


「食完(但唔飽)又玩完,只餘好大個問號:明明賣緊麥樂雞,點解個大盒上面寫住雞翼?係咪即係下水會到15件雞翼重出江湖?正又有得挑戰!」



2011 Week 34 a.k.a. "Then Chicken Weeken"


Day 1:[wow到hihi]劉Sir大戰高登炸雞


Day 2:KFC怒刷一桶


Day 3:挑戰麥記18件麥樂雞


Day 4:深水土步喜喜喜喜美食:
可能係全香港最好食既雞軟骨串




每週一相片大行動.綱要




Sir個網

lau-sir.com


Sirblog

http://hk.myblog.yahoo.com/lausirisual