香港國際爵士樂2009開幕音樂會



國慶正日遇上香港爵士音樂節2009開始,本來特登請左假連放四日,可以安坐家中慢慢Diablo,但睇見班底興趣大,加上戈竹尸誠邀,最後決定放低陣Diablo出去睇show,一來開幕秀是圓方免費表演,唔使錢加我屋企有架巴士直到圓方樓下巴士總站咁方便,又有包以正做嘉賓,吸引力夠晒大,而且返公司做野坐,返屋企打機都係坐,已經好肥了,順便出去行個圈啦。


從來唔鍾意黎圓方,冇錯地方係大夠晒光猛環境舒服,間中又有live band表演,就算乜都唔做純粹黎坐低睇書都開心過去圖書館,但我黎到如果唔係睇戲同行HMV(圓方HMV冇乜好行查實),就真係只有坐低睇書,因為全個商場我負擔得起只得戲院同大快活同HMV,其他舖頭九成唔屬於我個(低)層次。整座圓方在我最可取者,是此:


「成日覺得圓方個名譯得太柒,浪費晒個Elements整個主題概念。」


是晚演出於圓方頂樓蘇豪區即國金門口圓形廣場舉行,之前日日天氣咁差,好在今晚冇落雨,唔係要搬入金區戶內進行,Metal Zone搞jazz gig都幾過癮。圓方屬乜野地段大家都知,搞jazz呢種高檔野自然大把群眾圍觀,我諗觀眾過到百,外國人及「品味型」男女多不勝數,好在廣場有上層可以遠觀,唔使落去同人群迫又睇得清楚,仲睇多好多野。話說六點幾開場,兩位司儀雙語一輪,第一位嘉賓日本結他手小沼洋介見佢地講極未完,就企埋一邊整番飛,點知一點煙索幾啖司儀就話開始,立即掟低枝煙飛身上台。搭多個鬼佬saxphone手,二人組合玩左三首,有點唔聚財:睇黎全晚都冇鼓,會玩得好似佢兩個噉十分acoustic,頭兩首木結他,最後先有電結他對saxphone,個人聽jazz都係鍾意full band,結他亦最好lead成份重於rhythm,所以第二首木結他玩好多手指技術開始有睇頭,最後一首電結他上手當然更多solo位同交流結他伴奏成份冇咁高,感覺「熱完身」,就完場,因為第二晚仲有場收費表演,而家黎為大家免費表演三首當teaser。


「唔好意思,我始終唔識聽jazz,有埋鼓可能會好唔同...」


反而跟住正場部份驚喜先大。開頭以為係包以正典型樂隊jam,原來佢加Ted Lo同一個鬼佬double bass手幫韓國女歌手羅珫宣做伴奏,司儀介紹佢係近年韓國最成功爵士女歌手,勁到揚威海外歐洲都勁追果隻,等我初時一心打算睇包以正,冇計我咁耐冇乜正式睇過佢live,一次係all-star classic rock project,另一次係夏韶聲諳演唱會,兩者都非佢headline之jazz gig,所以見到個女歌手上台,心諗「唔係卦?」點知仲好,既然全場冇鼓真係玩結他相信都達唔到我心目中要求,只做伴奏樂隊或者更好(但我唔多鍾意今場選用枝電木結他,覺得隻聲唔夠夾),再者羅小姐表演方式非常唔正經。先一首清唱,第二首加多枝double bass,兩首歌都係一個riff兩三個chord搞掂晒吹佢唔脹,最過癮第一首,既然只得一個非常簡單伴奏旋律應該係播碟,但見佢坐低拎住部唔知乜野機仔係度邊唱邊篤篤篤,應該唔係逐粒音篤出黎,又唔似用黎控制節奏速度因為最後先有變速,好有興趣知到底點玩。跟住full band上場就大鑊了,正經唱的歌已經好勁超長氣勁高音又夠準,最過癮好多特別方法玩呼吸玩聲甚至轉tone,大量Vitas式ad lib solo夠晒「technical」(well,始終我聽metal出身,對技術總有要求),玩首「instrumental」先好笑,結他同vocal double lead之後拎左細細枝野出黎吹,唔使用手單靠用氣就轉到調十分神奇,最搞笑台下觀眾被誤導,有次結他solo後向來動作多多的歌手想打拍子,佢一拍手原來冇乜反應的觀眾以為「咦要拍手喇」,就一齊係剛剛段solo拍手歡呼,fake左各位觀眾拍錯兩次手之後女歌手連手都唔敢拍,好笑。jam完多一首鋼琴一首double bass靜歌,可能首instrumental太勁又jam到癲,而家聽番呢種正常編曲歌即使仍有大量Vitas solo都覺得唔夠,好在只唱兩首,跟住再次full band上場唱自己作品《Pancake》做壓軸,歌詞絕對及得上歌名咁白痴,隊band見最後一首加首歌本身已經咁傻,更加jam到歇斯底里咁滯超級好睇,唔知乜事的朋友可以當MAHAVISHNU ORCHESTRA之類progressive/jazz rock - 老實講,我一廂情願黎到想睇的大師級現場即興表演正是如此呀,好在臨尾整番首《Pancake》,亦一首抵晒成場。最後encore多首玩唱功抒情歌,已經不再重要。


咪同睇Bjork一樣囉。你可以話睇羅珫宣,就好似睇一個靚聲版加冇咁實驗主攻爵士之Bjork。」


節目表話佢只表演今場,如果黎緊一晚場收費表演搵佢而唔係個日本結他手就好啦,我一定捧場架,睇多次《Pancake》都開心啦。遺憾在今場兩大結他手冇同場較量。散場睇睇節目表,成個爵士音樂節玩足半個月,雙十又有多場免費show仲要玩big band,重頭戲當然係14同15號晚,除左又有包以正加應該真正完整樂隊比佢盡情表演,更想睇Henderson Berlin Chamber Trio。但係幾晚都已經有晒約。灰呀。