做行or做廠的朋友，或者有同Walmart沃爾瑪做生意的經驗。唔知咩黎的朋友，Walmart係美國最大連鎖超級市場，開到海外好多國家都有。想像百佳or惠康放大一千萬倍（可能都唔夠）成國際企業版。

「大陸都有Walmart，唯獨中國最發達最繁榮的香港冇，因為佢地知入到黎，都唔夠百佳、惠康鬥。可想而知李氏力場多麼強橫。」

同得大公司做野梗玩死你，星期一開會，星期日特登返公司整文件，百幾個Excel填足成日。一令紙500張高兩寸左右，全部開會用文件印晒出黎，仲多過成半令。我跟兩個買手，每個是但都揀你三四十樣產品仲要好多款要幾個唔同方法做，每件產品每個唔同型號要最少一張A4紙。造完樣品每套要加一個牌仔做撮要，再掛晒所有報價單上去。頂唔順問個agent點解要咁聊？

「係好無謂，但佢地話要我都冇計。」

報價單仲有長中短三個格式，掛起一份，要再印多完整一份俾佢地開會時用，我已經只做短同中兩個格式，做埋最長個詳細版，一令紙未必夠用。而今次只係最初期會議。加可以預期無論你準備幾多，做到agent同買手個個人手上有晒長中短三份不同格式報價表樣品再加一大一細，去到邊隨時立即知道所有價格規格資料咁照顧周到，十張紙入面有九張佢地會完全唔郁唔掂唔理唔睇。所以，我都廢事做最長果份報價單。浪費時間浪費精神浪費紙張。

以上只是第一次會議，其中一間公司偷工減料情況下消耗之紙張數量。想想如此規模公司，每場會議會有幾多公司工廠仆到去參加。而大機構制度下一年會開幾多場如此會議。你話美國佬幾環保。