一場需要先講講故仔的音樂會。話說09年底為了G.E.M.十八歲生日會演唱會，特登出尖沙咀通利買飛，明明寫住仲有平飛，賣飛姐姐死都話冇晒位得番最貴四百八仲要坐到最邊，廢鬼事益佢自己返屋企上網買好過。回程去文化中心逛逛，見到上面張海報，香港中樂團玩動畫歌咁有趣，諗都唔使諗就買左飛了。

「好多人成日問，點解劉Sir可以識咁多野、接受到咁多？或者因為佢夠無聊，同懶用腦諗野，又冇女媾，所以只要睇見覺得過癮，就一定會有心機有時間有閒錢去聽去睇，呵呵∼」

「另一個原因，可能因為我永遠同潮流脫節。每當有大band黎香港，網上好易見到大班靚仔一窩蜂地衝去買飛，特別metal gig：潮嘛。但我好多時調番轉鍾意睇細show，論經濟效益，大show一張飛夠你睇五六場細show，追星有其樂趣，但我寧願選擇俾自己見識更多，而且表演陣容越唔識越好，噉先有驚喜。好多人 － forum同Facebook見到的大部份 － 從來追求新同潮，仲有柴娃娃式event。個人較愚昧地喜歡縱與橫同表演、音樂實際內容。所以全香港（metal界）劉Sir應該係最唔懂得聽音樂果個。」

兩場都巧合地同時間發生大事。G.E.M.演唱會同一日朝早，家犬中風後享多個半月福終於走左，今場中樂動畫世界又遇著老死 漢 人生大事。開星期六晚同星期日晏晝兩場，買飛時冇為意，後來先醒起 漢 星期六擺酒要做兄弟，好在買時選左星期日晏晝場，做完兄弟執執手尾仲夠時間出去尖沙咀行行街至入場，唔係蝕左舊幾水。

我都冇諗過讀左四年教院，放低左咁耐，今日可以摷番出黎學以致用。老實講除左呃到張紗紙等我可以冒充自己大學畢業，四年師範生活冇太多野值得回顧，其中一樣有意思係year 1，第一年強迫通識即係乜叉都要讀，三科術科美術、體育同音樂三揀二，唔使用腦都知劉Sir一定唔會修體育，另外兩科之中音樂梗係最開心果堂。修得一個學期咁大把較為遺憾，但唔係中小學式低B地教你睇譜唱歌仔，而搵個博士講音樂歷史文化，例如中樂與西樂關係、交響樂團編制點樣令中樂發展一日千里同導賞。西方古典同中樂相比，其實我一向鍾意後者多，因為音色與演奏較「raw」感情比古典音樂真摰，古老及大自然情緒亦較豐富。但亦因為噉，香港人中樂一直覺得中樂好娘，摩登都市時代你仲玩親近大自然？西化文化、「不愛國」歷史後遺症加「上流品味」，自不然令香港人更願意欣賞古典音樂。

「又係時候收喇。如果唔係，繼香港metal之後，連唔關事的中樂都無端白事嘈一餐。」

是場演出，香港中樂團不是重點，動畫世界才是，所以主要客源是一家大細同學校定唔知邊個機構帶團。請大家睇番上面張海報。右上角寫住，如果你扮白雪公主、阿拉丁或者太空戰士7任何一位女角（仲有迪士尼動畫角色）入場有得拎紀念品。自不然好多靚妹（被老豆老母迫）cosplay白雪公主，戴對綠色耳仔就話係史力加的亦唔少。不過另外兩者冇出現過，阿拉丁一向知名度冇咁高，我亦唔覺得有幾多老豆老母會俾佢地ｄ女著到咁中東（西洋才是「上流品味」呀！），至於FF7．．．老實講，睇見入場果班一係老豆老母一係靚仔靚妹，有幾多個識／理？就等我扮FF7女主角啦，優勢係我唔使戴假髮買套衫就得，不過文化中心班實Ｑ以為有人玩野，迫住要換番衫先入到場，呃唔到紀念品添今舖蝕桌。

門票價位$120、$200同$260，我當然係買平飛啦，冇得呃學生飛但百二蚊其實同睇場大少少的indie gig差唔多價，而以一場大show$600-800計，同一個budget我仲可以睇多最少四場。唔計樂團後面背脊位，全演奏廳兩層爆七八成，我平飛坐樓上平台近中間睇清晒全隊樂團十分好彩，不過當入場大半係靚仔靚妹，就預左會十分地嘈甚至無端端身邊有人走黎走去。好在有精美場刊分一分神，開場前可以先為正場預習定先。冇去到唔緊要，正統音樂會一向事先張揚，公佈演出起已經將全場曲目及流程放上網，仲有周凡夫簡介動畫音樂與表演曲目，做到玩樂中學習。你問誰是周凡夫？其實我都唔太知，不過而家Internet 2.0時代，上網click幾click唔使一分鐘傻仔變專家有幾難？就等我呢個專家傻仔話你知，周凡夫先生乃兩岸四地知名音樂評論家，早前討論過之2009年度港產奇片《音樂人生》a.k.a.「給社會上流人士看的indie戲」，套戲未潮入娛樂版，仍是underground只能登副刊之堂時蘋果日報訪問，都要搵佢同導演「crossover」一番。專業及有學識是肯定的，雖則文章內容內行未必盡認同，好似Final Fantasy會稱呼為最終幻想而非本地化之太空戰士即見不完善 － 而家會唔會label改左名唔知，最少FF7時仍是太空戰士。但，又係果句：

「唏，有邊個會介意先？」

睇晒個rundown，基本上正路過正路，大路的迪士尼、彼斯唔少得，梗有經典日本卡通主題曲，反而冇諗過會揀Final Fantasy 7主題曲《Eyes on Me》，亦係全晚唯一一首非動畫歌，老實講，呢首歌係我半個入場原因，十分好奇點樣用中樂方式演譯呢首現代電玩金曲。期望越大失望機會亦更大卦，始終中樂團編制即將首歌MIDI化，旋律之外編曲層次最為重要，但我嫌主題發揮唔夠。不過，到頭來可能真係得我一個會計較，會擺佢打頭陣已可見重要性與知名度，似俾樂團試音熱身居多。跟住《傻豹》同原版相當接近冇乜驚喜，我未睇過史力加所以主題曲《It Is You I Have Loved》只覺平淡，《IQ博士》同《傻豹》犯相同缺失。本來話會玩阿拉丁《A Whole New World》同風中奇緣《Color of the Wind》，正場唔知點解（官方宣佈是「節目調動關係」）冇左但加多首《IQ博士》，好在我從來唔係迪士尼fans，所以少左兩首唔算大損失，即使《夢幻迪士尼》medley都冇乜感覺。選曲關係，上半場對我黎講算係悶場。

中場休息十五分鐘後，下半場較有睇頭。國產卡通《三個和尚》（介紹歌中三個和尚角色時指揮想玩《Bulletproof Monk》．．．當然，冇人識笑），因為本身已經係中樂而唔係夾硬改，即使我未聽過原版印象都好正面。反而我冇諗過小丸子《問題天天都多》會改得咁好，敲擊部夠玩野，真正做到將外來歌曲中樂化中西兼備。《多啦A夢叮噹》（old-school加hardcore的我永世唔會叫佢個新名！！！）冇得唔玩架啦，對於哈爾移動城堡主題曲，唔好意思，因為同史力加一樣冇睇過，事前認識不足難以評論。等左成日，終於到《Eyes on Me》之後另一個人重點《天空之城》，本身已經太出眾亦非常磅礡，交到中樂團手上同樣夠氣勢編曲夠豐富，再多一點山水情懷。老實講，作為史上最經典動畫歌之一，我相信落到任何一位能人之手，玩出黎一定得人心，由細聽到大，我從未遇過有一個版本，真人彈好MIDI好，會唔好聽。總的而言，全場對我最具吸引力係一頭一尾，頭開得唔好，但越後越精彩。

所以，按推理，encore是全場最強。值聖誕節前夕，例牌要encore番首聖誕歌架啦，我從來冇節日氣息所以冇乜意思。另一首encore先正。玩《世間始終你好》，即係羅文同甄妮合唱果首

「論武功∼俗世中不知邊個高∼WHO！HA！」（冇錯要全場gang chrous的真metal）

經典電視劇主題曲，煇黃出品必屬佳品／經典，有得玩gang chrous靚仔當然開心，雖作為非正式正統音樂會，之前都有玩過唔少互動環節，好似《天空之城》每人兩個LED電筒仔玩意境（結果，你當然估到係失敗：電筒落到靚仔手，不論首歌去到快位還是慢位，氣氛都只會同落D一樣），真正成功要到臨結幕此刻。相信樂團有排定幾首歌方便手到拿來娛賓，但《動畫世界》搵首中樂電視劇主題曲做encore，似乎有點古怪，尤其全場玩得最好可能係encore呢首。總括評分唔太高，就如前述，未達心中所想所求在於未夠中國化，《問題天天都多》同《天空之城》以外（《Eyes on Me》雖迷失，但亦可算），大多難以成功跳出「用中樂樂器奏本來份譜再加／改少少」規範影子太明顯，未能夠充分發揮融合東方特色。

「如果香港中樂團有興趣整番次《煇黃世界》，我鐵定捧場呀。」

其實我最想睇，係中樂團玩rock&metal，例如cover METALLICA首《One》（唔講你唔知，《One》現場版都有得玩gang chrous架，呵呵）。《音樂人生》時討論過，不同於七十年代DEEP PURPLE同倫敦愛樂合作可以搞到殺機處處之守舊時代，而家廿一世紀新潮開明，正宗crossover另類實在普遍過普遍。但只限於海外。上流的香港仍難以接受偏離正軌同時缺乏吹捧之藝術實驗，正如港樂crossover多年來合作對象集中盛名流行歌手，除外只試過一次同恭碩良合作symphonic rock，亦只限咁多。本身難以同搖滾樂拉上關係之中樂就更冇可能。夢，還是要繼續發。