NOTHINGNONE:
第一隊就係咱們心愛的MESSIAH之結他Davy同鼓佬輝爺之nu-metal side project。唔太nu架佢地ｄ野我覺得，不過理得佢係nu定alternative還是pop總之正就得。玩左五首歌（卦，我都唔多記得清楚），第二首係唱唔係嗌所以順耳好多，亦都最鍾意呢首，呢排心情都係聽番呢ｄ旋律野架喇太嘈反而唔多聽得入耳。整體黎講，唔錯。唱完之後，個歌佬話：「丫我發覺你地係唔郁就唔郁架喎。」冇計啦，鬼叫呢度係香港。
MESSIAH:
其實，大家黎到呢度都係為左睇所謂progressive之佢地遮（我係指Trinitian）。基本上而家MESSIAH出騷，都一定會送多個NOTHINGNONE，扮晒野等自己headline果時有supporting act呵呵呵。今次得歌佬同（估唔到）阿bass著OPETH，幾時先全隊都著晒OPETH上台先阿輝爺？不過唔使問喇問佢都唔會答，應該話係答唔到，因為打完NOTHINGNONE五首之後MESSIAH又四首仲要MESSIAHｄ歌複雜好多，睇條友真係打到訓低咁滯，最後果首係好明顯地聽到細聲左呵呵（條友仲係要打幾多下個身就震／彈／跳幾多下，抵佢支力）。歌就都係果幾首架喇，不過佢地真係一次玩得比一次好，但係「硬件」方面似乎唔多掂喎，支結他（唔係阿Davy兄，我都唔知佢叫咩名）未tune好就開始左到第一段solo就出事，同埋又係唔知點解佢彈ｄ野係完全唔出聽唔清楚，當係我企個位衰算啦呵呵。始終佢地玩ｄ野係最似"metal"，而且ｄ歌寫得真係唔錯，第二首最後靜完一段然後衝快係噉去果段真係爽到爆，加埋阿達爺唱歌真係唔差，今次唔用咪stand係放ｄ又fing埋頭，真係好正好正！咁多隊之中台下反應最好就係佢地，落到台仍然有掌聲亦只有佢地，話佢地係全晚玩得最好同最好睇一隊絕對係實至名歸。所以，都係果條問題：
「喂，小朋友，隻碟幾時出先？」
DARK VAMPIRE:
Symphonic Black，相信大家都知（我係指Trinitian）。我知係好唔客氣，但係我都會話，全晚最唔好睇，聽得最冇feel，就係佢地。台風，就唔講喇。台下觀眾果ｄ「反應」，都唔講喇。講番音樂。首先，呢樣係我衰既，我企個位差，所以結他聲係好難聽得到，最大聲就係個鼓，然後就係bass同keyboard。所以，真係唔多聽到野。鼓係好快，ｄ過門都好岩我feel，但係就係變化唔夠大。ｄ歌變化由嘈轉靜做得太刻意，有時係做得有feel，但係剛剛開始營造到氣氛果時突然停晒之後轉做keyboard，當堂灰晒。都係一直講果句：
「希望你地玩嘈ｄ、少ｄkeyboard。」
ZOUNDS:
第一次睇（即係幾時？），唔鍾意。上次睇（又即係幾時？），好鍾意。今次睇，唔鍾意。算啦，當係我呢排心情唔岩聽嘈野關係。Nu-Metal，玩左四首，之後因為YC未人齊關係就"Encore"玩多一首。頭兩首，對我黎講，幾悶下，可能太重複唔夠變化，不過最後三首都好正，又唔好問點正，總之感覺正啦。今次唔係咁鍾意佢地，可能係因為上次聽令我諗起我好鍾意的RAGE AGAINST THE MACHINE，但係今次諗起果隊係我徹頭徹尾地唔鍾意的KoRn。成隊都玩得唔錯，不過今次同上兩次一樣問題，鼓手係好勁打得好實好夠力，不過似乎力水方面控制差ｄ，隻左手係唔係都大力扳搞到個鼓聲搶晒，靜果時更加係唔好聽。
又，原來結他佬同鼓佬都係亞視做，唔知阿張大導同佢地熟唔熟？
YC:
「我地中文名係人中！」記住未？要記住架，因為雖然我唔係好鍾意佢地，但係我好欣賞佢地。佢地係玩hip-hop味較重之nu-metal，但係個組合幾特別，GtrX2+BassX1+DrumX1+MCX1+SamplerX1。雖然sampler唔係咩特別野，但係就真係第一次見到有香港band用到。其次係除左MC之外一個結他手、bass同sampler都有份唱，呢種流動歌佬方式唱live果時效果好好。鼓佬淨係用兩個tom，但係已經夠晒用，而且佢編ｄ野的確係好正，好夾佢地ｄ音樂，結他佬亦好特別，一個係Gibson另一個係用Fender（銀閃面加黑pick guard，呢一款我好鍾意），用Fender果位玩好多effect同埋清聲，不過可能佢係台上唔知，佢支野隻清聲個tone較得太尖，彈清聲果時係極度剌耳，表演前「試音」果段真係殺死人。音樂，唔係太合我口味，不過佢地ｄ聲較得唔錯，而且玩得好夾，vocal多部合唱編得唔錯，只不過個MC有時rap到一舊舊完全聽唔清楚好似唔夠快噉。而且佢地做到音樂方面令人人都記得之一樣：hook。雖然rap野我係唔多鍾意，但係最起碼我聽完之後會記得佢地有首歌叫《肥仔》當中有句好似係「肥，唔係錯！肥，唔係有罪！」（另加當中大量粗口），同埋另一首歌會係噉嗌「打劫！全．部．咪．郁！」（所以點解pop野咁受歡迎呢，一聽就識唱加可以跟住唱嘛）。講台風，我覺得佢地係全晚做得最好、好似"band"之一隊，須知Live House個台已經唔係大但係都可以玩到跳黎跳去彈下彈下，雖然台下都係點都唔會郁。點都好，呢一隊band，我唔係好鍾意，但係我好欣賞。
「我地係YC，中文名係人中！」
記住未？