一年內兩大中國民族音樂紅人黎晒香港，既然年頭睇左薩頂頂，冇理由年底朱哲琴黎唔睇埋啦。官方話佢場音樂會係開幕節目。咦，薩頂頂果場，又好似講過類似差唔多野，何解咁多幕開？原來係兩個唔同活動黎。之前薩頂頂果個係藝術節，而朱哲琴開幕呢個，叫新視野藝術節。兩個節有咩關係就唔知道，睇過節目詳情大概比較過，冇視野的好似較為正統／傳統，新視野就當代感較重，「pop」ｄ「progressive」ｄ。
「按此推理，唔太明點解朱哲琴會出新視野，「正宗」藝術節較為學院，而新視野藝術節接近摩登及流行文化時，好似應該改為薩頂頂出呢場？」
查實唔太熟朱哲琴，只知道出名在將西藏、新彊等遠方加中華民族不同音樂結合，《阿姐鼓》成為第一隻打出國際全球發行之中國歌手唱片及一部東方new age經典，個個讚到飛天時我唔算識欣賞（同，唔好笑我，當年隻碟潮到我以為佢個人就係叫阿姐鼓），或者太超凡脫俗了同唔算好迷邊彊民族音樂，之後較低調同放低西藏音樂之《七日談》更得我心，但未至於迷上佢地步，還是受薩頂頂多，較新少碟得兩隻追都較容易，同最重要pop得多適合膚淺的我。因為大家都係玩摩登化民族中樂玩到打入國際，可以預期大量專家會爭論「朱哲琴好定薩頂頂好」、「薩頂頂是否新一代朱哲琴」之類，根本冇意思，因為朱哲琴是漢人走入小數民族偏遠地區開創新new age，薩頂頂調轉蒙古走出中華大都會玩中樂西化電音pop，特別第二隻衰ｄ講句經變成呃鬼佬之作，唯一一首可以令琴迷們滿意，只有第一隻碟朱哲琴製作人何訓田包辦之《神香》。大家出發點已經唔同，薩頂頂點都唔會比朱哲琴「high」，仲比黎做乜？我反而對《阿姐鼓》銷量傳說更感興趣。今時今日媒體仍然話《阿姐鼓》係第一次有中國歌手唱片可以國內正版銷量突破一百萬。因為興趣使然，近半年一面追番中國搖滾經典，一面寫緊唐朝歷史回顧（當然講緊隊band，唔通劉Sir同你講中史咩），當年搖滾盛世，九十年代初崔健、黑豹同唐朝第一隻碟《夢回唐朝》，要比1995年《阿姐鼓》再早幾年，當時亦有類似「銷量驚人」聲稱，但一直冇人認真對待。我唔知條數點計出黎，因為果陣搖滾仲算當打大公司幫佢地出碟，應該都有當成正式主流唱片計算銷量，我亦相信一班國內搖滾巨星可以賣超過百萬隻正版碟唔一定吹水，你話《阿姐鼓》係第一隻全球發行中國歌手唱片絕對信服，但話係第一張國內銷量過百萬中國歌手唱片或需再考究。或者對好多人黎講，rock點入屋都非正統，古典民謠先算「真正」音樂，所以你玩rock玩metal賣到一千萬隻都當你冇到唔算入紀錄卦。
好在之前一日望番張飛，先知原來早半個鐘七點半開場。平時睇八點場，我會選擇出奧運站搭巴士慢慢躝出尖咀，今晚唔敢喇，試過塞成個鐘巴士先出到尖咀，得個半鐘廢事太趕反田家反MTR都選擇搭地鐵，唔怕遲到之餘又可以預鬆時間食多個Burger King先。點知廣東道間Burger King執左原來。想食要走番去通利果頭。唔夠時間，迫住食KFC，有點無奈。食雞時睇睇新聞，同一日朝頭早，文化中心果頭有個露宿者死左。劉Sir去到邊，邊度就有事。即係其實開到場，可能已經好好彩了，咁大個劉Sir邪住。
同薩頂頂果場唔同，表演場地由九展搬到文化中心大劇院（有ｄ陰影的，上次黎呢度睇完《大都會》就腳殘入院了），場地視覺音響較佳，可惜在同薩頂頂果場一樣，係要孤寒買平飛坐山頂位側邊近最尾，入場時同成班靚仔一齊爭位攝已知出事，結果位置又係成堆青少年之友旁邊，就灰爆了。未開場，已經好似入左K房噉，勁在開埋場都冇乜大改善，頭兩個字聽到各位同學傾偈多過台上玩乜唱乜，要到可能係佢地先生出聲嘈幾次先收聲。所謂推廣藝術的青少年之友、甚至香港所謂藝術教育，都是十分失敗的。與其你夾硬屈ｄMK仔女入場睇，根本冇人有心睇完左又學唔到野，不如用同一舊錢俾人公開申請補貼買飛，等真正有興趣果班更有動機支持藝術活動。
全場演譯跟薩頂頂完全兩樣，朱哲琴音樂聽的是靈氣，初時擔心實有大量民族樂器，原音樂器收音好易失真，好在音響夠靚冇事。同值番張飛，是舞台設計靚到冇野講，一個大幕加Ｎ個細幕大量超立體山水畫投影（絕對3D過你入戲院睇所謂立體電影，而家仲要唔使戴眼鏡都有超真實立體效果，戲院成日吹水講到自己ｄ戲點視覺震撼果班旋收皮），歌曲連接全場一氣呵成，亦計好晒每首歌完左歌手樂手點走位，邊度幾時落吊幕遮人做投影，乜都計好晒加冇失準，台前幕後設計綵排表演都非常專業，唯一錯誤在歌詞：台頂加兩邊都有屏幕唱歌時播中英文字幕，全部歌詞都係方言可能搞果個都唔太知各位民歌手唱乜，基本上佢同各位觀眾一樣都係估估下的，所以一心諗住睇字幕理解歌手唱乜的，期望不要太高。據主角講番今晚係巡迴表演首場，相信搞機只係果個未熟習晒演出流程，而且老老實實，我又唔多介意你落唔落歌詞，出每首歌歌名同樂手介紹已經好足夠。
唔會有重低音跳舞節奏，唔會間唔中掃幾段NINE INCH NAILS式結他riff － 最摩登係電腦同keyboard結他都冇枝，最「前衛」係鼓手打埋鐵桶，可以點rock法？但排場大得多，單副歌手已有兩男兩女，民族樂師都七個仲要一人玩幾樣野，計埋三個keyboard鼓手都要兩個分全能打擊同混合打擊（其實冇分別的只是唔同朵作識別，要諗多幾個呢ｄ好似好強的稱號都頭痕）。一連幾日特意重溫佢舊作驚入到場唔識聽，點知冇乜所謂因為全部新歌，你識背佢全部歌詞都用唔著。跟我想像中有點唔同，本來諗住會好飄好靜，但前半落幾多電子同sampling，已經「恆」過晒我聽過的朱哲琴，舊歌同狹窄視野令我仍一廂情願認為佢同new age都是慢是飄是靜的，不過而家噉偏向(dark) ambient我仲受。有趣是部份歌玩到好工業，當落白噪音背景，其中一個鼓手打埋油桶，我冇預到會咁現代，又同咁多民族樂手相沖得宜。
基本上照顧晒所有觀眾需要，想靜得要好中國好民族有摩登融合都俾埋你，hi-fi音響立體影像精心設計舞台聽同睇都至高享受，就算膚淺如我想睇技術，得，人人有solo。最期待的兩個鼓佬西器打中樂反而最冇驚喜，大家鬥力水鬥聲勢真係好勁，唔及我要求咁花巧罷了，始終中敲西敲思維不同。吹樹葉同跳晒舞吹笙夠過癮，但最強都是古箏solo。中樂團編制源於參照西樂團，大多樂器部可於古典樂團找到對應，唯獨是古箏我覺得屬整個中樂團中獨一無二，最接近之聯想是鋼琴，但古典樂器冇一樣及得上古箏咁具可塑性同攻擊性，你睇幾多武俠片要加古箏做背景做配樂做武器就知啦。氣勢十足之獨奏，都不及靚女琴手咁注目，叫常靜，我覺得好睇過陳靜，已經做得偶像實力派，如果佢出碟都係玩電子加古箏要買呀。又有表演「內蒙古失傳絕學」喉唱，同時發幾種聲甚至玩埋吹管樂器，唱把聲其實幾gothic metal，形象化是LACRIMOSA歌佬把磁性沉聲用中樂劇腔唱歌，一面唱一面吹同時有兩甚至三個聲部，口舌喉嚨全部用晒非常神奇。另一得意是冬不拉。即係乜野我唔知。如果以民族地理性、音色同演奏特色黎判斷，西部有班鳩，東方有冬不拉。
「有冇睇過Buckethead彈banjo？一模一樣。」
前半花盡心機，老老實實，去到尾三分一，唱《心經》之《頌梵》開始，我覺得已經停滯了，力度變化感情都不如之前峰迴路轉。話咁快就玩到最尾一首，唔覺唔覺就個半鐘了，感覺好快好短唔夠喉。當然要encore啦，但首先有主角出黎用廣東話為主普通話為輔另加少少英文，花三四個字篇幅講解成個演出歷史意念加介紹各位樂手，即係我唔知原來佢識廣東話咁犀利的，用字有點內地但冇乜怪音，可以接近全部用廣東話流利講出，係本身識定特意苦練？好處當然是直接講解到各種音樂知識俾現場觀眾，黎到香港你仲用普通話或者英文講野？好似佢咁有心花正場四分一咁長時間推廣中樂，點多資料點有教育意義都冇人會明，在唔係講廣東話就唔知你up乜的國際都會香港地。
水吹完，歌總要再玩，encore較為特別，首先黎首即興。你話似jazz band三四個人起板起chord就黎jam番個幾鐘唔出奇，而家噉十幾人中樂樂隊點即興？事前總有大概傾過流程樂理 － 事實上好多「即興」project都唔係全部落場度憑空而成，有先傾定框架技術方面才是即興 － 去到佢地水平點都唔會唔知點算或撻Ｑ甩漏跟唔上，但成果始終有點太夾硬，帶點post但去到一個建立到意境卻唔上唔落未知出路地步，只有話好在樂手技術高不至於崩潰，但難稱實驗成功。然後，飲歌唔可以唔唱架喇，《阿姐鼓》走唔甩。即使現場聽一次，仍未感受得到當代中國new age經典之偉大，反而新舊比對，《阿姐鼓》做代表之舊歌甚至顯得有點太pop。當事人話佢憑《阿姐鼓》揚名全世界，去到邊都俾人叫佢唱，所以決定放棄舊歌，十年前開始周圍旅行搵新拍檔新元素做新音樂，亦即今時今日班底及曲目，希望可以放下過去重新出發。對我黎講，如此改變一定係好事，新作品具音樂性得多，在我。舊碟除為歷史冇太大重要性及必要性追番，但如果佢出新碟係噉樣dark ambient地玩，就要捧場了。
因為香港是巡迴第一站，環遊世界之後又要再求新，應該唔知過多幾多屆藝術節先才會見佢第二次。到時，想睇好gig，一定要買貴飛了，唔好慳皮喇，睇過兩場，已經怕晒各位青少年之友。