寸金尺土


初時以為提早韓國飛返香港都唔錯,除咗睇到上星期土匪亡靈X怒人,今個禮拜仲有一舊水睇九隊本地metal band嘅難得大fest寸金尺土。但係咁早調返香港係因為公司唔夠人做大project,上星期睇完怒人好開心噉返公司,就接到個起碼要大半個月先做得完嘅project,而我只得一個禮拜時間,當星期二就係project deadline而交貨前兩日我仲有一半未做,deadline之前個星期六先嚟開咁大場fest,反而變咗玩緊我,大佬成九隊band,一隊玩加set嘢八個字,就算準時六點半開都玩到十二點幾一點啦,更何況香港show例遲一個鐘至開波是行規呢。而家嘅狀態加工作,實在冇可能睇到咁夜至走,好在Black Night Red Sky打咗尖,等我可以睇完頭六隊十一點閃先,Protoss本身興趣唔算好大,而Shepherds the Weak同Evocation睇過好多次加佢哋成日有show出,等下次再撞過啦。而今晚睇完show仲要做嘢,所以只講重點算。


HA個台大執之後第一次上嚟,燈光擺位好咗,冇以前一開紅光就搞到全個台暗晒嘅致命傷,不過另一樣反而係太多黃光大燈,用得有點濫,閃燈又間唔中閃過頭唔夾表演。而人事變動後嘅HA metal gig做聲冇以前咁好係事實,今場音響已算做得較好一次,唔知邊個推聲,但希望嚟緊都keep到起碼今晚個水準,仲有Warbringer同Suffocation會嚟呀大佬唔好失禮呀。


Escharotic真係好鬼Arch Enemy,唔止因為搵條女唱,結他同鼓佬玩啲嘢亦非常似近幾隻碟嘅AE。但實在需要搵多枝結他,玩extreme metal而咁多solo彈時,得一枝結他仲要bass聲唔夠惡,會搞到好多位好空洞。講咁多,其實我只係想講,下次有show出記住通知聲,理得你玩成點同啲聲點,有女目及的metal band就是good metal band。


今晚會/要嚟一大原因係BlackWine,上次睇佢哋應該已經係三年前仲未撤出葵芳嘅樂人地帶場Last to Live,當然係想知有冇新歌,好在是有的,而當歌佬話今晚半個鐘只會玩《循環不息》加新歌兩首,企後面班港女問「吓?即係點呀?」這種反應是正常的,我都唔知喺香港幾耐未睇過一隊(新)metal band係用男清聲唱,而當全男清聲metal已經幾乎是異端時,一首歌起碼兩三個字長,仲要中間係成個字band solo冇人聲呢回事,應該係而家一代香港band仔band女嘅概念以外。新歌驚喜不大,但冇見咁耐live水準同以前一樣仲keep到,我就覺得好睇同好享受,只係實在太難遇到BlackWine出show。


而Black Night Red Sky,已經係而家其中一隊我最鍾意嘅香港metal band,新班底的確好勁live玩得好好睇,只有一樣有意見:唱高音個新歌佬。佢把聲當和音同唱快位係好,但慢位靜位用佢種聲唱晒,會搞到個氣氛好毛而唔係metal,所以希望可以用返舊歌佬把嘔泥聲做主導,新歌佬只負責輪流唱同和音部份。


寫完呢篇文時,場show應該仲未完,而呢個本應喺HA繼續high緊嘅時候,我喺屋企食住個宵夜做嘢,然後聽朝要一早起身繼續開工趕埋個project。走時樓下撞到Jason Kui,傾開至知佢同小塵埃聽日有show出,我都好想睇呀,只係,唉...