今年五一勞動節，收到兩份禮物。一份係老細同我講，「我地公司都係唔掂架喇，你可以唔需要再勞動，唔使再咁辛苦喇。」第二份就係同我一齊收禮位同事、負責shipping個肥師奶，抽到兩張903拉闊飛，放上網賣又冇人要，見大家同病相憐，咪一齊去睇囉。即係其實，都係想搵人啃左冇人肯買的豬頭骨嗟，全晚我只對王菀之同林二汶有興趣咋。

我都係第一次黎睇拉闊，其實好多都想睇，謝安琪果場Beyond tribute睇唔到已經萬念俱灰啦（好在有出碟，同我覺得好過紅館吶喊演唱會），之前有場Mr. X G.E.M.又係伸晒利，但拉闊飛要用信用卡買野換，即係要我為左睇一場演唱會夾硬買六七八百蚊野實在做唔出，謝安琪叫我都係噉話。但睇過一次又覺得，未必真係咁值得恨，因為製作唔算好好及唔上「真正」大型演唱會，歌手把聲一定勁出放心保證聽得清楚唱乜，但音樂方面完全冇層次只得一塊，我都冇睇過一場演唱會可以敲擊仲大過鼓／鼓佬你睇到佢打但除左bass drum同少少snare乜都聽唔到。雖然有一樣野，反而做得比好多演唱會好：結他solo時一定會推佢出黎聽得清清楚楚，同攝影師同後台一定醒水知道幾時要影結他佬，唔係乜野時間都只識得拍歌手個樣你睇，所以今晚我睇隊band睇得相當開心。

「今場lead結他手就係怒人御用結他佬Jason，鼓手又係一丁，真係睇怒人一樣。」

老實見到今場個陣容，已經覺得失敗左一半，因為有點錯配：其實你都諗到四個人實係分兩組，兩個唱作人必定一齊，另外兩個舞曲K歌為主就另一組，唔係噉分的話只會累鬥累，問題係呢個分法亦更明顯帶出兩組實力差距。王菀之同林二汶都係有聲底有唱功識運氣識用聲實力派，薛凱琪我從來只覺得係個比其他人更懂得唱歌的K歌歌手（唔係我杯茶，但我都唔明以佢實力點解咁多年都唔多紅，證明label真係好重要），而吳雨霏就算啦我真係完全唔知做乜仲會有公司咁肯出錢出力捧佢，即係王菀之本身唔算唱rock歌種人，但佢同吳雨霏同台唱佢堆rock歌，都可以唱得激過搶過吳雨霏自己，想玩型格外型又唔特別討好，跳舞只一般仲要根本唔夠氣一面跳舞一面唱歌，咬字又成日唔清唔楚，以歌手而論，佢真係好難發展落去。

一如所料地唱作組二人部份勁好睇，安排一定係四個人互相翻唱對方歌，而兩個都係極具實力唱作人，要掌握得到點樣用自己風格演譯人地歌非常就手，遺憾在《留白》因為前面提到音響未如理想而唔夠迫力。可惜另外兩個唱歌實在太正路，一翻唱王菀之就出事，人地以風格化聞名而K歌組兩個人都冇「歌格」，翻唱出黎非常平淡甚至有點夾硬，吳雨霏最慘跳完兩首歌先唱連氣都唔多夠，同時一相比較立即聽得出兩位唱大路歌為主歌手問題，會及唔上人、唱唔好人地歌，除左聲底運氣唱功，仲差在一樣野：張力。所以下半場由K歌組二人擔正真係悶到hihi，佢地唱完唱作組終於再出場時又已經差唔多完場，encore都冇帶唔返起個勢，搞到全場演唱會有頭威冇尾陣。如果可以，我寧願王菀之同林二汶帶足全場，用兩個真係識唱歌同寫歌實力派唱作歌手做主，肯定好睇過而家好多倍。就算只王菀之一個都夠揹飛啦，下嘩？

本來話八點三開場十點九完，結果遲左半個鐘開但一樣準時十點九完場，仲要冇encore，以香港演唱會黎講，其實好短好唔抵睇。雖然一早知道怒人班友正職係session佬，但睇開佢地玩嘈野，而家見到流行演唱會台上面又係佢地始終有點唔習慣，同時我亦好理解如怒人訪問中所言，平時自己夾band炸到龍飛鳳舞但返工又要玩返唔係特別好玩特別優秀pop野，真係做雞一樣咁無奈。今場見到一丁，結他佬又係Jason（有趣，佢彈pop session彈得非常好，怒人寫歌真係唔簡單好有挑戰性），仲要今晚都係打兩套鼓，點會唔諗起怒人呀？今晚唔夠喉唔緊要，下星期五31/5 Hidden Agenda又有得睇怒人。雖然更想睇白安，但仲考慮緊可能變節撐怒人，因為白安一張飛$580真係好叉大個心理關口．．．