踏入新一年，又係時候為之前365日作個回顧，按照兩年前所立傳統，年度回顧在1月10日開始。作為一個metal友，老實講，2008年實在悶，自07年底metalcore急速下沉，因為大半個香港都係／只會跟住潮流走，個個等緊後繼metalcore下一潮出現，但metal不論主流還是地下發展已近飽和及才窮形成真空，除間中某些網上炒作（詳見各大forum），同07年metalcore當打時期相比異常沉寂，metal彷似大勢已去，好多當年聽metal者都少聽左、暫休甚至放棄metal － 講緊真係視metal為一門藝術文化有心去聽，而非「果期興乜我就追乜、人地聽乜我地就聽乜」的追星追潮流者。你會話而家聽metal人數比以前大幅增加，甚至可能係有史以黎最多，但在TRHK見盡七年黎香港metal聽眾及metal界期間起落，我會話而家必定屬於「落」期，連搞show一班（包括我＆非我）都話「而家ｄshow冇以前咁好睇」，此「悶」非搵水黎吹；心是最大問題。難怪香港地下音樂已經「唔多地下」矣。我唔會預期短期內能夠再「起」。

論最感慨，係眼見香港主流樂壇演者與聽眾發展充滿突破，進展甚至比香港metal界更大，假如見寫中文碟／流行唱片／「魚蛋歌」仲多過寫metal野，請勿見怪。某程度上，2008地區性及工業方面，有太多例證顯示出metal在港只能是股潮流，作文化藝術者則仍未甚至冇可能搞得起。打開序幕，是年度心頭好紀錄：

好多人鍾意選年度最佳、選幾多大，但文無第一，往往今日選左，第日或者幾年後會改變心意，所以我寧玩大包圍記低有乜野令自己有印象會鍾意／唔鍾意算數。除左唔使煩，仲為將來可以提醒番自己，因為有時聽得太多太亂，又或有ｄ碟覺得掂惜時間所限聽一兩次就掟埋，若干時日後已經唔記得冇晒印象，得閒睇番紀錄，「係喎呢隻好聽喎」、「咦點解我會記低呢隻碟」，再摷出黎重溫一番。你可以話整個《Honourable Mentions》，其實係為幫自己記憶而起。不過更大原因呢，都可以話係受到各位網上同好啟發：

「成日上forum，見到咁多人拋書包同玩填字遊戲玩得咁開心，等我又玩埋一份先！」
（真定假？你自己諗喇，劉Sir成世人講過幾多次真話？呵呵∼）

紀錄完畢，輪到深入探討。2008回顧主要從三方向出發：metal、中外主流音樂（雖則而家metal又有幾唔主流？），及一個七年工作者眼中之近代（本地）金屬市場、文化興衰。作為填字遊戲，質素冇保證，字數就有，因為量非質方為填字遊戲真諦。有幾多？如果週刊型式出街，出到2010都仲未講完2008。大多稿08年未過已經竣工，例如你知我實會寫的謝安琪《Binary》，排隊排到見街果陣應該新碟都出埋過晒期，有部份或需重編、重寫甚至抽起唔出街，唔係玩死加睇死。

另因業內工作性質，同我大半音樂係俾錢買返黎，雖說是回顧2008，亦會寫到唔少08年前舊作，冇辦法，當你係俾錢買唱片聽音樂，亦非每日對住電腦第一件事就係立即上網睇有乜新band放歌出碟搵野聽的時候，時間、金錢及流通所限，好多野唔係一出立即聽到／有得聽，甚至部份想買好耐舊碟而家仲未買到（都唔係「部份」喇，係「好多」喇），又或遲左幾年先入手，所以即使是舊，想寫就會寫不限年份所限，可能到2010年，仲講緊2006舊碟。這是俾錢買音樂唔download（懶）有原則的報應。

自己睇番，都覺得有點似放棄metal前夕迴光反照。