又到LiveHouse睇show的日子。話「又」，上一次，已經係兩年前。直至HORSE THE BAND為止，兩年間亦完全冇睇過indie show，LiveHouse Warehouse都係。星期六日太難抽身。直到今次，終於出山，不過原因係為公事，多於為睇show。
好耐冇黎過，人面全非，就連LiveHouse之名好似都不再矣。唏噓也。
「而唏噓者，唔止咁少。」
講起HOWLER，有少少自己的故事想講。HOWLER只有兩次機會遇到，第二次係三年前蒲窩，佢地排最後，但出場時俾人拉左出去影班相；第一次，要追溯到我剛開始聽metal，邊種metal打邊種都未識得分仲係白痴仔一個果陣時，我成世人第一場metal gig，仲記得最後玩左校歌《Master of Puppets》，地點同樣係LiveHouse，只係幾年間LiveHouse真係變左好多。
「最少，現在的metal show同以前（『真正』）的metal show，已經兩回事。」
因為事隔多年，對佢地印象除左有BLACKWINE bass佬玩，同BLACKWINE個鼓佬呢度變左彈結他同唱歌，就係BEYOND+太極。歌可以話幾老土 － 老土有老土的好處 － 成隊玩得好紮實，結他先多野聽。阿Jim手結他多ｄ「新奇」野聽，而Randy（希望冇記錯個名）係非常正宗'80旋律速彈。唔知係兩個成員定點，硬係覺得佢地ｄ歌越來越多BLACKWINE式progressive野撈入去。係歌佬要再練練，有時扯高扯得太夾硬。
「幾時出碟先？幾時夠歌先？」
INFINITY
個名聽得多的instrumental fusion project，個個聽過睇過佢地都話live一流，我膚淺只睇過網上最流行果段Yahama比賽片段，一首歌拎幾個大獎幾個最佳樂手，確係好Ｑ勁，除左鼓佬好穩但覺得唔太突出。今次終於有機會睇佢地，第一次。可惜在撞著keyboard唔得閒，得番鼓+結他+bass，美中不足呀。雖然齋結他同bass真係殺晒，尤其結他彈ｄ野、tune聲、effect通通一流，唔怪得聽過有人話佢係而家香港一大具潛質結他手。可能冇左keyboard確少左好多野，開頭大段intro，三個人重覆又重覆確實幾悶，之後越玩越有feel入味，太強了。更難得係夠靚聲。LiveHouse一向俾人話音響唔得，我自己覺得唔算太差，因為喇叭分佈你企邊個位影響可以好大，當然亦要睇番台上較聲，玩metal炸到仆街果ｄ就聽死得人，頭先HOWLER衰在bass太爆遮晒結他（我企左後角，或因地理位置影響），INFINITY得三樣樂器又要玩靚聲，冇乜拆聲大家又唔使爭，聽覺享受一流。睇佢地時覺得好怪，因為硬係覺得佢地隻style同LiveHouse格局、觀眾唔多配合，都係落吧玩先有果種感覺。同埋鼓可以玩花ｄ丫，雖然極穩同三人夾聲超強，但節奏太平穩冇驚喜，fusion野，我鍾意鼓佬多ｄ反拍同即興玩法。
今次主角之一，因為場show兼作佢地新歌發佈會。全晚只玩一首歌。
「咁少？」
夠喇。首歌係《循環不息》，二十二分鐘長。黎緊六月底七月頭BLACKWINE會出第二隻碟《影子》，同上隻碟隔左六年，六首歌中有五首大家幾年間聽下聽下都聽過晒，唯獨呢首長歌第一次公開表演。表現如何？多野聽過CD。好多。同覺得危機幾大，因為聽新歌佬唱左十秒鐘唔夠，已經敢講在場甚至所有有機會聽過佢唱之任何／所有（香港）人，必定100%負評。想唔俾人鬧，或者話佢可以話自己唔係唱BLACKWINE，而係唱緊metalcore？
玩成點未係時候講住，因為這只是個前瞻，是個開始：
「七月十二日，BLACKWINE音樂篇之《影子》。」
重演六年前，全隻碟由頭到尾玩一次加播片，一個visual concert，而BLACKWINE以外當然仲有神秘表演嘉賓，你估唔到果隻。有關《影子》同演唱會詳情，台上提醒大家：
「DSC今場為大家演出中年危機。」
玩左五首歌，舊歌多，當然重點之一《闖將令》即係如來神掌唔玩唔得，但最想聽都係《武術組曲》，雖然《十面埋伏》已經玩到濫晒。一直覺得DSC缺點係少歌、寫歌慢，雖然我相信睇左聽左佢地五六年，仲未聽過晒佢地全部作品，好似今晚有首《西域》就係第一次聽，但話晒唔係玩得短時間，次次翻炒，台下好快悶架，特別而家香港人咁即食。大哥丞玩live通常唔多穩定，今場算係睇過佢最好一次，而音樂上，始終DSC特色係中樂加rock，我想佢地玩多ｄ《闖將令》果類，多過典型傳統progressive instrumental，所以《西域》玩西關色彩，真係做到DSC種東方搖滾風格，我非常鍾意首歌，不過唔夠呢，出歌實在太慢喇。最後encore，唔使問，一定係《頑童》，大家睇《DSC》除左中樂rock，都係為左睇《頑童》嗟：
一睇張相就知唔係LiveHouse啦，係四年前灣仔會展漫畫節。之前聽講好多人走左、幾乎得番大哥丞一個，今場睇到，阿超仲係度丫，至於bass：
當然，用現在角度睇／聽DSC，除左涉及中樂之改編作品同原創作，佢地自己寫ｄ歌（非中樂類）而家ｄ靚仔眼會覺得都幾．．．低Ｂ（大哥丞，希望唔會得罪你、希望你會原諒我），因為編曲同技術上，只屬於靚仔眼中的樂器教材或者練習歌仔級數，好不幸佢地表演時，台下睇到有年輕band友發表「冇料到」、「我都勁過你啦」之類的不屑，
「玩反手？我睇CHILDREN OF BODOM好過啦！」
冇辦法。DSC已經係「上一代」的集體回憶，《頑童》好勁、好難玩？唔係。不過做到一樣野，就係首歌個feel好開心，同埋大家都係等最後阿超轉棍、大哥丞同文偉玩反手，冇錯呢兩樣野玩得犀利過佢地大有人在，但DSC係香港第一隊肆無忌憚地獻醜代表，大家睇佢地，只為重拾當年果份「香港人都噉玩法」、第一次睇人轉鼓棍玩反手的幼稚的衝動。新一代係唔會明白果份發現新世界的喜悅，因為第一日起已經靠上網，而上一次網立即有過量資訊塞落你對眼你對耳你個腦入面，根本消化唔切、未能欣賞，已經要去追求第二樣野，而當人人都係噉追，你唔追而停低一陣欣賞一下，已經會俾人笑你識得唔夠多野脫晒節。如此環境「聽音樂」，最後下場只有兩個，一係成為網上專家，一係放棄唔追唔聽，根本唔存在空間俾你有呢種「幼稚的衝動」；從音樂中得到的滿足，變成來自因為聽同睇一種音樂而得到其他人認同，而非真正因音樂同表演而起的natural high。其實，都幾可憐，上網你乜都有，就係冇左欣賞音樂的心、鑑賞音樂的耳。
「所以我仍然會欣賞DSC，因為佢地堅持努力創作新音樂，而唔係『我要好似邊隊咁勁 i.e. CHILDREN OF BODOM, LAMB OF GOD』，要似一個人一隊band好易，做到一樣野冇人似先難。即使佢地努力的成果，對好多後生仔黎講，技術層面只似exercise 1般不值一提 － 創新層面當然唔會理啦，出聲果班有幾多會諗得咁深入？」
初時諗住主角係BLACKWINE實擺最後，點知壓鎮變成LUXURY。又係個名聽得耐但live第一次睇，宣傳時話佢地表演會有驚喜，就係會玩番佢地第一隻碟ｄ歌。問大哥丞，佢地第一隻碟，即係幾時？
「．．．應該係上個世紀！」
多謝晒大哥丞。近十年前都有。實際上即係幾時我都唔知，因為對隊band我完全冇認識，宣傳時話「有驚喜」，即係大會話係話有，我出廣告時咪照噉講囉呵呵呵。睇過又唔難明點解會係壓軸，玩ｄ野係香港從來受歡迎的J系，全隊band唔多野，不過live得好同歌佬唱得出果樣野，雖然我唔算太鍾意呢類，全隊人歌同技術有料到好易聽得出。因為名氣、歷史同歌路，初時我覺得佢地擺最後，一定會係全晚最多人時段，但反而調番轉。點解？
「近年罕見之強勁陣容及熟悉面孔聚首！」
宣傳時如是說，但可能只適用於上一代，正如講BLACKWINE、講DSC，我地聽到會「嘩！！！」同而家ｄ人，問番你乜料轉頭，甚至可能同上面的一些朋友一樣，表現不屑。就如DSC帶出的中年危機。