本來今日難得地多野做，加今晚要出尖咀做野，超極速地搞掂趕六點半走人，因為
「謝安琪∼∼∼」
一知道今晚謝安琪去新世紀表演，立即野都唔做放工即上去。七點開場上到去已經差唔多時間，已經圍滿晒人，前面仲有位坐忝，不過劉Sir冇得坐，佢尖叫得太勁個橫額又太大，謝安琪未出場已經比人趕左出去。
呢場免費騷七點開到八點，既然係免費，都預左唔會真係有咁多歌，同商場騷實會有大量非音樂環節同hard sell環節，但夾埋先得六首，玩遊戲同吹水時間仲長過唱歌，免費黎講都少左ｄ卦，既然係用「音樂」為題就應該唱多ｄ歌啦，而家成場騷變成遊戲節目，同新世紀廣場宣傳環節，有點兒灰。今次先係第一次睇live，雖然個個都話唱live唔掂，但我覺得，幾好喎，起碼把聲keep到唱到唔走音再加多好多ad lib（聽live都係為左呢ｄ變化遮，同CD一模一樣有乜癮？），係低音未唱得夠好係有少少唔夠氣，一面唱一面好似唔知做ｄ咩好噉台風差左ｄ，但對我黎講，乜都夠晒！我係擺明主觀加偏見地覺得謝安琪好完美！吹咩！希望可以出多兩三隻碟之後開場真正大型演唱會，到時就真係玩音樂同有歌聽，唔係借謝安琪黎引ｄfans（擺明係講緊我）上黎新世紀！
為左呢場騷仔，上路途中專登走上皆旺問107借埋相機諗住影下相，點知，
「頂！講到部機點勁點pro，連zoom都冇得zoom，影到都睇唔到，頂！」
所以，唔好意思，靚女MC冇得睇，謝安琪冇得睇，劉Sir吹BB吹到比實Ｑ的出去個衰樣都冇得睇！