Thrash Method

Thrash Method

28/9/2006 THU

20060929，係皆旺107去內蒙古窩闊台汗國「和親」同食蒙古包的日子，亦係韓國thrash團METHOD TRHK Live正日。全隊人非常重視呢場騷，臨上機之前果晚練歌練到點幾兩點（係夜晚），第二朝一早起身去機場，重視成噉，因為呢場係樂隊事先聲明今次香港之行"the most important"之演出。朝早落機再放野上酒店，聽日先至開騷，當然要玩番日先啦！先去赤柱，再去山頂，跟住打邊爐，打完返酒店，成隊都好開心。不過冇我份。冇計，全TRHK先得兩個人，我日頭份工加管埋舖頭已經冇晒時間，仲邊有時間做呢ｄ野？隊band自然係另一人Soni負責接待，而我呢晚仍然係留守TRHK賣飛。上次DISAVOWED騷前一日賣到去百五張，今次，減一百。冇辦法，實在太多因素影響，不過冇所謂：
"No matter how many come it is always a good show!
大家噉話。

29/9/2006 FRI

演唱會正日。今朝六點鐘起身。
「咁早？夜晚先開騷喎！」
「唔使做咩大佬！」
我唔係full time metal呀老細！今朝有個大公司老細上黎，因為要趕飛機所以八點上黎公司，亦即係七點鐘要返到公司準備。平時我一定小九個客，但今日我反而非常多謝佢咁早黎，點解？
八點鐘黎到，傾左個零鐘九點幾就走人，老細專車送佢去機場，我當然黐埋去啦，反正全程都係坐前座的兩位老細講，坐後座的我完全唔需要出聲，仲可以借ｄ倚訓下覺忝。半個零鐘車之後，訓醒，到左機場，起身幫佢搬篋落車客套幾句之後，掟番去前座，回程半個零鐘由借ｄ倚訓變成擺到明訓，坐正老細隔籬都係噉照訓可也，塊面皮厚左少少冇計。返到公司十一點幾，開完唔知點解成日要開的例會（寫字樓工最無聊就係呢樣：永遠都開唔完、開唔晒會），食下野又做多陣野就走人，所以今日一早返黎見客都係好事，早左返工就可以順便早ｄ放工。搞到唔想小個客咁鬼早黎，仲有ｄ想多謝佢忝！

十二點八走人（其實搭半走都得，但搭半果時剛剛飯盒到，就順便納埋貢先走啦），點幾出到灣仔，先去酒店會合。
「酒店？邊間酒店？」
「同DISAVOWED同一間！」
「即係邊間呀？」
呢兩場騷，今次先係我第一次黎樂隊住果間酒店。因為上次DISAVOWED去到好後先confirm到，真係趕到死先至搵到酒店卜房俾佢地住，所以開頭我以為所謂「酒店」即係賓館，酒店點會旅遊旺季都咁臨急臨忙搵到空房呀？今日到左先知道，原來唔係賓館、唔係房仔，真係酒店，仲要超豪果隻，係豪到我去到樓下企係門口抬高頭望住呢棟高聳入雲的酒店望到
「嘩～～～～」
真係豪到黐晒線，而每次搵親band黎香港出騷，都一定係住（大）酒店，點解我會知？六翼04因為台灣果邊有事多左間房，演出之前果晚我同佢地一齊訓酒店，點會唔知？DISAVOWED黎香港之前去日本十幾隊band一齊玩之音樂節Tokyo Death Fest都係訓地下，黎到香港有得住酒店有床訓，
「立即覺得自己似番個人！」
所以抵TRHK每次搞騷都蝕錢。

METHOD五人加埋結他手女朋友，成隊band得歌佬識講英文，其餘幾位，so-so啦。METHOD想食拉麵，大家走去酒店隔籬間酒吧，呢度夜晚係bar日頭做日本料理，食住吹水，自我介紹。
"I am Jason Becker."
"I am Dimebag Darrel."
"I am Dave Lombardo."
已經知咩事。個 lead guitar係超級Jason Becker fans，手結他淨係上MySpace聽過下都知道癲到戙起，點知原來真係癲到戙起，話說用Fly-V結他的佢冇野做又唔使交人時生活就係訓＞訓醒＞練結他＞訓＞訓醒＞再練結他＞再訓，冇野做的話，閒閒地一日練最少十個鐘結他（呢個情況仲要經常發生忝），所以手結他可以癲成噉。有一晚，佢訓訓下覺突然責醒，見到本身戙唔起之Ｖ型結他，居然戙左係度。
"Wah! Jason Becker yin ling ar!"
"You're drunk!"
Dimebag Darrel就笑爆咀地係個曾志偉fans。食完飯，歌佬話呢餐佢請，因為琴日香港遊成隊人都玩得好開心（但冇我份，嗚）。
"Wei, wa si wa, lay dok shu dok dou mei level?"
"Only high school jar!"
"High school? Lay hou ying man ng chi gum siu yeah wow!"
絕對唔似！韓國人英文邊有咁勁！香港都唔知有幾多個大學生英文有呢個level啦！
"Heung gong yan d ying men ho yi tan, or tan duck ming sai!"
"Gan hai la! Heung gong yan ying man si mar!

食完隊band返酒店拎野，冇野做的我得閒到做bellboy開門，都賺左唔少貼士架！然後過去TRHK指定gig地菲律賓群島，
"Yau hai or!!!"
"Gum loy mo lie hoi show ar???
真係好耐，666果場去開呢頭經過打個招呼唔計啦，DISAVOWED已經係近五個月前喇，好懷念呢度，格局平和，同大家關係好親切。第一眼見到，修葺加建左唔少。
「咦，豪左喎！梗係上次我地DISAVOWED帶旺左你地啦！立即裝修得咁豪！」
執野搬檯搬凳砌台set聲，臨到試野時，METHOD支結他斷左線，全場最得閒果個即係我帶住唯一識講英文的歌佬同結他佬走去Tom Lee買線，因為被人老點走錯左另一個方向，行左勁耐先至去到。途中大家傾左好多野。呢班友聽野又係聽到好癲，聽thrash同death聽得好專，同埋真係搏晒命噉練，難怪隻碟技術會咁高，而最happy係佢地同我一樣鍾意DARKANE。但班友玩左metal十幾年，都唔係咁輕鬆咁容易，當然夾band出騷之餘仲要做份正職搵食：兩個結他佬都係教結他，bass佬亦係教bass，鼓佬電單車送外賣，歌佬就係做抹窗，即係吊到幾十層樓高抹大廈外窗一唔覺意就仆街死果ｄ高危高壓工作。基本上，成隊band冇個係打正經工，underground就係咁難捱，有冇講過你聽，其實KING'S-EVIL呢隊可以話全日本最勁之thrash metal band，都係同METHOD一樣，只係做掃地之類雜工，係捱住世界玩metal而唔係玩住metal搵大錢果種人？所以點解佢地可以玩(true) metal玩到咁多年，同ｄ音樂咁真，有ｄ野係要捱過先會感受到明白到，經歷過工作過ｄ歌先會有果份內涵，亦所以唔難搵到好多好band成員都係廿尾三十幾之「老野」，事實的確係十幾歲的花靚，就算技術及得上，冇生活過同經歷過，音樂都係欠缺果一份深度同味道，呢樣野係呃唔到人。而其他令地下band極難生存之原因，同香港差唔多：首先當然係download啦，而家都冇乜人仲會買CD，日本、韓國同全球好多細label一間接一間噉執，冇label支持又冇人買碟，自然難維持落去，所以歌佬自己搞左間label Aeon Artworx幫韓國metal band出碟同推廣，又係難得的堅持同支持。整體風氣又係同香港一模一樣，即使會有佢地呢ｄ已有國際水準之樂隊，都冇乜本地人識同理，因為．．．又係「名」。新一代係識新唔識舊、識潮唔識經典、識明星唔識音樂，與香港無大異，哀哉。

買完結他線又走一大輪返去菲律賓，開始試音。DISMAL PROPHECY今次係第一次出，MySpace首demo只係一般，但live感覺好好，同DISAVOWED果次一樣，鼓佬一落場，唔夠十秒成間吧已經唔見晒ｄ員工，連本身ｄ客都走埋。明白點解內房裝修其中一個重點係加多左度門，就係驚左我地等間酒吧仲有個地方隔音俾班職員避難。跟住到METHOD，唔知點解外地band較聲硬係靚ｄ，特別係支bass，聽過咁多，呢隻bass聲一聽已經成為我最愛之一，支野個款仲要型爆，Headless Fly-V！
"Li g hai or g cutom bass guitar!"
一開已經勁爆，較過EP balance一流，Jason Becker手結他果然黐線，可能冇玩幾日手痕，開始左就試極唔停，意猶未盡地一首玩完又一首。的確係唔似有想收手之跡象喎。
「頂！咁過癮，你班友試晒成場個半鐘佢啦！」
試完／玩夠，已經差唔多六點鐘，夠鐘食飯。錢呢家野當然要俾間bar賺（冇錯，係俾間bar賺，而唔係TRHK自已賺），所以是日晚餐係搵佢地幫手整自助餐，在場人士見者有份，原來呢度酒吧仔都有咁正野食，仲要真係好鬼好食忝！食一餐飯仔都咁豪。豪？TRHKｄ騷從來都豪。六翼04果次，完騷之後係請晒全部樂隊加成間音響公司，夾埋六十幾人包幾圍檯打邊爐，埋單條數已經嚇死人啦。都係果句：TRHKｄ騷，從來係非牟利騷，做到幾大自己都冇得賺，因為俾番晒樂隊同其他單位，幫手搞騷果ｄ賺得仲多過搞騷果班。所以抵TRHK每次搞騷都蝕錢。

七點鐘係開騷時間，六點九開始入場。DISAVOWED果次入場時收飛收到呢咁hea，今晚相反好容易就搞掂晒，跟住係等，等奇蹟出現。結果係冇。最後七點半開始。等待途中，見到阿Big，
「喂！點解今次騷咁早到？」
「未到開工時間嘛！」（灣仔的職業女性真係各種（族）各（模）樣都有要幾靚有幾靚）
跟住來自阿根廷的印第安鬼帶埋佢個香港女朋友黎，落到去之後soundcheck開始左唔夠半個字女朋友已經立即急急腳走人，
「頂唔順呀！好嘈呀！幫我同我男朋友講我九點半返黎搵佢啦！」

DISMAL PROPHECY

DISMAL PROPHECY First Ever Live Set List:

drum solo greetings

Masquerade

44th Day

Awakened

「喂！鼓佬！drum solo唔係放最後咩？做乜變左開場？」
「其實諗住warm up咋，點知warm極都未開始，warm warm下越warm越長咪搞到噉囉！」

Voca & Guitar: Him

Guitar: Kin

Bass: Dan

Drums: Sun

DISMAL PROPHECY係一隊新band，亦係一個明星組合，基本上玩果班有追開香港extreme metal都會知係咩來頭：謙(ex-DEPARTING CROSS)、Dan (ex-DEPARTING CROSS, ex-HERMETIC SILENCE, BEREAVEMENT)、健(HERMETIC SILENCE, ex-BEREAVEMENT)、新(HERMETIC SILENCE, BEREAVEMENT)。呢場係DP第一場騷，第三首"Awakened"就係MySpace公開果首，夾埋三首歌，live水準同效果係好過網上試聽好多，而睇過四人咁多隊band，除左BEREAVEMENT對DISMAL PROPHECY印象最好，除左因為係玩氣氛野有優勢，仲因為有自己style，好多香港band問題就係太冇自己風格，點聽都係「好似（band名）」，要找到自己型態係非常之難，而DISMAL PROPHECY正正係做到呢樣野，gothic doom + melodic death，有ｄ似芬蘭metal之新方向，但聽過三首，又唔會諗到同邊一隊band特別似（INSOMNIUM？）。美中不足係全場玩得三首。等緊下一場full set。

DISMAL PROPHECY玩緊果時我仍然係樓上等緊walk-in，所以成part都係同班賓妹賓哥一齊睇電視。一面睇，班賓妹一面指住光頭的Dan爆笑：
"Mo tau fat, mo duck fing! Ho yeung shui! Hahahahahahaha~"

METHOD

METHOD TRHK Live Set List:

METHOD intro

Survival ov the Fittest

Enlightened by Annihilation

Lost Inner Circle

Breakdown the World

Unspeakable Pain

Psycho Paradise

Stained with Blood

Half Nation of Sorrow intro

Half Nation of Sorrow

First Strike is Deadly (TESTAMENT cover)

D.N.R. (TESTAMENT cover)

Existence to Nonexistence (METHOD new song)

Catastrophical Inhumanity (Breakdown the World Part II)

11th Hour (LAMB OF GOD cover)

Being Nothing (NIGHTRAGE cover)

Coldest Fear

bonus track: Heartwork (CARCASS cover)

八點鐘到METHOD，已經唔需要再企上面等人了。未開始玩，台型已經殺晒：成隊三支結他都係Fly-V，但最正果個反而係最低調之bass，支bass真係超靚聲，又要技術得，同埋（最重要）支headless bass實在超型！

Vocal: Alex Lein

Lead Guitar: Jae Ha

Rhythm Guitar: Hag

Bass: Hyo Won

Drums: Jung Ho

DISAVOWED果場二百五十人成間bar企到剛剛好，係多人到台下想郁都冇位郁台上fing亦冇位fing；今次得八十，少左人變相多左位，成隊band企落台下玩，本來已近變得更近，亦加多好多交流同互動入音樂同表演當中。結他佬平排企正你面前唔夠半尺同你相視而笑個感覺實在好high。

呢一場live，事先聲明兩場香港演唱會之中"the most important"之一場，因為講到明會玩個半鐘，包括佢地今年年頭出之首張大碟"Survival ov the Fittest"成隻同幾首cover。想知佢地音樂大概，可以先睇睇呢篇METHOD零六年首張大碟"Survival ov the Fittest"碟評，相信我係香港最早聽到呢隻碟之人，亦係全球最先寫呢隻碟其中之一個。簡單黎講就係古今合壁，neo-classical瑞典thrash，加少少電＆少少hardcore之丹麥thrash，同埋SLAYER、TESTAMENT呢類old-school thrash，而呢班友絕對係超級TESTAMENT fans，睇兩個結他佬都著TESTAMENT tee就知，就連Jae Ha手野同表演風格都好Alex Skolnick。你話有ｄ甩？算啦，玩出黎夠唔夠feel先？而家係睇live定聽CD呢？

Jason Becker就係Jason Becker，手野真係好黐線。

Hag演出永遠帶禪宗大師之氣勢。

歌佬Alex好有台風，出騷指定動作係迷彩布包咪，相當有台風，係英文咬字同讀音差少少，好多時講一大輪野大家都唔知佢講乜，最後變成佢嗌一輪之後大家嗌番佢大家都唔知咩事，但開心就得啦，呢ｄ係睇live之樂趣黎嘛。佢把聲真係好鬼正，果種拆聲夠thrash之餘，就係鍾意唔似好多而家之新thrash歌佬唱得太core，同埋keep得住成晚十幾首歌直落仲嗌到。最正係，你睇佢個樣咁稚氣（三十幾歲都咁稚氣，吹脹），真係完全想像唔到佢係唱呢ｄ野。

你有幾可見過metal友會有呢種笑容？

鼓佬Jung Ho手鼓夠恆，好多位用cymbal做變化度得好正，得意在手鼓擺到明係唔正統ｄ手勢好業餘，但打得勁就乜都得，都問過佢打咁多年又唔係差點解唔教鼓，因為一定賺多過電單車送外賣，可能就係因為自學得唔夠正統所以唔教。rehearsal時打得好細力，細到要推一推聲先響番，點知一到正場立即兩個款爆到九彩。太鍾意呢個鼓佬，實在係太過癮，佢一日廿四小時個樣都係一樣，完全係毫不在乎、無乜所謂噉款，平時係噉，就連落場鼓果時都係噉，但求求祈祈ｄ野都爆到七彩，但怒爆怒快怒複雜的同時，個樣卻是好很沉悶就黎悶到打喊路噉款，打完一首歌之後動靜係「咦下一首係玩咩歌呢」然後望望旁邊張rundown「哦原來跟住係呢首」再怒爆，真係好好好好過癮，愛死了佢呢種若無其事的台風。又或者會成場都咁若無其事，係因為支力到傻左。

佢表情永遠係咁傻更更，台上台下都係。

成隊band五個人，最鍾意反而係bass佬Hyo Won，個樣勁斯文，似清秀版Rock爺（呵呵呵），真係好眉好貌到點睇都唔相信佢係玩metal夾band，因為全個人最metal最band已經係長頭髮其他從外在至氣質冇一忽似，平時更係唔多出聲果隻，但一拎支custom headless出手，一出手，殺晒，聲同技術都係。知唔知最勁在乜？最勁在支bass係佢自己砌出黎。真真正正之custom。

好鍾意呢張，好鍾意Hyo Won。
呢張相標題係《風林火山》。

遺憾地唔夠多人，但唔緊要，大家都好有feel，好多人同鬼仔怒mosh，基本上黎到呢間吧，已經冇分台上台下喇，所以歌佬衝出黎一齊玩，結他佬又成日走位，好正！特別鍾意黎呢度搞騷，前面mosh同睇，後面吧檯挨住飲酒睇騷頗有觀火之勢，側邊個地台係chill-out area，加上菲律賓群島自上一場騷起已大力支持，逢TRHK騷啤酒必定有折（係平到果度ｄ員工都話平到黐線咁平，呢間bar對metal gig之支持程度係連我地自己都唔信），所以我鍾意黎呢度。玩到越後全場越癲，有個鬼仔set左個超punk頭黎，ｄ頭髮入場時直晒，出場時扁晒。隊band踩成個半鐘成隊都支力，鼓佬尾二果首都玩到甩甩地跟唔到喇，冇緊要，最緊要夠thrash！

除左中間首instrumental interlude，"Survival ov the Fittest"成隻碟玩晒，再加一首新歌同唔少cover，ｄcover對一隊thrash band黎講係特別之選，亦可見佢地接受幾多野。作為超級fans TESTAMENT當然會玩，仲要一玩就係兩首，有舊日經典"First Strike is Deadly"，亦有較新之"The Gathering"名曲"D.N.R."，隻碟最後一首就係呢首，而佢地玩TESTAMENT當然最適合不過，本身METHODｄ歌已經非常之TESTAMENT，所以你鍾意TESTAMENT亦順理成章會鍾意METHOD！臨完場三首先最過癮，LAMB OF GOD真係估唔到佢地會玩，跟住果首仲有趣，係NIGHTRAGE第二隻碟"Descent into Chaos"第一首歌"Being Nothing"，瑞典melodic death黎講呢隊其實係玩得好激好勁，雖然超明星班底，就係衰在冇名氣完全比人忽略，所以METHOD會cover呢首，不得不俾個服字佢地，會揀NIGHTWAGE呢個超冷門選擇而大路之METALLICA / SLAYER / KREATOR一首都冇玩過，呢個決定已經足夠令人刮目相看。thrash玩完，連metalcore同melodic death都cover過，未夠，最後death都玩埋：CARCASS。完全吹脹，呢班友諗野實在係太過神奇，齋睇所揀cover已經睇得出真係識聽野、絕對夠照。唔知有冇機會cover一下DARKANE同DARK ANGEL呢又？

看圖識字　甲：fing

看圖識字　乙：mosh

呢場人數雖少，但真係high到hihi，特別加送bonus video：
Catastrophical Inhumanity (Breakdown the World Part II)
「擺到明low-fi架喇而家吹咩！」
呢首係METHOD金曲之一，夠恆同多變化，仲有個一絕tapping riff，
超鍾意果下中指神功，佢地應該同Kirk Hammet一樣擺支結他上膊頭彈。
但我地最鍾意呢首歌之原因，係中間slide果個卡拉OK位，我到而家都成日係度唱。

十八首歌，完場一個鐘頭四個字，歌佬周圍派野，有貼紙、有襟章（我兩樣都冇，灰），本來呢ｄ可以拎出黎賣，但叫隊band自己用黎派番俾各位朋友，寧願大家開心，有時做野唔係為左錢，意義更重要，不過我地同隊band最開心，係隻碟出乎意料地賣左好多好好生意，可惜冇tee，好多人用飛尾買碟，劉Sir開埋簽名會係噉簽飛尾。散場之後，酒吧老細好唔滿意：
「喂！你地上次搞果隊咁嘈，今次呢隊唔多夠激喎！」
「下次啦！下次再搞番隊death野黎！」
呢間酒吧已經逐漸愛上我地黎呢度搞metal show。

最後一首CARCASS "Heartwork"，成隊band玩到全場飛黎飛去。

完場例牌節目：全場蜂擁上台搶禮物

Alex with BloodKrishna "The Cult Thrasher"

"???"

最後，嚴正警告一位朋友，一位小朋友。

冇錯，就係呢位小朋友。
芳齡：13歲　特徵：著CARPATHIAN FOREST tee
罪名：METHOD玩幾耐，佢就訓幾耐。

睇下佢，企正係結他手前面，
都可以戙係度瞌左成場！完全當METHOD同大會冇到！

好在天網洃洃，一切罪證已被拍低紀錄在案，
呢位小朋友自此會揚名韓國！

完左演唱會，善完後玩多陣，大隊過去隔籬另一場，我當然係跟另一隊走去食飯先。喜喜已經成為灣仔band show後指定食堂，亦係呢頭之明星食堂，夜晚上黎呢度成日可以見到大量bands & fans，上次DISAVOWED完左之後佢地都係黎呢度一齊食晚飯架！野食唔係非常正又幾貴下但多到爆，加埋（最重要）呢頭我淨係識呢間都唔知仲有咩其他野食又懶搵，所以次次出親黎灣仔搞騷都係食呢度，某程度上都幾迫於無奈架～全場十幾人是夜晚餐當然係劉Sir豪包，橫掂都係蝕，都唔爭在蝕多少少。食完飯走番過去Philippine Islands隔籬間The Wanch亦即係666果個場睇另一場騷，今晚真係好正睇完一場又一場。呢晚表演係cover band BLACK SERAPHINE，玩DEEP PURPLE、SKID ROW、MOTLEY CRUE、GUNS N' ROSES呢ｄ一聽就會發晒癲的經典，絕對係一個rock版《名曲滿天星》，其實本身666都係諗住噉玩法，一班朋友玩下cover歌仔大家唱下開心下就一晚，但後來幾隊band各位朋友越黎越認真，最後變成真正的band show，係有點始料不及。但諗深一層，如果真係搞到好似呢個metal karaoke之夜噉，在場的朋友又有幾多知道做緊乜、會識得跟住唱？

BLACK SERAPHINE
（乜都睇唔到，夠晒black喇卦）

好多鬼，真係好多鬼去，rock music、band sound始終係鬼佬音樂同重要一部份，我地係聽BEYOND，而佢地係聽hard rock同metal野大，我地心目中之《光輝歲月》、《海闊天空》，就相等於佢地之"Number of the Beast"、"18 and Life"，所以BLACK SERAPHINE玩邊首歌都好，全場大家都識唱，因為呢ｄ都係一起成長我與你的金曲。有隻鬼一面跟住音樂一面好似跳breakdance噉跳「rock dance」，仲要跳足成晚首首都有得跳，勁！有個中國人阿叔，幾近阿伯果隻，著住件IRON MAIDEN tee，雖然老但一睇就知係rock友，上次DISAVOWED好似佢都有黎，每次一到IRON MAIDEN時間就係噉指住自己件tee大叫
"IRON MAIDEN! IRON MAIDEN!!!!!"
每玩完一首，觀眾都係度怒嗌點歌：
鬼佬甲：「BLACK SABBATH！」
鬼佬乙：「LED ZEPPELIN！」
IRON MAIDEN阿叔：「IRON MAIDEN！」
METHOD：「SSSLLLAAAYYYEEERRR!!!」（笑到仆街）
BLACK SERAPHINE班友都知METHOD係咩料，唱Ozzy兩大金曲"Crazy Train"同"Bark at the Moon"仲撩埋佢地一齊唱，而Bon Jovi首"Wanted Dead or Alive"，知唔知guest vocal係邊個？
"Lau Sir!!!!!!"
冇錯就係呢條茂利！你冇黎到，就錯失左如此精彩一幕喇！今晚好多人過黎呢度，DP & friends，有METHOD，有其他客同朋友，仲有北京人。呢個北京超級thrash fans做記者，因為出差黎到香港，琴晚先上黎TRHK掃thrash野，同行仲有位北京女士。剛剛上黎TRHK就撞到跟住果晚係呢場METHOD live，
「盛事！不能錯過，不可不去也！」
北京女士話：
「要去你自己獨個兒去！我一定不會陪你瘋！」
睇完METHOD之後，The Wanch又再出現，再見到佢好開心，完全係一個rock & metal友，好多歌都識唱仲要係唱得晒，一面聽一面起勢fing，一到solo位就彈 air guitar，
「你懂玩琴？」
「不懂！但高興！」
最high係玩QUEEN / METALLICA的"Stone Cold Crazy"，相信佢今次香港行一定唔會後悔，亦會覺得好好彩自己趕得切呢幾日落到黎。rock呢家野，始終係要同鬼佬一齊rock先夠high，差唔多首首歌都大合唱，全場一齊唱Bon Jovi、合唱IRON MAIDEN "2 Minutes to Midnight"同"Run to the Hills"，跟住北京人加菲律賓人加香港人加唔知咩國家人成棚人組成聯合國fing頭部隊，成排人牆係度怒fing怒跳怒嗌rock野都照mosh，high到仆街睇呢度真係仲high過正場，因為正場果度係睇騷，黎到呢度係聽歌同玩，free好多，同埋而家身邊係鬼；身邊係人，好多野都唔會發生，正如你叫身邊的香港人同你一齊唱IRON MAIDEN，香港人會a)問你乜野係IRON MAIDEN同b)話你黐Ｘ線。BLACK SERAPHINE隊野技術確係有ｄ缺憾，但high就得啦，係咪？出live係玩feel，唔係玩accuracy，玩錯玩甩又點先？你high唔high先？

聯合國fing頭部隊係The Wanch入面拆緊場時，
另一班人係側邊巷仔噉玩法：

玩到十一點幾，係時候食飯喇－我食左遮，其他人未食丫嘛！冇錯又係喜喜，成棚人走到入去，我就食左，純粹飲住野睇其他人同METHOD食。韓國人食野真係超食得辣，歌佬食個雲吞河，差唔多半樽辣椒油倒落去成碗染晒色先收手。無無聊聊吹吹水，今日吹開先知道，
「666我地HERMETIC SILENCE首SLAYER medley，特登玩俾劉Sir你架！就係因為場騷之前你點歌"Angel of Death" + "Raining Blood"，就係因為你呢句！我地特別練呢首俾你！」
我鍾意。結他手曰：
「知唔知我每次出騷幾慘呀！每次都係臨出騷先知道玩咩歌，呢首歌我晏晝一點先開始練！」
「你天資聰穎嘛！大家都係就番你個層次遮！」
食食下，附近另一場band show又完左，有群幾男多女的「型」人走入黎。班友又係度玩野：
"Fucking EMO shit! Fucking EMO shit!!!"
「講咩呀你係度！係度串我地？」
「咩呀！我講緊EMO，Hong Kong Extreme Metal Organization咋嘛！心虛呀你地？」
事實證明，玩metal，冇前途。睇我地四張檯，全部都係麻甩仔女的數目半隻手搞掂；再睇人地，開幾圍酒咁多，仲要女(fans)人數佔80%以上。真係勁多女(fans)。所以，大家記住：

千祈唔好玩metal　玩親包你冇前途

一條IQ題：請留意以下各圖片

1

2

3

問：以上邊張相入面果班係傻仔？
A. 以上皆是　B. 張張都係　C. 人所共知　D. 「噉都要問？」

又有另一條IQ題，一條metal IQ題，絕對適合用黎考考「我好metal」人士，一試就知道係真metal定潮metal。
「我聽metal聽左好多年架喇！我聽得好雜，咩都聽架！」
「你好似真係識好多野喎！不如我問你一條問題丫！」
「問咪問！我聽好多metal野架！」
「我想問呢首歌係咩歌呀？首歌係噉架：
拍拍拍
「．．．你做咩呀？」
「我問多次啦！首歌係
篤篤篤
「．．．喂！玩野呀？」
「可能唔係太清楚．．．我問多一次啦。呢首係咩歌？
澎澎澎
「黐線！呢首歌黎咩？我聽咁多metal，如果真係metal歌我會唔識？」
噉，在座的你識唔識呢？絕對係一條一試就知道係唔係(hardcore) metalhead的絕題，就好似METHOD歌佬最後一首歌時拍一下心口之後大嗌"work"一樣，係一個quiz。
「希望在座『聽好多』的你唔會兩條都唔識答啦下！呢ｄ係聽metal好好好基本之必備知識黎架咋！」

真係好過癮的一晚。

食到點幾鐘，METHOD返酒店，班友繼續落吧劈酒，我就返屋企。大佬唔使做咩真係！（「你班友唔好係我面前出聲呀下！我好唔妥返五日或者長短週果ｄ契弟！」）咁夜好在有通宵小巴返屋企，同巴士一樣路都只係十二，抵玩。途中遇上送隊到醉晒的阿Small搭車的阿Big，打開車窗大嗌：
「喂Big爺！今次係菲律賓妹定俄羅斯妹撩你呀？」
今日嘈夠喇，回程係聽謝安琪隻《K sus2》。你唔使問架喇，我絕對係盲目的謝安琪fans，呢隻碟係今年最佳大碟之事實點都唔會改變，買左聽到而家，都仍然係10/10，如果減埋電果兩首《亡命之途》，或者換番另一首acoustic/rock野，會完美至666/10，呢兩首唔係唔好聽，只係配合番整體果份「真」同人情味，全部都係acousitc同rock作品會一致得多，放兩首電野係度硬係有ｄ格格不入，所以呢兩首我成日飛，自製心目中之666/10四曲EP。

30/9/2006 SAT

琴晚咁多野玩，返到屋企成四點幾先訓夠晒high，今朝居然仲起得切身返到公司唔遲到。返到黎第一件事當然係
「會計靚女！即整杯咖啡麥皮黎醒醒神！」
真係好支力，頹頹地過。無驚無險又一點，今日超符碌，本來晏晝有大鑊野要OT過深圳做野，噉就真係舖又冇得開騷又睇唔到，好在本身今日剛剛有騷搵到肥仔頂埋，問題先冇咁大，跟住劇情再峰迴路轉地突然間所有問題解決晒，唔使我上深圳忝，正！噉我、會計靚女同另一個同事，亦實行我地原定計劃：太子豪食。
「呢間cafeｄ女靚呀！唔止waitress，連客都係！上次同佢黎，佢眼甘甘到丫！」
靚女話。所以今次特登帶埋我上黎。點知
「一個都冇！請問ｄ靚女去晒邊？」
「．．．今日dayoff卦！」
點幾鐘坐低就唔願起身，猛咁叫野飲飲食食，同埋傾傾傾傾傾傾傾。我間公司好頹大家都知，但今日係度傾一傾，先知道原來間公司咁頹，係我入黎之後先發生之事，我入黎之前朝早係冇人敢叫早餐、冇人返工敢遲到、冇人做野時敢食野、冇人夠膽做做下野匿入pantry坐大半個鐘先出番黎，呢ｄ違規行為原來全部都係我黎左呢間公司之後先開始。死，好似第一日我已經做足晒咁多瓣！原來係我教壞左大家！
「對唔住呀各位同事！係我令到勤力的你們咁頹廢！」
你初入一間公司個形象係點，就會係之後其他人對你之印象：會計靚女一入黎就係串爆，所以冇人敢恰佢；同事第一日已經做到軟弱無能噉款，所以做左咁耐比人恰足咁耐；而我入到黎已經係咁頹，係頹到老細都有ｄ後悔請左我返黎果隻咁頹，所以到而家呢條友冇人再想理佢，就算完全坐係度唔做野，大家都覺得好正常絕對唔會怪佢，就好似今餐噉，三條友坐係度，但基本上講只係兩個人，第三個係坐／攤／撻係張梳化上面，一面聽兩位同事講盡公司是非，一面食勻全間cafe所有薯類食品，薯角薯格薯塊薯條薯蛋最後食到去薯皮。點細的公司人事都係咁複雜，但點複雜都與我無關，因為我已經頹到超脫左所有人事關係，其他人有乜搞都廢鬼事搞我了。

吹水同食薯仔唔捨得走，去到四點三，
「唔得喇！要走喇！開騷喇！」
今日係LLNR Festival第一日嘛！只要係值得支持之本地騷就到時間都會支持。太子坐地鐵過到去九龍塘，去到已經差唔多五點鐘，門口仲係人山人海。
「咦？唔係話四點開始咩？」
好彩冇早到！冇諗過黎到第一個撞到係METHOD歌佬Alex，冇人陪住帶住得佢一個人係度行黎行去。
"Or d member ng gin jaw!"
本來係尾二一隊玩夜晚九點九，點知黎到個schedule調左去第三六點九，班友一黎到放低野就唔見左人，
"Wa hui bow yin, dim g ng gi hui jaw bin!"
要搵番班友出黎提佢地今日早左出，兩條友遊城大捉依因。都唔使問，睇班友個死款，十成十過左去又一城睇野啦！歌佬真係有ｄ肴底架，大佬全隊人得佢一個識英文，而且個個都以為九點幾先出，到時真係夜晚先返到黎甚至返唔到黎就大劑！搵搵下，有人做訪問。
「你好！我地係做緊一個project有關香港獨立音樂，想搵你問幾條問題架！」
indie music project？搵我啦梗係！傾傾下，有ｄ唔對路：
「你地係邊間架？」
「IEd。」
「我又係教院喎！你教院係讀咩架？」
「唔係讀，而家教緊架喇。」
「教咩科呀？」
「教英文！」
「教英文唔怪得搵到位教書啦！」
「唔係教小學呀！我係教IEd架！」
「即係點呀？」
「即係教BEd英文！我係助教黎架！」
「！？！？！？！？」
教院幾時出現呢ｄ神奇人士！？！？呢個助教都唔夠神奇！最神奇係佢唔係自己黎，係有個tutor帶佢地黎「見識見識」！

呢個係我讀教院加畢埋業咁耐，見過第一個鐘意band sound之講師，
除左ｄ手下仲帶埋個仔黎睇呢場band show夠晒rock，
而除左音樂之外，我地仲有一個共通點：
"I don't like IEd." "I don't like either!"
所以我介紹佢地睇劉Sir個網，見識見識呢個史上最不知所謂教院學生。

五點半，終於開始入場。一開場已經有百幾二百人，亦即係今晚打個double都唔奇。音樂節喎大佬！仲要超明星班底喎！（冇錯，你估係TRHKｄ幾十人酒吧細騷仔咩呵呵）相信聽日第二日會比今日更多人，因為係星期日，同ｄband更切合本地獨立音樂趨勢同口味，但今日仆到黎除左因為METHOD，仲因為FROM THIS DAY，更因為今日ｄband較貼近我鍾意果類，同好多都未睇過，我最鍾意睇自己唔識果ｄ野。呢一晚除左METHOD其他我係完全未睇過live，所以呢場開心到震。
SPERMATIC CHORD
歌聽得多，亦有隻碟，睇今次先係第一次睇。從來覺得香港會有呢種人好神，會玩呢種style絕無僅有，雖然慢慢開始多人研究呢類實驗core野，但佢地絕對係本地先驅。要形容佢地玩ｄ乜野冇乜可能，因為根本連佢地玩乜都唔明，只有話呢班靚仔DEP+Mike Patton上腦，結他手Adam又稱「香港Stanley Jordan」tap到唔明發生咩事，加埋個歌佬係噉嗌同得閒無事拎其他Ｎ樣樂器出黎，睇完相當明白點解聽過人講
「SPERMATIC CHORD唔係一班音樂人，而係一班科學家。」
無怪乎近排呢種noisecore野慢慢成為下一個本地潮流／趨勢之前，未聽過有幾多個本土香港人會接受佢地種野、聽得入耳－面對現實吧，本地音樂發展始終為大潮流所困，metalcore/emo(core)已經係最佳例子，所以SPERMATIC CHORD我第一次聽已經非常鍾意極有興趣，因為佢地唔係潮人而係發源人，就算當係跟（外國）潮流，都比人早跟不知多少，起碼你連佢地果種音樂都未聽聞過果時，佢地已經碟都出埋，兼已經有埋自己label同Ｎ個乜都玩過晒之side projects。所以我好鍾意呢班友。
EXIT ON TWELVE
絕對可以用「聯合國band」黎形容，一上台，METHOD歌佬立即出黎問：
"Hai mic EXIT ON TWELVE?"
咁關心，因為個鼓佬係韓國人黎。雖然係我鍾意果種野，亦太耐冇時間搵野聽，始終唔係自己專果瓣，呢隊screamo無論名定live都係第一次見聞，歌同玩都好正喎！鬼仔玩band無論技術定台風，唔知點解普遍比本地人有感覺得多。
睇睇下，撞到Star Crossed神神秘秘地走過黎講佢隊神秘組合SADLEC。
"Chiu! Yau gay sun bay! Yet joe g dou la!"
METHOD

由尾二提前到第三，METHOD變成上半場壓軸，玩左八首歌，六首自己歌加一首TESTAMENT一首NIGHTRAGE。琴晚寫左咁多，今日呢場唔需再多寫，玩到好喪就係必然，因為係尊重番自己同觀眾，只係個聲怒爆到唔多清楚，大場音響玩呢種恆野係好難控制。
知唔知唱完第一首歌之後，歌佬係度係噉嗌一句，嗌ｄ乜？
"Lau Sir!!!!!"
UNJUSTIFIED YOKE
METHOD一玩完，全場立即淨番半場人唔夠。或者因為係食飯時間？呢隊punk名第一次聽live第一次睇，好遺憾係呢場較失色之一隊，少歌＆短好快就玩完，只記得有首歌失驚無神有個guest歌佬上去唱／嗌，嗌完首歌之後又絲絲然落番台好似冇事發生過噉，其餘冇乜印象。希望只係因為上一隊係METHOD，先會有呢種感覺。
UNiXX
知道非常出名，但又係今次先第一次睇。到佢地出果時，台下已經唔同晒樣，十分地多女fans。玩「迷」野，係因為迷，定ｄ歌真係好長？感覺上玩左好耐，好難得呢場騷會有呢種另類表演，表現係今晚水準最高之一。係咪出左／出過碟？之前已經想搵，睇完呢次live，更想。
LUKE CHOW
UNiXX玩完之後，走勁多人，成個場又冷清晒，跟住入另一班人，成場坐滿大量鬼妹鬼婆，開始之後，更加係入下入下成個場滿番晒。會有咁多女性觀眾，睇過就會明白，唔難明白：隊band包括一個肥仔鼓佬、一個靚仔結他手加一個靚女bass手，歌路清新易入耳之folk rock，會咁受外國人歡迎，完全唔奇。好有樂趣的一隊，前半激左咁耐，中間整UNiXX同佢地chill out一下，感覺好正。
間場時「香港Stanley Jordan」係度兜售佢已經唔知係佢第幾個side project RAINBOWTRON，喂逢有佢份ｄband果ｄ碟都冇得唔買喎，仲要廿蚊隻，即磅啦仲使諗！
「阿冷！我已經幫你買左隻！」
SHEPHERDS THE WEAK
呢隊野想睇好耐，咁耐以黎只睇過一次，仲要係未改名仲叫MILK & COOKIE果期，我睇完冇耐之後就改左名做SHEPHERDS THE WEAK。
"Gor man ng tone jaw, yum mok hai my yet yeung?"
"Ng tone! Yi ga hai LAMB OF GOD!"
"WHAT???"
眼界大開。真係好勁，佢地係我睇過水準最高本地band之一，果然係香港版LAMB OF GOD，ｄ野爆到九彩台上台下都癲晒，連METHOD都話佢地好鬼勁。係咪鬼仔夾band勁ｄ？果種煽動性同音樂性確係比好多同類本地band更高，或者因為外國人肯聽多ｄ，呢樣絕對有幫助。難怪佢地會玩FROM THIS DAY之前，就算你話我聽係投機地將METHOD調去第三等SHEPHERDS THE WEAK做FROM THIS DAY開場，我都會覺得完全唔意外同十分正常，因為音樂性質同觀眾口味趨勢，絕對應該噉做。

間場，METHOD歌佬拉左入後台。
"Mer si???"
原來想影合照！

平時好難察覺，但呢班友無聊起上黎確係可以好無聊。
跟住兩日呢ｄ無聊事更常發生。

FROM THIS DAY
主辦單位力谷之一隊，亦係食正台下觀眾口味之一隊，所以全日最多人係呢part相當自然，正如呢場騷其中一個吸引我黎之處都係因為佢地。可以話係deathcore或者extreme metalcore，即係metalcore但本身metalｄ位變成death metal，加埋就係好多breakdown的death metal。台上五條友完全係喪爆，呢part係睇過最正外國"metal"(?) band表演之一，因為台風實在一流，淨係睇個結他佬成個台前後左右上下跳勻晒再跳埋落台，已經係空前絕後，再加埋佢襯晒首歌抵死到爆的表情，絕對係睇過最佳band show表演者，更加鍾意歌手每首歌之前都會講一番說話，講講自己、傾傾想法、介紹首歌、爆ｄ無聊野搞下氣氛，未必個個人受，但我就覺得佢呢部份做得好正，或者因為講ｄ野係有論點有組織有理據，唔同一ｄband純粹一味死嗌煽情流於表面。睇live就係睇呢ｄ野嘛！好坦白講，隻碟"Proverbs of Ashes"因為core之關係太多（故意）慢位停位，我地呢ｄ聽落嫌唔夠順唔夠爽，但core野從來係live正過CD，對一隊band黎講有時 showmanship比音樂更重要，可惜玩得半個鐘就完又要冇encore，雖然已經好夠但可以多ｄ當然更好。
「好似自己ｄshow，都唔係次次有咁高評價喎！」
噉就肯定，因為呢場係core show。core同metal從來係兩樣野黎，講「睇」，core show絕對係「好睇」過metal show，因為本地之台上台下文化，亦因為(extreme) metal之局限。正如你可唔可以叫METHOD成首歌根本從頭到尾冇刻停到手的結他手，搵個位停低同你一齊chok一齊fing，或者solo緊果時飛落台？如果兩隊band都係第一次聽的話，你會覺得由頭到尾高速直去的METHOD較易「聽得明」，定還是落好多鮮明停位的FROM THIS DAY易ｄ？有得chok的音樂，從來係比冇得chok的音樂受歡迎同流行，所以以前皇道係nu-metal，現在皇道係metalcore，(extreme) metal早已收皮了，甚至皮都從來冇過。

十一點FROM THIS DAY玩完，音樂節第一日亦圓滿結束，六個鐘加兩隊外國band絕對抵睇，對我黎講最抵係一次過睇晒咁多未睇過之band（相信呢番言論相當反傳統，在這人人都係去睇「我識果隊／我朋友果隊」的時代），仲要有兩隊咁正之外國band，抵！可能揀今日呢場真係好彩，除左UNJUSTIFIED YOKE果部份較失色之外，全日對我黎講冇乜悶場，當然聲可以做得再靚ｄ會更好，大場音響始終太難控制。不過有樣野唔多滿意：
「乜唔係有HARDPACK同 THE SCIENTISTS咩？」
HARDPACK興趣唔係好大，但係THE SCIENTISTS超想睇，點知黎到先知道冇佢地份！超級失望！希望有下次機會。
今日，好多人見到劉Sir都問：
「呢場騷黎喎！做乜拎電腦黎？」
五點半坐到十一點幾，除左聽電話同去廁所之外全日係度，正頭返工噉款，唔拎埋部電腦黎點捱？
「．．．好似好怪喎！」
「我覺得正常過睇一隊band，之後走出去煲半個幾鐘煙，入黎睇半個零鐘，跟住又走番出去煲煙食飯噉喎．．．」
我係唔鍾意睇騷時「交更」果種人，六個鐘長就六個鐘長照由頭睇到落尾，喂，俾左錢，唔係睇足先抵咩？當某ｄband、「我唔識／冇聽開果隊band」係廁所位、食煙位、電話位，於我黎講係幾戇居的一回事，亦對表演者唔多尊重。或者係我太投入。

完場之後，又係撞METHDO歌佬，又係尋人時間，同晏晝一樣得番佢一個其他member全部唔見晒，搵極都搵唔到，歌佬好心急地走左出去。
"Gum sum gup?"
"Ng hai! I need some nicotine!"
反正唔知去左邊，不如去煲番支煙。大家戙係個垃圾桶旁邊吹水，吹番場騷、吹下音樂、吹下生活。煲煲下煙，成班人躝完街返晒黎，仲帶埋手信、韓國土產酒釀
「雹潘炸！」
齊人就走人。今晚隊band搬去重慶大廈，執晒野出到場外撞到FROM THIS DAY又走過去傾下。佢地今次黎逗留中國兩個禮拜，黎香港表演完呢場，就會過中國巡演十二場，途中會係上海同北京放假，
"Then I will have time to do shopping and find some Chinese girls!" (hahaha)
成隊band鼓佬最老，其他除左結他之外個個都係廿六七八，亦即係同METHOD差唔多年紀，其他人可能唔明白，但METHOD果部份佢地非常enjoy，因為大家都係果個年代、都係聽thrash野大，完全明白佢地做緊乜同想表達ｄ乜，同聽得出METHOD係完全玩得出果樣野出黎，所以全晚最投入果段時間就係METHOD玩果時。另外佢地都超級鍾意METHOD bass佬支custom headless，呢句已經聽過唔知幾多次！支野真係太型！歌佬夠老誠，好鍾意佢幫每首歌加引言，講俾你聽佢地想表達ｄ乜同搞起氣氛，呢個亦係live band致勝之道。
"What is your job?"
"I am a psychologist!"
"YOU HAVE A GOOD JOB!!!"
作為一個metal band歌手、填詞人，呢種社會、心理同思考層面極廣之職業，絕對係夢寐以求。跟住結他佬過埋黎，恐怖在技術同表演玩到咁癲的佢，只得廿一！
"We tried many guitarists before. When we tried him once, we knew that we cannot lose him!"
呢個FROM THIS DAY首次亞洲tour，只係三日內，呢位廿一歲新成員已經學識晒佢地所有歌！完全唔知呢條靚仔咩人黎！
"You sound like DYING FETUS."
"Really? People say we are like MARTYR A.D. more!"
聽個鼓佬講就知佢聽野癲，全部都係超快超"tech"之black同death，又講左樣過癮野，話說佢第一次睇DARK FUNERAL時仲未聽過black metal，去到時見到隊band個個六尺幾高，再加埋鬆糕鞋七尺都有，台上個個人都超瘦仲要戴晒釘同鎖鏈子彈帶化埋屍妝，跟住怒爆怒嗌，成班鬼／成班小丑噉，果時未知咩係black metal 的佢只識講句
"WTF???"
難怪呢班友咁癲。難得有人可以傾到咁多野，好想傾落去。可惜要走了。

十二點半，依依不捨地返屋企，三條的士返歸，今晚盡慶而回。上網睇睇，
「今日唔係你睇舖，都唔知幾多人，我忙到食飯同去廁所都冇時間！」
肥仔話。所以我從來都講，次次我開就冇人唔係我開就爆，為免邪到間舖執笠，我都係時候退休了。今晚同老豆傾jazz，
「Ant哥，我老豆唔妥John Coltrane架！佢始終係old-school人，唔鍾意速吹派！」
聽jazz，始終鍾意聽吹野同big band野，貪夠high夠熱鬧，其次係鋼琴因為抑揚頓挫，jazz guitar就一路唔多鍾意，我同黑人結他冇乜緣份，但最鍾意始終係實驗、free、avantgarde、noise、唔知玩乜春唔知點分類果ｄjazz，或者因為我都係一個唔知做乜春的傻仔。上網睇下聽下jazz執下野，撻上床，先發現：
「係喎，今晚仲未食飯！」

1/10/2006 SUN

今日星期日，但好早起身，唔係訓唔著，係唔敢訓，因為應承左METHOD今日隨時on call出去。朝早流流長又唔想訓，聽住劉以達隻《水底樂園》攤屍。計中文碟，我第一隻買係糯米糰《青春鳥王》，第二隻係呢隻劉以達《水底樂園》，可以睇到呢隻係我第二隻買之中文唱片，亦係我第一隻買之粵語唱片，同呢條友一開始聽歌已經唔Ｘ正常on99。達明一派我好鍾意，但一路以黎我都覺得有料果個係劉以達唔係黃耀明，所以拆夥之後黃耀明ｄ碟完全冇追過，但不斷摷番劉以達絕無僅有之幾隻。可以話係唯二兩張之大碟《麻木》同《水底樂園》概念其實好似，都係劉以達寫歌再搵名歌手唱，不過音樂路向同水準都好唔同，玩電子迷幻之《水底樂園》初聽時已覺得唔算好突出，特別係由我十分唔妥的甄健強填詞，除左范曉瑄首《最好的愛煞人武器》、陳潔儀首《孤獨頻盜》同夏韶聲首《故居夜遊》，其他冇乜邊首特別，就算搵到張學友呢ｄ實力派都救唔到幾多。其後再搵到早已絕版之中樂歌德迷幻《麻木》，更加覺得《水底樂園》普通，淨係一開頭係中樂gothic rock已經立即吹到脹晒，而且呢隻碟主唱係黃秋生、王菲呢ｄ另類之選，先至係我心目中之「明星」。呢隻仍然係我聽過最特別之中文唱片，亦係我最愛中文唱片之一，只有一樣野好唔開心：當我搵到呢隻絕版碟之二手科百二蚊買左之後冇幾耐，就出左公價四十蚊的remaster版，吹脹。所以而家呢隻碟完全唔難搵，大家唔好錯過呢部傑作。
總有一天，會追埋《灣仔之虎》ost《醉生夢死》同佢其他作品，搵得到的話。

等到一點半，仲未收到電話，
「可能佢地自己去左玩卦？」
落街買碗牛腩河食（牛腩河我鍾意食全走，即係乜都走晒連湯都走埋走淨牛腩同粉兩樣，個粉仲要係河粉溝米粉，而家檔野見到我行埋去已經知道要煮乜，「得你一個咁黐線！」總有一天會全走到走剩個碗），食食下一點九收到call。
"Lau Sir! Lie la!"
嘩！即超高速一面食河一面換衫再係噉打電話，的起兩袋野即飛巴士出尖咀落車再跑，兩點半去到重慶大廈！呢兩晚佢地都係住呢度，見到呢棟大廈咁多阿叉同黑鬼，佢地覺得自己唔係黑色先係唔正常。琴晚場騷之後食完晚飯再劈下酒，成三點幾先訓，難怪今日咁遲起身。先去食個晏，
"Sic mud?"
"Yat boon choi!"
對我呢個尖咀只識HMV的傻仔黎講，呢個係絕大挑戰，唯有一面行一面問人，同一路比人老點，最後係隊band幫我搵番間日本野出黎，笑死。之前食左個腩河，而家陪隊band食又食多個咖喱豬扒飯，韓國人真係好食得辣，連旅行都自己帶埋樽辣醬跟身，ｄ飯到左係噉落落到黐晒線，仲帶埋納豆黎食。佢地食得津津有味，仲整左兜我食，拉開個蓋開完之後一大堆豆，倒ｄ醬倒ｄ油係噉撈就食得，一啖就收皮：好似食中藥噉，啃到爆！其實韓國人都覺得好啃，但一面難食一面係噉食！韓國人真係好烈。

食完日本菜，先去Tom Lee睇結他，仲撞到二寶樂嫂。呢度ｄ野冇話香港貴ｄ定韓國貴ｄ，effect平過韓國好多，結他價錢就睇model，但有唔少款韓國冇，好似bass佬雖然自己有支無敵custom bass，第一件事拎左支epiphone hollow body黎試仲非常鍾意，鼓佬亦即時掃左條鼓匙再執多條韓國搵唔到之snare。結他佬想買個細amp後台時可以練結他熱身，試左幾款之後都係落唔到手，因為ｄamp係
"MADE IN KOREA"
玩完Tom Lee，下一站就係旺角TRHK。
「你帶佢地四圍走，噉間舖邊個睇？」
好在今日肥仔有時間睇到，唔係我冇得走出黎METHOD又冇得噉樣周圍走，大家都會好灰，之後二寶樂上埋黎湊熱鬧，同佢地研究香港煙定韓國煙好食ｄ。鼓佬即掃佢地最愛的THE HAUNTED同VADER新碟，唔識英文都掃左本BW&BK，或者因為SLAYER封面？兩個結他佬掃左NATIONAL NAPALM SYNDICATE同我個人推介PROJECT HATE，跟住走出去睇玩具。成班除左係metal友亦係figure迷，歌佬超鍾意再生俠，同我一樣都係鍾意美國漫畫多過日本漫畫，因為真實同現實得多，同氣質好dark、好metal。其實睇過美國漫畫，就會明白點解美國人會咁鍾意metal，再比較埋美日漫畫，又可以睇得出兩地metal之風格同喜好差別係邊。

「METHOD隻碟好聽到隊band都唔捨得俾劉Sir！」

臨走前放低部cam俾阿成，
「今晚記得拍低佢呀！」
拍乜？

「四條友個款好metal！」

出到黎旺角，自然要行下街啦。旺角果然旺多人到死，首先去好景果頭睇軍服，軍服呢樣野係metal服裝之中舉足輕重，band tee + 軍褲 + 波鞋／皮靴從來係metal佬指定裝束。跟住行女人街，行左三份二條實在太多人＆支力，都係走去食飯算。每次行過街頭小食檔，各位團友都會立即頭暈身興急速離開，原因好簡單：臭豆腐。好正常丫，有外國人黎到旺角唔會有呢個反應先唔正常。行完街又臭暈左幾勻，兜兜轉轉，今晚又係食日本菜。我呢ｄ從來唔鍾意食＆食唔到日本菜的人又係咖喱豬扒飯。其實韓國人係咪好鍾意食日本野？問一問，唔係喎！噉點解餐餐日本菜？原來同香港一樣，韓國好流行食日本野。由呢樣野，呢餐由食延伸到日韓政治、文化歷史、metal & hardcore，「潮」、「態度」，同其他好多好多野，所以大家都好鍾意對方好好傾，因為思想同態度好相似，而且大家都係會諗野果種人。食完呢餐，去見家長的二寶樂伉儷臨走前送左我地中國中秋應節土產moon cake俾METHOD：

食完飯，去邊度好？難得今日國慶，睇睇煙花好似幾適合。
"Or day sheung jing d."
想靜，就去搵間cafe坐下，又蕩失下路，撞下撞下終於搵到間cafe。間野唔記得叫咩名，但個格局好正，上二樓係要入由後巷改成之內堂經一條好越野遊戲feel的樓梯上去。上到去，佢地講韓文我講英文，好在大家有一樣共通語言化解語言隔膜：層層疊。成班友一上到去見到盒層層疊立即發晒癲噉款，呢一晚之前我點都唔會估到層層疊係可以玩到咁勁咁專業咁有技術！隊band五個人加埋結他手女朋友同我一共七個，每round每人落一蚊par，每人每次只可以選一舊舉手不回，移左出黎之後唔疊上頂令舖game更加襟玩，輸左果個人out，跟住淨番幾個再落par繼續下round，滾下滾下之後贏果個就可以得到$7+$6+$5+$4+$3+$2=$27的和味jackpot。夾埋玩左三舖，第一舖熱身賽唔計錢，第二舖正式賽，第三舖直頭單手玩，我呢ｄ傻仔唔識玩，次次拎完之後上面果幾層都係扭曲晒變晒型，但佢地玩得真係超pro，完全估唔到原來玩層層疊都有咁高技術！最後一舖兩個結他佬對決，兩個人鬥到超精彩真係可以好有技巧好有策略，玩到最後差唔多每層都淨番中間果塊，好堅！都唔知韓國人係咪係冇野做果陣就係玩層層疊，定係呢個國家遊戲事業發展得真係好蓬勃，單單層層疊呢樣咁簡單之玩意都可以去到呢個神級境界。呢一晚真係好得意，因為黎到呢度，唔睇外表，你完全唔會覺得佢地係一班band友、metal友，同平日完全係兩個樣，佢地對住其他人95%時間係非常地cool笑都唔笑得一個表情就係得一個表情（特別係連出騷都要同樣目光呆滯的鼓佬），但呢一晚，係呢間cafe玩層層疊時，個樣完全唔同晒好似成班細路噉，結他佬前幾日差唔多冇笑過，黎到呢度變到個靚仔噉款係噉講笑係噉搞其他人，個個都笑到仆，好好玩，好過癮，好得意，相處左三日，我都係呢晚先第一次見到佢地呢一面，連個歌佬都話，平日聲都唔多粒的bass佬都會講笑，呢樣野佢地都冇乜見過！今晚大家都玩得好開心。絕對唔會估到，係香港呢四日間，除左廿九號晚，最開心會係玩層層疊呢一晚。

玩到差唔多十一點，見咁夜係時候回程喇。間cafe正正坐落砵蘭街，我當然盡地主之誼，同各位韓國朋友介紹呢條"street of hooker"，之後搭地鐵返尖咀，幾位朋友頭先玩層層疊輸到冇晒散紙，要用韓國錢問劉Sir唱香港散紙，就係噉劉Sir無端端收到二千蚊。咪開心住：
「唔好意思，1000圜＝港紙七蚊！」
返到重慶大廈送埋佢地上房，六個人分兩間房訓，一入歌佬、bass同鼓佬果間房，即時死亡。班友臨出門口時將出完騷ｄ衫卦起晒晾乾，但閂晒窗又冇通風，焗左成晚之後，今晚一開門所有人臭死晒，隔籬兩個結他佬同女朋友笑佢地笑到碌地。上去玩到十一點半到我夠鐘走，到佢地又拉又扯噉送到去電梯口，同歌佬係電梯口再吹多陣就落樓。十二點返到屋企樓下，剛剛好收到電話，係歌佬再打電話黎問候一番。呢一日，對大家黎講都好特別。

2/10/2006 MON

「今晚毓民場騷點呀？」
「唔好當band show就無問題，當政黨集合都OK啦。LMF得MC仁加3丁友rap同播帶，淨係唱左《大懶堂》同《香港地》；黑鳥兩個人玩acoustic ，有首歌加埋長毛做vocal；Seaons Lee都有表演，不過得兩支結他，其他播帶；毓民爆左幾次粗都miss左拍唔到。拍左大半之後部機無電，拍唔到好戲量3女短劇同Seasons Lee，又冇影到後段大合唱《海闊天空》，都影左接近一個鐘，有諗過下走去問ｄband友訪下問，但肴肴地底部機又無電。支持下基層又有歌聽都唔錯，但當band show睇就冇癮。」
咁樣影下睇下都幾過癮。希望仲有機會玩下呢ｄ野，好多野都想搞想試。

我琴日先知道，原來今日係公眾假期唔使返工，非常開心，所以今朝跟埋去送機。八點幾起身出尖咀會合Soni同二寶樂，大家都勁眼訓，梗係啦大佬連續幾日日日都噉搶法。隊band上十二點十機，約佢地九點半，
「嘩搭九喇喎仲未落黎？」
之後歌佬衝落黎，原來成班友之前果晚又係度玩同隊酒六點先訓，個個起唔到身。等待期間又同歌佬傾傾，傾下Aeon Artworx，歌佬自己搞果間label，而家有四隊本土band，黎緊慢慢會搵多ｄband，呢樣絕對係好事黎，實在好難有機會同途徑接觸到韓國band，況且唔少韓國band其實玩得唔錯。跟住傾下METHOD下年隻新碟，同黎緊之tour，可能性係有好多，但當中幾多個可以成真，確係一個問題。十點幾其他人一個個落黎，果時就知道做歌佬果個永遠幸福：其他人點少野都最少要抽多支結他或者整多袋cymbal，但歌佬一個袋搞掂晒，就算帶支私家咪又有幾大用得幾多位？
臨走一刻，賓館個職員衝落黎截住。
「咩事？？？」
問問，聽完，笑到仆街。真係估佢唔到。我呢幾日笑得最大聲係呢一刻。

搭巴士去機場中途繼續傾，韓國搞metal實在係非常艱難，如果有買到METHOD隻碟，讀讀歌詞入面附加果一頁，就會知道面對之問題係乜，其實都係果ｄ老生常談：少人聽metal、聽果班只聽名同download、冇設備同人員錄音、生活迫人，特別係錄音，因為冇呢種studio同技術經驗，直接令成本上升。大家都靠打住份工賺錢錄音，問歌佬，儲左幾耐錢先搵夠呢筆錢？
"Five months."
五個月都唔係好多丫！但呢五個月只係佢自己唱果part亦即係成隊人最簡單果part，仲未計其他四個人，全隊夾埋錄呢隻碟使ｄ錢係億億聲－韓紙啦當然係講緊。
「嘩！咁貴，飛去歐洲錄音可能都唔使呢個數啦！」

去到機場check in，韓空地勤見到呢班band友，吹吹水，原來METHOD出騷果日韓國個跳舞歌手Rain都黎左香港，一落機在場全部女性立即陷入瘋狂狀態，果日佢係香港機場俾成班空姐同地勤圍住不知多麼哄動，
「可惜果日我dayoff冇得見佢！」
臨上機前，大家係機場做埋ｄ無聊野，仲有個訪問，唔係我訪問隊band，係調番轉頭METHOD訪問番我地TRHK同二寶樂。可能遲ｄ網上面就會見到我架喇！

玩完訪問仲有時間，大家影下相吹下水玩下無聊下，珍惜埋呢最後幾分鐘。好鍾意同佢地一齊。歌佬Alex已經成為身邊最投契朋友之一，老我成五六年，但同我一樣係個大細路，第一日已經玩到打成一片。佢係我見過唔似metal友之metal友，正職抹窗的佢身上完全搵唔到一絲追名逐利之俗氣，企上台時可以好激好惡，但行落台放下歌手之身份，唔著住band tee你絕對唔會相信佢係玩metal甚至聽metal，甚至唔會信已經三十幾歲，就係因為好單純之思想同性格，呢個勢利媚俗年代裏頭、呢個metal越黎越商業一日比一日大路之年頭，佢絕對係純真同天真到冇乜可能生存到落去果種人。即係點？你睇睇劉Sir再睇睇佢就知。難怪佢呢幾日好鍾意見到我，好鍾意同我玩同我行同我傾偈，除左因為全隊得佢一個識講英文，亦因為大家呢種共同心境。我冇乜見過身邊有metal友會好似佢噉笑法。
solo結他手Jae Ha，台上永遠長髮披面，台下永遠戴帽，係全隊唯一有伴之人，今次黎香港就帶埋女朋友一齊黎睇表演順道觀光，演唱會入面拎住部機通場走拍低大家狂態／醜態果位就係阿嫂喇。較為活躍之一個member，無論表演還是平時都係好動好玩，如果佢識講英文相信我會同佢同歌佬一齊玩到癲。今次一行相信佢係全隊最happy果個，因為除表演仲可以同女朋友一齊黎渡下假，但呢四日睇睇佢就知，拍拖好玩，亦都好煩。
另一個結他手Hag，又係意想不到地好玩。唔熟的話，佢係一個永遠黑口黑面cool到爆之麻甩佬就好係上面ｄ相個「密宗」表情，但就係你冇乜預料、估佢唔到之際，條友就會整鑊爆笑野你嘆，之前果晚成班人上cafe玩層層疊已經領教晒。真係好笑爆咀架條友，假如你有機會見到同比佢整到的話。等上機時無聊，摷佢地ｄpassport黎睇，Hag果本一打開，在場各位立即向佢鞠躬敬禮：
"Yakuza boss!!"
跟住摷bass手Hyo Won本黎睇睇，張相影到佢成個歌舞伎噉款成班友笑到碌地。全隊最沉默就係bass佬，又可以話最內向最怕醜就係bass佬，絕對係好典型果種聽metal男性，唔識講野甚至怕同人講野，對住女仔有口無言手足無措果種，亦係完全冇機心冇野心唔會亦唔識同人爭同人鬥果隻「乖仔」，呢幾日都冇出過幾多粒聲，除左最後一日遊山玩水，夜晚玩層層疊果時就更加係開心到變左另一個人噉。搵到呢班人同佢一齊玩，相信係佢一大幸運，因為善良同單純成噉，真係好難係呢個年代生活，硬難得有一班同佢一樣咁簡單同接受佢照顧佢之同道。話時話，佢係教bass搵食，好想睇佢上堂點上，尤其是對住女學生果時。
鼓手Jung Ho由第一日到上機，仍然係果一個表情，所以佢同Hag成日一齊，因為兩個都係全日95%時間都係果一個樣，而出親街又會同Jae Ha一樣必定戴帽。所以好鬼鍾意佢，無論係行緊街玩緊野訓緊覺食緊飯定係表演緊打緊鼓，表情依然係果一個，面對乜都係用果份平常心態，差唔多全日都冇乜情緒起伏。當然，又係同Hag一樣，條友係最估唔到果時爆ｄ過癮野你開心下。好鬼過癮架呢條友！應該話，成班友都好鬼死過癮！
最後，當然仲有阿嫂。問下各位朋友，香港女仔靚ｄ定韓國女仔靚ｄ？一面倒地係話香港女仔靚ｄ。似乎「人離鄉賤」呢句唔適用於女性身上，香港男性絕對抗拒港女，但呢班韓國友幾受，可能因為香港女仔「無添加」，冇韓國女仔咁「假」？不過始終得果四日，如果多ｄ時間「見識」多ｄ，相信佢地會收番呢句，因為外在可能好ｄ，內在未必，見過超過八成之港女真係連及得上韓國女仔品格同思想之機會都冇，好似阿嫂，除左食煙之外對我黎講好接近100分（劉Sir好保守架咋）。

就噉睇呢班友，你覺得佢地幾多歲？起初我估廿幾、廿尾，同佢地傾開，先知道原來全部都已經三張幾。佢地算係我遇過唯一過左三十仲堅持玩metal之老餅metal友，識好多人到左呢個年紀甚至三字未到已經放棄metal放低樂器，妥協地勞碌奔波或者留番時間俾屋企同另一半，而呢個互聯網，好多秤都未夠的朋友甚至半年之內已經經歷完「我聽metal」到「我聽好多band」到「我聽厭metal放晒ｄ碟」之超濃縮金屬生命，呢類半年熱度朋友幾年黎已經見過唔少；真心決志要投身同維持落去之朋友著實寥寥可數，自己身邊都數唔到幾多個分分鐘一隻手唔使搞掂晒。成隊個個都玩metal過十年，仲要十幾年黎都冇變質，仍然係true metal而唔係trend metal，呢份堅持非常難得，亦係我好鍾意同尊敬佢地之原因。雖然一直以黎玩band都係後生仔居多，特別係呢個年代科技同社會對音樂發展帶黎好大助力，未夠秤已經世界揚名唔係冇甚至唔算難，只不過留意一下，冇錯而家十幾廿歲ｄ後生band好勁，技術亦大多數勁過老一輩，但真正襟聽果ｄ、有味道果ｄ，都係廿尾三十幾果班玩果ｄ，好似LLNR全場最強兩隊，係皆已廿幾三十之METHOD同FROM THIS DAY。由一開始到而家都係，老一輩從來係負責堅持果班，而年輕一代係負責創新：好多heavy metal、thrash metal、death metal甚至black metal之元老，當年開朝創代時都只係廿零歲甚至十幾歲。不過創新係一個嘗試、一個方向，論音樂性同內涵，真正玩得有意思有味道之metal樂手都係三十幾四十歲果班，始終老多十幾年老練ｄ同經歷過八十年代，生活過果樣野而唔係模仿，即使後生果班創新係破舊立新，佢地都係依靠上一代所傳，而老一代"old-school"果ｄ先係最基礎、最pure最正宗。噉係咪即係新一定不如舊？又唔係，正如當年thrash出現一樣唔被當時群眾睇好同支持照有人排斥，但之後成為左改朝換代之歷史里程碑；而家之metalcore係噉俾人鬧，可能過多十幾廿年後，亦會同thrash一樣被認定其歷史地位－可能。但我相信商業上有可能，但音樂上唔會，特別係metalcore呢樣美國音樂工業產物，因為九十年代起metal已經越黎越接近商業，直接令樂隊不斷削弱自身之音樂性，歐洲仲叫做一直捱到九幾年尾先開始滑落，但美國94年左右打後之新發現已經冇乜多少「意思」，因為點開發都係錢行先，所以大家都係創新，但而家之創新(nu, core)，歷史重要性、延續性同影響性，始終唔會及得上「當年」(thrash, death, black)，而歐洲選擇跟住美國方向(metalcore)前進，直頭係自願退步。所以老野好多時玩得仲好火同有紋路過後生，因為居於地下唔係賺住錢黎玩，到左呢個年紀，生活閱歷同人生經驗自然帶俾佢地無爭之心：名利已經唔點矜貴，玩得出好音樂先係追求目標。只有做到無爭，先真真正正玩得到好音樂，同玩得出果種韻味。

聽左咁多年metal（係呀講緊你呀），唔知有樣野有冇發覺，好似METHOD，雖然差唔多個個都戴戒指，但除左帶埋女朋友黎香港之Jae Ha外，其餘個個三字頭年紀都係寡佬一個。唔止佢地，覺唔覺好多醉心metal／音樂之人都係單身？如果你唔係，恭喜你啦，起碼我見到我同我身邊，好多好投入metal之人，越專注聽就越遠離女色，但玩metal反而唔會有呢個問題，可能因為玩band始終型ｄ。單身係metal友特徵，最少係聽果班、聽到好癲果班，噉又係，如果有拖拍，確係好難有咁多時間去苦練同鑽研音樂，或者呢種黑暗孤獨之音樂，就係適合同一類黑暗孤獨之人，又或者話有某ｄ性格缺陷之人會更易比metal吸引。同樣地，果種「性格缺陷」，只要睇睇我同METHOD就知。與世代脫節之「無爭」係其一。

臨別前最後一照

好在呢場騷撞著國慶呢個星期一紅假，唔係的話都黎唔到機場呢一面都冇得見。大家只係得短短四日唔夠時間相處，已經來得相當熟絡，比身邊好多已見月年之人更加親近，因為大家精神同心態一致。
直到呢刻，我仍然好懷念呢幾日。

送完行，三個人搭巴士出番去旺角食飯，一路好多野傾。完左METHOD呢場，跟住仲有其他好多黎緊，好似過多半個月已經到大壇好多倍之ANGRA，亦要再拎番起舖頭好多野諗諗計劃一下，忙呢樣野從未消失過停上過，某程度上TRHK呢邊，仲忙過日頭份工。食完個飯先點幾，三點先開舖，幾大打番舖Time Crisis 3鬆下先啦！之後走到上舖頭，頂唔順，訓陣覺先，呢幾日紅假都冇乜訓過覺，今日開住舖都照訓，反正紅假開三點都冇乜人理架啦（「平日都冇架啦！」）！訓醒覺睇睇呢幾日條數同補下貨，嘩，我唔係舖頭時咁鬼旺，今日我一返黎立即仆晒街。收得皮喇真係。
平靜的一天，襯番完左場騷回歸平靜的生活。去完雲南同西藏的契爺上黎，話比大家聽佢仲健在；有佢個香港女朋友上次一開騷即走夾唔抖果隻印第安鬼，因為要返老家阿根廷，專誠上黎拎番METHOD演唱會ｄ片同相，等佢可以返到阿根廷繼續幫佢地宣傳；有全港聽最多black metal之梁生上黎同大家講講佢前排北京尋black metal之行；仲有著到「嘩」的小婷妹妹，
「乜而家香港ｄ靚女咁open！」
回到平凡。

呢幾日，又玩又食又拎。

今次演唱會簽名海報，勁呀！係特別版！
有幾特別呀？」
就係特別在唔閃中閃。呢個係唔閃型態，睇唔到睇ｄ隱藏簽名？跟住拎個火機烘一烘：

烘完就會啟動中閃型態，ｄ簽名立即出晒黎！勁呀！

「唔該，我想要METHOD演唱會167號飛！」「賣左喇喎！」
「噉169號唔該！」「都冇！」
「邊有咁多人睇呀？邊個買左？」「咪我囉！」
冇錯，每次TRHK有騷，你都唔使旨意會買到呢兩張飛，
因為未開始賣飛前，呢兩張已經會俾劉Sir自己keep左私人珍藏！
「TRHK次次搞騷ｄ飛都求鬼祈，點解今次張飛會靚成噉？」
「唔使講都知今次張飛唔關我地事啦！」
冇錯，之前咁多場ｄ飛都係TRHK兩條友自己整，邊有時間做咁多野？
求鬼祈整個公仔打ｄ字再吸個飛號同日期拿拿臨拎把cutter介晒佢算鬼數啦，噉先夠underground！
今次呢張飛就係METHOD設計，當堂唔同晒，起碼似番張飛先！背面有歌佬Alex所起之一句：
"Metal for Struggling Life"
非常有意思，將"metal"同"struggling"代入唔同詞式，可以有好多個唔同但近義之演譯，不妨細思。
另外METHOD同Alex間 label Aeon Artworx另有一句：
"Support True Metal Frontier"
呢樣先係最難做到，真係要支持，心比錢更重要，metal從來係實而不華、要辛苦要捱苦之音樂。
所以你見TRHK搞metal、搞metal show，好少會高調浮誇。
（當然，冇錢高調浮誇係原因之一啦）

好有趣，雖然係主辦單位，經歷過咁多場TRHK演唱會，今場先係第一場拎到樂隊簽名CD。
METHOD "Survival ov the Fittest"絕對係今年驚喜之作，thrash永遠係皇道。

METHOD襟章，本來可以要黎賣，後來變成免費派派到我都冇得拎，好在最後隊band留番兩個俾我。
佢地仲有兩件tee，可惜韓國都賣到唔夠貨香港冇得買，
有得買肯定會執，因為好鍾意佢地個logo同新碟封面，
襟章呢個係black death feel新logo，舊果個logo仲加black metal！

遠道而來的METHOD亦帶來韓國手信，就係傳說中的韓國酒
「雹潘炸！」
我地呢ｄ乖仔唔煙唔酒，俾我都冇用，
「喂Soni你搞掂佢啦同我！」

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

玩完。問答時間。第一條FAQ：
「既然人地都黎香港表演一場，點解又要搞多場俾佢？要／想同人地撞同人地鬥？」
今次METHOD黎香港，大家傾左好耐，其實好多band都係好早期已經開始有聯絡，亦大家不斷嘗試搵共同機會黎香港表演，而METHOD出左第一隻碟之後，係好想可以黎香港表演，係想到不斷搵香港唔同單位睇可唔可以出多一兩場，聯絡過之單位係三個以上，最後由TRHK同LLNR幫佢地搞兩場騷，亦絕對相信已經有一場大騷在後，只有TRHK會／肯／敢應承METHOD幫佢地搞多一場演唱會，一場冇可能唔蝕之演唱會。講鬥，TRHK根本冇得鬥，因為性質、規模同觀眾層面都唔同，呢樣野好容易睇得出，亦好易睇得出呢場騷唔會多人、肯定蝕本。明知蝕都要搞多場，係因為隊band希望可以出多場，既然已經俾晒錢黎到香港，自然希望可以出多一兩場，幫到手點解唔幫？

所以第二條好多人關心之問題：
「今場維唔維到皮？」
問左已經係明知故問。基本上直到呢一場，TRHK冇乜邊場騷係唔使蝕本，迴響最好果場DISAVOWED，完騷果晚叫做cover得晒，之後再埋埋尾數，結果都係要蝕ｄ（睇埋後面就知點解，有時確係自己太戇居？），而當果場同樣係菲律賓群島搞之death metal show全場爆都要蝕，呢場得三份一個場爆又點會維到？同時自己確係戇居地有錢唔賺，因為差唔多全部錢都係去晒隊band度，好似場騷賣ｄ碟一切收益撥歸樂隊，TRHK係冇收過一分一毫，人地咁辛苦黎到香港表演，點可以唔俾錢人？就算真係肯免費表演，俾番ｄ水腳佢地都要啦。門券收益一樣冇得賺，全部豪晒俾隊band，由第一場TRHK show開始，差唔多隊隊band黎到都係又大嶼山又山頂又住大酒店食住全香港，噉樣又周圍玩又豪食又住豪華酒店，搞手自己都未試過噉豪過未試過啦，應該話對自己都唔會咁好，淨係我自己私人為METHOD而使筆錢，我一個月都未必會使咁多。但其實真係要做的話，今舖咁少人都絕對可以唔蝕，只需要唔為隊band做咁多野，甚至要佢地自己俾番錢都得，佢地絕對肯（有時要自己貼錢出國表演係地下band的悲哀），只要乜都佢地自己出晒俾晒錢，噉搞呢邊就一定唔使蝕，甚至咁細場騷都有機會賺，但為左呢ｄband就係肯蝕，因為大家都係地下，都明白大家都係點樣捱出黎，而唔係咩有錢人富家子弟，既然隊band都肯捱，請得佢地黎之搞手又有乜理由唔同佢地一齊捱去虧待佢地？隊band都唔計較自己黎到呢度表演可以得到幾多，搞手又何必去計自己賺到幾多、賺唔賺到錢、要使幾多錢？所以好多band都會話黎香港演出係最開心最享受最難忘之一場，因為待遇同個心。TRHKｄ騷從來係band受益大過TRHK，你見過有人搞騷係自己份都唔要俾晒隊band未？你有幾可見過有人搞騷隊band賺錢仲多過搞手？TRHK就係咁反商業、就係咁戇居。

又好多人話，
「成一百蚊睇得兩隊band，ｄ飛咁貴！」
確係有需要。DISAVOWED果場賣到七十蚊張飛，真係計到好盡好盡盡到假設隊band得益最多而自己唔賺錢只求回本咁盡，七十蚊呢個可能本地騷都未必得之價錢確係吸引到好多人黎睇，但亦係做壞晒規矩，如果果晚唔係爆會蝕得同呢場不相伯仲。因為顧隊band多過顧自己，每次TRHK搞騷都係搵命搏，需知TRHK收入就係賣CD，而呢個係超少人買CD之年代，搞一次騷都要用唔知幾多個月之生意，而每次搞騷都冇乜時間同錢入新貨，對好多人黎講無論已經放左幾多野係度都唔會理唔會望唔會試，只有「有新貨」時先叫做有野買，唔入新貨自然更少人上黎幫襯，惡性循環死上加死。所以你問下次新貨幾時，我確係答唔到你，
「都未蝕夠！」
黎緊仲要有多場呢？

呢場亦少左好多好多人。同一條街已經有三場騷，成個地區有五場，跟住果日又一個大騷兼METHOD亦有份玩，有好多人走去其他場特別係LLNR係好正常－坦白講，一個正常人都會噉樣選擇（唔好意思，黎左29/10呢晚的朋友，唔係話你地唔正常！），同時少左好多出現於DISAVOWED之「唔多metal」人士，例如"J-Rock"、"Punk"友，同埋女性。上一場二百五十人可以有五份一係女性，同時有好多人係好多人都問「噉樣都話聽metal？」果種，好多都係新面孔之前未見過。可能因為上次係第一次去果頭搞metal show加上夠平，好多人好奇冇聽開都肯俾錢入黎睇睇；中過一次招知道咩事醒水唔會再中多次，所以上次入到黎半隊未夠已經頂唔順走左呢ｄ中招人士一個都見唔到；剩番落黎睇呢場騷之八十個，基本上過大半我都認得識得，亦即係經過一場騷之過濾，已經冇乜新面孔、「水魚」同中招人士。有人話：
「都算係好事黎丫！即係黎親呢場騷果班都係真係聽metal啦！」
音樂上同態度上，可以話係。但商業上唔係。始終metal show呢種咁專咁窄之show（要賺錢，除左搞多元化show或者超明星show別無他法），單靠本身聽果班絕對唔會維到皮，點都要再靠其他新人先可以止下蝕。而呢場正正係冇左呢班人。但騷呢樣野始終要搞。你搞騷係為左乜？係為左賺錢、為左名、為左威，定係為左band同音樂、為左推廣呢種音樂令更多人去認識同接受？所以TRHK係蝕都keep住繼續搞騷，俾ｄband宣傳同推廣自己，同提供一個現成機會俾人認識呢種音樂，睇live絕對係比聽CD、聽MP3更易投入到音樂之中。但當然呢樣野係過份理想化，有幾多（新）人係會睇完一場騷之後，真係會摷番果種音樂黎聽黎試？呢樣野我絕對清楚。係接近零。DISAVOWED之後會搵death metal試之（新）人，你問我有幾多、有邊個，一時間，確係諗唔到，甚至唔需要問我你問問自己已經知，所以METHOD隻碟呢場騷之後唔會有多少人返轉頭買番隻碟，會係預料之內。係聰明的話，都知道而家賣碟出碟唔會賺到錢，只有搞騷出騷先做得到，你賣碟搵到幾多？當連本身聽果班都唔會個個買，「水魚」ｄ錢就更加唔會賺到，但搞騷大包圍又冇免費午餐同其他代替品先可以賺到最多，但點賺唔到錢都好，CD始終要賣唔可以放棄，因為唱片係令樂隊同全個圈子維持落去之重要一環，亦係樂隊將自已音樂廣傳同流傳之重要媒介。所以騷搞落去之餘，碟亦會繼續賣，又即係會一直戇居地蝕落去。

呢場騷，商業失敗，但難忘。你俾我揀，我都係鍾意搞細場細band細騷。如果係搞明星band，你覺得佢地會唔會同你上cafe玩層層疊？就係鍾意呢份大家好接近對方冇隔膜冇架子之親切感。