2008 Retrophrenia
Metal, Music, Merchantry


Chinese General I
關心妍《最愛Jade.i》

「找到香港主流以外的新歌路」



Pre:
2008 Retrophrenia
The Provenance
Post:
Deem Theater
Chinese General II
謝安琪《Binary》






既劉Sir從事五金業,2008回顧講完電影,跟住輪到metal喇卦?原先計劃的確係,不過臨出街覺得,或者先講中文歌較好,因為流行曲普遍比metal多產,講metal一開左個頭講一年都收唔到口,講晒metal先講番中文歌,果時歌手分分鐘出左(幾隻)新碟,所以先講metal群體眼中的「pop野」、「魚蛋歌」,為免出稿時脫晒節為妙。作此決定,當然仲有其他原因啦,例如上得網多令我開始質疑自己到底識唔識聽metal,因為在香港聽metal質從來唔係要點,眾所週知在香港識唔識得聽metal之指標係識得多唔多band,量凌駕質。論量的話若(懶有原則地)俾錢買音樂而唔download,你全年買落d碟都唔夠求祈一個靚仔一個星期download咁多,邊有得比點夠人拋?我都唔係太好意思咁大聲講metal,怕俾人笑,都係講「魚蛋歌」穩陣。


另因08年整個市場對全球與香港之連帶影響,及一年間本地metal界發生太多事。開場已經講過,2008最唏噓係metal之沉寂與下滑,尤其年中至年底冷靜期,縱持續有大作出現聲勢仍未夠壯大,或多或少反映現代本地樂迷/聽眾對此類音樂熱情大退卻及未夠認真。反觀常俾metal友鬧的串的笑的中文碟、「魚蛋歌」,08年充滿驚喜,聽眾與音樂一同進步,而「唔掂」的主流可以前進時,「正道」metal卻相反再加忽視質之重要性,日益強調潮流效應自願倒退,令我感到最失望最遺憾,搞到而家聽香港K歌帶俾我的歡樂更大於metal。為免被人笑、為自己歡心,從中文歌開始是最正確抉擇。


「講緊中文流行曲,BlackWine《影子》、唐朝《浪漫騎士》同六翼天使《日出東方》本環節冇份,等到講metal時自有分曉。」


四川地震香港賑災主題曲《承諾》,撇除片面歌詞(初時唔係話林夕填咩?),同兩位千金&兩位老前輩兩個低點,綜合近年中文樂壇歌手,一首歌聽出晒近兩三年香港主流樂壇應該聽同需要聽,如側田同方大同,問題係男聲我口味一係正氣熱血一係黑暗邪惡,加上從來唔鍾意香港男歌手歌路,我都知方大同好得、側田唱歌好勁,音樂所累,今年仍然主追女歌手。


一講香港女歌手,你實話我想寫謝安琪,一定會不過更想先提關心妍。2007聽最多中文碟係F.I.R.《愛.歌姬》,2008第一隻聽最多係關心妍《最愛Jade.i》,出碟後兩個月每日最少聽一次,加上比謝安琪《Binary》早出之利,我決定講呢隻碟先。出道起已經好鍾意關心妍把聲同唱功,要靚要感情要高音甚至要有力全部得可塑性極大,不過中間幾隻碟太大路(我最怕跳舞電子pop野),直到《Jade Loves...》先正式開始追,單為jazz到爆《玉石樂隊》、《眼中桃花》名乎其實lead guitar,同本地少見實驗如《蟬》,已經令我間唔中拎出黎回味。可惜跟住《Lost and Found》大失所望,歌平淡、編曲弱,最大缺點在於MIDI味太重,除左音色難頂,《如何離開你》個鼓聽一次講一堆粗口,編曲條友其實識唔識鼓?全碟只聽《指南針》,原版唱同編曲已經殺晒,unplugged版四結他仲精彩,我耳中《指南針》係全碟最強果首,點知派台同MV用唔多鍾意的《如何離開你》。隻碟我當single聽算。同送DVD有得睇音樂電影囉。


前車之鑑《最愛Jade.i》出左全無期望,一聽,極大反彈。首先變番band底,MIDI電子大幅減少,作曲編曲同《Lost and Found》兩個層次,就連歌詞港式還港式質素都比以前優勝(你有幾何見我講香港碟會講歌詞?)。除左尾二三唔算差但過於典型大路,其餘八首全部傑作,點K點pop都覺得好聽,而且有點台式的《I'm OK》原來係關心妍自己作曲(非MCR cover亦非emo,唔好意思)。


「講左好多年:香港樂壇唔係唔得,其實幕後臥虎藏龍,問題在少機會發揮,同幕前實在太唔爭氣。《最愛Jade.i》一次過糾正晒兩個問題。」


可以當成關心妍唱SOLER。天下無敵是《龐貝21世紀》,近年聽過最rock中文流行曲,唔止編同彈得仲唱得出種feel,尤其拍埋其他以「搖滾」為賣點之女歌手甚至男歌手,關心妍第一次唱已經rock過晒佢地,繼何韻詩Mk.1,等左好耐先再有如此真正夠rock中文流行曲。聽完覺得關心妍唱呢種歌路絕對唔難(但有保留,再談),要經過咁多隻碟咁多年先出到一首《龐貝21世紀》,商業顧慮或者太多,始終在香港做歌手,唱得好並非首要、並非重要,亦只有,亦可能哀在要佢呢種有實力但「唔夠紅」之歌手,先可以不顧大方向嘗試各種風格。


同埋《傘子》。鍾意佢夠張力,最特別首歌係投稿作,出碟前搞左個好歌招募比賽,最後SLEEPLESS《傘子》勝出。不眠樂隊咩來頭孤陋寡聞,只知此SLEEPLESS不是以色列dark metal的彼SLEEPLESS(...),但聽完隻碟立即對佢地極大興趣,因為曲詞未有改動全部照用只重新編曲,十分之有料到。原版較為簡單,唱方面覺得硬左少少同高音欠變化,新版經過專業製作立即煥然一新,結他同鼓節奏落得好應好有力,編曲演唱極具戲劇性,難得保留原長四分幾鐘長,即使修飾到美輪美奐,仍然一聽就聽得出同其他歌唔同,始終獨立之感覺係主流所代替唔到、提供唔到 - 同樣,相信又因「唔夠紅」才能成事,其他歌手用同一首歌幾難曲詞不改,先勿談唱(唔易唱架,長氣之餘高音),肯保持咁長唔剪短已經好野。單呢兩首已經值晒隻碟,對我黎講。


關心妍《龐貝21世紀》&《傘子》,劉Sir 2008中文金曲第二三位。」


另鍾意《最愛Jade.i》,仲有唱法繼續多元化、一般K歌歌手永遠忽略的一環:唱歌,唔係只用一種腔一隻聲就夠。同埋唱多番高音。出道時值偶像過於氾濫期,有唱功者立即備受注目,不過香港人*話*欣賞唱功一回事,玩得一兩首就會由讚你有唱功變成彈你成日高音、死嗌爛嗌、賣弄實力,間接導致關心妍過左頭兩三隻碟中期變到超大路,兜兜轉轉而家回歸*話*睇重唱功實力派抬頭,終於唔使收收埋埋。可能聽metal聽得太多,對於唱歌個人比較要求technical,我從來唔覺得佢高音同嗌有咩問題,甚至希望佢可以玩多d,正如謝安琪唔唱《我歌故我在》、《後窗知己》唔攝野海豚音、《3/8》最後段ad-lib冇左,我未必有而家咁鍾意佢囉呵呵。但唯一未夠technical係換氣,本地流行女歌手冇幾多個掌握得到,而個人最怕唱歌每句之間換氣聲出奇地大,嚴重者仲大過唱歌聲i.e.容祖兒,這是我唔太愛聽中文歌原因之一,部份歌明顯執過如《三心人》》《龐貝21世紀》可惜多數歌換氣聲唔理照錄,非常礙耳。聽CD我唔介意你作適當的虛偽架,但另一方面,亦希望唱live見得人,live要同樣唱得夠勁夠多變化先難,做到先可以成為一線頭歌手。全碟感覺關心妍幾玩自己,《傘子》接近未唱過live就預左,真係高音到爆,問題曲《龐貝21世紀》同當年SONATA ARCTICA《Silence》首《Wolf & Raven》一樣,接近冇明顯換氣位一口氣唱成句/成節,加上要非常用力,派台後差唔多出親live都唱呢首,就算已有心理準備仍難以大失所望。唱左大半年當然有進步,但CD實在執到太完美,無論點改善,單換氣一項已經露晒餡。


新碟所得評價遠超之前幾隻,加上路線獨特而聲底配合,如果可以出到一隻碟首首《龐貝21世紀》,擺明車馬走「Rock女」路線就更perfect,開演唱會時亦一定high爆。唔係唔得丫,現在的市場接受力同歌手實力?當然唱現場之負擔係更大憂慮因素。講開現場,08年又話十月會有紅館演唱會點知不了了之,09紅館裝修完重開已經冇晒聲氣。咁多年都未睇過佢演唱會,幾時先有機會?見佢有實力但紅唔起、冇人捧,唔好話開紅館,有得開演唱會我已經好開心矣。但有時我又寧願佢好似而家噉繼續「唔夠紅」,因為唔紅唱片公司至肯俾你試,試成左一紅起黎歌路就會有限制,例如謝安琪




Pre:
2008 Retrophrenia
The Provenance
Post:
Deem Theater
Chinese General II
謝安琪《Binary》




Sir個網
lau-sir.com

Sirblog
http://hk.myblog.yahoo.com/lausirisual