十月中新視野藝術節開幕起，成個月連續幾個禮拜都會過文化中心一趟。不過呢晚唔關藝術節事，朱哲琴一個禮拜之後，到中樂團年度節目鼓王群英會。搞左好多年亦因為本身係鼓佬一直有留意，以前未入過場，但單睇片點樣crossover其他國家鼓樂，睇片見到龍向榮龍一脈點樣互搏（老實講，當年兩父子猛谷自己，谷到睇到滯的地步），興趣一直不小。今年，終於入場了。原因好明顯啦。請睇睇上面海報。仲未明？將重點放大：

　

一如傳統，邊度有劉Sir，邊度就有事。上個星期朱哲琴，音樂會當日朝早文化中心外面死左人。今次都唔係好得好多，撞著二十年一遇超強颱風，全懶李氏力場法水無邊，連地獄黑仔王劉Sir都剋得住，周圍大陸台灣菲律賓點大鑊死幾多人，香港一滴雨都冇安全過安全，仲要開show前落波添，大家先至有show睇。本身今日22/10已經唔知咩事，同一晚差唔多度度個個都搞show，PERI M原來中秋果排出碟但延期今日，Hidden Agenda又有場免費ambient音樂會，就算唔睇騷都有飯局，點樣今晚都唔會唔出街，但無論幾多都係尖沙咀，因為最早買左飛就係呢場。而家噉一場風吹散晒個個紛紛延期仲好，跟住可以睇番其他。

可能早買飛有著數，第一次試坐下層正中位，雖然係最後一行，隔籬就係攝影師。台上幾大陣仗，因為opening是喇沙小朋友。或者你對鼓王群英會認識唔太深：其實唔只係一場show，而係全港四圍叫人一齊打鼓的康樂活動，幾年前就話同時最多人一齊打鼓破左世界紀錄上埋報，當然唔少得比賽，贏左咪可以擔當音樂會表演嘉賓，所以見到喇沙小學敲擊樂團做開場，絕對唔需要意外。著到日本賣魚佬噉款玩太鼓式合奏，我只見到名校式軍訓成果。跟住到中樂團敲擊部表演，選曲四重奏《鑼鼓經》及三重奏《戲》正好表達兩種相反表演態度。《鑼鼓經》是期望中之合奏，四個人每人玩幾樣野走黎走去熱熱鬧鬧，《戲》相反是門前衛藝術，作者解話現代人人希望可以掌握最多樂器，佢調轉頭用一種樂器產生最多聲音，我一向鼓勵呢種玩音樂態度同實驗，只不過實在太前衛，三個人拎幾隻鑼鈸不斷整唔同聲，加上有點九唔搭八的半話劇．．．唔好意思我唔多頂得順，的確似抽象藝術話劇多過樂曲，或者因此一向對話劇舞台劇有成見的我唔識欣賞。反而有其他聯想，有關metal的聯想。（．．．）

主角王貝貝表演之前參賽中敲solo得獎作品《大曲》。向來喜歡中樂多於洋樂，是古典音樂追求最高美感，編排往往好工整好有規律，但中樂玩山水感比較自然，唔一定跟足規範流程更大自由更加隨意，敲擊部份最為明顯，拍子節奏旋律思潮起伏發展往往估佢唔到，即使是無調性演奏如大鼓都可以流露豐富感情。中敲solo聽的是力水、是圓滑、是氣氛同力度之控制，及出奇不意。奏過《大曲》明白，難怪拎冠軍了。中場休息前仲有SIU2伍卓賢創作《火龍》，敲擊部仝人加埋嗩吶，十分長州的一首，郭雅志一直是香港中樂團最具吸引力成員之一，但另一支嗩吶不論台風還是演奏，都好似練唔夠唔多熟噉就住就住。同唔知係咪位置問題，嗩吶聲浪非常低，差唔多被敲擊部蓋過晒，有點失望，同第時黎文化中心都係唔好坐有天花樓下位。

下半場到重點中樂團合奏，當然又係王貝貝先表演一首，但唔太滿意，因為選曲正好表達中敲我唔鍾意之一面。樂器是西洋鼓同鐵片琴，兩者間來回演奏，我明白中樂團本身係借用古典樂團編制而成，但能夠突顯自己東方音樂辨識性，除彈撥部就係敲擊部，但敲擊部同時係我最愛最恨，正因大幅引入西式樂器，定音鼓我接受得到，可視作低音版排鼓，擺套爵士鼓我已經有點微言，點解仲要用木片琴／鐵片琴？論音色與型式，過度修飾之片琴都不全符中樂意念，亦不合地方色彩。所以勁一回事，為何一定要打西洋鼓、一定要打鐵片琴？我想睇多ｄ雲鑼編鐘排鼓solo喎！最後玩鼓樂節主題曲，所有表演嘉賓出晒場，加每場觀眾每人一個搖鼓，唔算非常震撼。反而我覺得半年前香港中樂團X顧嘉煇《俠骨柔情》，煇Sir特登為場音樂會寫之之敲擊部表演曲《狂擊》，編曲發揮聲勢皆精彩得多。

可想而知，對今屆鼓王群英會，個人評分唔太高，中樂團自己表演部份，「正常」作品典型欠驚喜，「實驗」作品嚴重超出我層次，表演嘉賓又太過正經，呢類獨奏／主題性演奏，現場表演技術浮誇一點是必須，今次嫌未夠，同現場睇最好睇一定係幾個樂手輪流鬥solo，又冇。配器又太西式，或者應該搵次係非中樂嘉賓表演先捧場最安全。但唔係完全冇癮冇得著。《俠骨柔情》時講過，中樂原來都好metal，今場亦可從中敲看現在重金屬，或從metal角度睇點解我鍾意中樂／中敲。歷史是九十年代中，metal發展從八十年代之層次性旋律性，轉向受hardcore及hip-hop影響之重節奏壓迫感，表表者是瑞典MESHUGGAH，1995年《Destroy Erase Improve》industrial metal式演奏結合九十年代初盛行之(post)-thrash，加上極端數學化將典型4/4拍子算術式分割，音色節奏氣氛達不和諧極致，之後'90尾'00初進一步融合hardcore繼而打進主流之metalcore，至今2000年代當打以重金屬型態演譯後搖滾之post-metal，整門modern math/technical metal冇野唔係MESHUGGAH引發。現今一代稱呼此種post-metal為「djent」，當連個djent字我都唔識讀時，更加唔使問我有乜值得留意之post-metal/djent band，想講是MESHUGGAH對重金屬整個型式帶黎之衝擊。一個講過好多次的故事：MESHUGGAH作為metal band，幾個成員本身而家其實好少聽metal而極迷jazz，有人試過將佢地一首歌改成jazz三重奏，結他部份改用鋼琴彈，播出黎根本係一首jazz歌。MESHUGGAH能夠獨一無二，正正因為MESHUGGAH係用metal band編制玩jazz，換言之用一種完全非metal手法玩metal，雖然metal本身進化就係藉不斷crossover其他類型，但佢地直頭係連演奏意念都引用埋另一種音樂，遠超「用另一種scale」、「加其他樂器」咁表面化，呢種破舊立新過左十幾年今時今日形成post-metal，仲一路發展擴張並已成一股重要勢力，所以MESHUGGAH一定係近代最重要樂隊，《Destroy Erase Improve》一定係最貝歷史意義metal碟之一。

「噉乜中樂乜野事？」

兜左好多個圈。想講是MESHUGGAH至整個post-metal movement，都是追求無定，從最基本一個簡單節奏數學題式拆開，或直頭特登將一段流程寫到有幾複雜得幾複雜，留心跟到足一面聽面計數都明唔晒果種，反拍、基數拍、切分音、突然轉拍之類，從前是progressive metal等標奇立異技巧，來到post-metal世代已成冇乜特別之基本技術。而此類手法中敲向來廣泛採用，尤其單數及不平均無規律數，唔一定好西式地四拍四去、四個bar轉一轉整整齊齊，似冇拍而有其潛規律，大量利用留白製造對比與氣氛，同行雲流水地一直變化。當中《戲》係最我頂唔順一曲，但其前衛性質，其中幾段令我諗番起前面「MESHUGGAH玩jazz」個例子。三重奏中兩個玩小鈸，各自敲不同音效成自己節奏，而兩者合起黎又可成一個主調，好比將一段riff拆成兩部俾兩枝結他彈，負責主節奏部之大鈸角色同鼓角色一樣，當兩個小鈸於大鈸之節奏上各有各「riff」而撞出黎全部聲部夾得埋，的確好似而家好多post-metal「不和諧中立和諧」非常相似。其他人我唔知，對我呢個metal友黎講，中樂尤其中敲存在十分大吸引力，在於此。你亦可以話，幾千年前已經可以咁「post」，原來中國人好progressive。（．．．）

「有興趣的朋友，不妨重溫2008年底亞視劉Sir做guest講中樂同metal的《文化潮流》第九集。」（但事實上，只關metal事，同中樂冇乜關係，呵）

題外話：閻奕格過台灣橫掃《星光大道》後，香港中樂團潮了一點，因為佢阿爸就係中樂團大佬閻惠昌。不過睇過咁多場中樂團演出都未撞過佢做指揮。鼓王群英會之後，黎緊暫時冇乜節目有興趣，今年可能未必再因中樂團入場，但如果乘勢搞番場香港中樂團 X 閻奕格兩父女crossover，我仆街都仆到黎呀。