2009年七月一日起，劉Sir正式放下七年TRHK職責，半退休隱居幕後，集中寫作及辦秀。近四年一個人睇晒六日舖，好耐未試過乜都唔使理放假，難得退休生涯一開始，隔幾日首個星期六已經有Livehouse重開，四年黎日日朝九晚十令我錯過好多gig，而家唔再只得星期三晚演唱會或自己有份主辦演出先有機會睇，加上今場show班底吸引當然唔可以錯過，睇show當慶祝退休都好。
Livehouse同劉Sir齊慶賀。即使歷史悠久，可能好多人仍然唔多知咩來頭。而家搞細indie band show，如非校園大半會選擇香港島，例如以前蒲窩同而家蒲吧，九龍場半隻手數晒，間中工業區有人開新場，往往因一段時間就關門大吉，而觀塘Livehouse算最老字號同唯一堅持到今日之九龍區gig場。對好多人黎講有一定地位，高峰期每半個月甚至個個禮拜六都有band show，風格包羅萬有乜都唔拘，加上部份時間／曾經係九龍接近唯一地下band show地點，多年來帶左唔少人進入band sound，自己成世人第一次band show經驗，就係六年前貢獻俾佢，而難數清之演出更協助大量本地樂隊得被更多觀眾認識，排除圈子問題（香港band壇絕症），冇幾多本地年青人組成之rock & metal樂隊未上過Livehouse個台。由始至終Livehouse近全部演出，都由二寶樂隊(R.I.P.)主音阿樂籌劃，是香港最勞心勞力band show搞手之一，基本上大家眼中Livehouse已等同於阿樂，就如大家覺得劉Sir等同於TRHK一樣。可惜經濟不景加生活迫人，Livehouse年幾前已停辦演出，直到09年暑假劉Sir都退下TRHK戰線，二寶樂反而出番黎搞show令Livehouse「再開張」，都可算贈慶了。我又點可以唔捧場丫。
入場第一件事：拎番張貼紙先。睇得唔清楚唔緊要，俾多個close-up：
繼崖上的霸王，而家仲有台上的霸王。玩就玩到盡，非常認真的道具組連實物都整埋：
「長沙灣市長都話好！一起來用！」
未開場已經笑到趴街。邊個咁玩野？咪就係第一隊表演嘉賓：
神奇膠 http://www.myspace.com/wondergarl
第一次聽到佢地個名，係觀塘仍然有幾個gig場的時代（無三不成幾的話，可能話幾間已算過多），亦即兩年前左右，睇過無不話班友名乎其實．．．地膠。今次終於有機會睇到。傳說中之「視覺系」膠衫冇出現，取而代之是玩播片：
既是Livehouse停辦演出多再度開張第一擊，樂隊就將場gig塑造成向多年黎主要幕後功臣、「冇佢冇Livehouse」的二寶樂致敬之「concept gig」，唔單係整張貼紙整枝洗頭水咁簡單，仲將近來經典（柒）廣告同節目再創作成tribute二寶樂版，每首歌中間有片睇，恕我見識少，細場細gig玩到噉，神奇膠可謂本地破天荒。
可以話隊band其實雙歌手，比其他人有優勢，至於玩乜問過好多人都講唔出，睇完知點解，講唔出因為乜都有，最簡單可以話pop punk，不過又撈埋rap野甚至少少folk，歌詞自然襯番開心抵死路線，將波兒變成Livehouse版《台上的霸王》已笑爆咀啦，好多野估佢地唔到。想更膠自然需要新元素，除結合影像，仲有個成員負責打機。多年前睇過GOSSIP表演，甚至更耐之前人中（好band，但晨早唔見左，灰），每隊各有個人專玩sampler覺得好過癮，香港地冇幾多metal band會試，各種類型單nu-metal對此方面有需求可能是原因之一，亦有樂隊嘗試其他方法，好似NOTHING NONE用effect模擬簡單sampler功能。初初唔知道條友做乜係度篤篤篤，睇真先知原來用NDS做sample，真要讚嘆科技進步同平民化、普及化，要玩sampling已經一部遊戲機仔做得到，唔使再特登買sampler，不過聽落唔係用得好多，同除左頗為罐頭的捽碟聲外冇乜聽到其他效果，應該更加玩野。
第一次睇印象非常非常正面，音樂簡單夠爽，夾得齊又識搞氣氛，仲有大量意外驚喜，難得唔係因「香港band」三個字而被盲目吹捧hype出黎而有實力有性格，必需要再加佩服同尊敬，係我第一次見一隊本地indie band，會為一場「細show」投入咁多、玩得咁認真，堅到幾乎以為場show係佢地搞、佢地係主角。有幾多單為名為利為女之香港band友肯擺咁多心機？音樂及台風好有祖國樂隊感覺，冇任何貶意甚至是褒獎，大陸band水準早已超越香港不知多少，而各方面似內地樂隊多於本地樂隊，即已擁國際視野同自我風格，加上有心夾好band搞好演出，只要個人覺得仍太地道及欠深入之歌詞方面再下苦功，闖出去唔難。從音樂歌詞去到表演都為場show度身訂造，相信每次演出都會有每場自己新意，未必次次都有Livehouse重開咁「盛事級」搞咁多野，但單睇歌同表演，仍是隊非常好的live band，值得將來有機會一睇再睇。
VINEGAR http://www.myspace.com/vinegarfans
個名聽得耐，認識限於好多人話「玩老歌cover犀利」、結他Bluesman阿齊好勁、同玩串講香港地下樂隊特別NEVER N的《鏗鏘集：聽不到的樂與怒》之《堅將集》。同神奇膠一樣，之前聽人形容多，可惜未能如神奇膠一樣睇完覺得實至名歸，而偏差於人言及自己期望。
服飾台風一流，同玩六七十年代路線夾到足，不過拙人見識少，未能分清邊幾首cover邊ｄ自己歌，但唔知原先首歌係噉還是手法，總體相當摩登，初時諗住會blues到漏，但極其量只達早期SOUNDGARDEN之類半復古。不過技術好特別鼓佬，Livehouse設備簡陋其中一個好處就係，一聽就知鼓佬夠唔夠力水。
一星期前Michael Jackson過身，自然要tribute佢玩首《Beat It》，MJ音樂一向唔係我杯茶只鍾意睇佢跳舞，《Beat It》算較熟悉一首，全因MJ作品中最rock同搵左Eddie Van Halen彈solo，唔係有佢相信我都唔會識／理首歌，所以MJ在我是個睇多於聽的流行歌手，但睇的話相比起黎香港的MJ Man Janice我有更大興趣（．．．）。非不敬，我都知道Michael Jackson幾十年黎對音樂、舞蹈、舞台表演、影像至到唱片工業營運、社會政治、種族等帶黎無法估計之影響，但香港夾band人士中，而家好似冇幾多個仲記得MJ死後五日，就係黃家駒死忌，理應對香港band友更切身，不過好似咁多年黎冇幾多本地獨立樂隊會特別紀念、致敬，即使六月尾七月頭時。
好物沉甕底，最後一首classic rock medley先真正上身，我膚淺，呢part我先至「識聽」，加上按之前咁多人描述，噉先係我心目中之VINEGAR呀。一首經典接一首相當興奮，結他佬實在太勁彈極有貨，追老歌就係為即興呀，但對band show搞手黎講未必係好消息，好似今場VINEGAR玩完落台，原來差唔多九個字，應該已經好彩，單《Smoke on the Water》個intro要jam番三四個字冇乜問題。不過美中不足。
鼓佬正夠力水，bass台風夠誇造型又掂，結他佬直頭出神，不過唔太鍾意歌佬，把聲拍埋差少少力，算夠玩隊band種音樂，但可以更好。又可能係自己問題，聽人講得太多hype得太勁，到現場有點失望在所難免，好難再有本地樂隊可以似神奇膠咁勁比hype更強。
SURVIVOR http://www.alivenotdead.com/survivorhk
新band（卦）一隊，show前幾日撞到結他佬，介紹自己隊band玩metalcore。有新band睇睇都好，不過一望，有幾新先？
「傑佬，咪又係你？」
我第一隊band知道有佢份係最Z字頭果隊（唔記得全名），但好快就變左RUSTY CROSS兩隊各睇過一次，音樂還是佢唱功印象皆麻麻，靜左一排再搞CRAZIMALS出左隻碟，一聽嚇親進步左好多，特別唱簡直變左另一個人，是2008年驚喜本地band。想睇又冇機會，除左時間就唔到隊band亦少出show，今場幾星期前YO Park有得睇，點知突然要返大陸再錯過，跟住冇行了原來YO Park就係佢地last live，灰。點知今日一黎到Livehouse就見到傑佬，原來SURVIVOR又係佢唱，加上出埋手搞show在本地有一定號召力，都算我見過香港地最多project metal友。
聽樂隊介紹，SURVIVOR已經出過幾次live，而家metalcore開始退潮，「上左岸」樂隊就如當年nu-metal一樣迫住轉型，大多不離走向metalcore之根歐陸化，同近番美式alternative或emo/screamo，當CRAZIMALS玩(neo-)thrash底兩種聲，一廂情願SURVIVOR會延續時，路線反屬後者相當兩樣，傑佬試過咁多隊不斷跟隨時局趨勢，新band新風格唔算好意外，難全面滿足挑剔fans如我罷了。
俾我感覺歌路落重左screamo，因從CRAZIMALS角度出發，先入為主已難滿足自己，如單論SURVIVOR同樣有所不足。技術瑕疵可以勤練改進，主要問題在寫歌，套路上過於典型，即使第一次聽已估到跟住會點，寫歌寫得好能夠補救好多野同留住人心，只得技術同節奏其實好快聽厭。多數新一代樂隊由metalcore開始，縱使按時勢轉型潛意識仍存在類型規範，就算音樂底已經唔太metalcore，依然有冇關係都攝段breakdown，但未必次次配合得到。不過失分最多可能係唱。欣賞CRAZIMALS在於主音對自己聲線控制得宜，懂得用適當力度同唱腔演繹各章節，雖是老生常談卻冇太多歌手留意，好多本地band一出黎已嗌到恆冇晒起伏，要再激唯有（夾硬）扯有時拆得難聽，鍾意CRAZIMALS正因傑佬有思考到呢一點，但SURVIVOR又回到典型本地樂隊甚至傑佬以前，一到現場好易失控而破壞平衡。同breakdown一樣，勁嗌並非必要，有時單用清聲對比更強烈，好耐之前另一場同傑佬有關之band show已有討論過，只有話守舊派的我未能理解後生一輩「一定要點樣做先至係乜／似乜」想法。
睇完SURVIVOR，更遺憾睇唔到半個月前CRAZIMALS最後一場，唔一定SURVIVOR唔得，只係CRAZIMALS歌路我較鍾意同創作較好。我仍然覺得寫歌未夠，同歌手唔需要嗌咁多、去到咁激。
「話時話，點解冇玩《Eye of the Tiger》？」
D-HEAD http://www.facebook.com/group.php?gid=58775494104
有人話band名其實係粗口黎，唔知真定假，今場live後只知原來唔係DIAMOND HEAD cover band。
今晚唯一一隊事前真正全無認識，除自己未聽過更加冇人講過，西歐歌路全晚最特別，一張白紙前提加無比較情況下我相當受落。樂隊提到已有最少五六年歷史，經驗自然老到相當紮實，但歷史悠久亦非一定好事，首當其衝年間必定有人事出入，自己歌數量實夠唯風格難免欠統一。前半玩effect玩飄，近後半post-rock成份較重，尾二即隊band自己都話最鍾意一首確實玩同寫得最好，全因最post-rock氣氛最好，又唔同之前幾首，唔知邊首歌較新較舊，都幾難消化。繼續落去的話，跟住後半尤其尾二首歌個方向走最好。
「D-HEAD好多人睇。」
SILENT CHAMBER http://www.myspace.com/hksilentchamber
除左Livehouse重開俾面二寶樂同慶祝自己退休，今晚蒲頭最大原因就係為左SILENT CHAMBER。通常band show最後一隊出場人數往往是全晚一二，今場調轉反而壓軸環節走剩半場左右，唔知係前四隊夾埋超左時夜過頭，定還是power metal風格唔夾，五隊band風格都唔同，但對比之前咁多隊，power metal的確是．．．「娘」。這是power metal在摩登時代、在香港的悲情宿命。
有一排出現唔少女聲metal band，SILENT CHAMBER特別在其他band唔係想做NIGHTWISH就想做EPICA，佢地揀RHAPSODY種symphonic power metal，冇（仿）古典女高音冇男聲冇死腔。其他人評價普遍上等，INTO ETERNITY時先第一次遇上，只睇到試音幾首已經知有料，識作歌旋律寫得靚結他技術高，結他手彈埋keyboard做到出黎夠氣勢，除左樂器較聲爆過頭同歌手經常俾人遮晒，後生band中SILENT CHAMBER水準數一數二。終於有機會正式睇，一上台發現有問題，結他得番一枝之餘鼓佬唔同左，已經做定心理準備。
樂隊兩個重心在結他手同女歌手。keyboard主要負責開場、間場、埋尾，唔搵固定keyboard手問題不大，況且一個人同時間彈晒keyboard結他兩樣野係幾型的，但有時需要兼顧太多，同夾metal始終要兩枝結他先夠聲，尤其到solo位得一枝結他背後只有bass頂住又冇keyboard立即空洞晒，部份編曲明顯需要兩枝結他先夠效果，當前之急係搵個新結他手補上。不過不減對佢地好感，香港地勁結他手唔係冇，但亦唔係個個識寫solo，更多整聲同音色強差人意，而SILENT CHAMBER器材彈奏等多方面掌握都俾人感覺到「有sense」，Livehouse睇過咁多metal band，較聲最靚、彈得最清結他手中一定有佢份。（講緊Livehouse咋）
音樂絕對冇問題，但弱項在於主音。INTO ETERNITY時現場音響太爆，推爆主音都俾其他人遮晒九成時間聽唔到，可以話場地問題；Livehouse本身音響已經唔係人人鬥大聲果種，而家少左枝結他，甚至不斷推大聲下仍然唔夠出常被比下去，就要思考點樣解決問題。女主音本身聲底屬於難入到咪果種，先天不足下唯有下下苦功加把勁練力練氣了。
人事變動帶黎必然之失準，據聞要就番四人陣容，部份歌編曲改左，所以台上個個望實鼓佬做人，玩得唔夠放唱亦有點硬，今場表現相信樂隊自己都未必滿意。希望快手搞掂，執番好ｄ歌同搵到人幫手，我想認真睇一次五人陣容。
「係咪八月仲有呀？」
作為Livehouse再開gig同自己長休睇第一場show，算心滿意足了，神奇膠抵晒啦仲要咁玩野只此一次，但擺隊咁勁係頭，後面難免被搶風頭，最想睇之SILENT CHAMBER又唔如意。睇舖幾年間，好多本地band都只得聞名，黎緊日子會勤力睇多ｄshow。期待更多本地樂隊帶俾我更多驚喜。