老實講，我真係等左好耐。甚至曾經以為冇機會等到。李卓庭唱歌好勁，不過歌路「另類」、外型唔夠偶像派、冇大label捧，拎得獎多都冇用，一年先出得一隻EP咁大把。《Eunix Mag》之後靜晒，跟住走左去做舞台劇，今年年頭《星光大道》，佢係林志美之外另一個想睇之理由。以為又一個好歌手玩完，靜靜地出左第三隻《After School》。「未死」當然係好事。可惜仍然只得EP。
初知道時有點驚，全因KOLOR的陰影。李卓庭新碟個幾月前KOLOR先出《Surrealism》，香港人從來只買hype與名牌，KOLOR歌得live勁，但對絕大部份人黎講佢地有何地位？肯download你隻碟聽聽已經俾左面你。要吸引呢種「樂迷」，只有靠種種音樂以外著數，如《Surrealism》送免費演唱會飛買碟有show睇。因為我唯一一次睇KOLOR已經係第一隻碟一年前之2006獨立字頭五周年城大獨樂秀，而《Surrealism》非常得我心，仲要佢地擔正演出，更加要睇。誰不知，正正別名「地獄黑仔王」的劉Sir買左隻碟寄信拎飛之後果日，主辦單位就公佈「因內部問題」，是場KOLOR新碟發佈演唱會取消。唔知道「主辦單位內部問題」是甚麼，希望唔會係隻碟太少人買進而更少人睇show索性取消，又或主辦單位同樂隊及會場傾唔掂數錢銀問題扼殺音樂。香港地要真正搞起band sound，金錢、社會、圈子等掣肘太多。《Surrealism》個幾月後，到李卓庭《After School》，仲要同KOLOR一樣又玩買碟送演唱會飛，衰過一鑊有陰影呀大佬。不過歷史照計冇咁易重演，畢竟李卓庭非樂隊而係歌手，香港樂壇而家唯一容得下之樂隊可能只得MR.，女歌手生存空間縱細仍算大得多；當年出《Eunix Mag》仲有賣過電視同巴士站燈箱廣告架，冇番咁上下財力同後台支援都難做到。最後是場音樂會如期舉行。冇再加添新一則鏽色幽默笑話。
事隔一年，仍然經常重溫《Eunix Mag》，《失眠幻想曲》同《響》兩首聽極唔悶，因頭兩隻碟rock爆，《After School》反而唔知應該點面對。包裝以本地唱片製作黎講超精美，一向唔多好紙盒特別版之類都鍾意，重點是EP都肯落咁重本去做到咁靚。開碟第一首《不愛名牌》，DEAR JANE出品，好過晒我認識之DJ歌；跟住林一峰《All is Fine》，預左民歌，我非林氏fans卻冇乜聽過佢有次品。餘下三首相信是方樹樑主理，全屬慢歌，回想頭兩隻碟各只得一首抒情或輕版作，今次佔左80%，人及音樂皆越來越令人聯想到何韻詩，對我黎講絕非好事，我想聽rock呀大佬。而最失望，係製作經年仍只出得EP一張，大碟都冇。
同KOLOR一樣買碟後憑換領券登記，之後收到電話通知，拎飛朋友請九月最後兩日親身去寫字樓拎飛。問題係兩日都返工日子，仲要辦公時間去拎，加講到過左分分鐘拎唔到，的確有點不便。香港文化永遠只著重結果，過程同努力關我鬼事，換著一般香港人已經講左三十幾句粗口甚至罷睇，不過自己從事多年地下音樂工作，非常諒解獨立單位細公司限制。因為年年十月中要返大陸做展覽，日期又遲遲未講，怕撞期睇唔到一直唔敢登記住，到公佈15/10已經過左個幾禮拜，仲拎得到「只限頭一百位」VIP飛兩張。
以為代表唔會好多人黎，點知事發當晚早半個鐘去到已經排晒長龍，隊外仲有大大班親朋戚友＆歌迷會，就算排隊好多人都係一疊疊飛在手，死，全場會唔會得我一個唔係憑關係拎飛呢？既然算場免費演唱會，即使派飛亦是名正言順，亦唔太執正黎做，全程幾乎冇查飛搣飛程序，就算冇飛分分鐘都可以白撞入到場。因為親友朋友加歌迷會先入，我唔算排得後，入到場已經坐到爆，要搵成個字至搵到位坐低。其實有冇唔VIP的入場券．．．我坐二十行左右算前，又近中間對正睇得清楚，左手邊即場中央座位區就係歌迷會重地，真係好多囡囡架，靚的亦唔少。
「所以劉Sir成日都話，聽metal，冇前途架啦。最近有邊個歌迷會收緊會員？」
場地同五年前MOGWAI一樣係演講廳，因為人潮入之不盡，要等多半個鐘安頓所有觀眾，應該坐爆晒有六百人以上。開場先清唱《眼花》chrous，聲線唱功絕對滿足到我，不過跟住《撇低你》同《人釘人》，唔對路，因為播帶。雖然明白場音樂會點大都只係indie秀，又表白僅得三個星期左右排練，成本及時間不足，音樂會變左睇唱Ｋ會唔太習慣。到第二部份搵埋同公司之葉宇澄同郭穎橋雙琴伴奏（雖唱得好，兩個都唔識．．．），至正式有樂器，不過無論主角還是嘉賓冇乜驚喜亦少發揮空間。唱歌外仲有個問題：近年李卓庭係謝安琪之後我非常有心跟隨之女歌手，不幸佢亦有著台風台詞欠佳之相同弊病，每次間場講台詞或者同嘉賓／觀眾交流，內容講速咬字要彈有大把野彈。另場地音響相當唔掂，喇叭集中台上單向發音，音質需改善之餘歌手聲線同力度都被牽制，種種加起黎個頭開得唔太好，睇現場不論歌手、伴奏還是音響我始終有所要求，頭兩部份大量失分。
開頭諗會唔會有林一峰合唱《All is Fine》？當然冇，變左英師傅加方樹樑拉隊玩unplugged，終於叫有隊完整樂隊上台，慘在音響問題仍多，同玩左兩三首隊band又走人，難得《All is Fine》加《男孩一次》終於挑得起舖癮呀。跟住有陳柏宇合唱我非常愛的《紀念日》，當年DRY一出呢首歌，因為未有得上網又唔識買碟，成日捕住收音機同電視等首歌，如今數碼世代長大的後生一輩唔會領略得到箇中樂趣。選曲好，陳柏宇+李卓庭卻難鬥得過馮德倫+陳慧琳，無論你話陳慧琳如何偶像派，佢聲靚唱歌得加現場實力足是事實，而且會場音響拖累，都幾草草．．．然後陳柏宇獨唱《拍半次拖》，我冇乜留心聽到，因為佢唱歌時出現兩個情況：我坐個位前後左右大多係四十歲以上人士，佢唱時變左廁所位，師奶出出入入；另一方面，隔少少走廊出現大量靚妹，拎住相機手機影影影影影影影影影。相當擾攘。
要佢獨唱，梗因為主角入後台換衫啦。出左三隻EP，歌唔算少夾埋夠捱一個鐘，不過做一場正式演唱會起碼要兩個鐘，自不然需靠大量cover撐場，廣東國語英文歌都有。見之前播帶歌同不插電都係佢較電同較靜作品，而家換埋衫，係咪焚機時間戲肉到？唔係。繼續cover。我點諗都冇諗過，會一個medley由容祖兒唱到梅豔芳．．．你可以話我hardcore，先入為主我心目中的李卓庭係rock，你話好似何韻詩或者盧巧音，一個搖滾烈女轉唱抒情流行曲我仲接受得到（前提是歌寫得好），但變成disco queen．．．唔好意思。你話我hardcore啦。再者，我覺得佢唔適合唱呢種歌：一個成功歌手同普通歌者最大分別，除聲線、感情及技巧，係唱歌令人覺得佢真係入到首歌，同著衫一樣，要carry得到，而唔係聽落似唱緊Ｋ，無論點勁你只感到佢係唱緊Ｋ自娛，欠缺一份台上表演者之風采及感染力。呢個環節我就覺得佢把聲同唱腔唔配合跳舞曲，從歌手回歸到阿某唱Ｋ層次。可能係音響問題啦，已批評過太多次．．．
好在disco medley後有《工作狂人》同我極愛的《響》，同時經過大半場仲唱得到，可惜如此rock的兩首都要播帶，之後樂隊先出場，等左成晚，台上套鼓同咁多台amp終於有用武之地喇。我等成晚就係等此full band rock session。作為全晚壓軸環節，所有金曲當然一次過放送，《不愛名牌》是必然主打。搵DEAR JANE幫手作歌自不然rock到爆，我未聽過佢地第一隻碟，甚至好後來先知《XOXO》原來係新碟，因為個個話佢地玩punk rock，隻碟頭幾首好rock後（大）半隻玩慢歌，貨不對辦當堂覺得被陰，不過不得不承認佢地作、彈、唱都好高水準，加上好多人話live玩得正，我又勁鍾意佢地個鼓佬，今場會唔會搵到DEAR JANE做嘉賓？當然又係空歡喜一場啦．．．仲諗住可以睇佢地live，《不愛名牌》之後《戰狼三國》。
「話時話，《戰狼三國》MV女主角，就係《激流青春》「點解冇signal」的Shiga！」
2008中文歌最大驚喜，都可謂關心妍《龐貝21世紀》，你冇預過佢會唱呢種歌之餘（新碟已經變左「white pop」了），香港歌手間亦難得有歌可以咁rock，《Eunix Mag》時發過奇想李卓庭cover《龐貝21世紀》一定好正。美夢當然唔會成真，但可能更好，因為一開始《Dear Jane》已經有點勉強，之後連續幾首名曲如《手鎗與紅玫瑰》同打住鼓唱《地獄少女》，樂隊較聲加音響本身已經唔恆，已爭聲爭得有點太用力，仲要選cover F.I.R.《Fly Away》真係玩死自己，F.I.R.自己而家都未必話唱就唱得到，首歌好高難度架。加多首《失眠幻想曲》埋尾，好在仲頂得到成首，不過跟住冇encore就完場。再唱的話可能要入後台飲番枝水再抖番個幾字養聲。其實此rock session擺頭會更好，帶得起氣氛之餘，亦唔怕唱完兩個鐘唔夠氣撐埋佢。通常一首rock歌去到現場會勁過CD好多，今場調番轉聲同玩都輕左，《不愛名牌》比較CD版高下立見，加上英師傅玩得麻麻，唔係自己歌可以自由發揮卻十分隨便，既我一心入場係為聽band sound，呢個部份甚至成場音樂會評分遺憾偏低。可能，錯不在人。錯在音響。不過兩個半鐘我居然會有好難捱、最後會有「終於睇完」之感覺，睇咁多年演唱會都算第一次，過左半場前面有個小朋友直頭拎部電話出黎打Winning，睇過先知而家手提電話原來咁高科技。部份時候，去同個靚仔研究部打機電話、研究Winning，可能會仲開心過睇台上演出。
完場雖失望，卻同換飛安排一樣我會諒解，我唔係果種只睇結果得失不思索過程付出果種（香港）人。公司Boxing Promotions，邊個聽過？夠錢夠勢力就唔使唱得到歌都只能一年一EP、除出碟一排差唔多冇show出冇野做。而且場音樂會免費 － 嚴格黎講係七十蚊，現今世代／香港人早認為「音樂應該免費」，要買隻碟拎飛唔使成本乎？今場主角精華一句：
「我唔係最慘果個。」
其實每年香港都有唔少唱得之人出道，有幾多出得到頭，甚至能捱到超過一年，又是另一回事。仲有幾多人記得徐浩？唱得超勁呀。拎過新人獎架。又點？李卓庭可以出到三隻EP、參演舞台劇，已經相當幸運。同樣《Eunix Mag》時提過，佢際遇同謝安琪好似，不知名實力派從細場商場唱起，慢慢出頭後參加其他媒體表演，再慢慢一步一步向上。作為一個搖滾路線歌手，在香港絕對困難，出第二隻碟時做舞台劇，而家出新碟，仲係做緊舞台劇，未到大公司簽一步。《After School》的「新嘗試」，或者是必要，如唔想之後大家都只記得佢係演舞台劇的話．．．
縱使今場失望，我仍然希望再有機會睇佢演出，因為今舖失分好大原因係音響出事。最好full band，唔好播帶啦。