劉Sir的童年好灰暗架，好多正常後生仔玩意、行為，佢都冇做過，例如我從來未追過（女明）星，未試過因為鍾意一個（女）明星 － 不論歌手、演員、靚女 － 特登俾可能好大舊的錢去買佢ｄ書、碟同寫真集。年少的十幾年，是一片空白。

「唉。講著講著，諗番起都有ｄ想喊添。」

在21/3/09這個星期六，收到AV興急電。話說佢而家係音響工程師，最常做就係商場show，上次撞到狄易達＆JJ，今次一知道Theresa去表演，立即第一件事打俾劉Sir：

「Theresa簽名碟，想唔想要？」

呢ｄ野真係咁大個仔都未試過喎。好，就襯今次填補番童年真空期其中一個窿先。（其中一個 = 1/77,777 ）

「好正呀！！！」

AV興見到隻碟個封面，再同Theresa真人近距離接觸，當堂唔想俾隻碟劉Sir。聽佢講Theresa人前好nice，不過得到個簽名，過程都幾艱辛。初時想隻碟寫「To: 劉Sir」，自然不解，問：

「劉Sir？邊個劉Sir呀？」

「呢！前排多用途室玩到全香港都識佢果個劉Sir呢！佢係我偶像黎架！」

「變態！！」

搞到死都唔肯簽「To: 劉Sir」，最後簽左個名就算。

隻碟黑膠咁大，點知原來EP黎，得五首歌。

「EP咋喎，幾錢呀？」

「頂！咁貴？我以為九十蚊有找添！」

灰。故事教訓我地都唔係唔好追星。一唔覺意就陷家蕩產。

聽只得EP，送多隻DVD，叫做抵番ｄ噉囉。但當然，會買呢隻碟or Theresa任何一隻碟的麻甩佬／仔，都係為左睇嗟 － 可能除左我，我純粹為貪過癮，騎騎∼我真係好認真噉聽晒隻碟架。先睇睇隻DVD，重點是《Before My Dearest》這個二十分鐘愛情故事，事實證明我童年一片空白是抵死的，睇晒四個字，評語只得「好無聊」同「冇演技」同「好悶」，不過想睇囡囡都OK的。另跟三個MV，包括左隻EP五分之三，音樂底唔使講相當行貨K歌，唱把聲嫩左少少，唔夠氣，高音弱，相信你去K房十個有最少七個唔會差得過佢（這就是K歌及K歌歌手的存在意義嘛）。睇過佢唱live再睇睇MV，覺得執得好勁，把聲根本唔似畫面中同一個人發出，就係執到咁假，問題係連CD都已經唱到相當危危乎．．．反而冇派台／冇MV兩首先有野聽，《太想愛》玩中樂加R&B相當F.I.R.（當然唱除外），小品情歌《她的小小愛情》好八十年代，唔止曲好唱亦叫入得耳，算全碟最好＆合格一首。不過五首歌已經唔多，仲要只得一首真正叫做寫同唱得好，就極度牙煙．．．

「噉係你戇居嗟！隻碟買返黎，就梗係為睇架啦！」

先黎兩張黑膠塊套尺寸海報，已經有四張大靚相，其中一張仲可以中間拉開做長拉畫。夠未先？未夠？仲有！

一開六巨型海報，俾晒兩面你，要橫擺得，要直放又得。全隻碟最值錢，其實係呢張海報呀！多相又要乜尺寸都有加要幾大有幾大，開唔開心先？咩話？屋企唔夠位放？

知你屋企唔夠大，仲有細細本選擇，兩張明信片之餘再多本小小相集，等你可以坐定定慢慢揭。揭揭下癮起，想唱唱Theresaｄ歌？都得！唱片公司夠晒招呼周到，噉都顧及埋！

呢ｄ野，試一次就夠。噉梗係謝安琪除外，如果有機會撞到謝安琪，要我立即買晒佢咁多隻碟全新俾佢簽名都制！

「阿興爺，你幾時接到謝安琪ｄproject做呀？」