成日都話想睇show。之前連開四五年舖，band show日子禮拜六日根本走唔開冇得睇，到退左休嗌得更大聲，但兩個月黎除左自己搞ｄshow，只睇左Livehouse重開一場。冇計，退休前冇時間加懶已經唔多會上網搵新聞，而家四年黎第一次有假放，放到個人更頹一樣唔知幾時有show睇（．．．），今場都係SILENT CHAMBER通水先知葵芳有個新場加有場雜錦show。
其實時間夾得好好，開show當日撞正長週返朝早，舖頭又有大箱野未清，本來諗住放工上去搬箱野返屋企沖涼訓覺起身出發，又或行番日街夜晚直去葵芳，點知同事屋企裝修要拆機搬機，俾佢屈左上去做苦力。大家都知劉Sir死剩把口得個講字，要佢落場郁手做粗重野絕對難為了佢，而且以為半個鐘乜都搞得掂點知最後整左個幾鐘，成身污糟晒立即返屋企沖個涼換套衫，本身十分支力但想訓陣唔敢訓，時間唔係冇，驚一撻低就起唔到／切身，為捧SC場加想睇傳說中的零霧同PERI M，雖地方遠車錢貴夜晚返屋企又麻煩，打晒喊路都走去支持啦。
個場叫樂人地帶，新場（卦，對我黎講而家除左Livehouse同蒲窩個個場都係新場），雖然咁多年黎自己睇過亦搞過唔少show，諗番起發覺，原來之前乜野活動band好pop好metal好，全部非九龍則港島，有史以來首次入新界睇show。可能由細到大都好少出新界，葵Ｘ地區更加唔係拜年都唔會出，人生路不熟成日好怕黎到蕩失路或冇車返屋企，好在今個場近地鐵站一條直路到，路痴如我第一次黎都輕易搵到，等我仲預多左成個鐘，見冇乜街行，買左個麥記去公園食（．．．），食到唔記得左時間差少少遲到，八點到已經開始左砌緊場，band show中咁準時實屬罕見。個場唔算細（應該有一間半Livehouse咁大），場內外都光猛空氣流通，仲有野飲野食賣場兩邊更有位坐（！），與其話呢度係band show係livehouse，個feel反而似cafe多，唯一band房feel可能係工廠大廈地址，環境唔錯十分舒服。最滿意一樣野：
「冷氣好恆呀！我鍾意！」
太耐冇蒲過了，見到好多人面口幾熟，連《紙談音樂》仝人都有出現。話晒我都算編輯一份子，你地會黎就早講嘛！早知我扮晒要寫演出專題黐大隊呃飛入場啦！
BEEBOB http://www.myspace.com/beebob1001
開場的BEEBOB介紹自己「以流行曲式創出不會流行的歌曲」，其實幾矛盾，順樂隊意，姑且稱呼為「alternative pop」。唔好話睇佢地，之前連個名都從未聽過，玩清新派pop rock，歌唔錯結他手技術加較聲好得，但令我接受是主音。好多清新派歌手用聲同咬字要比一般普通（流行）清聲「狠」，好彩BEEBOB冇，但中低音夠晒又夠氣，高音卻上唔到，寫歌可以避開高音位，對自己同觀眾都好。
葵芳可能對好多人黎講較遠（我！），不過八點BEEBOB出場時（八點都唔算早啦），真係好靜。頭三四首歌，表演時在場人士出出入入唔在講，真正屬於買飛入場觀眾唔知夠唔夠廿人，台前三尺完全吉晒。充份解釋非headliner而作為「opening」有多悲哀之本地band show現象。
SILENT CHAMBER http://www.myspace.com/hksilentchamber
黎睇今場show的原因．甲。一開波立即前半場企滿晒，同頭先BEEBOB成十分強烈對比，而家SC非常受歡迎。真正睇過只得Livehouse重開一次（「第零次」係INTO ETERNITY試音），果陣因為走左枝結他加Livehouse音響向來唔太得，玩得唔多好預左，今場搵到新結他手，自然要黎睇睇。rhythm同solo都應付到加夾到其他人，相信位新結他手可以幫隊band好多，但驚喜不足，主要場地問題。唔知amp咩事，頭兩首歌枝結他好似只得台聲，感覺到有彈野但基本上完全聽唔清，後來場地先醒水知道有事整整，至叫做出番少少，但仍然唔夠照俾其他人如bass遮晒。樂隊本身亦需要思考，因為原來結他手隻聲好J-Rock格偏厚聲圓聲，新結他用典型metal拆聲彈riff一定得，solo只會俾人搶晒，double lead時情況最明顯。睇黎要再到下一場先至可以見識到雙結他效果會點。講整體表演同音樂雖然仍然較嫩（同場太多老誠band冇計），以只夾左年幾黎講成績非常難得，只要一直練習同進步就可以，特別新鼓手，兩場都係拍子唔穩之餘，壞習慣一開始衝過頭，到一首歌後半需要更爆時爆唔起。體力同拍子都要鍛鍊。
換左新結他，都冇歌手改歌路咁多野講。Livehouse重開時講過，鍾意SILENT CHAMBER除左寫歌得旋律靚技術好，仲有女主音用清聲唱，當本地幾乎玩親女聲metal都要用古典聲時，返璞歸真反屬難得。不過今日一開場首新歌《Silent Forest》已經唔同唱得高音左，音樂底亦近NIGHTWISH《Oceanborn》，以為新歌關係所以有新嘗試，之後舊歌都改晒用新高音唱法，仲要cover埋NIGHTWISH版《Over the Hills and Far Away》，睇黎SC亦開始順應本地民意，NIGHTWISH傾向越來越強烈，但高音 聲易入咪同唱得舒服左，加香港人始終鍾意NIGHTWISH多過EDENBRIDGE，對band自己同觀眾同長遠發展都有好處，既改唱法只得劉Sir一個唔開心（呵呵），何樂而不變？
「而家唱得比以前好左係事實。」
講今場最特別，係派左兩首新歌上台，仲要擺一頭一尾。有點NIGHTWISH的《Silent Forest》第一個印象麻麻，除左可能新寫起同第一首未熱好身，成員間有點唔太夾得準，轉折位唔夠順，單intro入第一段個位已經有點怪。另一首《Secret of the Magic Crystal》（唔要第一個"The"較好）會近番一向RHAPSODY式典型power metal路向，當堂順耳得多，除左太多人追求NIGHTWISH但我始終覺得power metal應接近番RHAPSODY種力與美，再比舊歌來得恆，希望第時寫歌會走呢個方向，噉樣唱法唔同晒我都唔會唔開心（呵呵）。
正場完左到特備節目。事前宣傳講左頭兩支表演樂隊會有crossover玩jam歌，BEEBOB結他手咁了得，兩個上台一齊jam結他大把睇頭，到頭來「crossover」同「jam」兩個字在我黎講係個假象，原來只搵BEEBOB歌佬上台，大家再夾佢地一首歌變成拆聲底合唱版，覺得浪費左個機會同概念。
米通 http://www.myspace.com/hkmictone
又係完全冇認識的一隊。佢地表演時走左出外面同SC吹水，不過一開場punk版《半斤八兩》起全場爆到後樓梯都欣賞得到佢地演出。錯過左損失唔算太大。印象深刻反而係開場前主持問：
「點解你地隊band叫做米通？」
「因為每次食米通，都令我感到搖滾！」
大鑊。噉我隊band要叫屎，英文名Shit。潮流興大楷加點，就叫做S.H.I.T.啦。See How I Thrash。
野紅罌 http://www.myspace.com/hkyehongun
常睇band show特別多樂隊宣傳廣的大show，都會見過一位梳菠蘿頭著女裝行走江湖的鬼仔，之前只聽講過佢有夾band玩emo，見到佢以為黎睇show，但又唔多對路喎點解會唔著裙 － 冇錯你見到佢係似番個正正常常鬼仔，反而唔正常。問番佢點解會咁「唔正常」？佢話平時任何時間不論日常生活定返工做野定行街食飯都會著女裝，但夾band就會「正常」番，原因之一係各位隊友唔想佢著女裝上台（呵呵）。
第一次睇佢表演，要比我想像中強得多，一個大家都知搞笑多於一切之鬼仔，再加擺明識聽識講又要溝到唔鹹唔淡廣東話，企上台一出聲已經全場哄動，基本上全隊band全場表演魅力源自佢身上，唔知係好定唔好，野紅罌是個現場技術唔一定要超高、演出唔一定要零失誤例證。screamo我聽唔多，鼓妹打鼓打到咁brutal十分難得，不過隊員間唔穩唔齊唔難聽出，全賴歌手將大家注意力轉移，清唱得，嗌到斷晒氣亦得，最重要出盡力方圓三尺人等全部面對生命危險之激烈台風，音樂方面有瑕疵又如何？娛樂性勝過一切。而且玩左兩首一定估唔到的cover，先黎《娃娃愛天下》（「食挑既日齊挑」哈哈哈），最後大家叫encore，即興黎多首唱得好開心但成隊band玩到唔知點算好的unplugged版鄧麗君《忘記他》，抵死之處不止冇預過會揀呢兩首歌，而係一個玩screamo的「外國人」會cover中文曲。歌入面同中間仲有大把玩野搞笑位同互動環節，從頭到尾睇到人好開心，真正做到娛人娛己，亦帶起／救左隊band。香港band太多時齋企係度唱唱完拜拜，即使玩得好技術高，卻忽視左表演性質。
「睇見阿Rick台上嗌到趴街，覺得好鬼死似我地唱K，呵呵∼」
零霧 http://myspace.com/mausoleumhk
黎睇今場show的原因．乙。原是最後變成尾二，原來係主辦單位自己樂隊，難怪本來安排做壓軸。對佢地非常大興趣，個名已經有趣，睇過的朋友話佢地ｄ野香港band中十分奇特，致命是樂隊自我介紹中「香港Dark Music的強大黑暗力量」一句。事前花左好長時間準備，兩座keyboard加多台電子確大陣仗，作為一隊band冇鼓手夠晒特別，加上開始前話「我地會以講故事型式表演」，種種使我嚴陣以待，可惜又係個人期望緊另一樣野，開聲冇耐呈失望之態。
初頭可以聯想到去DEVIL DOLL，低調電子底間中爆metal位，歌感覺上長得黎其實可以一直連貫落去，雖然鼓方面編排同用聲其實搵真鼓手都可以，全部樂器統一電子化音色較一致，要做氣氛電子點都比樂隊容易同有效得多，又玩得多效果連歌佬都要落effect，女keyboard有份唱，總之玩感覺唔玩技術，歌路同風格香港band中確是獨一無二。唔對路在歌佬把喊驚「dark腔」唔自然十分夾硬壓出黎，做唔到黑暗感覺。然後歌詞咁貨不對辦。見到個band名、見到「黑暗力量代表」、見到男女聲，先入為主諗住玩陵墓音樂，做到好darkwave，唱七姊妹、新娘潭之類本地鬼故，點知歌詞（或如樂隊所稱「故事」）內容十分hardcore/emo，就算歌佬真係喊得到驚，遊說唔到改個詭秘中文名加低調音樂，但唱「人性和社會就是最黑暗」實在有幾dark。
最後一首歌，絕對冇人猜中：《阿信的故事》主題曲《信》。我小學已經睇《阿信的故事》，最近一次聽到《信》因為夏韶聲《諳III》，一隊後生地下band會cover實在十分意外，台下觀眾更加唔知有幾多個知咩歌，歌佬唱大家「識唱一齊唱」其實十分搞笑。歌詞意思加演唱會主持（即歌佬）一番說話，明顯本來零霧排最後再搵《信》做全晚壓軸，係特意安排之煽情感動位，不過編曲要風格化鼓亂過頭，同主音仍然要喊驚，削弱原來份勵志感。雖偏離自己期望，首次認識零霧仍有好感，贏在性格，只希望歌詞可以改變 － 但相信直到將來都冇可能合我意。
「《紙談金屬五》時都有提過，香港地唔係冇題材俾樂隊發揮，只係冇樂隊會去思考去做。估唔到而家講band sound，都可以拉到去保育本土文化。雖然我都知為一隻碟甚至一首歌歌詞，要花長時間睇書讀文做資料搜集，對好多band友黎講投資太大。」
PERI M http://www.myspace.com/perimperim
黎睇今場show的原因．丙。美譽聽之不盡，加上冇幾耐前（應該已經好耐．．．）M1個比賽贏左冠軍，聲勢如虹地「踩場」，如果你鍾意EVANESCENCE之類（唔計古典部份），一定要睇＆聽PERI M，夾左六年確比好多本地樂隊成熟，全晚做聲無論音色、迫力定平均最佳，女主音把聲夠厚夠氣同其他人爭一樣突出到，難怪會贏冠軍，第一次睇PERI M經歷就好似第一次睇AUDIOTRAFFIC，覺得係另一個層次之專業水平。可惜主音抱恙，全晚只唱得一新一舊一cover三首，十分吊癮。今晚唔知發生咩事，每隊band最驚喜往往在於cover，揀左一隊散左唔算耐之香港indie band作品，呢樣又係好少香港band會做：向其他本地樂隊／band友致敬。冇計，香港band壇一向出名在多是非。聽完好有興趣，完場後問到band名，又唔記得問歌名，返到屋企又記唔番個band名點串．．．灰。
「下次出show一定要再睇。快ｄ出碟啦。」
是次演出公佈時間係8-12，都幾擔心返唔到屋企，好在十一點九左右搞掂，多謝主辦單位提供溫馨提示教路邊度有車搭（我睇咁多次show第一次發生），不過搵極搵唔到出旺角小巴辜負左一番心意，最後趕地鐵算數。個場除左燈光做得麻麻（或者要再砌過），同非住地鐵沿線的我出入較麻煩同破費，暫時冇得彈，而家九龍已經得番Hidden Agenda一個場（Hidden到我而家都唔多知位置在那／有乜show），黎緊似乎會經常蒲樂人地帶同蒲吧。想見劉Sir的朋友，你逢星期六晚二擇其一，仲大機會過上皆旺撞到佢（呵呵）。
雖未如理想，十分欣賞主辦單位嘗試在型式上作突破。場show叫炒粉，初時聽以為係籃球show（．．．），都算係音樂雜菜煲前傳 之後我見過最怪band show名。意思係唔同類型樂隊炒埋一隊，但香港向來樂隊量少，要搞專門show可能連續幾場同幾隊band玩晒，基本上過半數band show都算「炒粉類」。今場炒得再盡，頭兩隊band夾埋一齊玩，即宣傳稿中之「史無前例地crossover」，非想掃興，其實之前已有好多演出作過相同嘗試：單今場show一個月前，「前『搖滾復活』」班底已玩過表演樂隊你cover我我cover番你；唔限於香港band的話，2005年中Livehouse Metal Revolution，NOTHING NONE表演佢地同內地大大樂團交換歌曲所改編之《等待》；要更早，BlackWine每次新碟演唱會包括2008年《影子》同2002年《追夢》，最後搵晒全部表演樂隊同台jam歌是指定動作（你明劉Sir點解咁乞人憎未？）。今場BEEBOB + SILENT CHAMBER某程度上似encore多過crossover，因為音樂除左聲底唔同未有太大改動，而crossover者應如「前『搖滾復活』」，揀一首人地歌用番自己樂隊風格玩出黎變成自己歌，又或一首歌當中兩支樂隊成員台上可以有互動甚至鬥法元素。可能唔夠時間預備，但如果將來做到，可以全部樂隊坐低，傾揀另外一隊band一首歌，風格越唔似自己本身越好，從頭改編之後表演，就真正表達到crossover之意，不過要噉做場show可能要半年前開始搞，中間有幾多變卦再是問題。
又或用另一方法：唔知係特意還是巧合，今晚每隊樂隊都有玩cover（好似得BEEBOB冇？），野紅罌一隊話晒你聽玩cover應該點樣玩同絕對是大眾喜愛的環節。唔cover其他band，可以用此pop cover玩法，例如大家揀定一首歌，中文好英文好pop好underground，每隊都有自己演譯方法，對於娛樂觀眾同團結樂隊都有幫助。
睇得出主辦單位花左好多心機，想搞好一個場帶動本地band壇，本地gig場已經買少見少，希望樂人地帶可以維持落去，耐唔耐搞場好show。唔好太晏開始太遲完就得，我真係好驚冇車返屋企架。
「我要真．crossover。」