每週一相片大行動

2010 Week 43



星期一晏晝,老豆打黎,「我半邊身痺左。」個幾鐘之後第二個電話「我入左急症室,中左風,今晚唔返屋企訓。」


星期二已經冇咩事企到行到,本身朝早出報告,等足成日都冇聲氣,睇個勢又要留多晚,唔係因為有需要,只係報告唔出唯有訓多晚繼續等。白等成日,放左工要返屋企專誠執一袋野上醫院俾佢。


以為有覺好訓,深夜收到老母電話。上星期六同親戚一齊去上海,本身行程行完世博星期一上遊輪遊到星期六返香港,點知架遊輪撞左,撞船個位仲要係本來老母跟個旅行團住果區,成個團百幾人都要取消,立即安排飛機飛返香港。係要揀十二點幾一點落機,係要度縮所以唔搭機鐵搭通宵巴慢慢嘆,係要唔帶屋企鎖匙出門,本來十二點幾諗住沖涼訓覺,而家冇得訓又驚沖緊涼時打黎,終於等到佢坐完個半鐘巴士,兩點幾call落街抬佢隻篋行三層樓梯上番屋企,三四點至有得訓。


噉搞法,星期三當然遲起身,九點半彈起立即衝出門口,其實未必趕唔到十點前返到公司,始終過左八點半至九點半最繁忙時段。點知。



仲差個街口先到車站,見到成條街塞晒車已知出事,行到去發現唔使等車,又唔係撞唔知點解死唔開車,成排巴士砌左條巴士蜈蚣出黎擋晒三條行車線,上面天橋下面條街全部郁唔到,巴士的士落晒客成班人走難噉走。我,當然係等。因為已經撞車撞到慣,返工路上有三個位成日出事,一係車站之前入太子道大彎位,一係太子道聯合道交界即係今次個位,一係去到公主道個十字路口,差唔多個個月最少總有一兩次交通意外,已經多到事實都變狼來了有時遲返到公司都廢事同老細解釋。


好在幾個字終於開番車。但本來可以早多半個鐘返到公司。冇覺好訓諗住食完飯可以抖抖,有個客本身聽日要辦突然提早一日,三點開會一點先講,要我食完飯親身送套辦過觀塘。晏覺都冇得訓,成日瞌下瞌下,偏偏又要多野做到死。


跟住老豆出院。半邊身郁唔到都可以自己入院個風中極有限,成間腦科病房人人訓係度,得佢成日起身走黎走去,俾盡輕度中風難怪話咁快只兩日就俾醫生「批准」佢出院,公立醫院已經唔夠床位,中風中得咁疏乎仲唔拿拿聲踢你走?又要返屋企執定野等佢返。又要幫老母幫老母上網睇保險,睇旅行團取消左有冇得問賠錢。而家只希望黎緊真係可以平日打得成風,等我放番一兩日假回回氣。


本週忌姓劉真係。




每週一相片大行動.綱要




Sir個網

lau-sir.com


Sirblog

http://hk.myblog.yahoo.com/lausirisual