每年最後一個月聖誕檔期,不論indie定主流大把日子加理由開show,月頭KRAFTWERK「High-P」,月中除大量indie show,想睇囡囡16/12俾$168就可以同FREEZE打邊爐(都算破天荒了噉玩法,其實我幾欣賞FREEZE的態度同智慧),錯過左跟住禮拜一22/12仲有HOTCHA(呵呵),要另類一點HOTCHA之前一晚灣仔藝術中心JACK OR JIVE搭多隊日本darkwave,不過當晚我留在皆旺乖乖睇亞視。最後只睇(到)尾場聖誕前夕F.I.R.。點解?


「鬼叫我個個禮拜都得星期三晚得閒,而佢地就係揀正星期三搞咩。即係唔係我唔想睇metal show呀,去得先得架大佬個個搞metal gig都係我走唔甩的禮拜六日!」


有d野是整定的。好耐未睇過show,上一場all-star classic rock show已經係暑假之事,好彩收舖後就到時間先睇到。再對上?正正半年前的陳慧琳「榮休」演唱會。都唔關metal事,仲要pop到爆炸。死未。這是indie show集中禮拜六日的影響,對其他人黎講方便,相反星期六日更加要留低舖頭坐鎮的我得個灰字,想睇show只能望平日同唯一放假的禮拜三晚,上次陳慧琳演唱會,同今次F.I.R.世界巡迴香港站都開星期三,冥冥中個天都同我講應該聽pop野,唔好聽metal。


我實在太鍾意F.I.R.。佢地擺明pop到爆炸,二男一女組合食正日本條水,勁在係個超強producer即係隊中keyboard佬建寧老師搞出黎,歌pop得黎有格又勁多元化,加上歌手同結他手有料到(雖然玩pop,手solo算見得下人的),第一隻碟在華語流行音樂界之震撼性多年來罕見。想知有幾勁?華語歌改編日本同韓國流行曲唔出奇,F.I.R.調番轉兩個大國改編番佢地d歌,吹唔吹脹先?賣點係超高檔次製作的《無限》可能太高檔次而缺突出,《飛行部落》相反放過頭唔夠平均,好歌已成經典,淡的卻可以好淡。見一路失準唔多穩定,第四隻碟《愛.歌姬》上年出時期望不大只志在支持,點知痛定思痛極級回勇,新碟寫歌得加一體性高,嘉賓同表演又多突破,我心目中比《飛兒樂團》更強,2007年聽最多中文碟就係佢,地位足以同謝安琪《The First Day》爭長短。得以贏盡我心之最重點,係咁多隻碟以黎未寫過一首電子disco歌,又或我仍頗為反感之(台式)R&B,兩種皆屬華語地區長青曲種,以佢地實力加上女主音要寫唔係寫唔到而且寫親必紅,但可以完全唔靠呢兩類歌而成功至揚名海外,令我非常尊重佢地。之後個producer整多隊二人組合出黎,結他佬自己又出左隻solo,不過歌路pop過頭唔太鍾意,都是F.I.R.無敵,《愛.歌姬》聽左無數次後,好想睇佢地live,我上次睇已經係04漫畫節,台風過份左少少(太日式了),表演已勝過大量本地歌手/組合,衰短。中間三隻碟有黎香港,見過上勁歌金曲,不過宣傳新碟之外有冇演唱會就唔多清楚。重點係「闊別多年」再到香港一開就開大場,去到人數比紅館更多之機場亞洲博覽館,加上平安夜搞咁有意思,最重要星期三開show!


「多謝主辦單位!多謝F.I.R.!多謝!唔係我都未必睇得到!」
「你睇我返工公司條街叫咩名,就知我這個fans有幾忠實啦!」

「一見到公司地址個街名,我立即跪地叫老細俾我入佢間公司做!就係咁愛F.I.R.!」



平安夜對打工仔黎講係喜節,除左返埋今日有得連放幾日假,平安夜仲有得早放。點知我不在此列。人人唔係食完飯走得都早兩三個鐘放,我早一分鐘走都冇,五點都好丫頂你,一向公司果頭搭巴士出機場最快都要個幾鐘,又永遠唔會搭貴巴士幾倍之機鐵,初頭預左今日有得早走,就唔怕平安夜封路塞車趕唔切出機場。唉點解我咁苦命。不過相對地,因為今日個個早走入市區玩,正常放工時間少左人,反而出機場條路完全唔塞車,話咁快一個鐘唔使就到,距離宣稱開場時間八點三仲有九個幾字,會場又多野睇,正好俾我兜幾個圈。





商品眾多,全部圍繞《愛.歌姬》重點歌曲加今次巡迴演出主題《第十行星》設計,雖然唔太好呢類野,睇見都覺得設計吸引又多款式,衫都有兩款喎,坦白招供,項鍊組我有d興趣架,為左塊pick!反觀香港,往往演唱會場地最多最易買的紀念品就係明星相同明星相,冇乜歌手同唱片公司會做為新碟同新碟演唱會整主題商品(有趣在呢度反而搵唔到),但而家download年代主題周邊商品先最搵錢喎,點解反而冇乜人開發呢條財路?想到之例子只有軟硬同陳慧琳飛天舞會,當你做到一個吸引主題自會大把人幫襯,但兩個例子皆屬殿堂級,是否唱片公司覺得新人名聲不足,投資開發商品回報未夠高,所以出碟可以包十幾樣贈品大大份賣,到演唱會反而咩都冇得買呢?





上幾次黎睇show都冇見過,或者今場夠大啦,多左個免費化妝攤位,有得免費幫你搽面同隻手整閃整珠。見有排等,有考慮過叫睇檔班師奶幫我化番個black metal屍妝再黐隻黑色骷髏頭上手背,入場\m/果陣型到爆嘛,不過實在太多姐姐仔跟機了,只好作罷。再四圍行,水洩不通,黎左三次機場睇演唱會,終於見識到何謂大show:第一次睇NINE INCH NAILS,藝術成份最高一份,亦因此而落得細場搞,都唔知有冇一千人入場,但細場好處係音響控制好非常靚聲,同台上台下距離接近零。第二次睇MY CHEMICAL ROMANCE,潮爆外國勁band當打,立即升級到中場,不過場內貧富懸殊意識過份強烈,亦親身體驗點解咁多人話「機場開show聲唔掂」。今次到第一隻碟已獲無數中港台fans力追的台灣流行組合,遇著紅館裝修,唯一選擇得番紅館以外香港最適合搞演唱會場地機博,話晒可以坐萬三人,近來台風盛行,香港人又咁迷日本野,總有人買飛入場...卦。希望唔係派好多飛啦。入到場館距離博覽館仲有個幾字路已經幾百人一齊行,博覽館入口更加行都有少少困難,加上地下樓上兩層都人山人海,萬幾人入場不是蓋的。八點一已經開咪叫人快d入座,我到八點半先入都未憂,演唱會例遲之餘萬幾人入場,加上機場咁遠大把人放工趕車未到,點會咁快入得齊人開場?遲開場仲有另一個原因。今次黎睇F.I.R.係同中學同學也哥一齊玩團購,佢果邊有幾個人一齊去,又識得人賣飛就一齊買方便大家,不過去買時內部d人話「售票情況非常不理想」,建議有心買飛都唔使咁急,因為最後一定有平飛甚至免費飛。我又冇乜預過會有免費飛(做音樂但咁大個仔從未試過睇免費show,都算柒了),最後入場中價飛三百蚊自動升級做頭等四百八飛。坐低睇睇即時明解:





我位置係舞台右邊中間,張凳向前,換言之睇show要個人向右轉近九十度先睇得清楚(or條頸轉九十度,假如你覺得噉會舒服d),絕對係不受歡迎死位,難怪賣極賣唔去,仲肯自動幫我地商務upgrade上頭等啦。其實呢d位本身就唔應該計四百八,所以去到八點八九臨開場,我地同對面兩個厲頸位仲吉左一半,咁樣衰,唔早開場非無因架。難怪要升級谷飛了。不過除左中同右中全場爆滿,又唔似所傳咁唔賣得,雖然香港最紅的第一隻碟已經四年前,中間幾年冇乜大動作,而家台灣興青春偶像派路線同F.I.R.完全相反,都擔心仲夠唔夠叫座力?


「希望唔係為好好睇睇而派飛派到爆場啦。」


第一次入到機場博覽館見識,新伊館式正面台加萬三個位,擺明整黎做演唱會多過做其他活動i.e.博覽,睇band show呢種場就最好睇,因為睇同聽集中晒前面,感覺先似睇樂隊表演而非歌舞流行演出,而對於F.I.R.之期待,係佢地既是搖滾,又是流行,亦是偶像三合一組合。舞台製作繼續玩銀河。



「成場最想睇,係上面幾個波幾時跌落黎?」



我認我睇演唱會睇得少大驚少怪,到頭來唔止個場起得好,成場表演視覺效果十分出眾,一向睇show唔多會影相(自己show除外,雖然靠人地影多),因為攝影技術不足同部相機太廢,今場好多奪目時刻而且編排有心,不禁每段為突出時候影一兩張相(當然失敗作佔近全部),再呃人地d相充撐場面。呢樣野睇其他show好少,包括製作更專業更大規模之陳慧琳演唱會,能令我「破戒」,可想而知今場幾咁精彩。





差唔多八點九(如果唔使播大量無謂機博自我宣傳片段同無盡主辦單位&贊助商名單,可以早最少兩個字),由第二隻碟《無限》主題曲(亦係佢地最成功快歌)開始08年F.I.R.香港演唱會。台左右各有電視,特別在播埋歌詞:





相信流行演唱會播歌詞唔係咩神奇事,但我睇過之演出確冇乜印象唔止出一兩首,而係全場全部歌不論語言都有,出全首之餘仲大致夾到演出。係咪唱國語關係,黎到香港特登出埋字幕俾大家聽清加一齊唱?未必前無古人,但本地演唱會少見專業至此。開場up-beat section F.I.R.最出名亦最擅長之快歌/party rock一連三首,而且個台去到左右兩邊前三份一,三人成日走去同坐得前的觀眾握手(可惜我個位在中間,冇得埋身),全場立即high晒,當然唔少得例牌講廣東話搞搞氣氛,仲要講好鬼多又講得到先過癮明顯俾心機苦練過,單個開場已見盡建寧sir才華同三人非凡表演魅力。


快完就梗係慢啦,第二部份ballad section意料之內玩緋聞男女合唱,我成日覺得結他佬聲同唱唔差但亦唔突出,聲底又薄,有時合唱尤其高音位俾人遮左,不過以一個你冇預會有份唱歌、冇諗過會識唱歌之成員(初出道佢只係結他手同和音,第二隻碟先正式唱歌),有噉成績算唔錯架喇。兩三首後入晒後台,播一段台劇式獨白片間場,台下昇部鋼琴上黎,男主角solo時間開始。自彈自唱一首歌後,超出奇地唱《其實你心裡有沒有我》,冇錯就係當年許志安加鄭秀文經典合唱情歌,唱廣東話喎唔係國語喎!至於鄭秀文個位搵到曾赴台發展(但聽聞失敗)之薜凱琪頂替。一個台灣人黎到香港選擇唱廣東合唱歌,真係夠晒搏命,雖然咬字唔太得(你咪當周杰倫唱廣東話囉呵呵),加埋聲底唔厚,一到合唱位兩個人唔多夾,但大家志在開心同「台灣人唱香港歌」嗟,以及當中勇氣。跟住梗係嘉賓獨唱一首,首歌唔識因為我接近未聽過薜凱琪,唱功同感情本地黎講算中上,不過觀眾反應好淡成為廁所位。老實講,我都有少少動機去廁所架。


「搵謝安琪咪好囉!雖然佢係環球而F.I.R.華納,都冇乜可能架喇。同最大問題係,F.I.R.黎香港,有幾多歌手有情誼肯『仗義』?」


F.I.R.出名除爽快party rock同靚絕慢歌,仲有異國風情,演唱會第三部份係一次過玩盡民族歌之folk section,《月牙灣》玩中樂,《塔羅牌》玩中東,《飛行部落》玩部落,仲有人出黎跳舞,係全場最特別一節。不過出現左一個重大失誤:《飛行部落》唔知結他定唱有事?段solo彈左一半唱已經入,即係早左四個bar入chrous,就我睇到結他佬彈左半段solo突然行左去,跟住歌手就開始唱,係結他手唔記得左彈晒段solo?定彈一半想走位,歌手睇見佢行開以為夠鐘入而出事?邊個位出事都好,好在最後兜得番冇事,但已經夠甩得相當明顯人人睇到,慘在《飛行部落》除左係佢地最好加我最愛,段solo度得靚後半係噉tapping,一心諗住入場睇佢現場彈呢段最佳F.I.R.結他solo架!點知而家首歌搞到噉...另一樣野係伴舞。首歌搵左班dancer跳舞令場面更加民族化,係咪我個位方向問題定個台太細?硬係覺得各有各跳大家唔多夾,加有點求祈,比起陳慧琳等超專業舞蹈團體,水準有段距離。


「不過,聽歌嗟,本身都冇預過會有dancer,咪當bonus囉。真係咁恨睇跳舞,之前就撲飛睇同一場地旋轉到破埋世界紀錄的郭富城啦!」


玩完民歌跳完舞,大家都支力了,監製話呢度攝番個unplugged section俾大家抖抖啦。從來睇演唱會最好睇就係不插電,簡單純粹之原音音色同編曲最能感動人心,加上睇完前三部份,編曲表演實在太高水準,更對此不插電環節再加期待。歌曲大多是非主打中慢板歌,但唔好睇少佢地b-side,好似新碟我就覺得album track勁過派台歌,唔揀主打反而令我更開心,unplugged得黎比想像中豐富先係意外收獲,而且兩條友著住件白恤衫就上台,連裝扮都配合埋。選曲又合我心意,第一隻碟《流浪者之歌》同《無限》《應許之地》兩首皆為慢歌精選,最後一首《Change》更加係《愛.歌姬》愛曲,呢首仲要三個人一齊彈結他,今晚先知原來女歌手都識彈結他,雖然頗為生手,彈唱時又成日望天唔多自然,都係主力唱歌算啦,始終較在行嘛。有機會碰到此三人彈結他之難得場面,梗要立即影番張相留念。



「...其實女主音枝結他有冇插線?」



雖然主路線係日式即係超pop加超靚,後三隻碟鍾意間中玩玩黑人音樂,第五部份就係party section,《1234567》同《Love*3》等輕快爵士歌連住落,再請班姐姐仔同佢地一齊走黎走去握手派禮物,全場幾咁開心,不過我個位離得太遠,兩樣都冇...又跳又走炒到全場氣氛好熱烈,加上玩jazz自然後面各位band member有表演時間,《Love*3》intro連和音都有得solo,勁到爆。玩完jazz第六個section祝大家聖誕快樂,梗要唱George Michael首經典聖誕歌《Last Christmas》啦,唱唱下連蕭敬騰都出黎唱埋一份,會搵佢真係估唔到,但再一次顯出F.I.R.黎香港,真係好難搵到香港歌手做嘉賓。咪仲開心,一個蕭敬騰唱功已經殺左大半個香港樂壇啦!自己唱多兩首一慢一快,慢果首當然唔識啦,但睇過《星光幫》d片,佢係好多年黎冇幾多個令我覺得真係識唱歌之華人男歌手,即使歌路唔對我口味,入耳仍然覺得有感情有料到想聽落去,這就是實力同感染力。快歌反而揀BON JOVI《It's My Life》。意外程度不下於見到佢現身今場演唱會。



「鬼呀!」



台風極度八十,即係好多挺胸收腹手指遠方天際唱高音令班妹妹仔覺得「好rock」引來連番尖叫的pose,雖然有時扮野過頭,但我總算受呢種「好rock」台風多過扮女人型扮低能果d。聽晒今場兩首快歌加一首慢歌,覺得佢有點不如前,以《It's My Life》比,當年參賽駕輕就熟,唔知大場關係定表演太多狀態不復當年勇,今場唱得唔多好。又有乜所謂呢?你睇佢一出場台下班妹妹仔反應幾咁瘋狂就知,大家志在有得睇佢真人同聽佢首慢歌嗟,快歌玩成點唔緊要,因為快歌台風比演唱重要,又好在表演功架一流,反應仲好過主角,水準同觀眾迴響更加係對上位嘉賓薜凱琪比唔上,唔係唔想支持香港歌手,不過一拍埋其他地區歌手比較,實力同表演真係高幾個層次架踢館踩場班海外高手。


「唔係講笑,睇完今次live,假如佢會黎香港開演唱會,我有興趣捧場。」


以上描述不止限於主角。蕭敬騰唱完入番後台,輪到隊band表演,呢類樂隊solo時間通常係其中一首歌中間拉長,歌手講個名每人秀一段介紹各位成員,今場在我非常破天荒,樂隊介紹係全隊band自己玩一首歌,仲要幾technical幾progressive果隻,邊個成員solo一個近鏡影住,電視機再出佢個名保證大家識得佢。當然台下冇乜反應啦,各位妹妹仔入場係為睇F.I.R.同蕭敬騰嘛,你叫隊band噉樣啡法佢地理鬼你咩?作為metal友我就睇得好開心,之前玩jazz每人一段仔已經好正,而家真正solo首歌唔係求祈亂寫,而度好晒全隊兩枝結他兩個keyboard再加鼓同bass一人一段(長)時間,最後成隊band玩到thrash metal噉款結他佬勁啡,知唔知我諗起咩?首歌激似SCAR SYMMETRY第三隻碟《Holographic Universe》種重舊世代氣息之摩登melodic death,雖然《Holographic Universe》d歌本身冇頭兩隻碟咁恆咁技術,都唔算普通碎料架。全場此半個字令我最為讚嘆,後面隊band,勁過前面多多聲。始終站在前面的,是表演者而非樂手。


蕭敬騰兩首歌加埋隊band表演,俾機會三人抖番四五個字,需要咁長時間回氣加聚氣是有必要的,隊band玩到咁恆,就係為帶入最後rock section,等左好耐喇,因為搖滾在日式路線的F.I.R.中佔非常重要地位,除左每隻碟開場,唔少album track都係流行曲中難得地爆之(hard) rock。最想睇《Revolution》,雖然話「向nu-metal取經」但查實頂盡只是hard rock,想知是CD版加埋中樂,到solo二胡同電結他一齊彈,live點玩?有點失望地冇左中樂部份,solo亦變成「single lead」。全晚唔計搵埋嘉賓助陣環節,單F.I.R.自己演出,最長就係此rock section,話晒最後一擊嘛,玩到場中間落埋天橋真正rock show feel勁精彩:





大半個場玩到起晒身,最後台上仲同觀眾玩「一二三一齊跳」,慢歌掂rock又rock得起,這就是真正的流行組合了,勁在女歌手著住短裙走黎走去,仲要玩到上埋天橋,認真搏命。最後唱多首《我們的愛》,話晒係近年最成功華語流行曲,旋律、編曲、歌詞同演譯皆近完美,一首歌已經為F.I.R.贏來萬千fans,編曲改「輕」一點方便全場合唱,相信我屬於場內冇&唔識唱的1%人士,此萬人空巷之景確冇太多本地演唱會(同metal show)做到,pop show(不論真pop、pop rock還是pop metal)還是有其獨有價值。女主角自不然唱到喊晒,返到後台琴手秀番段變奏導入encore,演唱會海報套衫終於出場。《我們的愛》之後當然唔會俾佢停,繼續攻第一隻碟成名經典,唱完《Lydia》到一首我未聽過之非常非常非常靜抒情曲,從chrous不斷「thank you」同「謝謝」,相信歌名會係其中之一,歌詞當然是釘橋各位粉絲了,可說是F.I.R.版的《總有愛》或《跟我走》(...)。臨尾當然唔少得同《我們的愛》地位對等之《Fly Away》啦!仍然活力充沛,不過唱已經唱到盡,後來副歌接近隊晒咪俾大家唱,入最後chrous一段把聲直頭變埋,好在已經唱到尾,如果打算玩到聖誕倒數唱多半個鐘,就真係要擔心女主音之後巡迴落去點算。之但係就算想倒數,機博規矩同偏僻地點所限相信未必可以,紅館就應該冇問題,難得撞到平安夜黎開show玩唔到倒數,可算是浪費左時機。不過最好在係,


「好在今次演唱會冇玩求婚!再玩,真係頂唔順!我地唔悶,都怕兩位主角玩到悶,最後決定唔結婚算!」


場show八點九開始,到十一點三四完,玩左三十幾首歌足兩個半鐘,音樂多元化表演好睇氣氛一流,今場真係非常抵睇呀,係要打橫睇辛苦左少少,不過未算最辛苦,好多年前睇迪克牛仔,俾人派位派到去山頂最頂最角個位,今次算舒服同清楚架喇,再比較跟住同萬幾人一齊爭巴士,去到旺角平安夜塞車塞足半個幾鐘,搭車返屋企所需時間相等於睇左大半場show,好在搵到位坐咋企的話未返到屋企已經死左(呢個故事教訓我地,節日假期前夕千祈唔好去機博睇show)。不過我入去睇完show出左黎返埋屋企到左呢一刻,仍然唔多相信個場睇落似只似新伊館大小、同紅館氣勢相差極遠,居然裝得落一萬三千人,唔多信當年郭富城破世界紀錄旋轉舞台係呢度。真係萬三?真的話,相信係d位密到迫到黐線的原因,我都冇乜試過睇演唱會坐得咁辛苦,唔係我地地段冇人一個人有得霸三個位,真係企足全場好過坐低。另一樣機場多人講係聲,黎三次試三個場,細場一定最好聲架喇,會唔會大場最唔好聲呢?好彩中場先係,始終黎得大場都係明星,製作單位必定落足本去做卦?一貫band成份重之本地流行演唱會通病,爆低音之後到唱其他撞成一舊、樂器同歌手大家爭情等情況仍有,好在過左開場第一部份立即大幅改善,綜合晒音響、影像、燈光同場地,比紅館差少少,但最少(感覺上)同一價位地段較近舞台,印象比紅館睇show好。如果音響能夠再做好d,如改善爭聲,就更加一層樓。F.I.R.半個月後X-JAPAN同一個場搞,相信當晚全場肯定會黐線,同絕對覺得呢度搞大band表演會好過紅館好多。相信是正面台同有得玩天橋關係。


另一樣擔心,係聽過唔少人劣評女主音現場唱功,始終我真正睇過只有四年前漫畫節,果陣剛出第一隻碟加上只玩兩三首歌,表現我覺得冇問題,但好難以該作準。單睇開場三首快歌,唱係唱到但明顯非常用力已有隱憂,不過慢歌運氣音準同感情通通達標,去到第三部份開party,因為節奏快加上走黎走去派禮物加跳舞,好多verse細聲到近聽唔到,最後連串rock歌仲扯得到,玩到encore臨尾《Fly Away》先出事,直頭接近逢chrous都隊咪俾觀眾,最後一段verse更加聲都變埋,可能事前聽得太多負評,加上主要出事時間係最後,表現甚至算穩定,畢竟有外在美有唱功聲又靚同冇過份明顯換氣聲(此最難得,香港冇幾多歌手做到),如此就是心目中之流行女歌手。反而結他手先係令我失望果個。或者聽CD好多solo彈得正,搞到我覺得佢手結他好得啦,現場唔符我所想,因為最難果d都係後面班友彈(後面隊band太強了!錄音唔係搵人代彈卦?),俾佢彈果d大多較易掌握,可惜亦非次次得心應手,就如大失敗之《飛行部落》...不得不唉多聲。演出小失誤冇乜所謂,有樣野叫做缺憾美,而且前面三個有事後面隊band補晒有突啦,選曲方面亦大致中晒我想聽d歌,要彈只有唔見CD中同信樂團歌佬合唱首《需要你的愛》,因為自己隊band結他佬把聲太薄卦?可以叫蕭敬騰代唱丫!同冇海豚音《愛過》,聽八十年代metal出身令我對高音有所追求,包括靚男聲(即係高得黎唔基的男性)同靚女聲,八十年代神髓之一就是廣闊音域搶高音呀!聽慣關心妍、王莞之同謝安琪等唱功派,新一代Gem齊齊癲,而家聽女聲賣弄或非賣弄高音係我基本要求,《愛過》有一下「技術性」高音,破左F.I.R.先河,自然想知道live唱唔唱到啦,鬥唔鬥得過《後窗知己》?不過唔唱現場可能係明智決定。


好在氣氛補救一切。三人之中keyboard似乎係最得閒果個,佢後面已經有兩個超強keyboard手啦,又唔使做主唱得閒唱唱和音就得,有d歌直頭唔使佢出手,單男女主角出場就夠佢可以返入後台煲番枝煙,但佢值錢在度歌嘛。金牌製作人就係唔同級數,F.I.R.音樂咁多元化,有d歌用到少少新奇樂器,好似unplugged時玩打箱,即係條友坐上個箱之後玩敲擊噉打前面,睇落簡單又可以做到好多聲出黎,中文演唱會我第一次見人玩,而呢樣只係其中一樣以前(中文演唱會)未見過之樂器。會留意配角同樂手,今場好多野睇,而能夠包含咁多元素同時融合成功,F.I.R.大紅大紫實至名歸。另一進步係台風:四年前睇佢地表演,玩左唔夠三個字已銘記於心,全靠非常日式台風,即係metal友表演都未必有咁放呀。可能唔止我一個噉諗,今次台風冇咁誇正常/正經左好多,唔會話冇乜事都fing晒頭搖番餐,雖然仲要好X-JAPAN地彈琴低音走去高音要掃到訓晒落部琴度,同木結他掃個chord都要拉到上頭頂(真係好IMMOLATION呀頂你),即係明知前兩個唔彈都唔會對首歌有任何影響,話晒真正出力係後面班靚,好似今場噉起碼俾識睇人士覺得你真係有彈過野有出過力就好足夠,玩番少少野調劑現場氣氛/呃妹妹仔尖叫亦無可厚非。


睇晒全場三十幾首歌兩個半鐘,不得不再對建寧老師致敬,全靠佢,令你睇到海外製作水平確實比本地高出不少。香港演唱會有個現象,就係你永遠覺得現場d歌好聽過CD好多,原因係首歌往往會被大執一餐,可以改編到同原來極度唔同,唔係話玩unplugged玩standards果種改編,而係直頭將成首歌改成另一種風格種改法,例子可見陳慧琳演唱會不同主題。當然一首歌唱左聽過無數次後,改動一番再表演自會俾觀眾耳目一新感覺,亦可以配合到個別演唱會主題,但調番轉諗:點解需要整咁多水色呢?某程度上K歌係一個原因。如果編曲太複雜,又點會容易唱呢?落好多筆墨落器樂方面,有幾多人會欣賞,同令歌曲長左,唱K時又點會開心呢?花長時間製作一首K歌,絕對達唔到經濟效益,所以往往到演唱會監製出手,先能令歌曲音樂性大幅提高。今場F.I.R.全部歌包括不插電曲目,演譯方式非常忠於原版,冇作過多少大改動,亦即無需要整色整水已經可以直接演出,大家又聽得高興唔會話聽得太多而悶。話晒能夠被日韓反改編,點都有d料到啦,再者自己band四隻碟加結他手一隻,有男聲女聲兩位主音,樂風又夠廣泛,從開始創作起,目標已經係聽得又睇得甚至唱都得(最後一項自己講完都有保留,F.I.R.d歌唔係易唱的),睇完深深體會到香港主流音樂創作之單調。同鍾意佢地份氣質,高貴華麗服飾得女主音有份,另外兩個unplugged夠膽死著件白色底衫就出黎彈,搵唔到本地興鮮艷設計玩晒designer style種浮誇,唱歌中間又會同觀眾講講歌曲背後、自己故事、心路歷程,同好尊重幕後一班 ,令人感到非常親民,上網世代有MySpace有Facebook,明星已經冇以前咁高不可攀,但佢地表演時散發到明星風采,又係香港少見,好多本地歌手只令人感覺壓唔到場。表演場地係另一令我感動地方:中文名亞洲國際博覽館,英文名叫Arena,對於一個八十年代樂迷、一個metal友黎講,arena呢個字、呢種場地別具意義,因為該年代最盛行就係arena rock,八十年代rock/metal其中一個大家覺得好聽之處,就係寫俾arena呢種大場地演出,表演時幾萬人一齊參與一齊唱。自從九十年代音樂意識轉向個人化,arena rock、stadium rock已經過氣同唔潮了,因為講緊人際關係破裂疏離,而唔係大家團結一致 - 你唔好同我講全場齊聲「fuck you」然後一齊jump the fuck up叫團結呀。好難得香港終於再有一個真正似做rock show、band show的arena。更重要係F.I.R.帶得出arena rock/pop之氣勢。所以今場show令我更愛佢地。


「這是我睇過最滿意主流演唱會。點解冇一場香港演唱會能夠俾到我同一份感動、同一份感覺?點解香港人自己做唔到?」


今場係自己2008全年最佳演唱會,後面隊band更是大驚喜,第時黎多幾多次,我就睇幾多次。快手出新碟,同再黎香港啦F.I.R.!