細細個九龍城搬過黎土瓜灣住（其實踩正兩邊條界，都可以算仲住緊九龍城），一直幫襯屋企對面街角間報紙檔，兩公婆睇檔，佢地睇住我大，我睇住佢地老，唔覺唔覺就廿幾年。近半個月唔見佢地開門，有日難得撞到個老公，先知原來老婆病左出門唔方便，而家賣報紙賣雜誌又搵唔得多連賣煙都冇油水撈，索性唔做特登返黎執野走人。都好老喇，二十幾年前讀緊小學果陣，佢兩個已經阿叔阿嬸啦。

「退左休，有乜做打發時間？」

「周圍去影相囉！我影相佬黎，玩左好多年相機，你唔知咩？」

「我淨係知你係報紙佬．．．」

好多香港特色商舖，因為商業化，已經買少見少。正如推車賣野食，100%地道香港文化，但又拉又趕禁晒，以前有幾間上到舖靠賣魚蛋賣煎釀三寶搵到食，點知七仔OK開始賣熟食，得番一間兩伙人夾份租每人半間舖至做到，同連涼茶舖都兼賣埋，篤完串魚蛋立即涼茶下火一條龍。雜貨舖同辦館一早俾超市趕絕，最抵死間雜貨舖執左之後個舖位變左做惠康。報紙檔本身最平安，但自從便利店開始賣報紙搶左好多客，本身屋企前後有兩檔而家都冇晒，好在冇地鐵站加舊區冇人派免費報紙，大街兩檔大檔先仲做得住。可以話大戶入主買野反而方便左，但睇住由細對到大咁多檔一間間收檔，獨特地區文化意識越來越薄弱，購物選擇越來越少，同冇乜野可以唔同李家有瓜葛，係好灰的。