話說中秋節正日公司有外國客人到訪，老細柯打Pizza Hut大排筵席（唔通質鬼佬食月餅咩），事後當然食剩唔少。pizza實清大半，其他小食意粉之類因為開住會食有點狼狽必定冇乜人吼，事後自然成為劉Sir囊中物。見中秋節，全部掃晒番屋企自製晚餐。

剩餘物資包括一盒半香蒜肉絲意粉、半打雞翼同三條芝士腸，全部倒埋一碗，即成此六星伴月勢。冇薄餅冇乜所謂，因為一向覺得Pizza Hut強處在於意粉小食， 我寧願食佢地肉醬意粉同香蒜肉絲意粉（相信是意粉屋之外香港咁多間pizza舖最正意粉），多過佢地任何一款薄餅，真係想食正Pizza，我會揀Pizza Box超薄批。當然，唔使錢，入到口就得邊間都冇所謂啦。難怪今餐食得十分開心。雖然此份量，只僅僅夠劉Sir一餐需求。

「所以我成日鼓勵各位客人選擇午飯時間左右上黎公司，再大安旨意叫老細請客。唔係我點有啖好食？」