2008 Retrophrenia
Metal, Music, Merchantry


Chinese General II
謝安琪《Binary》

「香港樂壇希望面對的『二元』弔詭」



Pre:
2008 Retrophrenia
The Provenance
Post:
Chinese General I
關心妍《最愛Jade.i》
Chinese General III
王菀之《Infinity Journey》






講完關心妍《Jade.i》終於到/先到最愛的謝安琪。繼《The First Day》同《3/8》兩隻精選後,終於有新碟喇,詳講之前先完成一個創舉:同一個討論題目,提供兩個版本選擇。


普通版:繼續睇落去就係

碟評版:按此閱評


劉Sir出晒名衰多口,一講/寫就萬幾二萬字。普通版即係呢篇,一如以往長到你唔想睇,碟評版將專輯精華全部收錄,應該少番萬零字。而普通版多左的萬幾字,就係音樂以外、咪後種種。基本上點睇都死。分別係邊個死慘d嗟。


對我黎講2007年中文流行曲最大新聞,係謝安琪這個「indie-pop」歌手簽左新藝寶,即係入左環球大公司,跟住出《The First Day》新曲加精選,雖然只算半隻精選,因為舊歌全部玩新編曲,甚至比以前更放膽,到頭來又係一部傑作,但睇見新藝寶嘜頭,加上開始有主流製作人插手,總叫人擔心將來。《3/8》識驚,主題曲同《神奇女俠的退休生活》典型周博賢,不過《鍾無豔》係繼《滄海遺珠》再一個分水嶺:


「謝安琪是否需要K歌?」


新碟《Binary》先派《十七度》上台,「disastrous」;再睇見新碟封面如此主流,本書仔成幾十頁紙厚,但實際上有字或同音樂有關唔夠十份一,彩色相集霸晒其他頁數。《Binary》撞正書展出,大量姐姐妹妹出寫真集,同期仲有JJ呀Theresa呀等等等等新碟CD送大大本圖集,就算明知隻碟非取此方針,客觀環境比較難免做到好似同班靚妹一樣層次,低章而商業味重過頭。不過包裝設計唔差,同丁菲飛《樂源》一樣透明膠套包裝,不過冇《樂源》膠套超易爛個問題夠實淨,同設計有心,其上「Binary」旁是幾何化之「二元」,睇多幾次先睇得出當中心思。


作為大公司第一炮,環球官方網頁用頗大篇幅為唱片解構:中文碟名《二元素》正是歌詞主題,就如1同0「對比、對立、反差」,搞到好似concept album,但都幾屈機&對號入座,正如最最最普通情歌都可以話係一男對一女的「二元」,這個concept百搭至老屈。基於簽約新藝寶先入為主負面印象,同派台曲完全打倒昨日的謝安琪,隻碟是成是敗?繼BlackWine《影子》,全年聽最多中文碟就係《Binary》(早出之關心妍《Jade.i》被後來居上成第三),聽到隻碟都花,嘆句有喜有悲。「二元」也。


開場《囍帖街》應該係第二首公開作,見到班底寫住Eric Kwok+Wyman,灰左一截,好在慢歌但唔行貨,編曲錄音夠飄渺非常得人心。歌詞係不痴男但怨女故事,以囍帖街入題,一貫本地填詞人食潮流所長,用今期流行戲名事名地名人名入詞,有點「抽水」,係文筆好囉,黃偉文喎。 頒獎禮


《十字架》唔係ZEN cover唔好意思,雖然我都想,ZEN首《十字架》係我心目中最佳本地搖滾歌曲之一。見到全周博賢出品期望甚高,點知絕對台式chamber pop,難怪送多個國語版《那碗粥》。今次係痴女撞著埋怨男,歌詞冇乜興趣,但唱得好,聽到謝安琪除感情外比其他女歌手優勝之處:換氣。正常唱歌好難完全唔俾人聽得出換氣聲,但點樣能夠換得自然聽得人舒服?請聽聽《十字架》


《私隱線》再黎周博賢玩晒,老式電子似《亡命之途》開心版,講搭車身邊人電話滋擾,chrous玩埋vocoder夠過癮,不過sample solo未夠放,同整體起伏可以再大幅度。


跟住一連兩首都係Cousin Fung同周博賢合作 - 講明先呀我唔識Cousin Fung咩來頭架。《如花》終於玩番野,《我愛茶餐廳》日式酒廊rock格歌詞十分抵死,真係講周星馳喜劇個如花,唯周博賢填得出。不過跟住相同班底搞左首《十七度》出黎...齋聽係聽得出Cousin Fung非常有料,多元化創作自若,只係我地聽謝安琪,想聽《如花》多過聽《十七度》囉...

《十七度》係我聽謝安琪唱片咁耐以黎第一個飛歌位。」


好在喊完,一連兩首周博賢作品力挽狂瀾。《入型入格》聽左幾多次仲可以聽到笑爆咀。音樂係非常非常簡單的R&B,而我從來唔多鍾意R&B i.e. 《十七度》,重點是詞。唱其實只得一段其他全部rap,周博賢扮文化人已經爆笑,再聽埋謝安琪港女回應,直頭笑到仆街。

「點《入型入格》給各位出沒於TRHK的男性,一針見血解畫點解聽metal的大家仍然單身。」
(註:「出沒」不同於「經過」;「經過」的男性,不見有多少個在《入型入格》之列)

聽謝安琪姣d對白出黎,眼前不期然浮現典型港女形象(我鍾意!)。知首歌咁成功,周博賢居功90%以上,因為唱的部份冇幾多,而且唱黎唱去同一段野,俾任何一個女歌手唱都冇問題,但果種歌就要夾果種人先聽得順耳,如果首歌係謝安琪出碟同期是但一個似出寫真集多過出碟的靚妹唱,佢地只夠資格做rap果個而做唔到唱果個,相反謝安琪「超齡」、結埋婚生埋仔、一開始已經「唔pop」,就可以大大聲講佢先至「串得起」唱《入型入格》

謝安琪《入型入格》,2008年度劉Sir最愛中文金曲。」

有樣野好搞笑。環球網頁詳細解構全碟「二元」概念、製作同歌詞,唯獨《入型入格》完全冇講過,相信因為歌詞提到《獨家試菜》、《十蚊菜》同《我的鐵蓋》三套戲位男主角(當然唔係懷好意果隻),而該男主角(傳說中之万刀甲)係另家唱片公司歌手。即係玩串都有個限度,當你進入主流。換著兩三年前仲「indie」果陣?明串你咪明串你,使怕?


再黎《烏托邦》,另一首全碟最佳作品,我係Moby迷,對迷幻、ambient甚至帶點gothic之飄系電子情有獨鍾,嫌《私隱線》舊式或平淡過頭,《烏托邦》音樂加重摩登感,編曲豐富、鋼琴夾主音迴聲殺死人、旋律同唱夠淒美,都未講到重點歌詞。歌名其實係個反諷,講香港人唯利是圖風氣、「窮人含撚」社會病態,蠱惑賤格走精面才是正道、有原則有骨氣晒九氣,寫得好中好到。可能我算半個音樂業界中人,雖然歌詞表面講香港社會,暗媊控o周博賢從中鬧埋本地音樂工業,《The First Day》內文已發表感慨,詞中雖不屑妥協、但為勢所迫又需去習慣之描寫,咪就係《Binary》境況。佢已算3/4個主流都有此感,自己搞metal賣metal、面對專家眾多,從《烏托邦》中感受到的無奈感慨,相信比出品人自己感受更深,甚至聽本地indie band都唔會聽得出呢份音樂工作者之灰暗心情,因為indie band只是「局內」,而非業內:有幾多indie band真如大眾所預期咁支持同接受indie sound呢,查實?當局者迷。

《入型入格》之外,《Binary》中我最愛,就係《烏托邦》這首『gothic doom pop』。」


《十七度》更污的污點非《十優生》莫屬,再黎Cousin Fung+周博賢,作為一首電視劇主題曲,放入隻碟就顯得太大路太行貨太開心,即係《十七度》我都唔係次次飛有時會聽埋,《十優生》除左剛開碟聽頭幾次,99%機會頭十秒內必飛,最後1%只為中間段木結他solo。我諗幾難有多一首謝安琪歌可以更令我唔妥了。唔係話唔好,Cousin Fung的確越聽越有料到(開始有興趣搵佢其他作品),不過歌路非大家想要,又如提過寧願佢寫多首《如花》多過一首K歌。點解唔等再下隻精選碟先出?


最期待之《港女的幸福星期日》壓軸,又係Eric Kwok+Wyman,隻碟未出街只派《十七度》上台時,齋睇曲目表最搶眼就係呢首,個名實在太強了。《3/8》有首歌叫《神奇女俠的退休生活》,拍埋一齊,加上呢種港式筆觸,未聽已經估到又係黃偉文傑作,或因最初兩首派台都唔算好震撼,當初等隻碟出其中一個大目的係為呢首歌。得唔得呢?王菀之式民謠音樂底,歌詞冇錯講港女,不過唔係串佢地,而真如歌名講港女捱完一至六點樣享受嘆世界的幸福星期日。

「...好似《入型入格》仲港女的幸福星期日過《港女的幸福星期日》喎。」

可能「港女」早被定型成過街老鼠,大家先入為主認定首歌串港女,結果填得如此生活化、如此「正氣」,我以為聽緊《女生向前走》。不過有興趣講講填詞手法。因為題材咁地道,用詞亦玩廣東話,而黃偉文好想成就全廣東詞入詞,睇佢年來填詞偶爾嘗試市井生活化、港式用語、廣東話,當然成果通常得啖笑(《你唔愛我啦》),今次《港女的幸福星期日》廣東詞入到旋律,而且非常高明避開晒有機會過於市井之陷阱位,所謂「新廣東話運動」中(如尚在),這可說是最成功例子。下隻碟繼續唔該。


「encore」《那碗粥》都講過係《十字架》國語版,歌名差咁遠,唔聽完全估唔到同一首曲黎。《十字架》本身台式嗟,冇諗過唱埋國語,可以台成噉嘛:

「嘩!孫燕姿?」

歌路同唱都可以,入唔入到台灣呢?但如真係想做野隻以打入台灣為目標之國語專輯,歌詞未必可以咁玩野先。怕即時行貨晒咋。


睇落謝安琪出左好多隻碟,其實五隻當中只有頭尾兩隻係大碟,中間三隻全部EP/精選,即使唱得好,都難逃香港唱片工業運作模式。等咁耐值唔值?論唱,謝安琪把聲同唱功在港仍然無人能及,單為聽佢唱歌作為fans實會支持,雖然明顯避開高音,以前每碟總有幾個(超)高音位,今隻碟聽極搵唔到。討論關心妍《Jade.i》時帶出過,香港人再次對歌手要求唱功,但一個歌手只需要少少招牌歌表現到唱功如高音、長氣俾聽眾就夠,有一兩首佢會話你勁,第三首開始佢會話你死玩爛玩唱功,難怪唔少歌手都係出道用一首歌證明俾大家睇「拿我唱到高音架」、「我唱歌夠氣架」,其他點行貨都唔會有人怪你話你唔識唱歌,越新歌越冇聽頭。高音唔係必要,但將唱者音域收窄時,亦隨之為編寫旋律時帶黎限制,今次歌曲就係唱方面美感不及以前,又欠特別突出時刻,唔係本身謝安琪唱法多變感情豐富,好多歌未必有而家咁襟聽。可能唱片公司主意,方便K歌化遷就卡拉OK市場?講歌唱技巧相信仲有,新歌K左但未必易唱過舊歌,《十字架》聽得出有難度,不過我膚淺,直接標個高音我會開心d。但今次冇。


音樂上,就睇你本身站在何處。聽慣大路歌的話,新碟可能係佢咁多隻碟以黎最好聽一隻,因為d歌夠K,《囍帖街》《十字架》《十七度》三首已經無敵啦,雖然我覺得《鍾無豔》更K但更強,連我唔聽呢類典型港式流行曲都覺得好聽,今次三首除《囍帖街》另外兩首唔識欣賞,但要重申《囍帖街》編曲查實係當中最唔主流化。從「indie pop」層面聽(直到《The First Day》我都係噉樣稱呼謝安琪,呢隻「精選」可能係佢最indie一作),同樣以上三/四首歌加《十優生》夠令你反感,好在都有金曲如《私隱線》《如花》《入型入格》《烏托邦》挽回,只係全碟差噉一首振奮人心代表作,如《Kay One》有《姿色份子》同《我歌故我在》、《K sus2》有《愁人節》、《The First Day》有《後窗知己》同《節外生枝》,《3/8》都有首主題曲,《Binary》聽晒成隻碟,就係搵唔到有一首歌同樣煽情,個人之選《入型入格》《烏托邦》低調左少少,贏足成年之《囍帖街》尚欠些許,好還好對我黎講過左譽,其實我到而家仲唔太明點解首歌可以拎咁多獎咁多人撐,除左唱片公司手段之外。值得一提前四隻碟代表作歌路同樣所謂「英倫」一點,但新碟冇一首歌走此種「英倫」路線(我知唔太英倫,但最常用之形容是此),因為換成香港主流聽眾所喜愛的R&B。所以點解聽到簽左新藝寶後咁驚,因為舊歌路香港搵唔到之餘我非常鍾意,港式/台式R&B調番轉頭從來聽唔入耳,而且聽謝安琪的大家,絕對想多一首《入型入格》《如花》,多過多一首《鍾無豔》、《十七度》,結果全碟偏向低調飄渺,歌詞或做到主題之對比反差(都幾勉強),音樂未夠。「pop」幾首好唔好聽係另一個問題,問題係應唔應該由謝安琪唱?唱現場cover人地歌冇所謂,放入唱片絕對弊多於利。當然,我噉講,因為我係indie。


歌詞難得未有失望。周博賢詞作繼續諷刺時事社會,有骨得黎好玩,好多題材只此一家,好似我未見過人歌頌如花。《入型入格》完全香港男性心聲,更加冇幾多人試過咁明目張膽講港女。黃偉文一向好玩好串,兩個加埋詞質極高,高到令人感動果隻,所以某程度上隻碟歌詞同歌名比音樂吸引,甚至因而起死回生。初聽唔太鍾意,就係講過之三首慢歌拖累,只係聽左過百次、深深感受到《入型入格》《烏托邦》詞意以外的感慨,隻碟已經由「麻麻地」成為「好好聽」,假如隻碟唔係今年出,全年最佳中文專輯就會係關心妍《Jade.i》


進一步隱憂,係作為型格路線歌手,在偶像派橫行而商業潛質極低之香港音樂市場中,加入大公司後仲可以型格幾耐?《Kay One》最重點歌曲之一係《我歌故我在》,除擺明賣(弄)實力,仲講出作為獨立女歌手志向,唔需要做偶像派、唔需要唱情歌、唔需要作出妥協,只要用心唱就夠,但明顯地《滄海遺珠》已偏離此道。《節外生枝》同《3/8》繼續歌頌indie,但其時已有半個人完全進入主流界,非所有事能自我掌握。記得睇過佢一篇舊訪問,表示希望可以專注歌唱事業,唔做太多與音樂無關之工作如拍劇、拍廣告,但現實香港邊有可能?有幾多個張學友同陳奕迅呀?尤其佢歌路仲未算完全受大眾接受?仲連仔都生埋?即係《K sus2》起幫音樂器材做代言,都叫做同音樂有關係,但入環球之後,幫無線唱電視劇主題曲做益智節目、幫戲同遊戲配音甚至做埋戲,開始灰了,唔止因為「pop左」,當你工作繁多,自然唔能夠如以前咁保養把聲及鍛鍊唱功,好多人話謝安琪生完仔復出唱歌冇以前咁好,我覺得過勞係原因之一。我都好期待佢可以單靠唱歌維生養家的一日,可惜某程度上必需要作出妥協,又一個「二元」抉擇:


Kay歌 vs K歌


這是全專輯最大對立、對比。大家都係想聽前者。中文流行曲需要的也是。問題係,可以選擇、控制嘛?香港是個《烏托邦》


令我諗番幾年前,謝安琪主演之音樂劇《歌神英雄傳》。




Pre:
2008 Retrophrenia
The Provenance
Post:
Chinese General I
關心妍《最愛Jade.i》
Chinese General III
王菀之《Infinity Journey》




Sir個網
lau-sir.com

Sirblog
http://hk.myblog.yahoo.com/lausirisual