上回提到物價飛昇加最低工資，而家連住舊區都難搵啖平野食。食肆加價唔停，家陣想食得豐富又開心，除左街頭行到街尾格足幾條街價，只有自己煮，靠營多撈麵加OK減價貨，就可以廿蚊整個開心大餐。

營多俾高登搞到潮晒，但讀緊書已經食佢，高登呢幾年先猛咁講我細個已擺左佢上神檯係噉拜，除左好食又易整一隻湯碗加水再隔搞掂煲都唔使用，仲係抗通漲榜樣，十幾年前食一兩蚊家陣可以差唔多冇變（最少我屋企果邊係），大佬老母麵都加左成蚊價啦。自從近年公仔麵賣到四五蚊包六點鐘麵包又唔夠師奶爭，出黎做野先明白搵食艱難，個半一包的營多是救星，兩包塞到飽夠當一餐。但唔覺唔覺貴少少，前排仲賣緊個七而家差唔多見親都係十一蚊五包，好在之前未抬價時入定貨。有次去個領匯商場，見到有間印尼雜貨舖，今時今日仲可以賣$1.5一包營多，為了廣大香港市民印尼同胞的福祉，我衷心祝願佢可以頂到落去。

營多本身已經有大量調味醬粉，就算唔再加任何額外野都好食，最鍾意食原味夠香辣（事實係試過另外幾隻味差唔多隻隻都幾難食），但老實配料全部油加醬同幾匙油倒落肚冇分別，連劉Sir咁唔健康見到都驚。所以好多時只落一半甚至完全唔落 － 實際上半包醬同粉已經夠撈一包麵你話幾濃，但有時嫌太淡又只得麵趙唔夠開心，就會落街平平地加送。整罐午餐肉當然最開心，但更鍾意去七記同OK掃就黎過期微波爐叮叮減價貨，雖然七記比較平OK選擇較多同我覺得好味過七記。一係買隻雞脾，臨過期貨會平幾蚊十零頭，貴少少有$16.8兩份點心，通常會選擇後者，雖俾多幾蚊但有兩種送食開心嘛。同我成日覺得食大雞脾好鬼麻煩。

最鍾意XO醬蘿蔔糕配小籠包，首先兩包營多掟落湯碗加水焗一個字，焗果陣微波爐叮番熱兩份點心，叮完倒水唔使落湯粉，就噉撈蘿蔔糕劈XO醬已經夠辣心理上又冇咁肥（但你食過OK蘿蔔糕都知，其實XO醬一樣超油．．．），好好食份量又夠多劉Sir都夠食，而且落熱水就得一隻碗搞掂食完洗又容易，全部夾埋只需要兩包營多$3.4加OK過期前減價貨$16.8 = $20.2，噉價錢一麵兩送仲要好味又冇乜手尾合乎劉Sir「一餐俾盡廿蚊又要食得好」生活態度。

以前通街走搵好野平野食係樂事。而家變成差事。可想而知而家生活在香港幾灰。我好擔心會有一日營多賣到出前一丁咁貴、落OK買盒過期小籠包價錢拍得住去上海食一籠。