其實本身唔太想去睇白安，雖然佢隻碟《麥田捕手》真係好勁，唔係上年到世界末日先出咁遲，一早做左2012年度十大，就係好聽成噉（其實香港區出版年份係2013，所以都可以魚目混珠地算係2013年最佳之一？），按道理黎香港梗仆到去睇，問題係，太貴。到而家都唔明一個台灣新人，雖然兩岸三地讚到天上有地下無，點解第一場個人演唱會居然會揀香港開，會計劃咁大力打入香港市場？我唔係介意新人身份，而係只出得一隻碟，好怕玩得個幾鐘就完場，都可以九展演講廳全場劃一$580一位，已經係本地歌手紅館貴飛價位，甚至睇外國歌手／唱片演唱會都未必要咁貴，就連演唱會半個月前黎香港開一場簽唱會，都要先購物四舊水先可以參加，雖然話送埋簽名碟，但扣埋即係簽唱會都要三百蚊入場費，身價未免吊得太高了。所以一直遲疑，唔係最後有人放平飛買一送一都唔會黎睇，因為好鍾意好鍾意一回事，$580真係高攀唔起。同，我硬係佢咁睇重香港市場，型住再出新碟時好大機會又會立即再黎香港，仲可能唔使五百八添。

第一次聽到白安已經知道冇得唔鍾意，好難得聲靚又有特色之餘識彈識作（仲靚添，口桀口桀，不過真係好瘦），唱腔帶點台灣歌手風格的帶點口齒不清，奪命在輕柔得來帶磁聲的聲線，聽今次演唱會主題曲亦係全隻碟（雖然擺壓軸的）主打《是什麼讓我遇見這樣的你》你就明架喇。當晚一齊去睇的七刀同學話佢把聲同唱歌似爆肺前的謝安琪，我呢個metal界最痴謝安琪fans反而一直冇同樣聯想，因為會迷的原因係諗起另一個人、賣點同樣係特色磁聲聲線加靚樣的潘辰，兩個把聲我覺得好似，分別在白安表達平伏直接，潘辰就柔和一點同唱腔較多修飾，我成日都會想像如果佢地唱對方既歌會點。可能始終新人所以冇乜舞台經驗，成場show好多台上漫無目的的走位同小動作，睇得出佢多數時間唔知應該做乜甚至有點緊張，好在唔太影響唔到唱，只少少位會避開高音長音，最灰梗係《是什麼讓我遇見這樣的你》啦bridge個位「我又該怎麼學會不依賴」本身係全歌高潮之一，點知「依賴」唱低八度（首歌唱左兩次，兩次都係噉），當堂變成反高潮，其實唔需要丫，睇佢今場狀態冇失準又冇唔夠氣，根本冇必要咁刻意去留力？有樣野就幾鍾意，叫得唱作歌手都會玩玩樂器，雖然好少得一首琴一首結他，特別在冇和音歌手而自己玩sampler做埋效果，只係得兩首用到又玩得唔夠盡興。

其實成晚係點大概都估到，一定會玩晒成隻《麥田捕手》架啦，雖然會用擺明埋尾格的主題曲做開場就估唔到，或者始終好多（香港）人都係因為呢首歌識佢。再玩多少少新歌同唱少少cover，最驚喜係翻唱王菲《百年孤寂》，保留原版大漠風情而且結他佬手solo勁正，白安走民謠輕搖滾路線電結他連開distortion機會都少啦，呢首歌最後大大段solo任佢表演，睇佢彈到勁high真係好爽，同結他佬有料到研究過晒原來種音階先彈好有感覺。不過想知點解今場飛價咁貴，睇晒就明白了，原來貴不在白安。全晚有兩個嘉賓，第一個係嚴爵，即係邊個我當然唔知啦，不過我諗我可能係全場唯一一個唔識佢，佢一出場見全場囡囡high到呢，就知肯定好潮了，問題係佢真係超級偶像派，唱歌屎到呢．．．仲要當正係自己開演唱會一樣人地先係嘉賓，難怪明明自己先係主角的白安表情好鬼無奈，一路好似好唔妥噉眼超超啤鬼住佢，雖然全場所有女性超級瘋狂，但唔掂我真係頂唔順。難怪今場會咁多女觀眾。

跟住到五月天瑪莎出場完全另一回事，有神秘嘉賓任賢齊出場送花，講到自己係老細黎探班一樣（原來跟住一晚肥姐紀念演唱會有佢份，初時仲以為佢真係老細特登飛過黎睇），可惜佢只出場講幾句同送花唔唱歌，瑪莎同五月天我唔多識但起碼歌好聽得黎識唱歌先，同佢識得尊重返場合同主角唔會喧賓奪主。所以你話今場點可能收得唔貴呢，按港女邏輯，$580飛，三百蚊係睇嚴爵，二百蚊睇瑪莎，白安只係俾八十蚊睇咋，我都明作為新人而公司肯投資，總要搵重量級人物撐場先引到更多人黎支持，但又需唔需要搵實際上會唔識規矩搶晒主角風頭的嘉賓呢？再睇現場反應，雖然今晚最後都坐得爆全場，但我相信其實好多人同我一樣係買平飛，甚至係拎免費飛入場（其實平飛本身咪又係標住$0免費飛．．．），而當中又極大部份唔係因為白安，而係黎睇瑪莎甚至嚴爵。

呢個似乎係主辦單位的兩難：台灣歌手要揀香港開第一場個人演唱會可見其決心，要打響頭炮自然想搞到好大，我知九展演講廳租唔平，今場場地製作質素又高音響好靚（九展演講廳從來最多人講就係爛聲呀），班底又要咁勁開支必定唔小票價迫住要高，但跟住自然又要入鄉隨俗地包容香港文化賤賣免費派散飛，入到場好多人又唔係為睇主角，就有點搞到不淪不類。其實面子呢樣野係咪真係咁重要呢？講真，睇白安呢種歌手，嘉賓完全冇必要，同時出細場唔一定差過開大場（可參考Moov Live），應該針對真正知音人因為佢地先會有心長遠追隨，而唔係可能今日見有邊個陪你出場就黎睇第二日已經唔記得左你叫咩名的路人甲乙丙。同埋真係再黎的話，唔該真係唔好賣咁貴啦，今場連埋中間嘉賓出場例牌吹超極大輪水，成晚先好夾硬有個半鐘，老實我覺得$280-380先係合理價錢，而其實一開始就賣$380我相信一樣可以爆到，而唔似而家要用好多唔太體面的方法塞爆個場。一係你分$280/380同$580兩個區囉，老實如果我俾六舊水點知坐到全場最後果行，我都唔妥啦。

最後呢．．．因為歌唔多一早唱晒，而十點完場時開晒燈人人都唔願走（我都唔走啦大佬，得個半鐘咁少），所以白安出場唱多一次木結他版《是什麼讓我遇見這樣的你》。其實我拍左條片。不過返到屋企先發現，部相機拍片mode較左靜音。