荷蘭brutal death metal樂隊DISAVOWED，亦係第一隊黎港表演之歐洲brutal death metal樂隊，2006年5月第一日夜晚八點九正式黎到香港。今次係佢地成團六年第一次「亞洲巡迴」 － 講到好勁，但其實只係過日本玩兩場，之後再過黎香港呢個"Asian tour last stop"玩埋，完場之後第二朝上機返荷蘭。黎到香港去到灣仔上到酒店，隊band好鬼開心：
"Or day dai yet chi lie heung gong! Ho hoi sum! Chung yiu yau duck chu jau dim! Or day hai yet boon dou hai fun day ha jar! Lie dou heung gong yau duck chu jau dim, gok duck or day chi fan gor yan!"

上完酒店放低ｄ野，再拉隊落去今次個場Philippine Islands睇睇。好多人都知道，本來呢場騷係去街口果間Les Vistages度搞，但因為Underground同一日同一地點有騷，撞期之下TRHK自然要搵過第二個場，仲差少少搞到要改期搞唔起，真係襯晒個band名。好在最後搵得到呢間菲律賓群島，噉可能仲好，呢個場個格局更加適合，睇要落地牢先去到就知道真正underground！（．．．）始終係賓佬酒吧，個場本身唔係玩metal，落去望左一望，隊band唔多滿意ｄ器材，例如，冇double bass drum（．．．）。不過唔緊要，呢ｄ野後日先算，呢一晚落到吧最緊要好玩，睇睇隊黑鬼band個結他手，彈到悶調轉支右手結他用左手彈，成隊band睇到好鬼high：
"Wah!!!! Jimi Hendrix ar!!!!!!"

Well，隊band當然係香港周圍行周圍玩啦！似得我地呢ｄ仲要返工臨放假前死做爛做咩！

雖然係星期三，今晚上黎TRHK一樣會見到劉Sir，因為要賣飛。從來冇預期過呢場騷，隊band香港接近冇人識、隻碟接近買唔到、仲要係非主流的brutal death，冇預計過會過到150，甚至120，所以起初只係印100張飛，點知反應好到再加50張，結果呢晚演唱會前夕，TRHK門市部150張飛最後一刻剛剛好賣晒甚至唔夠賣。多謝捧場！

「點解星期四搞騷呀？」
好多人都問。有得搞，我都想首選星期六晚、次選星期日搞啦，但問題係搞騷唔係話搞就搞咁容易嘛，仲要遷就場地同隊band。星期五本身公眾假期都唔會有場用，星期六日搵場本身已經夠晒難，而且要夾埋隊band個檔期，佢地上禮拜尾今個禮拜頭日本出完，如果仲要就到佢地星期六出要租多幾日酒店，七十蚊一張飛黎多幾多個人都好都補唔番酒店錢。我都想星期六日搞就晒你我大家，但搞騷係咪真係好似上Soul Seer搵mp3呢各位覺得？

演唱會正日好早起左身，不過唔係過去搵隊band，而係返公司。今個星期日已經要上機過美國今日仲請假，加埋工廠五一勞動節後第一日開工，點都要返公司覆幾個email打幾個電話，同埋，食靚女會計姐姐應承今日特登整比我食的芝士鹹牛肉三文治（日頭個劉Sir就係一個咁得女同事&老闆娘歡心的模範職員，雖然夜晚個劉Sir係對住各位（靚）女客人都完全唔識反應的傻仔）。九點半返到超極速做野十點半走人（其實搭九起已經係坐定定食三文治時間，都唔知今朝其實返黎做乜），之後未過得灣仔，仲要巡迴油尖旺幾頭蒲，就係因為準備呢場騷，例如出尖咀搵搵B哥借cam（絕對要特別嗚謝BBoy@BBoy Studio），同埋印海報 － 冇錯TRHKｄ騷一向趕成噉，就好似呢場騷都要係演唱會三個禮拜前先正式宣佈，宣傳時間一個月都唔夠，雖然籌辦方面夾夾埋埋差唔多成半年。臨時臨急就係TRHK傳統：
「Underground係求祈ｄ架啦！吹咩！」

兩點半過到灣仔，已經見到DISAVOWED係度執緊野。個場比想像中大，雖然唔覺點樣如傳說中「裝到三百人」，最正係全場差唔多全部職員都係賓佬賓妹，待人同態度好簡單好純樸，對住佢地個feel好正，一落到去已經比賓妹玩同玩賓妹哈哈。入到去第一眼，已經見到結他手Daniel拎住支結他係度不斷噉啡，啡極都啡唔完，因為出今晚場騷佢地都緊張，唯有不斷練野散驚，跟住bass佬Nils都出埋黎一齊啡，啡METALLICA，提親METALLICA bass個個都係提"Orion"，但佢係玩完全被人忽視之"Pulling Teeth"，然後兩個一齊DEATH "The Philosopher"。見佢地啡啡下啡夠停停歇歇同Daniel吹吹水，原來佢有1/4亞洲血統，難怪第一眼已覺得個樣唔係咁似歐洲人。成六年都只得2001年一隻碟仲要咁多年都未散，到五年後即係今年先至話出第二隻，確係夠晒underground夠晒cult。點解會咁cult，中間呢五年做乜？其實未出碟隊band仲有不斷出騷，最激果時逢星期六日都出，去美國tour上車坐幾個鐘一落車就玩再上車幾個鐘過下一站再玩噉正宗巡迴法咁辛苦都試過，係歐洲幫好多勁band做opening都試過，但唔出碟係因為前鼓手對手傷左，雖然歌寫晒都停左差唔多兩年，今年年頭有留意的話，上網會見到佢地post news話搵新鼓佬，同埋今年年尾出新碟。五年黎終於出到碟當然係因為搵到新鼓手，但唔係今次出騷呢位德國death metal band DESPONDENCY鼓佬Dirk Janssen，不佢只係幫隊band出tour，呢場香港係佢幫DISAVOWED打鼓最後一場，之後錄音會由新鼓手玩番。既然係歌一早寫晒亦搵到鼓佬（有睇場騷的朋友都會記得個歌佬好玩野地介紹左幾個member唔係荷蘭人，呢個新鼓佬亦係，佢係法國人居於法國），今場玩完返荷蘭之後就會開始錄音，計劃係三年內甚至兩年內出兩隻碟。半休止左近五年，係時候進取。噉樣，會簽邊間label／有冇label想簽DISAVOWED？最理想，當然係同上隻碟一樣留番係Unique Leader（個名已經夠晒型），呢間technical brutal death label論市場、性質同規模都係適合不過。當然，好多人會問：
「要入梗係要入大label啦！入間咁細label為乜？」
但係DISAVOWED完全唔想入大label，太大喇。因為簽到大label，唔代表一定好，甚至未必好過入細label，因為大label某程度上都係商業為先，你唔係勁band明星賣唔到唔夠商業價值，入左去都唔多會理你，好多時簽你入去都純粹為左同人講「邊隊band入左我地label」拉fans，但對呢ｄ細band唔出名band，待遇可以十分地差，就好似Olympic Recordings執左之後SEVERE TORTURE呢隊質素高但唔夠出名之荷蘭brutal death band搵唔到label收留，最後Earache簽左，但純粹為左等佢地ｄfans一齊過黎，之後接近冇幫過隊band幾乎冇俾過佢地任何協助出左碟都唔多為佢地宣傳。唔出騷唔溝通與世隔絕，淨係閉關寫歌錄碟，只等有一日可以一隻demo比（大）label睇中一鳴驚人的各位朋友／各支樂團，會唔會有所思考？

星期二隊band黎睇過個場已經知道套鼓同個amp換得，因為本身係酒吧場，今日一換就黎個double bass drum，冇乜幾可見本地metal show會出到double bass（香港地最多用到double bass之演唱會，反而係流行演唱會，例如BEYOND），裝完個台已經冇乜位。鼓佬set好套鼓之後第一件事係裝trigger，呢樣野第一次見live用，雖然唔係一定要用，但呢場唔用的話真係會大問題，睇佢試鼓已經知道今晚會大件事：

之後隊band玩左三四首試音，同set cam準備拍野，求祈地玩左兩三首，足夠搞到全間酒吧ｄ人走晒去唔知邊度。成隊人齊到好恐怖，絕對聽唔出有任何甩或者彈錯，加埋ｄ聲較到大家都剛剛好，根本就好似聽緊CD一樣。而班友個款係好似坐係度煲支煙咁輕鬆，唔使半個鐘已經乜都玩晒試晒（咁多場TRHK show，除左六翼因為故障問題，場場都係噉樣主角半個鐘內一定搞得掂晒所有野）。之後到HERMETIC SILENCE：

好戲在後頭。
最後到今晚唯一一隊鬼仔band NANAHARA SHVYA，亦即係現代亞洲電視國際台新聞brutal anchor Arthur隊band。因為通常都係出鬼仔騷關係，唔係好多香港人睇過佢地，但間吧個老闆娘一聽到即刻非常開心：
"Or! ATV News gor gor Arthur ah mar! Or sic li tiu yau gar! Cur yau hai Philippino, sheng yet lok lie or day li dou gar! But gor or day dou mei thai gor cur chok show gar! Gum man chung yu yau duck tie! Ho yeah!"

到佢地試音，本來塞滿晒人的場已經空晒，除左隊band之外得番三個人睇，連埋隊band兩條友，即係得五個人。一睇就知道，今晚最惹人非議就係佢地，鬼佬玩音樂心態同香港人實在唔同。睇完rehearsal已經非常開心，今晚一定夠晒嘈夠晒好玩，在場各位同事亦唔會有覺好訓。

綵完晒排已經到六點幾。呢一晚六點半已經見到我係樓上門口迎接各位，但其實我都唔算早，六點過ｄ已經有朋友坐定定等入場。一貫香港band show傳統，開場時間七點但呢個時間之前永遠冇乜人，一到六點十一，立即成村人衝過黎，過左七點，直頭係成鎮人黎左，所以大家呢一晚開場前都冇機會買野，成間舖得兩個人，老細自然係睇住幾隊band，淨番ｄ打雜野得我一個一腳踢，賣飛係我收飛又係我，人手就係短缺成噉根本冇時間幫ｄband賣野賣衫賣CD。因為酒吧唔比帶野飲野食入場，同場仲有個賓妹待應搜袋，最開心果個反而係佢因為有得成日串人玩人，玩玩下仲落樓下叫多個賓妹上黎一齊搜袋／玩人，專逗ｄ個樣擺到明唔夠秤人士：
"Gay dor shui? Sub say shui? Lay dim tie dou hai sub shui jar bor! Lar siu pun yau lok dou hui ng ho yam jau ah ha! Yam wai ta lie ho lar wor g ng g ar?"
之前已經賣左150張飛收飛都收到手軟，到左今晚再加好多人＆鬼walk in，賣極都有，好亂，但係好正，因為人數遠超預期。選擇灣仔酒吧搞呢場騷絕對係正確選擇，因為有好多唔鍾意去band show場的朋友都相繼出現，亦有好多從未見過人士，更有好多鬼，呢場騷見到好多人：好多hardore友黎睇（但反而少見metal友會調番轉走去睇hardcore show）、好多唔係death metal友黎睇、好多甚至唔係metal友黎睇、好多女仔黎睇（起初賣飛男女比例真係有50:50，但男性後勁凌厲，女性數目最後跌到五份一左右，不過都夠晒啦你有幾可會見到有一場純metal show會有咁多（靚）女你見？）、好多阿叔級人馬黎睇（唔知有冇人見到有個長毛剃眼眉阿叔著住件牛仔褸縫滿晒band logo patch超型夠晒metal！）、好多鬼黎睇（當初係自己MySpace幫手大力宣傳呢場騷的呢個鬼妹都有黎，仲要帶埋阿媽黎，佢阿媽隊住啤狂郁睇得仲high過個女），仲有唯一一隻黎TRHK買飛的鬼佬，本身住香港亦聽開metal但唔識TRHK呢間野（宣傳實在太難做），到識得一個聽doom的女性朋友帶佢上黎先知香港都有metal舖，第一次上黎就撞到有呢場騷，兩個即刻買飛黎睇，又原來隻鬼又係教書！當然仲有ｄ入錯場的朋友，好似有一pair女果個好靚，但從外表到行政人員裝束點睇都係剛剛放工兩個人行街想搵間吧劈劈酒見有騷睇湊湊熱鬧果隻，但由我賣飛比佢地到落到去第一隊opening NANAHARA SHVYA玩左兩首唔夠，已經見兩隻野飛噉走，仲要係女果個好似因為太多人抖唔到氣＆太嘈暈暈地超高速拉住條仔走噉款哈哈哈！所以我好敬佩今晚黎睇騷仲要一睇就係咁extreme metal的所有女仔！（仲有唔少靚女忝！所以DISAVOWED好開心！）

NANAHARA SHVYA
今晚唯一一隊鬼仔band，亦係TRHK演唱會歷史第一隊外藉人士opening act。
「．．．佢地玩乜架？」
基本上有睇到佢地的99%人都問呢樣野。得兩個賓仔一支結他一套鼓（唔係講笑，真係有人以為佢地係未齊人就出騷），個鼓手一睇就知業餘到死好似自己摸下摸下摸左幾個月就黎出騷，仲要笠住個摔角手頭套唔知乜春噉，一時結他佬唱一時鼓佬唱仲要係扯住喉嚨聲（我非常鍾意佢地唱得好正特別鼓佬），一時慢一時快一時BLACK SABBATH一時Zack Wylde一時METALLICA，又係起勢噉衝唔算好多好大變化，鼓佬猛咁上cymbal結他隻聲又tune到爆（其實三隊之中，結他聲最恆最出果隊出乎意料地係呢隊）．．．佢地玩乜唔使又punk又thrash又black又doom又stoner又乜又物噉形容，其實好簡單一句已經夠晒：
「這就是sludge。」
Sludge又係乜？身邊99%人會問呢樣野。簡單黎講，sludge係從hardcore進化成之doom，所以睇佢地玩時會覺得hardcore (punk)中帶點stoner，外國相比其他種類都唔係多band玩呢類野，更加相信NANAHARA SHVYA係香港唯一一隊sludge metal band。Sludge從來屬於underground、從來唔會靚，所以音樂、結他tone甚至兩條友個鬼樣（．．．），都唔係大家聽／睇到會開胃果隻。亦因為噉，除左圍內幾個之外（成班都係傻Ｘ），暫時未見到有人話鍾意佢地，甚至有ｄ人好唔鍾意，例如頭先提過入錯場果pair（哈哈哈）。而我，當然係超極勁鍾意啦，我係傻Ｘ黎架嘛哈哈哈！不過好遺憾我係成part都睇唔到，佢地玩果時我仲係樓上做緊門神，而且落去果時已經人頭湧湧，完全睇唔到隊band！

HERMETIC SILENCE
逢death metal show，實會見到HERMETIC SILENCE，佢地出場果時，人數已經過二百，台下相當墟陷。雖然綵排時不在狀態，上到台完全係另一回事，過左頭半首歌已經知道呢次一定係玩得最好之一次。從歌到演出都明顯舖排過，第一次見用到sample開場，不過如果係band同sample一齊去而唔係sample完band先入會好好多。或者因為場地細同音響，歌佬把聲今次完全聽到，所有樂器亦分得清清楚楚冇炒埋一碟得一大舊聲，音效同氣氛一流，最後加多首CRYPTOPSY cover，反應實在太好，實際上玩成點我都唔知，因為呢段時間我仲係做緊門神收緊飛，但一路以黎睇到同聽到，觀眾都好high，就連幫手收飛冇位企到要企出樓梯ｄ賓妹都好high：
"Wah! Ho dor yan fing tau ar! Or yau yiu fing!"
HERMETIC SILENCE呢一次表演，實在係極度成功。亦係最接近冇投訴之一次。

DISAVOWED
今次係DISAVOWED第一次亞洲tour，不過只係得日本同香港兩站，而實際上本來唔算係tour忝因為只得日本一個站，但就到時間又搵到場兼（最重要）儲得齊錢搞呢場騷，佢地去完日本就順路經香港轉機返荷蘭順便玩一場。黎香港之前先同另外十五隊band去日本參加一連兩日之Tokyo Deathfest，日本metal發達人人都知，知唔知呢個算係好大型之death metal音樂節，幾多人參加？第一日一百左右。第二日都只係多二十個左右，計埋十六隊band，平均每日都有百五六啦。所以唔好講隊band，我聽到都覺得灰。death metal似乎係日本都未算成氣候，因為日本市場都仲係要大路野同靚野，仍然係heavy＆melodic＆technical＆power＆progressive當道加多少少gothic同埋名氣（咦，情況同一向跟住日本走的香港好相似喎！）。但唔緊要，香港呢場，一場已經抵番晒，到佢地表演時個場已經過二百人，最後全場總數係２５０，成晚walk in成百人，全間吧爆晒，剩計台下觀眾，香港呢場人數已經多過日本兩場加埋。
"Chung yiu yau ho dor lui jai lie tie or day tim! Yat boon yat cheung sin duck sub gay gor lui jai! Holland chung cham gum loi sin gin gor gay gor lui jai tie metal show! Heung gong yat man yi gan ho dor lan lui! I LIKE HONG KONG!!! THANK YOU TRHK I LOVE YOU!!!!!"（好明顯最後兩句係我作落去）
一如所料，出場先黎野drum solo，根本呢一part係冇得唔做，鼓佬太勁喇，無論速度力水還是體力都係香港未見過！亦因為噉要用trigger，因為唔用的話bass drum聲一定唔會清！
本來隊band話玩八首，有一兩首係舊歌仲要係好舊果隻，有一首新歌，最後似乎加多首encore，唔係好多歌但玩得好又夠feel就得啦。佢地ｄ野，話恆唔算激恆，話多變化又唔算，純粹夠好feel技術同編曲亦補番晒，但亦因為唔夠好恆唔算太多變化，聽番黎有ｄ人甚至鍾意HERMETIC SILENCE呢部份多過DISAVOWED，因為佢地ｄ歌較恆同埋較邪。外國band始終係兩個層次，全隊band好Ｑ齊，又要玩得好似好輕鬆好自若，難得係歌佬真係咩聲都嘔到仲要keep得住全場兼真係由頭嘔到尾都唔覺佢辛苦過，其他member更加唔使講，技術水平實在高得可怕，但難得係台風好得，唔係個場咁細的話，會郁得fing得再勁ｄ － 當結他佬係比人迫到一面彈支結他一面係噉打親人佢要一面係噉sorry，就知道空間幾有限。最正係同台下好多交流夠晒互動好識搞氣氛，呢樣野已經好過好多band，完全係非常專業之表演者。有一首歌寧捨唔同，就係第四首，呢一首係全場最technical最prog一首，非常鍾意，亦相信黎緊新碟我會勁勁勁like，因為呢首就係佢地新歌！佢地玩果時反應實在太好，台下好多人郁而且mosh得好勁（你有幾何見香港metal show有人mosh？），有人話見到連歌佬都衝埋落台mosh，係咪真係有我唔知啦企到人牆最後仲要成日唔係場入面睇唔到，但認錯人都唔奇，因為比條女帶上TRHK買飛睇騷果個鬼佬阿sir同歌佬一樣係光頭，而全場mosh得最勁最投入之一就係佢，鬼仔睇騷係唔同ｄ，間酒吧班員工都未見過呢ｄ野，就連班賓妹都睇到好high。但好可惜太多人冇位郁，亦都忙到唔記得左幫部cam換帶，拍唔到DISAVOWED果part live，呢樣係呢場騷最最最灰！

爆到唔係企前面根本唔會睇到隊band。

開場前最忙係我，完場後最忙都係我，場騷未完已經要走番上門口擺定檔，冇錯TRHK灣仔支部就係呢度！所以今日好多野都冇得睇冇得玩，冇計，賣飛又係我收飛又係我幫隊band賣衫賣碟都係我，邊得閒？本來隊band對今場生意冇乜期望，
"Or day d dip ton sam bin yau yan my ar chiu!"
點知最後生意唔錯喎，帶左四十幾隻碟黎仲賣左一半忝，最抵死莫過於TRHK最cult顧客阿Big爺，見過佢的朋友都會記得佢呢句金句：
「我最鍾意聽鹹濕metal！最緊要歌詞夠鹹濕！」
呢條友個英文名真係冇改錯，見過佢就知點解佢叫阿Big，但笑到仆地佢買DISAVOWED件tee要中碼。
「中碼？你玩野呀？你邊著到呀？」
「你理得我丫！我著到架啦！」
場騷完左仲未完，之前已經講過，場騷之後DISAVOWED會留低同大家見面簽名影相劈酒，成間bar都非常滿意呢一場騷連果度ｄstaff都話：
「我地老闆真係好鍾意你地！好人到只收你地廿蚊一支啤酒，就你地就到噉，真係好支持你地呢場騷！」
完場開心過正場係TRHK騷特色。隊band對呢一場之器材同反應非常滿意，因為呢場香港演唱會可以話係佢地成團歷史之中最激迴響最正面之一次，雖然日本叫做係成個death metal音樂節噉俾佢地演出，但日本玩兩場騷，夾埋都冇香港一場咁多人，而呢一場騷，一野過已經同TRHK之前搞過咁多場騷之人數打個和。完場之後間吧變番做賓吧，到老闆＆老闆娘出手唱"Can't Take My Eyes Off You"，連老闆都要黎幾句死腔唱哈哈哈。原來兩個都係高人！有ｄ客睇完騷之後仲留係度繼續玩好開心，好似mosh得最勁果隻鬼睇完騷繼續同隊band吹水，吹左好耐先走，呢ｄ機會你去第二ｄ騷冇乜幾可會有。所以要underground！隊band見第一次黎到香港呢度會有咁多人黎睇佢地非常之開心，坦白講，我搞呢場騷，都冇預過真係會有咁多人黎睇啦，最後仲真係全場爆晒，真係一個奇蹟，但最特別都係，真係好多女仔黎睇。日本一場都係得十零廿個（但如果係heavy metal/power metal show而唔係death metal，百零二百個都唔止），荷蘭一場騷仲衰都係得三幾個女仔，但黎到呢度，居然有五份一個場係女仔！佢地對呢樣野感到十分驚訝。唔好講佢地啦。我都超級驚訝。

成班友留番係間吧度玩，我就廢事喇，要食飯，仲要趕尾班車返屋企，走先。點知走去食燒味飯，會撞到隊band一齊係度食！呢樣都唔算恐怖！最恐怖係，成班歐洲佬都識用筷子！驚呀我！亦因為噉，終於影到今晚唯一一張正正經經影既相：

食完燒味飯，隊band上番酒店房沖個涼換件衫之後又落番bar繼續玩，玩到兩點幾過機場第二朝七點幾機返荷蘭。我冇跟埋去，因為第二朝仲要返工，食完飯已經要追尾理車返屋企訓覺。香港地殘酷現實。

就係咁多。冇錯，TRHK搞騷，係唔夠人到連相都冇得影。所以要出通告：

好多野都未夠好，但趕得切完埋場騷先至美國出差一星期之旅，都算足夠。

呢場騷，有幾樣野可以寫寫。第一樣係trigger。相信睇場騷的歡眾冇幾多個留意到呢樣野，但事後有人問起「乜野係trigger」就寫少少。Trigger其實係用sampler出鼓聲，打到個鼓之後唔係用咪收而係播sample鼓聲，因為係用sampler所以鼓聲唔一定係真鼓聲可以播其他聲，好似MAYHEM "Grand Declaration of War"果隻碟同live都係用trigger，所以ｄ鼓聲勁電，亦有好多電子同工業band會用trigger玩聲。因為唔同用咪收可能會有大細聲同ｄ聲散晒，trigger係播sample聲所以一定會清楚同靚，而用trigger其中一個好處係非常慳力，因為只要打到個鼓就出到聲，所以有人會反對用trigger，因為用好細力都可以做到大聲，唔夠真實，某程度上亦係一種暪騙，但另一個原因係用trigger玩live時鼓聲一定清同出，studio錄音時亦一定可以錄到最靚聲。當然，因為只有偏rock同metal一類特別係(extreme) metal出live時先會嘈同亂到乜都聽唔到，所以好多時都係rock、(extreme) metal同工業／電子band會用，其他音樂好少會用trigger，因為好難甚至冇得控制大細聲隻聲亦太死板。你試下叫個jazz佬用trigger出live，佢分分鐘殺左你都似。

本地metal band show台上都有一個共通點，就係永遠唔會點樣郁動法投入法，好多band都係技術好甚至歌都好，但一上到台，企定定望住地下，好似怯場又好似驚彈錯所以要睇實對手唔好彈錯野，但其實錄音同玩live完全係兩回事，上到台除左音樂表演方面更重要，100%冇正確零失誤反而唔係要點。好似上次DEATHGUY黎，你覺得個bass係噉fing狂跳一味怒掃成支bass，噉樣彈法，有冇彈錯？就算你同我講佢彈錯好Ｑ多，甚至首首都係從頭到尾亂噉彈，我都唔會介意，因為佢表演得夠放夠狂，睇完全係有feel，彈成點已經係次要。反而太多香港band係本末倒置，用左錄音室心態去出live，所以好多時本地metal show，單從「睇」之角度黎講，真係唔多好睇，演出太生硬同固定，台上剩係企定定彈冇其他動作行動，都好難預期台下會肯郁卦？同埋好多時都要做到好認真好嚴肅：係咪玩親(extreme) metal甚至玩親band，就一定要惡、一定要兇、一定要講道理呢？DISAVOWEDｄ音樂同歌詞具深度過好多人，但演出果時，完全唔覺得佢地真係咁兇惡咁death仲有講有笑大家開心，上埋DISAVOWED個網玩埋佢地整果三隻minigame，你會更加知道呢班友簡直可以用傻仔黎形容。但你話佢地唔認真？聽埋佢地隻碟、睇埋隻碟歌詞先講。聽過一個香港extreme metal band中人講過：
「唔知點解，而家ｄ靚仔夾band，第一件事係要挺起心口愕過頭好兇噉樣望住人。」
唔止而家ｄband，其實新band舊band都係噉。應該話，整體90%以上香港(metal) band都係噉。但你見到ｄ外國metal band － 接近全部 － 差唔多冇一隊係似香港band噉，而係似DISAVOWED咁隨便咁唔志在咁幽默。唔知點解香港band一定要維持呢個「形象」。

仲有一樣野，就係mosh。或者因為香港地只有hardcore同punk show先有人mosh同插水而metal show冇人會做呢ｄ野，好多香港人都覺得mosh呢家野係hardcore同punk先有唔關metal事，但實際上外國ｄmetal show一樣mosh到死瘋狂插水，睇睇METALLICA就知，基本上一開波已經成班友打晒架，只不過係香港地玩同聽metal的朋友較含蓄而hardcore/metalcore/punk的朋友較狂放，大家先會有「metal冇mosh pit」呢種想法。其實mosh pit係非常自然之band show現象，只不過mosh pit都有自己規矩：成個場前排係真係睇同fing頭果班，mosh果班係會係場中間圍（大）圈撞，睇而又上唔到前排又唔mosh自會企去側邊，但呢一場係mosh果班衝到最前排mosh，搞到想睇果班冇得睇迫到去一二邊，仲有人撞親人兼衝埋上台搶埋歌佬支咪搞到歌佬勁興勁唔開心，影響到噉，已經唔係健康之mosh pit。當然香港地有幾何會有metal show，更有幾何會有有人mosh之metal show？呢場騷metal而又有mosh pit確係值得高興，但mosh到影響到其他觀眾甚至台上表演隊band，加埋場騷本身唔係睇／聽metal之人絕對唔少，除左有可能整傷人，更容易令新人對呢類騷呢種音樂反感同抗拒。玩音樂有樂品，睇band show係咪應該都要有番ｄ品呢？自己享受之餘，亦要顧番其他參與者之感受？但就係唔多見好多人會考慮到呢樣野。我係唔認同「我地mosh係應該band show就係噉你地唔mosh果ｄ見我地mosh應該避開你比人撞親你避唔切係你自己事唔關我地事我地撞親人冇錯錯在你地唔醒水遮」呢種想法，雖然上網睇左咁耐forum，每次mosh完出事之後有人出聲嘈mosh果班，都見到有人會俾呢個回應，只會諗「我有冇得mosh」、「我可以點mosh」，忽略其他人而以自己為中心。或者就係因為好多香港band友咁過於自我中心，先形成「挺起心口愕過頭好兇噉樣望住人」呢個香港band特徵。

呢場騷係TRHK第一次係酒吧搞騷，睇番回應，有ｄ人唔係好鍾意呢個場，因不離三：細、聲唔夠爆、睇唔到。好多人搞騷睇騷，都關注呢三樣，因為睇開ｄ騷都係「靚」騷，最緊要有台個台夠高夠大睇得隊band清清楚楚、地方夠大唔會人撞人、音響靚到盡同要幾爆有幾爆，但underground騷唔係應該噉樣人迫人隊band企正你面前玩你摸到佢佢掂到你先夠feel、先夠underground咩？搞酒吧騷有個好處，就係地方夠細又夠簡陋，而且有得邊睇邊劈酒，呢樣先夠晒氣氛！如果隊band隔到九里遠唔可以同台下ｄ人接觸，台下真係好似睇明星噉睇，就少左層意義；又如果玩大場，本身個場音效質素唔係高又唔落重ｄ本做好音響，metal呢家野出到黎只有一大堆聲或者一大舊聲，雖然我個人都鍾意爆聲metal show，但如果場地或者音響唔夠好，絕對係唔爆好過爆，因為最後可能得個睇字咩都聽唔到。所以呢場騷全場先得個台一個位一面出聲，出到黎個聲反而粒粒音都聽得清清楚楚，而且balance做得好好唔係大家鬥大聲，聽落真係好似播CD咁靚聲，係唔夠恆，但學到唔少野。

又有個現象好多人都會留意得到：呢一場騷好多好多好多女仔。如果場騷係有明星band出場，女多過男絕對唔係唔正常；但呢場騷，點睇三隊band冇一隊係明星卦起碼第一三隊冇人識先，而且玩埋ｄ音樂亦絕對唔親民卦？但結果女仔超多：四五十個！係起碼！雖然你可以話都唔算好多，但計番佔左全場最少20%，比例黎講呢樣算相當值得留意，特別係以前聽metal男女比例女性比例係10%都冇，聽呢類brutal野之女性更係可能得1-2%，但而家越黎越多女仔聽metal，而且好多時一搵就搵最激最恆果ｄ，唔再只係搵最靚最舒服果ｄ，呢樣野好多男性都唔會做。呢場騷已經睇得出，非常簡單：難得一隊亦係第一隊歐洲death metal band黎香港，男果ｄ好多都係「death metal唔關我事我係聽（＿＿）metal」、「我係聽death metal但係呢隊我唔識又唔係（＿＿）黎香港表演睇黎做乜丫」、「我好brutal架我去睇騷架不過冇人陪我我梗係唔去睇啦」唔見人，女果ｄ未睇過未聽過death metal但見有騷都照去，「當試新野嘛！」就知道香港女仔對(extreme) metal之投入，真係慢慢趕上甚至超越男性。好多人都會話多唔代表ｄ乜，好多都係湊熱鬧心態黎睇騷亦唔等於ｄ乜野，呢樣野亦唔止係指黎睇呢場騷之女性，更係指黎睇之大半人。雖然我都相信好多人甚至可能達半個場係純粹睇騷心態，見有band黎香港有騷搞，唔識咩係brutal death甚至唔識係咩metal都照黎，起碼見到唔識野果ｄ都會黎睇會黎試，識野果ｄ反而唔會黎睇，已經值得思考。或者係識野的人覺得呢場騷太垃圾唔值得睇？當然我都認同，抱湊熱鬧心態之人冇乜幾多個真係會事後繼續發掘落去，當連聽開聽緊metal的絕大部份人都唔會主動試新野同嘗試唔出名ｄband名碟，又點能夠預期一個人直頭未接觸過metal睇完場騷之後會立即熱心投入metal行列？所以冇乜大預期，十個入面有一個都好 － 雖然呢個比例已經超過份樂觀。一百個入面有一個就差唔多。（呢個數字我仍覺得太過樂觀．．．）

呢場DISAVOWED HK Live另一個迴響，係有人睇完呢場death metal live之後有意玩death metal。睇live之感染力從來比聽CD大，好多野你覺得唔鍾意，睇完live可能會改變想法。但有一樣野可以肯定：呢場騷之後，一定唔會有人因為睇完NANAHARA SHVYA之後搵sludge野聽或者玩sludge。Sludge呢家野，對香港黎講仍然係太偏門，睇場騷之後各位對NANAHARA SHVYA評價100%偏負面就知。

呢場係TRHK搞過最成功之一場演唱會，250人以地下騷黎講係超乎成功，雖然相信只收$70一張飛係主因之一，各位自問唔係咁平你會唔會肯試新野、肯睇一隊自然完全唔識之metal band，即使隊野真係玩得好已經達到歐洲頂級水平，兼係第一隊歐洲death metal樂隊黎香港表演之歷史性時刻？同時呢一場live已經係DISAVOWED咁多年黎top 5 live之一，亦已經贏過日本一連兩日之大型音樂節Tokyo Deathfest。其實有演唱會睇的話，確係有香港人係捨得去睇，好似呢一場香港metal演唱會已經贏過metal繁榮過香港唔知幾多十倍之日本，THE ETERNAL04年黎香港果場，係佢地第一次出國演出，係去歐洲巡演中途停香港玩一場，而呢一場ETERNAL HK Live，無論觀眾反應還是表現係比佢地歐洲任何一場都好。連外國樂隊黎過都可以讚到一流、做一場騷可以比歐洲甚至亞洲最強之日本更成功，呢樣野香港人應該好自豪好驕傲。其實香港人真係有心要投身metal，未必追唔上其他地區，例如最近而已經超越左香港好多之台灣同中國。但自己唔肯起步只願原地踏步，冇人勉強得到。

「幾時下一場呀？」
最近一場會係666。但呢一場冇外國band，只有四隊香港band，但唔使錢免費入場淨係買杯野飲就得（或者好多人未睇過酒吧騷：入酒吧睇騷免入場費的話最少買杯野飲當向酒吧老細答個謝交個代係免費酒吧騷不成文規定），都唔會／唔應強求咁多卦？如果你話「四隊都係香港band」、「四隊band都唔識」，而家直頭免費俾個機會你去睇去聽去試，仲要係支持本地band，算係為各位大老細盡晒人事卦？如果噉樣接近唔使付出已經有得睇band騷同支持本地地下音樂都唔值得你去考慮，都冇辦法。至於成日話賣metal碟搞metal騷係商業係賺錢的朋友，仍然覺得搞呢ｄ咁獨立之樂隊黎香港演出仲要只收七十蚊一張飛，都叫做係「商業」同「賺到錢」的話，相信呢ｄ朋友係覺得搞騷係完全唔使本完全唔使花心機完全唔費神。絕大部份人唔會知道為左呢一場DISAVOWED HK Live，之前係用左幾多時間儲錢先夠生意額同盈餘做儲備搞呢場騷，同為隊band做左幾多；為左搞騷而付出之其他時間、精神、補貼同請假麻煩事等更多更加唔使講，因為根本計唔到。你唔係信搞外國band黎香港表演之underground metal show真係有錢賺／夠資格商業到賺到錢丫嘛？呢ｄ騷唔蝕錢打個和已經要還神架喇各位哥姐！
所以，下一場，相信都要再做多排生意儲多ｄ本，同搵到band就到期先再算。當然仲要希望日頭份工仲有假期可以請到假搞騷啦。（基本上我已經冇晒自己假期，病假除外）

希望好快可以到下一場。／希望仲有下一場。