顛覆M Ego Fall Live in Hong Kong


「特登出番張poster,因為我好鍾意佢地新碟封面。」



新視野藝術節十月中開波,跟住成個月個個星期都會非常忙,月底個禮拜終於冇show睇,可以暫別文化中心小休一下。方式是,去Hidden Agenda睇show。(...)顛頭M是第一個中場休息節目。


先講講隊band,冇幾多隊蒙古band我識得,有機會睇現場更加係第一隊。以前連台灣或者深圳咁近,一年都冇幾多次睇到呢d地方樂隊表演,而家差唔多逢星期五六都有外國或內地表演,仲要蒙古咁遠都黎到香港,可見國內獨立音樂發展之蓬勃與民眾支持度,同香港主辦單位勞心勞力,香港地搞show你知幾難場地貴搵樂隊難各位老細仲要貼埋錢叫佢黎睇都可以嫌三嫌四,唔係有心人肯堅持點可能似而家外國樂隊表演仲多過本地樂隊?請大家齊齊為HA仝人鼓掌。


第一次見到佢地個名都幾頭痕,中文名顛覆M,中文又有英文字十分古怪,但政治意思十分hardcore,以為英文名係Monogolian Rebels或者M. Revolution之類,點知係解釋完全唔關事的EGO FALL,氣勢立即變番普通metalcore band水平甚至有點emo。有見及此聽歌前其實冇乜大期望,好在音樂得,兩年前2008第一隻碟《蒙古精神》,我會話係美式melodic death即冇breakdown只剩下thrash底的metalcore,再加點瑞典現代melodeath不能或缺之synth-pop電子,仲有少少(唔太多)蒙古音樂,老實講第一隻碟唔係特別好,但玩得唔錯,同咁多樣野加起黎夠特別,罕見之蒙古音樂始終殺食。今年新碟《Inner M》(好似冇中文名?)寫歌好左增加變化亦更通順,而且民族音樂大幅度增加,差唔多能分類成folk metal。所以十分期待。睇完朱哲琴隔個禮拜,又有機會欣賞蒙古音樂了。


成日覺得Hidden Agenda勁在好多時可以就到星期六日搞show,需知辦外來樂隊演出往往是主辦單位遷就人地巡演檔期,而好難要人地就番你,HA反而幾多場外國band演唱會唔係星期六日開,真係好好野,大佬如果禮拜一至四晚開,遲放工做左成日又支力第二朝仲要早起身返工,大把人包括我唔願黎啦!今場都就得到禮拜五,你都咪話度期果班唔勁,最符碌今個星期要過會展做展覽,我又咁蹺編到今日唔使過灣仔留守公司,先至有命黎到睇咋。好可惜,顧此要失彼,睇唔到PERI M。期待之EP由中秋節延期成個月到22/10出,但果晚一早買左飛睇鼓王群英會,是好失望的因為我只睇過佢地兩次但好鍾意,睇show可以順便買埋碟真係好想捧場。而當日撞正二十年一遇超級颱風,可是李氏力場強橫幾大風都冇用,香港側邊台灣大陸菲律賓橫風橫雨死不知幾多人,唯獨香港滴雨不見風球都落埋,證明2012年全世界最安全地點就是香港,大家放心到世界末日我地仍然可以安心繼續做李家奴僕。風打唔成,但好多show驚會掛八號波,風平浪靜都紛紛改期(竟對李家如此冇信心,一干人等拉出去斬),好事黎的 - 如果場show唔係延期到跟住個星期五今日的話。結果,都係睇唔到。


「其實PERI M按照本來計劃,中秋節開新EP發報會就最好我一定睇到,不過此乃另話,今晚講的是EGO FALL。」


經驗之談,HA show你預一定最少遲半個鐘開,今晚話星期五始終係返工日子,加撞PERI M(佢地fans唔少,而家改左今晚一齊開絕對有影響,最少本身我一定仆到去睇佢地先),放左工慢慢躝過去,八點半先到,仲叫早。結果係再多九個字先開場。某程度上係迫住開,場面都幾灰,我入場時場面非常靜,表演一班人數,係觀眾人數之倍數計,過多半個鐘先開始多人,雖然形勢仍是台上多過台下,但再落去就變貓頭鷹時間,加等開show時間仲長過場show實俾人小爆。不過我覺得反正都係,其實遲多個鐘十點至開未必係壞事,一來唔係個個好似劉Sir咁幸福(定頹?)唔使OT準時六點放工,同有心黎總會黎,香港indie gig的智慧:無論幾細,一日headliner未出場,都會繼續有人入場。


「但其實仲有另一個原因。等開場時,兩隊band劈酒劈酒黐晒線,一枝駁一枝劈唔停果隻。再唔開,佢地會貓到show都出唔到。」



THE INNERCORE http://www.myspace.com/theinnercoree

opening的INNERCORE未聽過第一次遇到,成班鬼仔,結他佬件MACHINE HEAD講晒佢地玩乜 - 雖然你問佢地,佢地會答你自己係玩metalcore而唔係post-thrash。兩者有著歷史淵源,你問我有乜問題,自己最膚淺的解釋方法「post-thrash是冇breakdown的metalcore」,同我覺得創作post-thrash比metalcore易撻Q得多,冇正宗thrash咁直接咁旋律化,同時唔會及metalcore咁重hardcore壓迫力未夠,最常見缺憾衝唔起變化不足加欠重型,現在回顧是自身過渡型態本質搞到兩頭唔到岸之尷尬。遺憾地INNERCORE第一首歌就係例子,開場加第一首歌,加台下凌落景況,難免影響表演,樂隊尤其鼓手漏甩得幾嚴重,對佢地印象相當負面,但第二首歌有起色,跟住三首似樣了聽到好high,特別第三首歌riff有點阿拉拍十分特別,開頭只想佢地快手玩完,點知最後會嫌得五首歌太少。事後講番鼓佬係返緊工中間take個break過黎出show,其實好多鬼仔band友都係做酒吧做夜市食店,呢種返返下工走去出show出完趕返去繼續做野好平常,但不論狀況,老實佢本身技術都唔多合乎要求。



顛覆M http://www.myspace.cn/egofall

主角十點零出場時,場面終於似番場面,我諗最後有五六十人。加入另類樂器之樂隊,對佢地現場表演從來有點質疑,黎到live可以保留幾多成真實?因為有個隊員玩sampler,其實預左所有民族樂器部份同電子一樣都係錄音搞掂,不過非常意外bass佬會喉唱。唔知乜野黎的話,返番兩個禮拜前朱哲琴,相傳是內蒙古失傳一時絕學,後來外蒙同其他地區識喉唱前輩返去教番新一代,可以同時發出超過一個聲部,一個人唱晒主音和音,我冇諗過呢度都會見到非常老實,因為一直以為只係搵guest唱黎到現場播帶算。所以成隊有三個歌佬四種唱法:正式歌佬唱拆聲清聲,sample佬唱清聲同山歌式高音,加埋bass佬喉唱,音樂又加電子,編曲夠晒豐富同層次,好多野live播帶唔係成枝馬頭琴拎出黎彈我都冇乜所謂。


第一首歌反應已經好過INNERCORE,做得全國巡迴水準點都唔會差,成隊台風一流玩得又夠齊,sampler其實好少野做,但條友一得閒就會走出黎玩出黎跳識搞氣氛,再者呢類core底音樂聽碟其實好悶,但到live係另一回事,頭一個字已經全場high晒。重點肯定係最後:尾二一首歌,聽過碟都冇印象加風格十分唔同,metalcore得黎變化多過而家d歌,可以肯定係新歌黎,當第二隻碟對我黎講已經係一個大進步,假如呢首歌就係黎緊新碟大方向,第三隻碟可能會比《Inner M》更精彩。完場是第一隻碟的靜慢歌《深淵的迴響》,正路的埋尾通常都係揀自己最恆或者最抒情果首,不過十分過癮新改編做嗌爆版,原來中間木結他solo變左melodic death笑爆咀。但遺憾是冇玩新碟首慢歌《永恆.瞬間》,我鍾意呢首多好多。同成場只玩得九個字左右,又冇encore話完就完。事後問番,bass佬原來係特登拜師學喉唱,本來想問問原理係點,但聽佢講喉唱歷史已經唔清唔楚,人地唔會體諒你香港人普通話水平超低而就番你,北方口音已經難明加照樣平時噉超高速地講完全唔會聽得明,既然係噉問佢喉唱技術都晒氣啦,因為問完都只會成個白痴仔噉應佢


「是啊是啊對啊哈哈哈哈」


成場除左台上好睇,台下都係。主力是THE INNERCORE一班,佢地表演果陣,現實是捧場的會郁的大多係佢地拉黎的鬼仔 or ABC朋友,但表演完成班人留低,顛覆M時隊band同佢地fans一齊衝台,而且仲要玩得癲過之前,成班人猛咁fing fing到走埋上台fing果隻,同十幾個鬼仔自己玩插水,一個衝上台插落黎,落番地第二個走上台插,可以成班人成首歌由頭插到尾。最過癮今場唔係百幾人果種今場只得零星四五十個,而且玩果班只係鬼仔一堆十幾個,人手有限自不然經常出現插水唔中或唔夠人接實的搞笑仆街情形,同插完水唔落地玩人傳人,但實情因為太少人根本傳唔到,結果係插完水之後俾班人抬住佢行黎行去,睇落好似抬棺材,而成班人入面最喪係INNERCORE個結他佬,佢睇顛覆M時仲癲過自己隊band表演時。仲有其他奇景,有對男女企台前搭住膊頭fing,兩個人飲一枝酒,一個飲酒一個fing,飲幾啖遞枝酒俾對方之後交換崗位,仲有條友煲住煙fing頭,上下fing果隻,一面fing一面食煙,每次fing個頭向上次就噴煙。睇班鬼仔已經夠笑到你仆街。唔知點解,每每出現呢類場面時,人物都是鬼仔鬼妹。香港band友都係自己表演之後,各位成員或者拉埋fans出去煲煙吹水,有自己friend表演先入番場睇,又或表演完直頭立即收工走人。好多時反而係鬼仔band會表演完之後捧埋其他樂隊場。


雖然遲開場,因為兩隊都玩得短,好早十一點零已經搞掂散水,最後有五六十人,觀乎今晚大圍,有此入座率都算理想 - 而家搞indie gig其實好慘,冇出名band冇明星的話,五十人已經係個「好理想」目標,但就算唔搞外國band黎,賣五十張飛本都回唔到啦,有何理想?難怪要賣埋酒水,因為酒水收入分分鐘多過票房收入,而且係樂隊自己勁買,即係請佢地黎仲要靠佢地幫手貼番租金咁灰。你話因為撞show或其他原因,但諗深一層,同晚其他演出,觀眾對象應無太大重疊,多show照計未至於影響極大,尤其是從metal角度睇。而家多左show差唔多個個星期都有外地band演出,但當中有幾多係metal band?你又親身聽過睇過幾多蒙古band,仲要係玩蒙古民族音樂加metal,呢類機會有幾可你覺得?仲要買張飛一舊水有找。兼表演樂隊及場地有質素。但,如此有實力有特色,揀埋星期五晚表演叫盡量遷就,九點幾開場你遲放工都趕得切,場面音響得氣氛好,已可用價廉物美抵到爛形容,一樣見唔到多少本地metal友出現。或者現在真的已是emo天下。