2008 Retrophrenia
Metal, Music, Merchantry


Chinese General VII
Beneath Beyond

「香港band壇主角去左邊?」



Pre:
2008 Retrophrenia
The Provenance
Post:
Chinese General VI
MR.《Mister》
Chinese General VIII
VEGA《The VEGA》




冇乜必要再講BEYOND對全球華人地區影響及貢獻有幾大,同黃家駒離開之後,如何令樂隊本身同香港音樂發展急轉直下。


「看吧。」


唔覺唔覺,黃家駒已經走左十五年,BEYOND亦已到第二十五週年,所以2008年意義相當重大,向BEYOND、向黃家駒致敬之產品及演出連串出現,音樂界具規模者,可算是黃家強召集之「別了家駒十五載:海闊天空音樂會」,同謝安琪重唱BEYOND致敬演唱會「拉闊變奏廳」。


作為黃家駒胞弟,黃家強今年籌辦多個活動追思,以「別了家駒十五載」先後舉行過座談會同收藏品展覽,重頭戲是6月10日黃家駒生日舉行之《海闊天空音樂會》,搵黎多個本地著名歌手及獨立單位演譯昔日金曲。因為時間就唔到,去唔到睇現場,初時以為錯過不可再,好在冇幾耐就有CD。可能我悲觀,當初我真係冇諗過呢場show會搵到公司資助出CD同DVD。





CD封面大大個黃伊汶(有心定無意?),包裝平平無奇,內裡靚夾硬淨,但外面軟紙盒相反簡陋加唔襟,買到返黎開左幾次,第二日已經殘晒,對此包裝我相當不滿,內容也是。今場演唱會由黃家強主辦,而非BEYOND,可能因此黃家強獨唱近一半歌,再有幾首佢同其他人合作演出。只係黃家強唱功一向唔算突出,而且現場狀態相當不穩,由佢唱咁多歌絕非好事。加上既非BEYOND演出,其他客串單位方為主角,想聽係其他人點樣用自己風格去玩去唱BEYOND,而家佢霸左過半時間,相對削弱今次音樂會吸引力。


大部份歌同原版相差不太遠,嘉賓列包括周國賢、太極同KOLOR可見以搖滾為主,不過前兩者未如理想,一向覺得周國賢水準未夠,太極亦玩唔出應有力度,反而KOLOR《永遠等待》好有氣勢,雖然佢地隻碟有點失望,現場睇過咁多次都覺得精彩,KOLOR始終屬於舞台。SOLER本身已具魅力及唱功一樣成功,全場最耐人尋味者,則數林一峰同AT17,因為風格最迴異,林一峰版《喜歡你》唱同玩出新意思,但跟住AT17將原來funk rock之《爸爸媽媽》改到又迷又飄特別卻有點迷惘,好在再搭林一峰加黃家強《真的愛你》,發揮番佢地最強本色:和聲。可能一心希望參加單位會將原曲改頭換面至耳目一新,而家忠於原著演出卻未達標,掃興之意不絕。


就連難得同台之三子自己都唔太爭氣。講過多年黎仍未懂欣賞黃家強唱功,《Long Way Without Friends》扮到足家駒(唱英文關係?),其他時間可以好唔穩定,揀《衝上雲霄》同黃家駒「對唱」更加異常古怪,論共鳴同效果,數極未到呢首。葉世榮一樣現場失準,今次只獨唱《光輝歲月》一首,聽完嘆句「好在只得一首」。黃貫中亦冇咁好火。全世界等待,都係埋尾BEYOND再聚唱《海闊天空》,但年華過去已經兩回事矣,尤其最後solo玩到完全唔夾首歌糟蹋晒。聽得好灰。


對比現場同唱片曲目,明顯因為廠牌問題,有幾首歌出唔到街,好似同年推出之《弦續 別了家駒15載》未發行作曲集,有兩首歌CD入面搵唔到;同樣黃耀明唱左兩首,相信因為英皇關係一樣唔見。最慘黃耀明唔止唱得好,佢兩首《情人》《農民》都係我超鍾意BEYOND街,特別後者係連BEYOND自己現場都冇乜玩過之遺珠經典,綜合全場,相信最能令我滿意只有黃耀明兩首,點知兩首聽碟都冇。難免大失所望。


評價相當一面倒,可能期望太高卦,除左KOLOR、SOLER、林一峰+AT17,全碟冇太多時候令我感動(黃耀明呀《農民》呀唉)。但對於BEYOND,身為香港人的我們就是盲目的,就算唔好唔出色照樣支持,因其成就及地位。所以仍舊去聽去買。意義重於音樂性。





謝安琪一場反而有睇頭得多。903向來鍾意玩crossover,兩/幾個歌手同台互唱人地歌,又或如今次現在歌手唱過去歌手,903拉闊往往好聽好睇,因為新意嘛。今場謝安琪演唱會開宗明義向BEYOND致敬,當然作為一個流行歌手,就算紅透半邊天,只唱舊歌唔唱自己歌照樣死硬,所以BEYOND歌同Kay歌大約六四比。但單女聲唱男聲、pop歌手唱rock歌,同冇BEYOND成員身份包袱,好多野任自己改唔需要跟原著,《拉闊變奏廳》可塑性同娛樂性絕對更高。


兩場比起,903拉闊選曲從知名度出發,唔會似黃家強一場按自己喜好所選,未必首首全部人聽過或有共鳴。特別在玩左幾首medley,玩&改得仲好過BEYOND自己2000年同樣玩medley之「告別演唱會」。叫得做cover BEYOND就自然玩到好rock,《爸爸媽媽》出乎意料地熱鬧,就連原來K到爆的《鍾無豔》都改到成首《Highway Star》噉款勁好玩。發揮最大反而係慢歌部份,重點必定揀中間連串unplugged/soft rock:《大地+長城》《遙望+早班火車》《海闊天空》《我歌故我在》《菲情歌》《愁人節》,全部都係BEYOND同謝安琪首本名作,同最重要一樣:《海闊天空》冇失禮大家,還要是全場唱得最好。多謝。


可惜後三分一比較失望,《爸爸媽媽》起踩到最後都係rock歌,可惜冇預期中爆搞到後勁不繼。可能隊band未夠放?因周博賢關係,今場樂手有與謝安琪同屬Ban Ban Music之英師傅同J.O.Y.,英師傅聽完佢隻碟真係好鬼正,今場做band leader加音樂總監,諗住會rock加玩野加多結他,但出到黎編曲同技術未算多野聽,而全隊最唔鍾意係鼓手、session常客Johnny Boy,擺明留力留到出晒面。J.O.Y.三位玩得最有台型,尤其keyboard一段solo盡顯大將之風,不過雙女和音始終唔夠搶,部份恆歌聽落好怪。主角謝安琪都係令後段失色一個因素。


出道起謝安琪已被全人類睇實,皆因久未出現有靚聲有感情有唱功之實力派歌手,時勢造英雄。把聲變化度高、音域廣、夠力夠厚,出道以黎唱盡不同曲風,不過搖滾以前比較近英倫同現代派,今場BEYOND試真正力量型,聲底夠但唱唔出其中激情,第一首medley已經上唔到,去到最後搵埋黃家強合唱《我是憤怒》做encore,更加被遮晒似和音多過主唱。當初謝安琪帶俾我極大感動、驚喜,剛出仍是最好的《K sus2》時,有幸新世紀睇到佢一場簡短商場show,簡直比CD有過之而無不及,《我歌故我在》冇走音加玩ad lib玩得高音過CD都得,再睇埋《The First Day》演唱會,心目中佢已經係現今香港樂壇最佳女歌手,實力最高峰時,咩都唱到咩都難唔到佢。會唔會係狀態不如前?《The First Day》後隱退產子,半年過去復出再黎《Binary》,現場已經冇以前咁穩定,聲線都有點沙,走音撻Q慘況更加時常出現,生仔前後兩番氣象。今場頭幾首可以用大失水準去形容,連唱腔都未掌握得到,恆位唔夠實,靜位一時想唱柔聲一時R&B變黎變去,去到後來先轉好,開始時未熱好身?更似進入主流過渡期間未決定應該用邊種唱腔。高音確冇以前咁游刃有餘,聽《我歌故我在》上得相當夾硬,《後窗知己》《3/8》兩首高音金曲竟然冇唱,型住海豚音神話不再。一年間,唔明點解可以如此遜色。


聽完隻碟,仲有得睇。唱片公司相當有策略。先出CD版,旋買。隔兩個禮拜再出VCD,係唔出DVD,我忍。再隔兩個禮拜,DVD出現了,再買。香港歌手以前出live,有幾可噉出法架?擺明就係有市場而個別谷銷量,一出即出DVD仲邊個買CD同VCD?講過音樂,DVD只講講睇方面。近年香港好興出特別版、「加印版」、「慶功版」,《Binary》賣得咁好加大公司出品好難例外,初時擔心過係咪又要買多隻?《The First Day》特別版送成場live喎大佬!當然係發夢啦,現在的謝安琪再唱BEYOND,大把傻仔i.e.我義無反顧俾錢,仲似以前咁益你有錢唔賺?新版只送幾個MV(YouTube出現後,呢d野而家有都唔多恨),同演唱會精華片段。雖然表現欠佳,隊band玩live相當高興所以隻DVD幾好睇,支持埋俾佢昆多鑊啦。只係要分開兩隻買就覺得有點麻煩。metal band出live,好多label除左CD同DVD,鍾意出CD+DVD特別版/限量版,通常我好樂意買呢種套裝,有得睇之餘有得聽,畢竟唔係成日咁得閒坐低對住部電視。但未見過有香港流行碟、香港pop野會出CD+DVD套裝,即使分開買價錢仲平過二合一,彌補唔到紀念性同方便嘛。可惜市場不容矣。



今年較具規模之有關BEYOND演唱會,最少有以上兩場。BEYOND呢?點解反而主角自己冇份?既值樂隊廿五週年,又講到「BEYOND再辦演唱會唔係冇機會」,點解反而有人地玩冇自己玩?單藉黃家強自己搞一場,三子上台合唱《海闊天空》(又玩得唔好),就叫團圓、紀念?何解而家BEYOND會搞到咁貌合神離?這意義重大一年,更令人傷感。




Pre:
2008 Retrophrenia
The Provenance
Post:
Chinese General VI
MR.《Mister》
Chinese General VIII
VEGA《The VEGA》




Sir個網
lau-sir.com

Sirblog
http://hk.myblog.yahoo.com/lausirisual