「話說呢日我去左大陸買動畫soundtrack黑膠俾自己．．．呀係幫我舖頭入貨至係，
執完貨之後去左深圳個朋友度玩，我都冇預過架！
我起初都以為佢住細細間單位仔，點知黎到先知，原來單位仔呢樣野，得我地香港人住！
而家大陸人閒閒地都住豪宅架喇！」
「一去到佢個屋苑，嘩！死！大到我都唔知點行蕩失路！」
「一望無際之複式別墅單位，嘩行邊一邊至好？」
「呢邊盡頭似多ｄ樓喎！就行呢邊啦！」
「嘩好似去左歐洲ｄ鎮仔噉！同去外國住完全一樣！
仲有大量名車喎！等我坐番間兜下風啦！」
「雖然咁豪，但成個屋苑大概只有一個足球場咁大，
分開一百間屋都唔夠，密度低唔多人又唔迫。
係呀好細架咋，其實兜風唔使搭車行路都得架！坐黎過下富豪癮遮！」
「落車之後，黎到呢個歐陸式花園，如此美景香港邊度搵到呀？
後面兩座風車係小食亭黎架！係呀賣薯片都賣到咁豪咁荷蘭呀！」
「仲有呢個威尼斯水都式設計園林景色！你香港搵俾我睇！」
「怒豪！靚景！渡假村呢度根本就係！」
「做得渡假村水準叫得做豪宅區，又點少得club house呢家野呀？」
「有呢個官廷式游泳池！睇真ｄ，ｄ水係由中間最上面果個水池流入個泳池度架！」
「唔鍾意游室外水？冬天游水嫌凍？得！呢個羅馬浴池式設計室內泳池，得唔得先？」
「穿過唔知幾多景點同場所，終於黎到朋友屋企門口喇！
我同你一樣，第一次黎到都問佢，『個門口係邊？』
佢話，『到架喇！不過入去我屋企之前，睇睇門口呢棵樹先啦！』
就噉睇相你唔會知，其實我影果時，係要企到廿幾米以外影，
因為實物係大棵到要三個人先攬得晒咁粗！
我朋友話，單係搬呢棵樹黎佢屋企門口，都要成三萬！呢三萬只係搬運費咋喎！
而家木價咁貴，呢棵仲要係生勾勾老樹，價錢自然更高啦！
我冇問過，不過我估呢棵樹起碼使左十萬！」
「仲未到！想入佢屋企，仲要穿過呢個森林 － 冇錯呢個森林係佢屋企前園黎！見到度門未？」
「我地終於到達目的地喇！踏入呢度門，就可以見識到我朋友間四千尺豪宅！
四千尺係點豪法？好豪架真係，豪到，我都顧住睇唔記得影相！
睇下坐下就一日要返黎香港，但係由深圳佢間豪宅返黎都只係個零鐘，
同我香港返屋企差唔多，只係貴少少同要過關遮！」
「又靚景又多設施，呢間四千尺豪宅，你估下幾錢？
三百萬唔使！二百萬唔使！只係收你 一百八十萬！
喂！其實真係唔係貴喎！同一個價錢，香港夠你買個單位仔咋！
你住香港一個月供幾千蚊萬幾蚊，個單位可能先得劉Sir間舖咁細，
但同樣每月供相同價錢，你去大陸已經可以買得起呢間豪宅喇！
仲有喎！大陸生活費平過香港好多喎！買野平食又平十零蚊就食到餐好飯，
而家我地食餐新明威都廿蚊啦！」
「老實講，我地仲住係香港、仲留係香港捱，做乜？」