香港藝術節從來同我冇乜關係，膚淺metal友劉Sir除左嘈即係最唔藝術果ｄ藝術之外乜野藝術都唔識欣賞，特別視覺藝術及舞台藝術。所以咁多年黎都冇理過每一年藝術節會咩節目。到藝術節2010請左薩頂頂，先知道原來白痴如我都有野識睇的。其實所謂藝術節玩幾耐？因為過左半年，仲有好多節目掛住香港藝術節名義，Ｎ個月後又過節了。

楊嘉輝我係唔多識的，只間中睇報紙雜誌電視會提到，近來有線《青年音樂家》專題都有佢份，大概知道屬於所謂新派古典音樂家，電子野同遊戲機音樂加古典，不過老老實實音樂就一個音都未聽過。有日行文化中心睇到張flier，覺得幾過癮，就買左飛了。老實講，因為marketing。張flier有兩樣野令我覺得值得去睇：當大大隻字寫住"dark, epic and fun"，而heavy metal中只要出現dark同epic其中一樣我就會上當，就係用這份metal sense去理解這一場古典音樂會（．．．）；至於個fun，我相信係講緊現場用8-bit電子聲撞交響樂團，打紅白機大的一代8-bit是個美好集體回憶，到大左聽metal聽pop聽電子撈親復古MIDI我實受。因此，完全唔識聽古典野，但以完全唔古典的思維思考，令我作出「今場show應該好睇」的結論同「買飛啦買飛啦買飛啦」的決定。（．．．）

買飛果陣，以為表演場地又係文化中心或者演藝等大路場，因為所有海報同flier字細到爆本身已經，而表演場地地址要比其他字更細，到演出幾日前查番，先知道原來間兆基創意書院好近我屋企，行三個字就到車都唔使搭，仲俾個機會我又去九龍城行番轉懷古一番。呢頭由細蒲到大，都唔知道有間野咁新咁靚，而且已經冇乜創意加冇人支持創意的香港地會有咁大間打正旗號搞創意的學校。個場幾特別係學校活動室，用類似室內運動場種座位疊起拍埋牆要時拉出黎果種，今場用左大約三百個位，當然坐滿啦。

演出名堂《第三種像素》，唔熟佢discography唔知第一同第二種像素係乜，加上第一次接觸楊嘉輝音樂，感想係驚喜震撼皆不足，聽的不是音樂，是「香港」。陣容係兩弦樂兩管樂一琴一敲擊六個，主角自己玩電子坐鎮panel，我坐最後一行，正正係佢前面。大體是全樂團加電子之交響作，之間加插成員solo之小品式曲調做間場，敲擊solo打頭陣，不過玩木魚 － 我睇唔到玩乜，但得兩個音加埋隻音色同個敲法，我只覺得好似玩緊木魚。兩個音敲敲敲左成個字，正式第一首相信就係場刊唯一提到之樂曲《第三像素》，其實好擔心音響，即使樂器用晒電子收音，總憂音色過度變質，又或電子同樂團撞聲EQ做得唔好，好在只係電子推得大聲左少少有點炒，全場整體平衡得到。不過論音樂還是兩隻烏蠅機怪物3D舞黎舞去CG，都未至於好震撼，或者因為紙上堆砌得到新意，實際上同好多indie音樂人所做冇巨大區分而欠驚喜。

好在只係開頭（但冇左頭威已經輸蝕一半），跟住慢慢深沉落去，遺憾在事前冇試聽一黎就黎，場刊亦冇任何曲目介紹（唔善用到場刊長處真可惜），演出後難免丟失左部份記憶，但如果仲記得仲 有印象，代表一定係水準之作精華所在。如之前提過，各人獨立演出（除左玩木魚的敲擊「solo」）更得人心，對我黎講，中提琴發癲果part（第三or第四？）表演先叫正式黎料。玩法係背景播電子噪音，提琴佬用盡一切方法同佢鬥嘈，特登換琴黎玩係咪怕拉壞枝靚琴？mute唔乾淨、拉錯位之類你諗得到的小提琴「拉錯」手法全部齊晒，因為場細，我坐最後一行（只離佢十幾米左右）都感到極度刺耳，唔知前面班觀眾點頂，而台上咁多位特別提琴佬相信更是辛苦。假如你鍾意聽noise野呢個字會聽到好興奮，不過．．．

「在這麼藝術的場合、高檔的演出，一定有好多人話點樣有意境點樣有意思，我亦同意單獨欣賞呢part中提琴噪音有聽頭，但對埋前紋後理，個人意見是有點格格不入，好似為加而加，轉合唔夠順暢，主題性亦不明確。」

一路落去，的確越來越dark越來越epic，有一快一慢好鍾意，慢是畫面是Gameboy雨，無數部元祖Gamboy天空慢動作跌落黎，構圖同物理都設定得好，低調而層次感強襯到足。跟住一首玩快同upbeat少少，剪埋好多當年8-bit同16-bit正game片段再加雪花同扭曲效果，問我邊首歌最能表達得到《第三種像素》電玩音樂加古典主題，答案就是這。全樂團主角似乎是鋼琴，其他人solo時間好短，中提琴玩成個字叫好勁了，但鋼琴仲強，除左間中一兩段間場，仲有得連續幾首長篇獨奏，而且作同彈都好有感情，似乎偏心左佢多ｄ喎。

整部《第三種像素》一個成功是編排得宜，營造到一路加重調暗之氛圍（除左開場較弱我要投訴，可以唔咁開心做得沉重一點的），重頭落在結幕章。到尾聲時，坐最後一行panel前面的我背後突然傳黎手風琴聲，原來係一直玩電腦的主角動身參加樂團一齊演奏，先手風琴後音樂盒，映照住慢動作雙截龍（美好回憶矣），陳年《鏗鏘集》訪問小學時期主角（是否劉家傑配音？是就cult了！）（班細路對話十分搞笑，夠fun之餘同dark & epic相沖得到呀！），演出冇幾耐前發生馬尼拉單野，緊貼時事地用白底黑字字幕紀錄各位成員以高深英語傾該宗慘劇再延伸至討論資訊爆炸之負影響。當之前做到低至高輕至重，結尾整個咁靜咁灰之聲畫演出，加上玩埋場地背後發聲，是著神來之筆也。

「最後拉住手風琴同音樂盒，係全場最簡單但最成功之誇媒體示範。」

後半場十分無敵，但問我滿唔滿意？唔算太。我諗最唔開心係全場只得七十分鐘左右，得正場冇encore都算仲要散水散得超快一玩快鞠個躬立即快快手手拉隊走人慌死蝕多一分鐘俾你噉，噉就收左我兩舊水。喂去開演唱會音樂會，最少都兩個幾鐘至敢完場啦，就算短都收我舊幾水算，今次兩舊水得個半鐘，係我睇過最奢侈音樂會。懷念LiveHouse五六十蚊六七隊band四五個鐘炸餐慒歲月。同埋，回到半年前薩頂頂，講過欠缺地方色彩的香港都有自己的folk，就係演唱會途中，觀眾好鍾意落力為大家表演舞蹈，尤其慢歌位同靜位（本地學術名稱是「廁所位」），台上越靜越抒情，台下果班出出入入行黎行去越大聲。當俾得兩舊水個半鐘呢個價錢，加高級藝術格調，我真係接受唔到會發生同一個情況，一樣睇睇下要出去聽電話或者去廁所即坐言起行旁若無人地走出去。要出入唔緊要，但好多時呢類場地觀眾席都係木製膠製加冇底空心，行路果陣比平地平實心梯級嘈，仲要成班人一齊大大力踩，台上玩大聲一倍都唔夠你地鬥啦。同埋曲目之間空檔先出入，是普通音樂會禮儀，呢度呢，唔好意思，你有你彈我有我行魚貫而入，我遲到嘛大佬唔快ｄ入場等你彈完先入咪蝕晒底？香港地無論是好高檔還是點低檔音樂會，觀眾一樣完全欠缺基本禮貌，而咁正宗之藝術演出先黎騷擾人，只會比平時流行演唱會時做更乞人憎，同顯得自己更加冇文化。當然，表演果陣電話冇響到，已是俾足面大家了。人地已經咁大方，你仲有咩好講？

另一樣呢．．．終於到音樂了。抄番宣傳稿幾句：

「最新創作《第三種像素》，藉八十年代電子遊戲，探索大城市童年黑暗經歷。」

講到咁堅咁邪釘（最後果句真係令我有入場睇恐怖片感覺），但兩點基本上都唔多達到。「八十年代電子遊戲」仍處於紅白機時代，有屬於自己之8-bit音色同質感，一聽孖寶兄弟個theme就明。但用到之電氣音效，對我黎講唔夠8-bit，8-bit是需要lo-fi的，尤其你主題係帶大家回到童年時，冇理由唔用番二十年前種音色，唔係用以前種旋律同調式寫作法就復古得晒架。真係有心再做的話，第一件事，換左台電子模組先，而家太靚太鮮太新，抓唔住果種粗糙落後質感。其次，我探索唔到大城市童年黑暗經歷，除左如前述質感已有偏差有點徒具其形，唯有用自己細個被訪問電視片段引入即最後部份，先令人懷緬得到童年時，其他我只會話僅是以電子遊戲音樂作為藝術靈感，但局限於樂理創作，帶唔出當中社會生活意識，再者成品dark epic fun三樣都有，但同時三張刀都唔夠利。當事前吹到咁大、講到演出咁有主題性，實際內容卻頗虛無，老實講，我係有點失望的。

可能又係關自己事，唔係人地事啦。投身獨立音樂近十年，對得多懷才不遇一班，再睇睇黃家正，對「正宗藝術」之成功成就早抱太多質疑。除左真係捉到鹿唔識脫角，驚喜欠奉，好多野亦一早俾太多電音人同post-rock友玩過玩盡晒。欣賞《第三種像素》時，兩個經常想到之名字是Moby同RACHEL'S，佢地唔少作品同樣古典加lo-fi電子造低調灰暗氛圍，同今場演出非常相似，而Moby同RACHEL'S其實已經屬於好出名好大路果班。我承認楊嘉輝實力高，好多編曲同旋律細節極富感染力，但整體而言唔太新奇，始終學院派出身存在一定常規包袱，點都唔能夠如冇特別背景冇市場掛慮一班去到咁盡，同其他人比較即顯距離。不過，冇所謂丫！唔夠咪唔夠囉，只要做到出黎自然大把人排定隊拍手掌，「古典音樂家敢於嘗試，有前瞻性有勇氣呀！」但同一樣野，好多人做得更早做得更好，例如Moby同RACHEL'S，佢地反而唔係勁而係唔掂，因為「亂咁黎嗟。呢ｄ藝術黎咩？」

「流行人玩音樂，不論點實驗點另類，都是通俗，而非出名困於地下一名，藝術性點高，冇名氣只會先入為主被嫌棄，冇人會理會欣賞，死得更快更慘；相反古典人或學院派玩音樂，即使本質非常通俗，有少少同傳統觀念不同，就是前衛大突破即得好評。《音樂人生》是一例。《第三種像素》是再一例。某程度上，藝術界中之『成功』、『突破』、『創新』之類，而家都變成階級人士特權了。朵，相當重要，比內涵更。」

點都好，修行多年作曲編曲強是事實，加上最後幾章煽動到我，如果《第三種像素》有機會出碟，會支持買番隻。最好出CD+DVD，睇電視都冇乜幾可有咁多時間心機啦更何況睇碟？加上當今技術一隻CD最多可以錄八十分鐘，應該裝得晒全場《第三種像素》。隻DVD可以加番多ｄ幕後野，例如講解演出及創作理念，場刊冇解到多少；演出花絮必定要，音樂好多時接近冇拍噉前進，其實好想知音樂各位團友ｄ譜點寫？特別提琴佬，solo果部份份譜係點的？「風炮聲 x 4 bar | 走音 x 8 bar | repeat x 2」？隻碟出到黎點樣都會買隻架喇放心，作品未如人意一回事，indie的我份人好簡單：

「只要香港製造加有心，唔係我杯茶，有緣我都會盡力支持。」

「香港」都是一個朵，一個足夠呃我落搭的朵。可惜出碟機會相信幾渺茫，睇大家有冇緣啦。