Kolor Independence Live 2010



首先,必定要重溫一年前。話說2009年中,KOLOR上隻碟《Surrealism》經黃家強公司發行,普遍售價$80,內附演唱會入場券換領券乙張,買左碟除可免費睇show仲有一件tee送。原定演出日期係2009年8月26日,點知臨到開show之前幾日,先公佈演出取消。


「柒左。這個故事教訓我地,點解要買碟?(well,你知我曲線緊的)


對我黎講,是非常失望的,佢地正式live只好多年前睇過一次,當時仲係舊班底,一首《了不起》同Sammy粗壯的手臂(仲有台下無限囡囡),未出碟已成為KOLOR fans。跟住《Color》再《Surrealism》,音樂一直進步從Canto Pop進化至Canto Rock,自己由fans升呢成大fan,只係九展場show取消左之後一直未有機會撞到佢地live,唔覺唔覺就半年,再留意番因為兩個原因。首先係Rock Motel,由一班香港indie band成員同有心人成立,用專業及主流手法推廣indie,包裝一流格調高左幾班,但同時唔會覺得pop仍然保存獨立氣息,我諗Rock Motel已經成為香港史上其中一個最成功主辦及推廣單位。另一樣,係非常特別的「Law of 14」,簡單黎講每個月十四號出一首新歌,是個別出心裁的市場策略。睇個勢的確堅持到一直有新歌出,更難得唔係夾硬為趕而趕迫出黎,出左街六首真係首首都好聽,這就是實力了 - 只是歌詞仍需努力。而且錄音靚到爆,仍然唔太相信係自家獨立製作比而家流行唱片更高質素更有質感,加上當今indie人才濟濟,好多時出左新歌高速拍埋MV,唔係咩高成本大製作,但一定好睇過無記d求祈垃圾MV先。


距取消演出一年,以獨立之名再到九展重開演唱會,不過早左二十日,如果就得到同一個日子搞,就更加型型到爆了。所以剛剛睇晒兩晚re:spect LIVE 04未有空立即寫(第一晚24/8又有KOLOR,都算應景),第二日就係「正日」八月廿六,特登揀今日回顧番KOLOR Independence Live。


兩場分別,除左主辦名義由黃家強公司改為KOLOR自己搞加Rock Motel協辦(老實講,信心大十倍以上都有),仲要俾$280買飛,唔再係八條有碟有tee有show睇了,但老實講,值得的,同人地已經包左九展演講廳搞演出,開支絕對唔細,俾多d錢支持是應該。雖然而家製作宣傳等多方面已經非常完善,香港indie gig其中一個大難處,仍然係有效而方便地預售門票。先入數,再email入數紙,然後交收,已成普遍方案,當然對買家存在一定不便,而家手提電話可以影相叫做方便過以前一定要scanner好多,始終要去銀行/櫃員機過數再影低入數字過番電腦再email實屬繁瑣。俾完錢收飛再一煩,我玩過三次,李卓庭似KOLOR上隻碟買碟免費送飛(就算冇演唱會飛送,單為《不愛名牌》買隻碟都夠值得,boxset包裝仲要勁靚喎),但唔收錢自然冇乜服務,寄完coupon要辦公時間即係你返緊工的時間上佢地公司拎飛,加限住一定要某段日子得幾日有得拎,最後麻煩到搵速遞搞掂;MONO果次入完錢,好在傾得掂數可以到場先拎飛,但事前冇飛在手總有點唔聚財;今場就開心了,email完入數紙話咁快覆問你拎地址直接寄飛俾你,服務態度同效率都一流呀。Rock Motel,我愛你地。


上場九展演講廳演唱會係半年前古幽靈「完美世界」(佢地26/3搞,又係廿六號,真巧合呀),當晚人丁單薄,實在唏噓。所以放工之後,冇諗過咁快過黎會展,躝下街坐低食飯慢慢嘆好過啦。就大鑊了。七點幾到德福車站,等穿梭巴條龍已經轉左好多個彎,超多人 - 更正,是超多女。七點八到演講廳外空地,人數同人龍長度破晒我見過紀錄,而且有飛都唔排得隊,拎張籌先唔該。睇演唱會多人到要派籌放人入場咁誇張你見過未?派籌姐姐話唔知幾多號前買飛係VIP,我已經早買飛喇喎都做唔到?結果距離開場仲有半個幾鐘都要排到四百幾號 - 演講廳坐滿先五百人,即係全部飛賣晒。可想而知場面幾咁墟陷幾咁鼎盛。派籌入場制度有個好處,係唔需要一定排隊同人迫,可以周圍行下先。有大大個台,原來之前六點到七點仲有TONICK同SUPPER MOMENT做public opening,但大多數人六點都未放得工,六點開場七點玩完似乎有點浪費,應該七至八啦。場內仲有大量攤位乜都有,有檔賣風筒之類化裝髮型用品,冇錯女性的確是今場甚至現今香港indie樂壇中堅份子,檔賣風筒甚至賣到做埋KOLOR贊助你都咪話唔吹脹。想知今場排場有幾大、陣容有幾強勁,就梗要睇睇張飛啦:


「首先睇睇正面。」

「然後到搞手&幫手名單:」

「多到爆,連咩護髮都有,難怪咁型啦新碟造型。」


當連賣風筒都有份贊助,三百幾人排隊超長龍入面超極勁多囡囡,又睇番半年前古幽靈份慘淡,劉Sir幾時都話,聽metal,冇前途架啦。所以我決定轉型玩pop rock,立即買左KOLOR隻新EP《Independence》學野。有樣野十分有趣,我地呢種人買碟買到傻屋企一早多碟多到冇位擺十隻碟有五隻買返屋企幾年都未開,去親睇show乜band都好就算自己唔多鍾意都實會買隻碟,一場黎到加上indie總要出錢出力支持。今晚買完隻碟,好似變身稀有物種,排隊果陣拎隻碟出黎睇,隔籬左右係「嘩佢買左隻碟喎」十分驚訝惹來圍觀,因為全場五百幾個位接近坐滿(MOGWAI之後第一次見,場show真成功呀),好辛苦先搵到個較前面位坐低,旁觀係兩個妹妹仔,見到隻碟反應一樣甚至更誇張全程睇到實,其實我已經有點尷尬想收番埋隻碟,不過驚會俾兩位妹妹打,就佢地面前成個digipak由頭到尾咁多面咁多頁睇晒一次。鍾意一隊band去睇show,買碟支持隊band甚至三唔識七都買番隻,是十分平常。但而家反而變左會俾錢買佢地隻碟是神奇。


其中一個原因,可能係「Law of 14」。家陣會覺得買碟係怪甚至傻,因為個個特別靚仔靚妹乜都上網搞掂,而家樂隊出新碟新歌都要用同一方法,冇幾多隊band出碟前唔會全隻碟俾人上網試聽架喇,因為你唔做,出碟一兩個月前已經有人擺上網仲快過官方。「Law of 14」除左提高樂隊創作效率同士氣,同樣是一著聰明市場推廣手段,因為好老實而家歌手好樂隊好,出新碟九成人總只會聽主打幾首,結果十首歌可能得一兩首有人欣賞浪費心血,而家每月一歌,可以話個個月都有新主打,宣傳定位唔同左,而且可以用二三十日谷一首歌,大家就肯慢慢聽真同心理上覺得「主打喎果然唔同d係特別好聽」了。但反效果在全部歌都上晒網聽過晒,網上又有得隨時重溫,隻碟出果陣已經冇新野啦,而音質高低從來無關痛癢於download世代,有幾多朋友肯為擁有個包裝而俾錢買番隻碟?睇到身邊人見到隻EP實物個反應,就明白了。


皆因生性懶惰,雖則新EP六首歌一早出晒街,就算明知黎緊有live買埋飛,都冇特登上網聽過新歌,除左《對錯》會留意,只為聽聽點樣featuring盧巧音,其餘幾首只有坐低等開場panel播果陣雞精速成。聽過新歌,又再更加喜愛KOLOR了。聽得出有心,睇住創作及製作只進無退,同堅持玩番最簡單的BEYOND、太極時代港式pop rock,而香港而家咁多band,技術高大把、融會貫通外國音樂亦多,就係越來越少一聽就感受得到地道香港風味之本地樂隊,單數而家仲有幾多香港band主要唱廣東話,已經有難度啦。開場前簡單講講的話,第一隻碟仲(曲線)叫自己Canto Pop,一隻碟後已經正宗Canto Rock,新碟撈多左英倫大量keyboard,仍然維持到自己風格十分港非常難得,最重要由頭爆到尾好high,這就是Canto Rock了。而佢地做到我最愛本地樂隊之一,係每一隻碟都有最少一首歌,好聽到會成為我年度最愛中文歌之一,頭兩隻碟《Color》同《Surrealism》,分別有《了不起》同《圍城》,碟出左幾年依然不斷回味百聽不厭,新EP冇錯就係《對錯》,編曲夠迷幻旋律夠悲壯仲有盧巧音,只可惜當中亦顯示樂隊兩個弱點:《圍城》乜都好,而且有劉卓輝好難唔掂,可惜頭兩隻碟聽完,我其中一樣印象最深係鼓手未得,而兩隻碟編鼓編得最差果首係...唉。浪費了。不過改進左好多,證明有苦練過。而一個至今都未克服到之弱點係歌詞:不論自己填定搵人幫手,KOLOR歌總係平白敘述式歌詞較得心應手,反而內容較虛無或意境化、重寓意,好多時出事,例如《對錯》,可以一開始到最後差唔多句句都有語病,咩叫「人海中唆擺」?好老實,如果我係樂隊成員,收到填詞人份稿睇完,文法出事措詞堆砌好多句子更太弄玄虛,根本唔合格必定立即退貨甚至搵人重新寫過,而家反而話冇問題仲錄埋音,即使編曲旋律點無敵,一留意歌詞,實在礙耳。


「唯有《了不起》仍然點聽都咁完美。難怪一定要用黎做encore了。」


就算唔同一年前七條包晒全餐比較,單睇票價$280,以現今香港地大老細「場show冇外國band又唔夠明星要我俾多過兩舊水睇你傻左呀」心態,已經叫貴了,請睇番古幽靈差唔多價位的「完美世界」入座率。不過KOLOR與Canto Rock當今江湖地位,同睇到場show要準時八點三開場因為玩足三個幾鐘超晒時,加多嘉賓到喊(同樣,太懶,懶到連張海報都冇乜睇真過,事前我係完全唔知今場有乜guest的),就我記憶所及列番個run down出黎希望冇記錯,睇見嘉賓名單場show又咁長,兩舊八其實係抵到爛的。


  1. Independence (《Independence》)
  2. 尋 因果(《Independence》)
  3. 無人島(《Surrealism》)
  4. 圍 城(《Surrealism》)
  5. "Kolor & Friends" band introduction & solo 1
  6. 愛莫能助(《Surrealism》)
  7. 逃 (《Independence》)
  8. 雄心 (《Surrealism》)
  9. drum & percussion solo
  10. 獨家堅料(《Color》)
  11. 大條道理feat. Benji and Lesley(《Surrealism》)
  12. Too Late(feat. Benji and Lesley最新單曲)
  13. 昏迷 (盧巧音cover)
  14. 對錯(feat.盧巧音)(《Independence》)
  15. 光之翼(盧巧音cover王菲)
  16. Lithium feat.周國賢&盧巧音 (Nirvana cover)
  17. 英雄勇feat.周國賢 (周國賢新派台歌)
  18. 衝鋒隊feat.周國賢(《Color》)
  19. 半 首歌(《Independence》)
  20. 回味(《Surrealism》)
  21. 離家.洞簫mix(《Color》)
  22. "Kolor & Friends" band introduction & solo 2
  23. 傻人 (《Surrealism》)
  24. 時代 騙局(《Surrealism》)
  25. 月球人feat.恭碩良(恭碩良新派台歌)
  26. Come Together feat.恭碩良&Soler (Beatles cover)
  27. 神舟99號feat. Soler(Soler《Canto》)
  28. Blue feat. Soler(Soler《直覺》)
  29. Free from Your Command (《Independence》)
  30. 了 不起(《Color》)
  31. 留 言短訊(《Surrealism》)


出左兩隻半碟,夠晒歌應付一場headline show,從選曲睇出樂隊非常清楚自己實力,新EP全六首必玩啦,大成之《Surrealism》同樣全碟玩晒,第一隻碟《Color》只挑最似樣四首,冇辦法,隻碟的確太canto pop,好在冇為應大陸天災景而玩歌詞太離奇的《瓦礫下的人》,但冇《哄動》失望少少。專業製作就是,拍左大大條片做開片,隊band四個人在大廈甲某角落牆上畫公仔,用黑白加凌亂剪接加陳舊菲林畫質製作,配上陰森詭秘的音效,而KOLOR個新隊徽係圓形內加個斜左的五角星,加埋呢,好black metal。(...)場show叫得做獨立就梗要唱新碟主題曲啦,連續兩首新歌開場,或者得我一個覺得係新因為人人都識,玩到《尋因果》我果行d人 - 主要是女 - 已經衝晒台成行我霸晒。《無人島》好過癮,Sammy把聲本身夠恆夠厚,唱呢首間唔中要加幾野疑似嘔泥十足SONATA ARCTICA,high當然是我啦。話咁快就到最關心的《圍城》,鍾意首歌咁耐,第一次睇現場版,不過《無人島》唱得太high了,黎到慢歌收唔到有點過左火。自己擔正演唱會係唔同d要玩玩野,入solo全隊停晒,跟住羅斌除結他,諗住同一首歌彈solo都要換結他咁寸?點知仲寸,係換小提琴,即係全首歌拉小提琴唔奇,特登為左一段solo而換第一次見,可惜冇大驚喜,因為我坐場中間近左而佢企右邊,每當solo不論結他定小提琴我都冇乜機會聽得清楚,此乃九展場地限制。同小提琴試聲時,聲較到好拆同結他分別唔太大,綽頭性高於音樂性。


然後介紹幾位session俾大家,落重本今場三枝結他再加keyboard鼓之外又有percussion,鐵樹蘭TONICK GRIN各方好友來相助,大棚人鬥solo從來是好睇的,再直落重新編曲由頗基變成有點bossa同BEYOND的《 愛莫能助》,一氣呵成之餘睇到鼓手進步左好多,玩多兩首又有drum solo同敲擊佬鬥,雖頭兩隻碟覺得佢手鼓麻麻,live任佢發揮,差很遠矣現場似樣得多呀。然後到guest時間了。第一pair Benji and Lesley我係唔識的,MySpace話《超級巨聲》出身,但反無記的得《超級巨聲》只關心暗黑小公主唔好意思(...),最堅連維基百科都有份,睇完先知原來秦沛唔係姓秦(...)。《大條道理》變成rockability版,我只覺首歌可以玩到好ska punk,跟住係原創歌《Too Late》,膚淺唔識聽R&B,所以唔識欣賞佢地音樂,但表演是過癮的:


「想問兩兄妹係咪玩咩歌都會排定舞呢?首首歌都有晒企位動作咁多野玩!」


然後,終於等到了。要cover盧巧音首《昏迷》,是搵個理由俾佢出場唱《對錯》嘛,著住件black metal斗蓬(...)加交叉mic stand型到爆,不過相信今場之後,都好難再有機會聽到live版《對錯》。係唔明點解到佢solo時,自己咁多歌唔唱,會揀cover王菲《光之翼》,chrous玩埋大聲公首歌又夾佢整體精彩,冇乜機會見到佢加我之前未遇過,始終希望玩自己歌多。跟住拉埋周國賢玩《Lithium 》,NIRVANA歌從來live玩是high爆的,但更留意跟住《英雄勇》,對佢舊歌冇大感覺,首新歌有點U2唔錯。《 回味》唔算我鍾意果種,冇計我聽KOLOR係想聽rock的非power ballad類慢歌唔使預我,不過好睇,因為玩時大量吹雪,而且唔係台上吹係台下,左右兩部機噴雪噴到黐線台前十幾行十分開心,嘩大show好細show好我未見過會玩觀眾席玩到咁放。


「難怪咁多妹妹仔&hardcore fans要猛咁衝台同坐VIP區啦!」


我諗《離家》會係香港band scene史上最神奇其中一幕。話說KOLOR電台節目邀請大家上台jam歌。結果有位洞簫朋友蒲頭。就由佢負責《離家》本身keyboard旋律部份。問題是,洞簫屬原音樂器,只用普通咪收音,而其他弦樂器全部直插amp出聲,佢後面又已經大大座bass amp,只有全隊人唔彈果陣先聽得到,亦即真正有用只得結他solo前一少段bridge。概念是好,但不太成功。同埋跟住又黎band solo,或者真係好多band幫手太多session喇,連介紹樂手同jam solo都要分兩次玩,應該叫佢留低同其他人齊齊jam啦。


再黎《Surrealism》最好同最恆的《 傻人》《 時代 騙局》,到恭碩良出場,先玩自己新歌《月球人》,有點post-rock的格局唔知原版係咪噉?但更搶眼/耳是佢帶emo的造型同歌聲...雖唔算特別鍾意恭碩良舊歌,《月球人》是不錯的。而有佢就好自然有埋SOLER啦,jam左首《Come Together》,基本上只係睇恭碩良打鼓,同一套架生,就係佢打出黎音色觸感唔同其他人有生命好多。是勁,但我更期待跟住SOLER,兩條友聲好聽唱歌得結他又強又型仔玩live非常落力,衰在選曲。自從同label打官司,已經再冇多少聲氣,碟仲有出,但近兩年大家來來去去只記得《風的季節》同《咀香園》(...),而唔知點解咁多歌揀,而家出live自己歌基本上只會唱《神舟99號》,佢地新歌之中我覺得屬於普通平淡一首,就係唱極都係佢上年林曉培到一年後今場仲未轉,有點無奈,唱《風的季節》都好丫。另一首特登揀的《Color》亦唔突出。我等緊你地新歌架。


黎到呢度,新碟得番《Free from Your Command》未唱,因為全碟算最弱但結尾玩無限輪迴全場大合唱,是預期之內的encore前選擇。都未玩《了不起》,點走得呀?又播片,香港地唔多興嗌encore嘛,成日嗌嗌下冇聲你叫隊band出唔出黎encore好?而家拍條片睇隊band彈《了不起》,有得玩又連到戲。現場睇成班fans齊齊「yeah yeah」是很感動的。跟住亦一定要玩《留言短訊》,雖歌詞似情歌,實際上似BEYOND《總有愛》又可以用黎送俾fans,預左會做全晚最後一首。雖然演出、技術、流程編排有唔少阻滯未夠暢順,三個幾鐘加咁多guest又玩晒我想聽的KOLOR歌,好滿足了。同不得不讚主辦單位功力,開場encore拍片十分絕,全場超強燈光同舞台大量供應,噴煙噴雪連爆破效果都有,音響受制於演講廳難完善,各方面已非常專業了。而且裝一裝身搞搞形象立即精神晒,雖然我地indie仔唔計較你包裝得唔得型唔型這些只是bonus,將KOLOR包裝到成隊一線band噉 - 當然佢地實力同台風都有咁勁撐得起場 - 繼續高調宣傳落去主流或會有一日接受。坦白講,就睇過之MR.同KOLOR live比,一定係KOLOR好睇同現場水準高d。好可惜香港地要出頭,還是需要人脈關係才好辦事...


同,唔該,再寫新歌,請好好寫詞。作曲編曲表演KOLOR已經非常非常勁。只差歌詞文采及深度。我唔介意好口語歌詞,呢方面反而做得幾好,港得黎唔會怪或娘,冇幾多band做得到,但要再上更高必須努力作好歌詞,或搵更有實力幫手。


「KOLOR Independence Live:相信難再有多少本地indie gig可超越。」