因為Messiah，之前miss左好多次，今次再唔捧場真係俾人鬧。撞正沙士，地方細細塞滿百幾人但係超過大半都係唔戴口罩，即係呢度地少人多戴口罩的話唔病死都焗死啦。因為好多人冇去睇或者冇得睇之關係我會頗詳細地整返篇show review，又即係你唔係Metal人的話基本上你係可以立即飛落大半版因為就算睇左你都唔會明：

Five Disciples 五嶽劍派:玩Hardcore，因為遲左到關係淨係睇得佢地一首歌。音樂上就冇乜印象架喇暫時對Hardcore野未有太大感覺，只有話個鼓佬幾勁囉（冇錯當唔知聽／睇咩好既時候我就只會睇／聽鼓）。不過正確黎講果個係鼓仔，成隊野都好細得十幾歲完全令我諗返起ＸＸ茶餐廳 － 唔好問我ＸＸ係咩喇你呢世都估唔到架因為同茶餐廳完全究極無關，而我亦唔想提呢兩個字真係想知就問我啦。對我黎講呢個名係史上最七名之一（我係話ＸＸ茶餐廳唔係五嶽劍派）。

Choke:
「雖然你而家睇到台上得五個人但係記住我地Choke其實係有六個人！」
呢句野個歌佬由頭到尾都係度講，結果除左佢地隊band係有六個人同佢地係玩Nu-Metal之外乜都唔記得。

Zoundz:Nu-Metal，上次Metallic Night睇果陣冇乜feel今次覺得超正，可能聽野個方向開始唔轉同喇。技術好掂ｄ歌又寫得唔錯不過最記得都係個鼓佬打到飛棍哈哈。

Messiah:睇到佢地ｄ衫已經知隊野咩陣型：著band tee果三個（歌佬、鼓佬、結他，亦即係經常上TRHK踩場果三件）都係傻佬黎，另外冇著果兩個就正常到爆，我都唔明呢兩班人點解可以撈得埋。整體黎講玩得好正不過唔夠放喎，正常果兩個唔使講真係好正常真係；歌佬插支咪係個stand度企定定對住唱唔掂啦，我成日都覺得除非係大台如果唔係出show唔應該用咪stand，不過表現唔放一回事真係點都諗唔到佢成個傻佬噉但係原來把聲咁厚唱歌唱得咁正；結他佬劈左酒都唔多放淨係fing下頭（佢出騷之前一定要劈酒架唔劈會企係度唔知做乜）；鼓佬就好過癮唔知點解可以一邊打一邊"un"（仲要好神奇地打係打4 beat但係un係un 8 beat喎搞到好似打到抽筋噉），打完之後猛話「好Ｘ支力」相信佢唔un咁多運動量會低好多。
首先佢地夾左《鏗鏘三部曲》（講左先：佢地唔知幾時會出一隻細碟收錄呢個三部曲，隻碟好似兩個月前開始錄但係得幾首歌仔都要搞咁耐因為俾studioｄ人迫害，跟住仲要掟隻碟去外國搞後期製作所以請大家繼續等。成個過程五個人夾埋要使最少六萬，出左之後仲諗住免費派因為收錢的話驚冇人會買！灰！）。 跟住因為第一隊玩少左首歌之關係佢地就玩多首撐場。呢首就放＆行到爆喇！仲要死唔斷氣玩玩下靜晒以為玩完點知跟住再去行ｄ連續幾次都係噉，可能想陰人以為唱完拍手點知仲有 － 不過事實證明唔得因為係香港唔會發生呢種事，當台下對佢地之評價係「好悶！」之時佢地仲點會郁？佢地玩呢首歌果陣我絕對相信其實佢地只係係度jam野最後鼓佬輝諗唔到點樣打落去先夾硬完，如果唔係一定唔止兩個字咁少！真係是晚最出色樂隊之一（係支Lead Guitar唔知點解勁細聲搞到solo成日俾riff遮晒）。
話時話原來Messiah個Bass就係成日出現「小狗你」事件個forum（好迷你果個呢）個（前）版主，得喇遲ｄ一定要搵佢斟斟．．．

Lava:你可能會聽過呢個名，好地上架喇佢地連Milk都有訪問佢地，有超多妹妹（＆弟弟）fans。基本上隊野技術超高除左歌佬之外（我識之人個個睇過佢地一次之後都係噉講），不過歌佬唱得點唔掂都好佢搞氣氛唔錯（阿明你又唔黎你會好有睇麥記感覺），不過點好feel都好呢一套係香港都幾難有好大回響，今日見到有一個弟弟fan肯跳已經覺得好好野（雖然佢後邊成班人指住佢話「傻仔！」亦因為呢個原因香港ｄband show台下永遠都超靜／呆滯）。
睇佢地表演可以睇到Bass之悲哀：個鼓佬不嬲都超勁（我見過其中一個好有實力之香港鼓佬），個結他佬快到爆（阿Rax請努力），其實個Bass都好勁不過上到台全世界都只會留意另外兩個唔睇佢 － 冇計Bass就係噉架喇因為好多時你彈左好多野ｄ人都唔會知。彈bass永遠都會係全隊入邊最悶／最灰一個，假如你係為威為型而夾Band的話千祈唔好揀呢個位除非 １．你手bass真係好Ｘ勁 ２．隊band係玩以bass作主導之音樂 ３．你好好好靚仔而其他隊員好好好樣衰。不過唔知點解我就好鍾意彈bass果種感覺，可能我真係好低調哈哈。

係好正不過得五隊始終唔夠喉，尤其是到第三隊先熱完身，不過黎緊五月尾仲有一場。不過呢場唔關Metal事係玩其他野。傳聞之後仲有場「有成八隊玩包行到仆街」之勁騷，現階段只有期待同期待．．．

今日一大遺憾係見唔到阿叔，一個老餅metalhead。可能因為呢度冇啤俾佢劈所以佢都廢鬼事黎。佢知道有騷第一句就係問：
「有冇啤酒架果度？」