場騷睇個名都知係女仔諗噉搞手的確係全女班，概念唔錯架以雜菜煲寓意包括唔同類型之音樂，只不過好似都係偏rock/metal，同埋唔明點解要「前傳」，乜呢場唔係第二場黎咩．．．全晚七隊band：COXA (alternative rock)、DOPED (nu-metal)、REDNOON ("pop rock"?有興趣)、DARK VAMPIRE (symphonic black metal)、DSC (progressive rock)、BLACKWINE (progressive metal)、NOTHING NONE (nu-metal)，我十點去到果刻係第五隊DSC《頑童》尾段雜技時間大哥丞反緊手果野（想睇大哥丞尊容同「反手」請到呢度），即係miss左頭四隊，冇計啦我都。呢四隊當中COXA同DARK VAMPIRE兩隊上年八月八弦極聽典 The Carnival睇過，前者印象一般對後者更感興趣，但最想睇反而係DOPED同REDNOON，兩隊都未睇過。去到蒲窩，第一件事唔係睇騷，而係應酬中途攔截果Ｎ人之問題：
「劉Sir？？？點解你會黎架？？？」（先前個個都叫我黎，黎到就個個都噉講，吹脹）

睇得三隊，就講下呢三隊：

DSC
剩係睇到《頑童》耍雜技果段，唔知之前幾首玩乜＆玩成點，但係睇過咁多次DSC，始終有一個毛病：總有點失準，同埋欠點台風。大哥丞呀大哥丞，我都唔知講過幾多次喇呢番說話．．．同埋，我要新歌∼∼∼

BLACKWINE
上次睇，同COXA & DARK VAMPIRE一樣，係8/8/04城大，果次除左聲做得差左ｄ之外整體唔錯，但今次睇完，覺得有點兒「求祈」。一共玩左四首，兩首係黎緊新碟歌，一首係《追夢》最出名一首《心醉》仲搵埋keyboard手彈琴，最後一首呢，就一首抵人地兩三四首，因為係《追夢》medley。全首駁得好正而且冇乜失誤，最大驚喜反而係呢首。等緊傳說中之二十分鐘長曲。

NOTHING NONE
話時話，即係支持左咁耐，隊band自己都冇乜提過個名其實點解。其實個名諗得幾好，「沒有事是沒有」，但中文名就真係差左ｄ，據Henry哥所講，最貼切中文名係「冇Ｘ野」。今次專登上黎，有一半都係因為受唔住班友（其實只係Davy乙個）死催難催加被擺埋上檯，所以呢part會講多ｄ。我睇過咁多場騷，都未見過有人可以一次過抬咁多野出騷差唔多成套架生拎晒過黎囉，即係蒲窩ｄ野唔夠靚就係人地知，但係真係第一次見有人做到咁明示地暗示囉．．．而家仲玩埋sampler忝，本身都有ｄ期望架點知原來得第一首歌亦係新歌開頭播一段仔sample．．．講番ｄ歌，第一首新歌，正；第二首「好似」都係新歌但我係聽過，又係正；第三首係GUNS N' ROSES "Paradise City" nu-metal編曲版，超鍾意；總括黎講，頭三首不論玩定歌都十分好，可能出埋自己ｄ靚架生真係有用ｄ。跟住兩首舊歌，聽左ｄ新歌之後，好明顯聽得出新舊之別，新歌感覺較老誠同有少少偏metalcore，舊歌最正都係中段玩左野flamenco果首唔記得咩名。最後一首．．．
「劉Sir呢首送俾你架！」
阿Davy哥話。咩歌？原來係tribute to Dimebag Darrel，PANTERA "Cemetary Gate"。唔怪得送比我啦，原來係以十分文藝之方式詛咒我
「去死啦仆街！」
唔係玩得差，但係玩得好輕，最後一段cut左，聽落平左ｄ，同埋作為最後一首，呢首有點兒反高潮．．．但可以話，今次係睇NOTHING NONE以黎最好之一場，除左玩之外豪仔過場吹水都好正，搞氣氛方面做得十分好。當中的進步有目共睹，努力啦，但希望投入NOTHING NONE之餘，唔好忽略MESSIAH。

今場騷最大發現，係越黎越多妹妹仔黎band show，好多妹妹仔由頭企到尾，NOTHING NONE玩完之後仲有大量妹妹仔一擁而上兼合照忝。香港band之成功指標，彷彿就係依從台下妹妹仔之數量黎衡量。

上一場「雜菜煲」冇睇到（仍然唔明，點解呢場會叫「前傳」，《無間道》上畫之後潮流興？），但呢一場搞得唔錯，同一日有五場騷（！），我十點先到張飛係九十一號，睇黎今次唔係話蝕左好多人比其他騷，如果少噉一兩場一定過到百。呢場騷仲有一個特別意義，就係賑災，所有門票收入用作慈善用途，另場內發售由香港indie界製作之《愛要更多一點》single，由不同單位成員合作，創作出一首獨立音樂界賑災主題曲，有中、英、普三語版本，一定好過官方果首"We Are The World"中文版。有關資料可以到http://www.givemore.j-sonic.net睇睇（仲上到的話），封面由麥家碧設計，歌詞顧問係潘源良（就係有線個講波佬甲）。要睇片都有，click下呢度就有得睇粵語版《這晚我看見》（仲睇到的話），重點係，出極都出唔到鏡之NOTHING NONE結他手羅斌。段片係取自之前大球場果場賑災演唱會，唔知佢地有出過？當然啦，ｄ細粒野梗係塞晒去晏晝攝時間啦，大明星夜晚先出架嘛．．．