HORSE The Band Live in Hong Kong




HORSE THE BAND話黎香港,傳左好耐。我記得FROM THIS DAY時(超好睇!又黎香港,記得去睇!),已經傳佢地有份,十分期待,就係一隊咁on9的post-hardcore band - 自詡「Nintendocore」 - 音樂同台風都一X流。不過好似06年打後,除左擺明係為搵錢的大路騷之外(metal已經「K歌化」嘛,太大路了),大規模少少的underground show/fest唔見影,自從hardcore界發現左中環碼頭,突然好似多左好多騷,08一開年已經連續幾場打埋身果隻,傳說中的HORSE THE BAND終於鐵定復活節君臨,擇日擇得咁好,加上今次班底太強,有糾纏已久的門生、久休復出的HERMETIC SILENCE同仲未睇過live的荔枝王,幾大放日假黎睇騷先!
「復活節之後六日一三日假,個個唔係出街玩就係匿係屋企架啦!反正係唔係都冇客,早d收舖去睇騷好過啦!」

香港搵場地搞indie band show實在艱難,一係好貴,一係空間不足或位置偏僻,音響效果相比下甚至未能在考慮之列。以往hardcore show蒲點來來去去明愛(少左好多機會喇,始終屬於「大場」)、蒲窩(好似大修?)、IMnet(已經不知所蹤了),今次去中環四號碼頭搞,好有睇頭,估佢唔到碼頭都可以搞騷:
「好有rave party feel喎聽落!」
地點屬於中環上環新填地咩地區我都唔知,只覺得難去,一早搵定地圖,好彩有巴士出入唔使坐地鐵,巴士過海仲要比想像中快得多,冇塞車半個鐘到站,只係黎時容易,睇騷前特定搵定返屋企條路,睇地圖好似好簡單,撞下撞下半個零鐘先認清條路知道點走法,都幾係野架海邊行去巴士站三四個字,仲要趕尾班車!
「已經好過蒲窩架喇!齋條斜路已經行死你啦!仲未計搭車入香港仔同出香港仔,又貴又浪費時間等車又耐!」
行左幾個圈,仍然覺得中環呢邊頭好難認路,去到碼頭果邊與世隔絕僻到想搵個廁所都難,任何飲食更加係貴到唔使講。最大發現係,中環四號碼頭,真係碼頭,初時諗住或者有機會係有間吧或livehouse之類叫碼頭?(哈哈)上到去先知點搞法,碼頭成個二樓長方形平台最尾間左個同LiveHouse差唔多大細位置做表演場地,得一面牆同冇窗關係,可以話係半露天場,睇到悶或者間場時可以睇睇海景吹吹海風(都算第一次,我咁耐以黎只睇過室內騷),中間仲有膳食部,不過奇貴,飲杯野都要兩條半一包細薯片收十蚊,我地窮苦書生都係算啦。只係失望在冇碟買,本來打算一次過可以掃晒HORSE THE BAND全線,甚至KING LY CHEE隻EP,點知會場除左兩款HORSE THE BAND tee冇其他野買,隊band話「d碟運唔切黎」。灰。


門生
第一個要黎睇今場騷原因之一,同佢地(結他佬嗟)糾纏左一排,上次戈竹尸睇後一篇發言,寫到人地踩場回應,睇雙方講到風格係「metalcore加post-rock」十分吸引,自然要黎睇睇咩境況。
「詳情請見此New Generation of Metal Hearts Cliche Review Aftermath啦。」
玩左五首歌,果真如之前大家爭拗「是否metal」而言,係兩樣野夾埋,只係可能大家吹得好勁,睇完同我預期中差好遠。佢地歌曲中可以拆開三個部份黎睇,一個係hardcore/thrashcore,一個係breakdown,亦即metalcore中之兩大要素;最後係post-rock/atmospheric部份。睇過港人樂隊中,佢地metalcore方面技術、概念同表演非常得心應手,自問冇乜試過睇香港metalcore band咁有感受,但會感動到係metalcore部份,反而理應我會更受的post部份唔算出色,如果將呢d位獨立抽出黎有玩得唔錯,特別第三首最後兩枝結他怒掃歌佬玩埋假音係全場最好feel之一,不過將post位加番落metalcore位中間,串埋聽就顯得未夠好/順。或者係衰錄音。只係肯試新野唔係只扮某隊band、果期興乜就玩乜,有心已經贏左。另外幾鍾意歌佬,兩隻聲都唱得好,但最緊要有台風,冇乜見本地band歌手唱或唔唱時會有咁多動作,受唔到呢套一回事啦,點都好睇過冇野唱時企定定唔知做乜卦。雖則同想像中之「post-metalcore」有點偏離,玩得好表演得好係事實。
「班友,睇落都幾老?」

騷後,遭人捉住,被點相。
「你咪係劉Sir?」
forum嘈交的幾位主角終於碰頭了。幾大唔認自己係劉Sir先。認左俾人打咪大鑊?點相者為結他手Joe,即台上左邊藍衫者,都係圍繞一條問題:
「你話我地係乜?係metalcore?定唔係metalcore?我都唔知自己玩乜!」
well,我都唔知,自己唔多識,同唔敢亂講野因為香港地你講錯野 - 「講錯野」唔係即係講錯,係講完聽者感覺唔順耳,不論內容是對是錯 - 係可大可小的一件事(通常係可大架喇信我啦經驗豐富),以我微薄metal(core)知識分辨,我會話係metalcore,因為雖加入post-rock同新興「post-metal」,大體仍然係metalcore,正如你歌入面加d電子野,都唔會立即話你係玩電子,而只會話「加入電子元素的乜乜乜樂隊」。聽番分享,歌佬好鍾意日本隊ENVY(去過台灣野台的一隊日本實力core band,係emo screamo定post-co唔知唔好問我,只知我有佢地一隻碟而非常非常之正),唔想只玩單調正路metalcore,想做到比較氣氛同emotional,所以既搵到metalcore,又有「飄飄地」的時候,此乃近年metalcore發展趨勢,唔係往deathcore極端進發的話,主流界大多回歸old-school,indie界同半地下好多選擇向「後」,只係比重似乎未捉到平衡仍偏重前者,我嫌唔夠飄,同飄得黎未夠將歌曲氣氛好大程度改變。所以,又黎到所有樂隊實驗後面對相同問題:
「之後點玩?重定輕?」
我梗係希望可以重d啦,因為愚見佢地輕位飄位氣氛位未夠純熟,而五首歌除左第三首假音ad-lib夾勁掃post-rock底(嘈),係完場最後半分鐘段MESHUGGAH(更嘈)。
「唔好意思,劉Sir始終只識得聽metal,仲要一味死嘈果隻,對唔住!」


IGNITE THE HOPE
事前名同歌都未聽過,連MySpace都唔上,留番個驚喜俾自己。歌路係emocore卦(唔識,專家物插),係較為失望一隊,唔係我聽開果種所以我評唔到,但五隊中台下最靜局反應最平淡係佢地表演時,可能係一個指標,要到最後一首歌,全場反應差好遠,或者係佢地首single?首歌較爽,又難怪多人鍾意包括我,但搵左guest歌佬唱,唱得係勁不過把聲有點...難聽(係膚淺的我從來唔鍾意hardcore聲甚至部份瑞典聲嗟與人無尤)...同個guest歌佬動靜好很有趣。感想仲有慢位唔太得,想做到有death metal咁激deathcore同極慢速break位,只係一轉特別快入慢,好多時好夾硬同整體唔夾。只有話唔係我聽開果類,所以唔識欣賞。
又可能係聲問題,五隊中聲最差係佢地,大部份時間除左唱同鼓唔知另外幾個做緊乜,或者係set聲問題,又或者係鼓。
「鼓佬(好似)好勁。」
睇落好勁,野野起勢怒扳夠晒力水,只係場地本身音響有所限制(始終開三面),鼓本身收音已經好出出到你唔信,而兩枝結他唔知係結他聲事定推聲問題非常朦同唔出,呢個時候鼓佬仲野野有幾大力得幾大力,結果幾條友鬥大聲,爭下爭下就得個嘈字。鼓手俾我感覺顧得表現自己有實力而忽略左團隊性。佢把夠堅拆聲比手鼓俾我更大好感。



IGNITE THE HOPE玩完,換人間場時,選曲十分過癮:係非常八零的heavy metal,錄音得技術高啡晒solo果隻之餘,唱廣東話。播左兩首,難得有呢d八幾經典/遺珠重溫喎!
水晶迷??呵呵呵∼」
有d野,想搵都搵唔到。當今世代,有唔少過一百個理由叫你唔好買碟,download算。



HERMETIC SILENCE
「有請CRYPTTOCATION!」
if你鍾意,咪「香港CRYPTOPSY」囉呵呵。等左好好好耐。據聞上次出騷係07年頭 果次,當天店務繁忙抽唔到身冇計啦,想係好想去一來多band二來想睇新歌佬,因為舊歌佬功力及台風尚有不足及狀態不穩早已被好多人指出過。出完後話閉關修練冇機會睇,最後一次睇到佢地係666(香港可一不可再的metal show),同時係舊歌佬唱得最好一場&最後一次有機會睇舊歌佬一場,之後一等等足年半,終於有得睇新人新出關HS。從佢地上台時台下人數及反應,真係好多人係為佢地入場,我就係。
「新歌佬好似林峰,勁靚仔!」
「第時出碟封面一定要擺佢大頭,立即有大label簽!」

一開波已經壓晒場,超grind而家路向grind左好多(你可以話grind到錯左甩晒你都唔知呵呵),相信除閉關修練多時功力大進,睇鼓佬個size壯左幾多(唔係肥卦,呵呵),仲有新歌佬帶契,嘔得拆得把聲太得人驚了。
「久未露面,阿健仍然係本地indie最強技術結他佬。」
快得黎清,同說服到你真係彈到而唔係夾硬或扮出黎果隻,而家班底可能係佢地最無敵組合 - 新bass穩定差少少 - 再現江湖好過晒以前任何一場,實力一早被公認為中港台地區一線唔使再多提,只係有個問題仍未解決到:
「點解一定要(咁)慢?」
好多香港人聽metal同玩metal都有個通病,就係一定要有幾極端得幾極端,聽恆野要最恆,聽慢野要最慢,中間位果堆永遠唔多人鍾意甚至被小,此乃metal在香港發展緩慢甚至倒退原因,因為乜都只聽「最」果隻,好快就會聽到悶或覺得「不外如是」、「我識晒」,一早將自我界線定得太低、音樂生命期縮至太短,進而謀殺自己及整體進步同發展空間。HERMETIC SILENCE以前常被形容為「快位似CRYPTOPSY、慢位似SUFFOCATION」,某程度上講左有幾極端,就係快可以好快而慢可以好慢,將兩個速度相近段落拼埋唔難,但將兩段速度差大駁埋而駁得好,係extreme metal最難之一,HS我覺得仲未得,有時由好激快位一轉超慢慢位,唔感覺順甚至有點無所適從。其實係咪咁有需要一去去咁慢呢?第三首cover CRYPTOPSY《Slit Your Guts》(咦,拍線呢?),全首歌所謂慢位只係中板偏快,唔會一去去到SUFFOCATION種接近doom death咁慢,可以話全首都係勁快冇乜慢過,但一味死快可以快得順你唔會投訴。old-school death可以歷久不衰、廿幾年前到而家仲可以咁多人鍾意聽至死忠、仲未消失甚至仍有唔少樂隊追隨復古,就係謹守呢條重歌不重浮誇規則,但香港人好多時仍然覺得一定要做到好唔同、有好大對比先可以,請refer番之前提及過之香港人通病。既然新路向比舊路向成功、更具完整性,個人之見,係保持速度。
「唔好再攪住SUFFOCATION唔放喇。會累左自己。」


KING LY CHEE
「《亞洲起義》,得!!」
加上「KLC live show超好睇」,但多年黎未遇過,既然今場有佢地更加唔可以錯過,就成為等左好多年黎第一次睇KING LY CHEE live。因為《亞洲起義》隻EP,一心想黎睇阿紫唱,點知一開始Riz已聲明「變番四個人的KING LY CHEE」,噢。始終冇聽開hardcore同metalcore果邊,普通路人甲意見係
「正喎。只係點解有d野,一定要係某一隊band上台玩,台下觀眾先至會做?」
欣賞佢地其中一點係唱方面多變化,兩文三語兩三種聲,而家得番阿Riz一個唱,新歌點搞?原來有guest,但小弟無知,除左認得一個係頭先IGNITE THE HOPE最後一首個guest,同《晚九朝五》英文版搵SHEPHERDS THE WEAK歌佬唱,仲有一個唔知邊個,敬請見諒。老實講,任何一個都唱得比阿Riz在行。既然可以搵到咁多guest - 相信以KLC江湖地位絕對唔難 - 倒不如搵guest唱晒全部,效果可能更好之餘,又可以等Riz專注彈結他?
「為向fans交代?」
換人換得咁密,幾時先再有新歌聽?


HORSE THE BAND
經過四隊opening三個鐘,終於到主角出場,企加等左好好好耐,未試過睇騷睇得咁支力。主角出場立即好齊人,香港band show傳統,每隊band上台玩,台下輪更式換人有過半觀眾唔同晒樣(今場此情況算唔明顯,意外地),只有到主角級人馬出場,先夠號召力令全部平時「邊個上台我先去睇」的朋友齊齊蒲頭。實力確係冇得講,未開場,你齋睇個鼓佬拎個pad玩手指已經嚇死你。點解香港band成日俾人話及唔上外國band,就係差在基本功,好多人一開始玩band就死追幾激幾快(請再次見上「極端」通病),但叫佢玩最簡單最基本果d,可能掌握都未掌握得晒,HORSE THE BAND鼓佬對手 - 唔使講對腳 - 在場已經冇個鼓手及得上。
「一個snare甚至單手打snare夠玩死你。」
隊band玩的,叫任天堂蕊,hardcore中罕見的keyboard,將陳年世代的8-bit低B聲加落metalcore。
「甚麼是8-bit?」
「bit即儲存資料單位,紅白機係8-bit,超任係16-bit,第一代次世代係32-bit,N64係64-bit,如此類推上去,亦即bit數越細越古老原始。」

雖然而家去到128-bit甚至更上都可以,但老鬼對8-bit sound情有獨鍾,貪佢夠old-school夠白痴,你唔難發現好多人寧願玩番紅白機同超任都唔想玩而家dCG game,你睇劉Sir就知。你覺得會好戇居?有時真係可以好戇居,睇個歌佬真係成個孖寶兄弟噉款我有點想笑出口,同台風台詞簡單岸能久,果時DISAVOWED你都見識到,出live唔認真台下絕對會開心得多。
「這種台上幽默和交流是外國樂隊致勝之道。」
開心之餘,仲可以執生,香港band就係好多時要做到好認真,唔會抱住玩音樂係為娛樂為樂趣心態,某程度上令台下「冇反應」、「反應唔夠好」,同一有問題發生唔知點算(「ITH case」)。
「hardcore嘛。但HORSE THE BAND都係hardcore?」
但你以為純粹搞笑?又唔係。隊band自己都話起初確係以玩野為主hardcore tribute Nintendo,但後來/而家較認真地變成任天堂聲hardcore,你掟走部keyboard,個底近noisecore/mathcore級數,唔會話簡單話易玩卦?因為場地所限,自己又唔鍾意衝台(睇show,都係中後位聲好),全部睇人頭當聽歌算,雖然場地始終聲未夠,齋聽都好開心,相信個場可以大番少少台上有多d空間發揮會更開心,台上台下玩得更癲。遺憾在冇得買佢地幾隻碟。


玩完尾二一首就走人,廢事同人迫同趕尾班車,encore果首行住聽都聽到半首,大佬半露天喎開三面,加上出面海邊全空曠,行到二三十米遠仲聽得到,又勁喎噉都冇人投訴!
「爆成噉,黎緊FROM THIS DAY仲話玩到一點,激呀!」
交通同地點好過蒲窩先,音響初時見開晒口都擔心不過出到黎意料地好,鼓明顯睇得出同聽得出落左好多心機整,冇幾多呢種規模indie gig會咁多架生整一套鼓,鼓聲出到黎特別snare同cymbal比唔少band show靚,係靚到你覺得唔夾呢個場,只係最強亦係鼓,環境上實在難控制,結他好易朦晒,好似門生本來冇乜野甚至用到靚聲去形容,但佢地d「post結他」冇幾多段聽到,一post就係鼓bass歌佬搶晒,如果錄音改善到,我會對佢地甚至IGNITE THE HOPE大幅改觀,門生而家已經好正了對我黎講只係仍則牽連,
「我應承你地我會睇多一次你地、睇你地『玩得好聲』。」
唔知點解,有幾隊band都係初時平衡做得好,但越後d歌鼓聲遮結他情況越明顯,好似特登推低結他再推番高鼓,面對鼓佬神力如IGNITE THE HOPE同KING LY CHEE(最後幾首簡直爆到黐線!),結他手受晒罪。套鼓搞掂左&搞靚左,搞手而家要諗的,係搞番掂埋結他,同就番整體而唔係單鼓一樣了,雖則在任何最差情況下,鼓係煽動台下最後一著。



「唔夠喉?29/3星期六仲有!」
「FROM THIS DAY重臨香江!」


「佢地乜料?」
「我睇過最佳live band之一!」