Bjork The Volta Tour



我都唔記得同唔知道點解自己會聽Bjork,就同NIN一樣,唔多清楚對方底細,就係覺得自己鍾意而追,純粹出於一份音樂愛好者直覺,亦好好彩冇估錯到。佢成名時成十年前,讀緊中學未太識聽音樂,對音樂的興趣同知識限於動畫、打機同超級機械人大戰配樂及主題曲(機戰都叫做有份導我聽metal,全部歌熱血加metal到爆!),只係玩捽碟機而留意及聽電子野,真係聽rock聽metal係到上到中七七出左結他機同打鼓機先,。冇音樂雜誌上網又未盛行(果陣仲係撥號收兩三蚊個鐘Pnet年代,56K已經係高科技黎喇),即使想搵野聽都唔係想知就知話有就有咁簡單,不過佢隻《Homogenic》紅到我都知道,因為音樂一如以往地超凡出眾,同造型及MV驚為天人,可以話佢「嚇死人」就係由呢隻碟開始。但細個唔識野亦冇乜多錢消費,同唔似而家互聯網上一上話晒你知應該/要聽乜,聽野真係自己聽過聽真再揀,所以一次有緣開電視撞到Moby上David Letterman,除左令我開始迷上呢個騷連追幾年加英文進步,仲令我再加認真研究音樂,對比Bjork《Homogenic》之深層意識,我選擇左世界大同的Moby《Play》。
「題外話:之前有個疑惑,成世人買第一隻外國CD係邊隻?有兩個疑兇,分別係因為David Letterman之Moby《Play》,同因為一部韓國捽碟機首《Y.M.C.A.》之VILLAGE PEOPLE精選。經過年來思索,我相信應該係Moby《Play》。」

當時揀Moby,除左因為《Homogenic》「潮完」,因為佢出碟時Konami先剛剛出出捽碟機,果陣會考都未到,大佬打怪獸儲經驗值升level都要時間啦,玩緊捽碟機時有關心音樂動向但未至於咁認真,要到Moby出《Play》先叫做升到識聽歌的level 1,果時已經讀緊A-Level,隔左起碼年幾,以前未識聽野自然邊樣最新最潮就係果樣,同埋少媒體途徑搵音樂資料,見到佢上David Letterman玩《Play》首single《Porcelain》(就係後來Nokia廣告歌同《迷幻沙灘》預告片曲加插曲),迷到爆(「迷」包括「迷上」同「迷幻」),一次行HMV見到特別版仲要「減價$98」(年少無知,大過左先知道原來咁平因為係台版,同之後仲有再一個孖碟特別版出...),就買左做我呢世人第一隻外國碟了。至於Bjork要到隔多幾年上埋教院開始再認真研究音樂先追番,其實只係聽左好短時間。香港地傳統,就算係舉世知名歌手或樂隊,除非係近年出最新作,舊碟一律難搵,即使去到大舖如HMV,但Bjork就係大名到全線HMV執得晒,但咁出名咁大,佢頭四隻碟全部淪為HMV減價清貨定期死貨甲乙丙,從舊到「二百蚊三隻」古老時期到而家「一八八兩隻」都見到。最新兩隻碟自然係正價啦。但睇個趨勢,相信等多一兩年,下場大同小異。香港地音樂文化及工業特色也。

十幾年黎出左激多精選EP soundtrack remix之類,多到慣左鍾意一個artist一隊band一追追全線的我都怕,執晒六隻大碟就停手唔敢亂黎。佢唔係band亦唔係rock or metal,但會咁迷佢因為有格,造型時裝從來唔係我會留意重點我只聽音樂,但確未聽過有多少歌手唱或歌同佢相似。或者因為聽metal影響,素來對歐洲小國音樂單位極具興趣,而佢來自冰島,完全冇認識聽個名覺得似《康泰帶你遊花園》會帶你去遊兩遊果d北歐山林國土。
「冰島除左Bjork,我只識得SIGUR ROS。」
兩者音樂都係超然脫俗幾達非人仙境,可能係冰島音樂特色?
「似乎要研究研究喎。」
同出名在身為一個歌手,佢把聲係根本唔適合唱歌果隻,又沙又拆唱功亦唔高一d都唔靚,完全唔專業再加神經質有份唔知刻意還是無意的不穩定,但係不正常的音樂就係要加番把不正常的聲音先可以成功,加上一直以黎佢都係自己寫歌寫詞,同搵到好多猛人明星台前幕後all-star班底製作,可能因為自己寫完唱番,d歌全部好夾佢把聲,甚至換左第二把聲或換一把靚聲,反而唱唔出理想中意境。至於佢玩乜我都唔知,籠統講係電子,你要夾硬分類我層次未夠唔識分,見過較pro的叫法係IDM,即係智慧型舞曲,但因為雜得離奇加自成一格,我只當成「唔係用黎跳而係用黎聽的電子野」,亦即我鍾意果種電子野。第一隻碟《Debut》覺得較普通,係「有點特別」的「普通電子野」(翻譯劉Sir文,解「有點特色的偏跳舞音樂」),第二隻《Post》大致格局相似但「聽」之成份如旋律、編曲及純節奏以外再加進化,第三隻《Homogenic》真正黎料實驗迷離得多,亦明白當年點解隻碟可以咁紅咁大迴響,但個人最愛仍然係第四隻《Vespertine》,唔止古典迷幻仲要帶點灰,咁「gothic」所以鍾意,只係你知劉Sir鍾意果d冇幾多有好下場,所以呢隻碟無論大小唱片舖見到呢隻碟長期減價或平賣最平見過$48咋二手舖更加常見,劉Sir在此僅對Bjork致歉。幾年前出第五隻《Medulla》,一開始笑爆:
「a cappella。」
睇頭四隻碟走勢,寫歌應該會越黎越複雜或憂怨,點知玩野到調轉全人聲,接近零樂器只用男女老幼人聲sample再合成剪接成歌,成到名出到名入到主流歌手冇幾多個夠料夠班同夠薑噉樣完全顛覆自己大改歌路,得佢可以自己鍾意點玩就點玩想幾實驗都得,可想而知地位幾高藝術性幾強 - 但咁世界殿堂級都要HMV六七八十一隻求清貨,香港地多麼有文化。癲到如此地步,07話出第六隻碟《Volta》,事前唔會估得到會點玩索性等佢出左先算,點知變番「正常」,冇上隻碟咁飄渺隨意歌曲較完整,但又可以同以前唔同,因為舊時追求低調甚至灰,今次睇封面Bjork包到自己成粒萬樂珠都知有幾開心,首首歌夠喪夠玩野夠high乜都玩連中樂都玩埋,人老左音樂反而後生左吹脹,好似鍾意呢隻多過晒前五隻添。再聽埋dsoundtrack同remix,可能會當佢(女)神咁拜。
「我想搵番《天黑黑》隻soundtrack呀!有佢同RADIOHEAD Thom Yorke合唱喎!單一首已經夠照啦!」
有專家問:
「劉Sir,點解你身為metal友,唔聽metal走去聽魚蛋歌?電子野黎喎唔係metal喎!」
「知唔知勁多美加同歐洲metal友視Bjork為神明?知唔知佢係SOILWORK歌佬最愛歌手及創作人之一,平時佢著Bjork tee仲多過著band tee?」

well,扮唔知算啦,噉樣聽metal會開心d。


佢出碟完全唔急,每隔兩三年先黎一隻,《Volta》07,下隻計番應該2010左右。同樣無必要去估會玩乜野會變成點,太過遙遠,當務之急係今晚28/2/08有Bjork live。主辦單位宣傳係「闊別十年再臨香江」,真係黎過都唔知,十年前即係九七九八,仲係玩緊捽碟機傻仔一個,難得遇到大駕光臨(07&08真係一反常態地Q多演唱會!),只係不願不願還需願,而家逢係外國歌手樂隊黎香港開演唱會,地點必定係機場亞洲博覽館。
「一場MCR話晒你聽我有幾唔妥個場。」
上次搭車去亞洲博覽館成個半鐘,落車入到去剛剛好開場,今次反而似第一次黎博覽館睇NIN甚至更早,一個鐘唔使就到左時間鬆動。不過現場多人到我以為幾乎遲到,黎過三次,只有今次係周圍都有人甚至多到山海果隻,睇黎Bjork號召力真係好大,當中一半係外國人,又整體又一半係女性。
「所以劉Sir成日叫你地唔好聽metal囉!聽metal真係冇前途架!」
三場演唱會剛好試晒三個場:NIN細場、MCR中場、今次Bjork大場,某程度上睇到三者江湖地位,同間接睇到metal真係冇前途同唔入流。博覽館大演唱會分$780同$480兩個價位似乎已成慣例,上次MCR買平飛中晒招,只係價錢相差實在太遠,今次都係$480入場算,大佬加埋車錢五百二架喇!行行企企七點十入場,大展廳只開一半比預期中細,見出面仲係成村人諗住實有位,點知入面已經排到四五六行,加埋出面咁多人,相信塞得爆半場。
「最過癮,係見到疑似某個行家,呵呵。」

MY CHEMICAL ROMANCE好唔同,今次入場冇幾多靚仔,全部都係老野同勁多外國人&囡囡,所以好多情況如專家遍地,只係香港人對roadie歡呼同係唔係都影相的習性始終戒唔甩,叫做今場冇咁嚴重囉,尤其影相真係嚴打得犀利,而老一輩心態唔同後生(就係唔係單為「一睹風采」),好多都係影一影就算,甚至完全唔影,入黎都係聽歌睇表演嗟。大牌係唔需要opening同要等耐少少,所以今場話八點開始,企到八點七八先正式開騷,個場佈置到成個中世紀嘉年華噉,巨型錦旗同城堡式旗幟處處,好似圓桌武士時代同AD&D入到矮人或精靈村落個情景,但見到d旗上面印住雀呀青蛙呀動物甲乙丙(點解冇魚蝦蟹?),反而令我諗番起當年小學教常識教靚仔識動物d教材。台上極多人,歌手以外仲有一支全女班十人銅管樂團、兩個電子、一個鼓手同一個keyboard,男果班睇落好正常keyboard佬仲要著晒西裝上台,但女果班真係著到古歐洲噉款夾晒舞台設計,而Bjork本人由頭到尾都係一套衫冇換過(初時仲諗住會玩好多花款),不過佢演唱同台風,加全場走黎走去跳晒舞,就係想做到果份民族部落feel。只係舞台同意念有潛質但未發揮盡,燈光之外最盡只玩到激光,起初諗住會有大量舞台效果玩埋視像,音樂咁藝術咁實驗,加埋video表達得更完整嘛。

選曲覆蓋相當全面,每隻碟幾首名曲大部份有份,當然玩唔晒啦金曲實在太多,但我想聽我鍾意大半有玩就夠,雖然有幾首好想好想聽live冇表演到有點遺憾。在電子音樂世界媢爸苭羶楞Y最得閒果個,琴佬手琴真係好好好好勁,兩個電子佬你唔會知佢地做緊乜甚至有冇做野有時玩到似打緊NDS,隊銅管先緊要嘛,因為好多歌本身極多層次同用交響編曲,黎到live除非全播帶否則好難忠實重現,所以改用銅管代替keyboard,有可能係刻意一直以黎Bjork好鍾意寫歌時加管樂,所以live都要搵番隊有新意之餘更好睇更有排場,只係唔係每次銅管替代交響或弦樂都咁成功。講表演Bjork係個民族舞版Axl Rose,唱估佢唔到地唱得好,同CD一樣之餘狂叫狂嗌都keep得住把聲,係去到臨encore先開始唔夠氣唱唔好 ,但台風補救番晒。頭半選曲較遜色,多數慢歌靜歌集中前半,仲要係一次連出幾首果隻有時靜局過頭,有現場觀眾甚至覺得難捱,正如你接唔接受到一首歌除左唱之外接近零伴奏,亦即聽歌手清唱三分鐘?好多人唔得,所以唱時完全唔知做緊乜,完左之後「唱完架喇?」詫異一番。雖則話係電子,但再深入風格其實好雜,你想知一隊band表演會玩乜,聽聽set場時用乜歌試音就知,今場由舞曲到低調電子到和風爵士都有,你都知場表演唔會係普通野大路野同唔會正常。
「其實知唔知你睇個表演者玩乜音樂、入場前有冇做定功課?」
好多歌改編曲改得我好開心,有玩主題中古feel,夾埋銅管隊有時甚至玩到似睇/聽BLACKMORE'S NIGHT夠過癮,亦因音樂本身性質更多亙動位跳舞位rave位,但自然冇人郁 啦香港地嘛,甚至台上想台下做乜可能都唔多明。後半快歌同名曲多番,重點係《Army of Me》,好多人識同鍾意因為係佢成名作《Post》第一首歌,同埋係佢最易聽最可親一首single格式舖排最正路,但我鍾意唔係從電子角度出發而係metal角度,根本就係industrial metal,相信勁多聽Bjork的metal band同rock band同我一樣一聽已經想cover,
「可惜我地JAZZTALLICA係玩jazz唔係玩metal啦。」

正場最後一首唔記得左咩名亦懶查,首歌係玩音牆怒炸,成支銅管隊玩得最開心就係呢part吹到爆(CD都是這樣的),玩到超metalcore又係夾band的話一聽已經想像到點樣將首歌metal(core)化cover(按現在專家口吻的講法,唔稱呼為「post-metal」會唔會俾人笑?)(同,你明點解外國咁多metal友會當Bjork神噉拜未,當我見好多香港metal友仲當流行曲同非metal音樂係「魚蛋歌」時?),玩完一句釘橋立即閃入後台,完得相當突然。例牌地要匿埋一陣先再出黎壓壓場,因為「北京今年辦奧運」,應景地唱左上屆奧運主題曲《Oceania》,初時幾驚唔唱因為出自唔玩樂器玩人聲之《Medulla》,現場環境所限似乎刻意地避開呢隻碟d歌唔多玩,雖然台上仲有支十人女子團但似乎佢地只會吹唔會唱,所以呢隻碟d歌全部改晒編曲成電子版,聽落冇乜癮,但《Oceania》新版本來用choir模擬交響,現場改成銅管同鋼琴,新版好似仲正過CD特別琴佬鋼琴精彩,算《Medulla》現場作品最成功一首。之後玩埋《Declare Independence》,新碟《Volta》最high一首,台上噴埋紙碎成個$780區都係白色,又係話咁快就玩完完埋場,正正十點鐘走人,近個半鐘唔算短啦都,整體亦滿意過MY CHEMICAL ROMANCE,但未達NIN。MCR&Bjork大家都係分兩區,但前者個平飛區同個台隔到黐線咁遠,加上音響差,買平飛真係灰得好緊要。唔知俾人投訴得多吸引經驗,定還是唔同場唔同做法,今次平飛區比上次前一半睇得清楚,加上開場後有人走(咪就係上面詫異「唱完架喇」果班,噢又令我諗起睇另一隊冰島野SIGUR ROS時坐我前面兩個阿叔),我又攝下攝下,搵到個靚位成場睇得晒成個台實屬難得。音響亦大改進,只係有趣在睇band演唱會往往係低音遮晒其他野,今場電子show反而中高音得,唱同銅管最出keyboard其次,低音同電子成日一劈唔夠清,已經好足夠架喇其實,朦朦地(又未至於太朦)夠現場感嘛。個場分區間隔合理,加上貴飛區近爆晒唔會兩個區中間勁大段真空,聲靚場好加人多,終於唔存在「睇人睇演唱會」感覺。只係正場同encore都係一玩完台上全部人即時高速走佬,躬都冇鞠個就唔見晒人完場左都唔知(似每日六點我放工喎),雖然有才華有舞台魅力,但好似趕收工冇乜心留耐d玩多d,印象分扣左少少。我諗冇乜人計較卦,見個個走時都好開心,個場亦爆到兩個區都幾近企滿、走時要同人迫出去,相信絕對多人過MY CHEMICAL ROMANCE,市場唔同嘛,睇Bjork都係老野、有錢使肯使錢果班,MCR係靚仔靚妹,你覺得邊個市場大d易賺d好賺d?


十點鐘完場亦就晒時間,搭埋車返到屋企幾個字先十二點,始終第二日要返工日子,遲過十點完場就會搞到好夜。全場騷算滿意啦,只係同我理想仲差少少,我希望可以玩得更癲同多d實驗野好似NIN,最正自然係《Army of Me》同《Oceania》,但記憶猶新,反而係差唔多首首歌完左都要講果句

Fing.Kill! Hong.Kong!

有趣有趣。