Marco走了


自從家犬09年中秋3/10突然中風住左院一個禮拜,最後始終唔捨得,決定帶佢返屋企一齊。雖然中風後遺唔能夠企起身只可以攤地下,返到屋企環境唔同心境都唔同,開朗番晒康復得好好。而佢最鍾意,就係訓劉Sir個肥肚腩陪佢打Diablo:



「劉Sir終於肥得有意義了。」


要照顧佢唔算非常麻煩,只係慣左晝伏夜出,夜晚大家訓覺時兩三點到佢起身,隔一陣就吠醒你到第二朝先訓番,同成日唔明自己行唔到路,訓地下都要游乾水磨到自己手手腳腳損晒流晒血,慣左同花多d時間去睇實佢,就冇乜野大問題。冇預過佢行得番路企得番起身,但可以好似以前開開心心生活落去,大家唔介意辛苦少少。


不過每次隻狗出事都係全無先兆。幾日前仲好正常,跟住夜晚吠多左郁多左,心跳喘氣得好密又肚屙,抽筋扯到恆晒或成隻狗突然冇晒力軟晒都試過,甚至有日「假死」搞極唔醒唔郁以為走左,幾個字之後先醒番。到21/11星期六,惡化得嚴重:



成隻狗冇晒力,手手腳腳仲好凍,跟住係噉嘔,之前餵落d瘦肉一粒粒嘔番晒出黎,唯一可以做到係用針筒打葡萄糖水入佢個口。間唔中後腳撐幾撐同勁大聲吠,平時噉樣做即係想屙,而家屙都冇得屙,因為連飲水食野都冇力之餘嘔到冇晒野屙,養左佢差唔多七年,以前想佢出句聲都難,未試過有呢日吠得咁大聲,最慘佢吠得咁犀利又唔知佢咩事,只知一定係重病有事,加上可以成日眼光光完全冇訓過覺,都知佢情況好嚴重,特登通宵唔訓覺陪佢成晚睇實佢,諗住第二朝帶佢去睇醫生。點知...



七八點安撫到佢肯靜靜地,訓隔籬梳化陪佢,十二點幾起身,原來已經走左,之前一日咁精神吠得咁犀利,可能係迴光反照。寵物走左你唔會話大鑼大鼓同佢驗屍,點解走永遠唔會知道,可能係再中風,可能係心臟病,又可能步Jimi Hendrix後塵嘔到窒息,不過希望係舒舒服服自然走,因為十六歲其實已經時日無多,只要可以陪佢多一日得一日 - 而家叫陪多佢近兩個月 - 同唔走得辛苦大家已經好開心。


除左以前中三讀Bio同去街市,成世人第一次正式有條真正屍體係自己面前,原來一隻生物死左,會全身肌肉僵晒,同對眼真係睇得出冇晒靈氣。上網搵電話搵幫手善終,個半鐘後師傅上黎,因為隻狗中風之後成日好似隻燒豬噉撻落地下,拎起佢時硬到成塊餅噉成隻狗抽起仲係大字形,入唔到師傅帶黎個籃之餘走得唔好睇,就同師傅一齊幫隻狗按摩整軟手手腳腳等佢訓番好d,遺憾在佢條頸側左去一邊擺唔番正,同最後開住眼走。


"R.I.P., Marco."