連續講左咁多女歌手，男歌手並非一無是處，全因個人偏好女聲，加上本地男歌手歌路一向唔係我杯茶，聽慣band野男聲音樂底唔爆唔得，好男歌手要數實數到方大同一個已經殺晒，始終而家世界音樂潮流靠攏黑人音樂，多年前雙陳黎多個麥浚龍hip-hop雄霸，hop完R&B到今時今日仲未玩夠，加上台灣美國力谷，R&B已定型為港式流行曲典型，而我從來受唔到稔到無可再稔的pop R&B，亦絕對相信本地流行曲經過R&B如此抒情後難以回歸八九十band底時代，唔一定要恆，但玩pop rock可以減少古典keyboard，即唔用古典為主整多隊band只為加番個鼓遷就聽眾，已經難得。所以當初話我聽主流有隊MR.，加出到名＆出到碟，我唔信架。

香港中文歌幾耐未見過樂隊呢回事？BEYOND冇左黃家駒之後，你已經數唔到主流中仲有多少樂隊，舊band自然消失買少見少，新band．．．乜仲有新band咩？九幾中起香港樂壇只餘組合，樂隊幾近不再存在，一直到MR.出現，香港樂壇先叫做再有樂隊。問對上一隊得到大公司支持入到主流之樂隊係邊隊？只得二人的SOLER算的話是其一，你話ONLINE呀乒乓呀都算「樂隊」叫多兩個（LMF你話算咪算埋一份囉），加其他「炒唔起」單位如臨記，再之前已經返到去BEYOND太極年代，中間大段真空。對佢地歷史冇認識，只知以前叫WHITE NOISE，捱左好多好多年至正式出到頭，聽完隻碟，感想抵佢地紅好鬼正，再感嘆一番點解要等咁耐。

會有大公司簽MR.幫佢地出碟，意義遠重大於香港樂壇十幾年來終於有band可以名正言順踏上台板，樂隊加唱作身份令好多方面能比歌手大條道理，中文流行曲終於可以將樂器聲特別結他推到好出唔係唱大晒、可以唔加keyboard結他玩晒、結他solo可以長過八個bar、一首歌可以有超過一段solo、可以全碟最短首歌都長四分鐘。難免令久未認真接觸香港歌的朋友有番個理由聽番本地出品，單講結他solo一樣，K歌中間樂器彈四個bar已是極限，普通流行曲一向八個bar已到頂，你估仲係梅豔芳時代，《妖女》結他佬同你啡足六十四個bar咩？聽慣外國野對以上不以為然，在香港卻是破天荒。

不過絕大部份人認識及留意MR.，唔會關任何突破事，而係歌佬把聲超級陳奕迅，派台《Everyone》唔問清楚冇睇MV，認錯陳奕迅新歌不足為奇，似得好交關好驚人仲要玩到咁rock，但成隻碟聽晒，實際上差別相當大，唔止歌手，音樂亦是。因為日聽夜聽以為《Everyone》會做隻碟第一首歌，點知開場係《戰禍》，各方面都好過《Everyone》，不過人地曲詞single格確屬派台首選，《戰禍》只好委屈做album track。全碟最rock頭兩首，一心諗住成隊band出黎焚一定好rock如我就中招了，跟住全部慢歌，當聽OASIS、早期RADIOHEAD、BLUR、SUEDE等英倫樂隊自然非常開心，寫同彈水準極高，《想太多》又係派台之選，更難得香港樂壇中風格只此一家。《Everyone》呃晒全世界，中間兩首歌較易聽得出歌手把「真聲」，原因之一玩好多高音假音而且越後越高／越多，亦因陳奕迅高音勁都唔會成日噉玩法，二人聲底之別碟中間明顯得多，可惜同時突出歌手之不足。女聲難唱低音，因為往往唔夠自然，男聲唱高音亦然，用真聲去到咁高而唱得好就是真正實力派，可惜無論流行還是rock/metal都唔易搵到，假音係另一途徑，反效果係搞到把聲好薄同聽落好假更難到家，《假使》《等不了》假音玩大半首，其實個key需唔需要去到咁高？如為表現唱功的話，反搞到有點弄巧反拙，間中有點礙耳。另連聽幾首歌，覺得感情表達未夠，音樂底吸引，唯獨主音唔太襟聽，感覺似一個聲底較實、唱腔較硬的陳奕迅，又或分得清兩個人，皆因佢係「未完成」的陳奕迅，如此絕非好事，唱得比而家更放更有彈性是進步方向。同唔好咁多時候猛上高音、一去就去假音，中低音除在行亦係「Eason key」，不論為更佳發揮，又或想蒙騙世人（呵呵），減少太多（不必要的）高音／假音，聽得人舒服多。可參考《Everyone》。

講到全碟最愛，反而數最後兩首。《Mister》全碟最飄，八十年代之後，我諗唔到仲有邊首中文歌結他solo可以咁多、咁長，一首歌結他佬晒盡，成隊band都好勁呀。埋尾整隻慢歌《15》，木結他加弦樂，難得唱片公司肯俾佢地唱英文，而全碟最「唔pop」就係呢兩首，好多時流行歌手、樂隊album track比single更襟聽，皆因single要人一聽就覺得好聽，一定整到最淺最易，要花心機長時間浸果ｄ冇乜機會派台，往往聽晒隻碟先發掘同欣賞得到，呢兩首就係例子，魅力除音樂仲來自歌詞。其實對於歌詞有點失望，因為半隻碟都係情歌題材較行貨，《戰禍》憤世一點叫有ｄ野睇，都唔夠《Mister》主題曲自然講番夾band、用音樂去克服改變，音樂本身已經灰同飄，夾埋詞好鬼欷噓。《15》講十五歲回首過去已覺老，又係灰好似聽緊NIN，不過從中睇到時移世易，我地以前靚仔時，十五歲仲係白痴仔一個，而家呢個歲數已經嘆自己老。下一隻碟，希望詞題可以跟從呢兩首，寫得較生活化同具思考性，隻碟頭三尾二是心頭好，中間兩首「假音歌」被比下去，但其實全七首歌冇一首唔好聽，在好多時除派台幾首碟內其他歌往往似塞位多過認真創作，此在香港非常難得 － 「好聽」者，最後首bonus track《Everyone》remix版除外。唔多想提，因為講到搵到外國電子音樂界大師級名人混音，出到黎好麻麻完全唔突出，又同隻碟風格唔夾，唔擺入隻碟仲好。

香港indie band唔少，但音樂能保持咁indie上到主流則罕見，MR.開左個頭，令香港樂壇再次出現齊人組隊上台演奏自家創作之真正樂隊，是意外不過未至於太過好奇，我成日講近年本地indie抬頭，互聯網各大forum MySpace YouTube之助，令獨立樂隊好易宣傳自己、被人認識，以前死聽大label歌手一班上多左網，開始發現原來香港地下收埋唔少好人好歌，實力派同唱作派替偶像派接棒，再加幾年間忽然大量外國band／英倫band到香港表演，就算本身聽開中文歌都開始留意外國單位、K歌以外其他音樂類型，MR.有人撐上到主流好難說服到我係唱片公司突然良心發現。無論如何，最少是個好開始，加埋「競爭對手」RUBBERBAND，起碼而家唱片公司肯簽番樂隊，只怕因為家陣個個話要聽實力派，至俾到唱片公司足夠動機，換言之只為潮唱作打造另一個潮流締造商機，而非真為支持唱作。老實講，要簽band的話，何憂無選擇？之前就係唔做，你見一路只得個別音樂人或細公司會推band，好似黃家強、葉世榮，可惜全屬曇花一現，正如KOLOR，歌好live更好，出完碟，去左邊？唉。除左為時潮流未到，只有話香港地始終接受唔到rock文化，真正玩rock玩band sound，即使只達當年BEYOND、太極之「噪音度」，一樣冇太多人願受，聽左太多年稔野寵壞晒，而MR.歌路會近香港人鍾意種抒情英倫，「嘈」極都得人鍾意。Rock，香港始終難起／唔起。同：

「如果MR.歌佬把聲唔係咁陳奕迅，唱片公司會唔會捧、佢地會唔會如現在有機會專業製作出唱片？」

此問題乃值得思考。我唔係話因為歌佬把聲，MR.先至簽到大label，佢地音樂本身已達一班，但敢講引到大公司定音之錘，歌手是比音樂更大考量。只怕跟住失去自控權利偏離樂隊之意，如SOLER，你話我主觀都好、話佢地始終走二人pop路線多過band rock路線又好，出道後的確軟化過出道時。所以MR.有大公司支持，應該感到恩惠、樂觀還是保守、悲觀，著實難講。我最怕隔一段時間唱片公司見炒作唔起，或另一潮流捲至，眾樂隊即被遺棄。前科唔係數唔到，臨記呢？可能冇乜人知，當年DSC都簽到大公司，但公司完全唔支持、根本冇幫過理過佢地噉解。簽大label絕對有好處，如果KOLOR係環球，會唔會如而家懷才不遇？害處，講過太多次。indie出唔到頭，雖敗猶榮；簽大label而冇人撐紅唔到甚至從頂跌番到底，要灰得多。唔希望睇到MR.會成為又一個前科。因為佢地真係有料到。