Roger Water's "Dark Side of the Moon"



已經講過,標到明係Roger Waters就唔會係PINK FLOYD,但唔係PINK FLOYD又點?Roger Waters某程度上已經等同於PINK FLOYD,所以今次得佢一個黎,冇左其他隊員、冇左David Glimour,加埋咁老,抱朝聖心態都要去睇。噉點解六點半前會見到我?因為放工之後先上舖頭拎野嘛,107要打埋電話黎通知「有好野益阿劉Sir你」,冇得唔上黎啦,一睇,

「係正野喎107!」

知道今鑊實會萬九幾人,特登遲d先過去差唔多八點先去到,仍然係超多人攝入去都攝成幾個字。票價由四舊到成千都有,劉Sir呢d窮人梗係睇最平啦條友真係好有錢咩,個位係右到好右加後到好後,同個台隔成兩百米遠,真係睇豆豉人噉睇。話八點開始但八點半先正式開始,噉就預左啦全場爆喎多人到,超過半個場係鬼,好多仲係一家大細噉黎,外國人對音樂心態係唔同d,上次黎會展睇騷係會爆到咁座無虛席係兩年幾前LOVE PSYCHEDELICO,如果連Roger Waters挾住"Dark Side of the Moon"之名今場都唔爆,香港地真係以後唔使再搞演唱會喇。叫得做PINK FLOYD,當然唔會係一般表演咁簡單,先天玩聲畫合一已經可以玩多人幾倍野,就連開場都有創意過人,其他演唱會入場等開場時都係冇乜野做頂籠播下歌仔,呢場都係播歌,但螢幕播住條友煲住煙聽收音機,歌轉歌就係條友係度較收音機,到最後更加係直落入演唱會第一首歌,亦即係就連呢個「開場」都係正場之一部份,夠晒新意。未聽歌未睇騷,最關心當然係呢場騷班底咩料?打正Roger Waters旗號就唔會預期有David Glimour或者其他PINK FLOYD成員,即係全部都係新人,但講新其實又唔算(太)新,除左鼓同bass,隊band包括三支結他、兩個keyboard、一個專吹saxophone同三個女和音,全隊加埋十一個人瓣瓣都有,基本上PINK FLOYD音樂所有細節都可以現場重演。三個結他佬都唔多識但其實幾猛料下,rhythm果個幫過THE WHO玩,lead果個Snowy White係"The Wall"開始已經一路幫PINK FLOYD手,但主lead guitar先係重點,唔知咩料但超後生,手結他真係得,雖然好多時都係忠於原著但自己即興黎果d野都唔差,睇佢個款、台風、手結他同唱都似個hard rock band友,呢個班底完全有料到,冇左David Glimour唔係完整PINK FLOYD都唔係世界末日。

PINK FLOYD演唱會最出名係視覺效果,唔止係聽歌咁簡單,一路落去仲有好多錄像、燈光、煙火同其他你唔會預期得到之事。見開場段片係條友較收音機,會以為玩"Wish You Were Here"先,不過"Wish You Were Here"首歌點聽都唔似可以做演唱會第一首歌,有聽開PINK FLOYD,唔使講都好大機會估到,PINK FLOYD演唱會之開場最適合一定係"In the Flesh?",第一個鐘流程係"The Wall"精華版>"Wish You Were Here"精華版>"The Final Cut"精華版>"Animals"精華版,即係「全盛時期」PINK FLOYD出名果堆歌,亦即係個個黎到PINK FLOYD演唱會都想聽到果堆歌,所有經典差唔多no miss地cover晒,選曲絕對令人滿意。intro唔使講架喇需知"The Wall"本身已經係幾咁epic先得架,冇可能唔用呢個intro黎開演唱會,過埋"The Wall"金曲之一"Mother"就落"Wish You Were Here"。玩左"Shine on You Crazy Diamond"、"Have a Cigar"同"Wish You Were Here",成隻碟玩晒我會更高興因為呢隻我實在好鍾意"Wish You Were Here"首歌同隻碟,但呢度都揀左最好果三首出黎,只可惜講玩唔係玩得太好,"Wish You Were Here"始終太神聖,加埋原版David Glimour實在唱得太有feel,Roger Waters把聲同唱都及唔到,呢部份有d失望。"Wish You Were Here"跟足CD版本,係"Have a Cigar"臨尾突然fade out入電台節目sample再駁"Wish You Were Here",我成日都諗,其實呢首歌開頭都係玩收音機,點解唔真係拎部收音機即場玩香港d電台?雖然而家連原版David Glimour唱之前咳果兩聲都有埋(證明真係用番原版sample啦),有d人會享受呢種100%原汁原味,但睇live我反而希望可以玩多dlive先有可能做到之新意。"The Final Cut"呢隻碟唔係好多人鍾意,因為已經完全唔迷幻變得好symphonic rock,除左果一份灰同Roger Waters把聲實在同以前PINK FLOYD好唔同,起碼完全搵唔到果份迷幻感同空間感先,但我反而幾受呢隻碟,唔一定要迷幻同玩好多sampling先可以係PINK FLOYD遮我反而好鍾意呢隻碟戰後滄桑果份灰、一份只有PINK FLOYD獨有之灰,只不過最rock果首"Not Now John"冇玩到就唔多開心,見搵左三個黑妹黎唱我諗住真係會玩呢首架。"Animals"玩左"Sheep"呢首PINK FLOYD最恆最爆歌之一,雖然呢隻碟歌我覺得差左少少,但最出名係live果陣真係好似封面噉有成隻大豬會場入面飄下飄下,黎到香港隻豬仲係度,成首歌兩個字,隻超大吹氣飛天豬就全場飄足兩個字,講睇當然係精彩啦,但更重要係當中之訊息,"Sheep"呢首歌睇名都知係講盲從之人,而"Pigs"係比喻貪官污吏同腐化政權,隻豬表面寫上大量政治訊息,反戰反美固然唔會少,亦順應大中華演唱會地區文化,其中一句係中文:

「你可以重寫歷史,但不能改變它」

PINK FLOYD寫"Animals"呢隻碟果陣係三十年前。三十年前已經咁激咁有態度,到而家都仍然覺得唔會過時同非常正確,所以我極鍾意佢地。除左呢首歌之外,有首歌又有個吹氣太空人公仔全場飄,呢d野其他演唱會絕對唔會睇得到,而兩隻公仔可以飛足成首歌,後台飛到去前台再飛返去後台,而過程中完全係冇撞天花板冇剷上台冇跌到落觀眾席,首歌玩完仲會自己飛返入後台,梗係遙控啦唔同線控咩!仲玩左一首新歌"Leaving Beirut",寫佢到黎巴嫩一遊遭當地人厚待之經歷,個MV畫到成個漫畫噉將全個巴格達之旅過程重現,唱果陣仲有埋歌詞,單係呢首歌已經殺晒,會咁鍾意PINK FLOYD,正正係因為佢地之創意、意識同歌詞。上場個零鐘噉就完左,感覺上好似未落足力,似熱身部份多。

**********************************************************

中場有半個鐘頭休息,個個走晒出去廁所or煲煙,我留係度睇107進貢果本《Kidults》。會放工都仆上舖頭拎埋先走過黎就即係好野啦,107一見今期封面係

「謝安琪喎劉Sir!等我益下你啦!」

謝安琪喎!梗係要睇啦!《Kidults》係咩黎?記唔記得《突破》?又或者講最初出道未變鹹書而真係健康學生/青年讀物之《壹本便利》同《Yes》。見到噉樣形容都會內容唔會係劉Sir想睇果d啦,一定唔會係詳細地研究佢d音樂,而只係訪問一個藝人噉樣訪問法,冇所謂啦反正有半個鐘照睇啦,但最正反而係訪問河國榮同埋深水步四十年歷史特集,呢d先至好睇,但叫得做「深水步特集」,

「點解冇講鴨寮街阿Paul?」

**********************************************************

半個鐘休息期間,螢幕出現一個月球慢慢放大,一睇就知到中場重頭戲:"Dark Side of the Moon"完全重演,如果唔係有呢個賣點可能未必有咁多人,

「『都唔係PINK FLOYD!』」

我冇乜所謂,講過啦,香港之中呢d盛事可一不可再。講到明全隻碟現場演譯,就真係90%跟足原版,solo呀sample呀呢d自不然唔會有缺漏,有色士風手又有女高音連"The Great Gig in the Sky"段女聲都要同原版一模一樣,「一模一樣」係指一樣到女聲個旋律係100%忠於原著,但都唔夠勁到連d歌中間過渡果dfade out、轉聲甚至歌佬唱歌回音都係做足,雖然睇live一首歌全隊band慢慢越玩越細聲噉「人手fade out」法係好怪,但對於一隻結構咁嚴謹之概念大碟,你反而會覺得真係有必要咁忠實法。點解會話上場感覺似熱身多?因為重點呢部份水準同上場比完全係兩回事,音響同表演都勁得多,上場有d位硬係感覺有咁多聲炒埋d亂或者有d樂器聽唔清楚,呢度係完全冇任何音響上之問題係靚同清到冇地方可以挑剔,隊band都係好似突然上左身噉,全隊十一個人個個人都玩到盡,就連三個結他佬每人都最少有一首歌係做主唱,我好鍾意台上呢份全情投入之熱情,感染力好強,而且咁多個人即係多好多即興演唱同演奏位,就算原版背到熟晒都有新一番感受,好似"On the Run"原本只係首三分半迷幻噪音,但呢度加多好多sample,除左原版之撞機聲仲有火車、賽車、子彈同其他,用到大場喇叭推聲加埋超速影像,中場只係頭兩個字你已經知道呢演唱會係值回票價。更何況再有朝聖之意義?由一開始之心跳聲,去到"On the Run"噪音高潮,跟住入"Time"全場打鐘果野又係殺死人,"The Great Gig in the Sky"飄到盡之色士風同女聲,"Money"入錢之後再rock到落尾,然後係點聽都咁無敵之"Us and Them",再一直迷到最後,幾部合唱之"Eclipse"去到最高點完場,從頭到尾順暢俐落至你可以當係一首歌黎聽,可以當成係一個四十五分鐘長之live MV。"Dark Side of the Moon"實在係完美得神聖不可侵犯加永遠唔會有人超越得到之藝術成就,睇過就會感受到同明白得到,點解講親流行/搖滾/藝術音樂中最偉大最重要作品一定會/要提呢隻碟,同PINK FLOYD呢隊band創作思維點樣超越當時甚至而家幾個時代。

...當然唔會咁簡單就完,點可以冇encore?仲有PINK FLOYD最經典最出名果首未出,邊度完得呀呢場演唱會?通常呢d演唱會最後一part,一係玩最激最恆果\dhigh爆完場,一係玩慢歌靜歌chill out,呢場尾場選擇係恆爆,同開場一樣收場又係殿堂級之"The Wall",咁多正歌齋開場又點會玩得晒,encore係"The Happiest Days of Our Lives"同"Another Brick in the Wall"呢對組曲然後CD入面連埋之三首"Vera">"Bring the Boys Back Home">"Comfortably Numb","Another Brick in the Wall"同"Bring the Boys Back Home"都係超振奮全場唱爆嗌爆之史詩,可惜呢個咁完美之安排,香港係唔會行得通,老實講,在場有幾多人會識唱、知唱緊乜丫,衰d講句,可能有一半人對PINK FLOYD/Roger Waters之認識,就係僅止於"Dark Side of the Moon",呢個環節係應該全觀眾參與多過台上演出,只係香港呢個情況實在冇乜幾可會發生,所以呢幾首玩果時唔多聽到台下聲音,。最後係冇得唔玩之"Comfortably Numb",一開呢首已經全場歡呼,臨尾兩個結他鬥solo幾精彩,邊個話一定要有David Glimour先好睇?原版PINK FLOYD得佢一支結他,如此場面冇乜機會見。jam完之後,十一點鐘正式完場,第一件事梗係立即飛身走人啦,二千幾人喎大佬,走遲半步幾時先迫到返屋企?

**********************************************************

如果冇黎到睇,我肯定肯定會後悔,因為真係冇乜演唱會可以咁聲色俱全,極豐富影像、燈光、煙火、玩埋飛天公仔,唔止係台上咁簡單,係真係全個場館玩到盡晒,未計睇齋計睇已經震撼人心,加上本身音樂之內涵,影像同演出配合到無話可說,講睇PINK FLOYDdlive真係好睇到頂,有第二度唔會有呢種體驗,敢講係我睇live最滿意最感動經驗之一。唔睇一定會後悔,只不過睇完更後悔,後悔點解唔真係落本一d買貴飛,$390位係上山,講睇係遠左d不過唔緊要啦聽歌先緊要嘛,可惜講聽,平位亦確實蝕左,因為PINK FLOYDd歌真係玩足晒你前後左右環迴三百六十咁多面,音響用到前二後二左一右一六座喇叭推聲,問題就係呢度:真係前後左右包晒只有貴價飛「平原」位,我地呢d平飛「高山」位,座山係位於後面對喇叭再後,前左右喇叭隔幾里遠失左真,後果對喇叭仲要背向山頂觀眾,即係少左呢一份聽覺體驗而唔可以享受真正之環迴三百六十度,而太空人同飛豬領空亦只包括平原地帶,絕對唔會飛過我地山頂朋友的頭頂(除非你想俾隻公仔兜頭撞埋黎啦),聽覺少左連表演投入都蝕左d,搞到坐平飛位,有d似睇人睇演唱會多過自己睇演唱會,係灰左d架呢樣野,早知個情況係噉我唔介意貼多少少錢(「少少錢」=「最少兩舊水」...),都要坐番落平原位真真正正睇演唱會!今次係"Dark Side of the Moon",相信總會有人有興趣知道:

「會唔會有一日,"The Wall"都會全隻再演?」

相信幾難,而且就算真係會再搞多次"The Wall Tour",黎到香港可能都未必會做得好好,一來呢個超大型演唱會係要大量資金同時間準備,二來當今日係連睇個大螢幕都覺得dvideo唔夠大果時,樓底唔算太高之會展對"The Wall"黎講會唔會細得滯?