吾美行:拉斯維加斯2008


每年五月,例牌要過美國走一轉,假如間公司未執笠、假如我未俾人炒。逢五月第二個星期,美國都會搞個國際性的Hardware Show,前年第一次去,目的地拉斯維加斯;上年目的地轉左,因為場館裝修,舉辦地點改到奧蘭多。今年2008係第三次去,好開心,因為回歸拉斯維加斯,雖然奧蘭多舒服又靚,但個城係渡假區乜都冇,十分地悶,展覽完左我又冇得留低去迪士尼同環球片場喎,拉斯維加斯起碼叫做賭城,冇得玩都多d野見識。出發前,先提醒大家:


臨走前,劉Sir留低左好多禮物!

記得唔好錯過
《明周》與TRHK劉Sir一談:A Moment of Clarity!




4/5/2008 SUN

次次去美國都衰一樣野:雖然上機時間唔係早,好似今次十二點半飛,但要三個鐘前check in,搭車入機場又耐,十二點幾上機等於要七八點出門口,仲早過起身返工。不過早起身係冇好報的。禮拜日仲要晨咁早,點計都唔係繁忙時間唔會多人多車,平時九個字個零鐘巴士出到機場,今日可以坐足個半鐘十點幾先到,好在,老細只係早我少少!
「死,遲到左,會唔會冇得check in?」
結果發現,梗係唔會。早知就唔咁早起身訓多個鐘好過。早三個鐘到係非常無聊的事,check in手續三個字唔使搞掂,跟住兩個幾鐘唔知做乜,唯有機場周圍走。第一件事當然係食早餐。已經第三年幫襯大力水手,即係唔係唔想食其他,閘口入面food court其實超多野食中餐西餐日式都有,而大力水手隔籬就係Burger King,點解就係要俾錢佢地賺,雖然對Burger King印象良好?一個早餐唔算太貴(機場內黎講)又幾好食,同食之餘真係有個電視播Popeye卡通片(我真係以為佢地掛件大力水手頭賣豬柳漢堡架本來),出面又搵唔到,加上第一年就係食佢地,好頭好尾卦,咪支持下囉。食完十一點幾開始起行,以前登機廿幾號閘,今次六十五號,首次去到機場最深處,原來勁大而家先知,仲要越入越多野睇,入口果頭好似地鐵站得幾間地舖仔,點知越行得入,後面大到百貨公司噉款加超勁多人。可惜,
「都冇變形金剛!挑!!!」


六十幾號閘去到機場最尾,食完野行到過去已經差唔多夠鐘咁誇張,從來唔知道原來機場咁大。準時12:35起飛,滿心歡喜地迎接,你知我幾鍾意搭飛機同食飛機餐啦!只係,越搭越唔對路。三年三次飛機,一次比一次唔掂,06老細出錢搭國泰,正到爆呀真係好食好坐好訓;07跟番團搭美國大陸航空,一程機超正、一程機唔得;睇錢份上今年自然繼續跟大隊啦,點知美國大陸冇左,變左聯合。一上到機已經灰:
「頂!冇戲睇!」
係舊式客機十幾行一齊睇一個投映螢幕同幾部仲細過閉路電視果種電視,我坐中排,即係坐低已經俾前面人牆遮左半個螢幕唔使睇,好在播得四套戲,雖然算新但除《National Treasure》同《Jumper》其他完全係唔睇冇損失果種,加上一來睇唔到二來只播一次冇重播,算。d位又要窄,check in時老細同counter姐姐對話內容如下:
老細:「你地d飛機唔掂喎!出晒名窄!」
姐姐:「真係好窄!我自己坐都嫌唔夠位」
老細:「噉點搞法呀?仲要坐十幾個鐘!」
姐姐:「如果加九百八十蚊upgrade商務客位,咪俾多五寸你囉!」

上到飛機睇過,九百八十蚊果五寸,即係一寸$196,加左同唔加,係冇乜大分別的。d位真係迫到死人。然後,發現機上空姐接近零,舉目只見空佬,又起飛前實會講解一下各種逃生裝備同途徑,人地飛機每人一個芒播帶搞掂,聯合呢,係每個空佬拎晒d安全帶救生衣同你live示範old-school到爆,只係這種old-school同人地new-school相比,樣衰好多囉。就連飛機餐都完全欠缺吸引力,乜都冇連食都唔掂超唔開心,一上到機即訓,第一餐飛機餐我都廢事食。冇戲睇都要搵d消遣,好在仲有歌聽,飛機電台有十幾個channel,分得都幾仔細,聽rock有個專播六七十年代舊歌,當年的迷幻、art/progressive同classic rock好正,訓低聽PINK FLOYD一流,另一個專播新歌,九幾年到而家都有,聽完舊野聽新野,拍埋即時聽得出近代真係冇味道好多,九幾頭grunge還有聽頭如SMASHING PUMPKINS(我最愛grunge band,算alternative/art pop啦其實),九幾中post-grunge起,實在平淡好多,到近年開始玩番轉頭去九幾頭d老土野,音樂性先至高番。聽rock聽到悶,仲有個new age台,jazz blues classical就梗係會有,呢d時間聽呢d野好有mood,特別鍾意聽古典結他同豎琴。只係用飛機椅套音響聽呢d靚聲野,死晒,飛機俾你果對headphone係連邊隻左邊隻右都冇寫的鴨寮街十幾蚊對貨色,漏音細聲又拆到爆聽唔清楚,難怪話送埋俾你落機唔使還,最後要出動自己對私伙先搞得掂聽得入耳。唔係拆到聽住黎訓覺都有難度。


冇乜好做唯有勁訓,訓醒夠鐘食第二餐。香港去美國長程機分三餐食,上機兩三個鐘先食一餐正餐,再過五六個鐘左右一餐「輕膳」,臨落機前一個鐘再黎個正餐。聯合的「輕膳」係杯麵一個、完全唔Chinese的Chinese Noodles。
「你呃到鬼佬,呃唔到我!」
人地國泰杯麵係合味道,仲要係你叫就俾任食,「輕膳」係真正一餐下午茶式小食,有包or餅食仲有雪糕送食完一次再encore,對比今次「Chinese Noodles」,好灰喎搞到我。只好繼續訓。邊訓邊聽歌,無聊得滯轉左去兒童台,膳稿話係「全美國最多家長同小朋友聽的電台」,好似好勁喎!專播兒歌,而美國的兒歌乜叉都有,木結他到rock到trance勁多元化,嘩勁喎而家d細路細細個就聽得咁癲!香港d低B到爆「兒歌」簡單冇得比!(本地兒歌只追《小老鼠與大花貓》同《Guillver Boy》,因為兩首都係metal野,前者係gothic metal,後者係power metal。仲有首《阿花的故事》,好doom metal)。有首歌連聽左幾次,點解咁記得?因為個intro超hardcore,入到正歌係首punk野黎,成班人不斷狂嗌

We are the Kids
of the Future!
嘩好Qhardcore音樂歌詞都係,聽到我打冷震。唔怪得hardcore外國咁多年都係咁盛行啦,細細個已經教緊各位小朋友入教,計劃長遠。
「噉metal呢?」
唔好意思,兒歌雖然乜style都有,連punk同hardcore都有,就係冇metal。metal對各位細路同家長黎講,太邪惡了,都是hardcore正氣好。


聽到我都就黎成為Kid of the Future之後,終於夠鐘食第二餐正餐。通常都係一中一西地俾你揀,中餐係雞肉炒麵,賣相完全唔得,迫住要食西餐奄列乙個,頂佢十分難食,我已經係好犯賤地鍾意食飛機餐果種人,都接受唔到都冇encore食多個,聯合的飛機餐真係收得皮。朝早十一點八即係你地香港夜晚兩點八,到洛杉磯喇。
「點解次次去美國,都係先到洛杉磯再轉機?」
「因為呢個係入境關口,老屈你的。」

一落機機場勁大風,扯恆晒十四度超勁涼爽我鍾意。下班機十二點半飛,其實咁遲落機都幾危,大佬閘口相隔甚遠仲要等埋行李先過得,
「一唔覺意好似上年趕唔切轉機又有免費酒店住都唔奇!」
可能聽到劉Sir投訴,得番半個鐘唔夠的時候,有個地勤走上黎問邊個趕上機,即時開條打尖快線俾大家,結果由趕唔切變成去到下個閘口仲有幾個字頹。
「相信真係接到劉Sir上年的投訴而作出改進。你知條友幾煩架啦!今年都唔改,再俾佢唱成世咪大劑?」




由遲到變早到,等上機前夕,睇睇玩具先。
玩具角係正我等上機隔籬。夠晒就腳。




變形金剛已經冇乜喇,要同恐龍戰隊一齊。
我仲未買到搵左好耐果隻Xbox手掣變猩猩呀嗚嗚。




「現在,《賽車小英雄》才是皇道。



只係今年開快線分別查實唔太大,因為內陸機永遠冇國際航班咁準時,埋到去坐左陣,已經收到通知班機遲半個鐘先飛,上到去坐左半個鐘部機仲未郁,加加埋埋比原定時間遲左個幾鐘先正式起飛。原因除左內陸機例遲(航班頻密爭跑道卦,人地飛機場有我地的士站咁大流量),上行李慢到死,我坐窗口位有得睇隔籬架飛機點樣上行李法,條運輸帶慢到接近唔郁,即係你自己單手拉件行李上機仲快過佢,人手只得運輸帶兩頭各一個工人抬(正確的動詞係掟),大家坐定晒都有排等。仲有個原因,就係要多謝我們祖國的民族意識,每次總有幾個遲報到,好多時候要大家等埋幾位祖國同胞先開得機。
「加加埋埋,咪遲好多囉!」
但係我仲開心。內陸機不知何解,首先服務好幾倍,又要先進喎有番電視機睇唔使望大銀幕,唔使睇住班空姐空佬教你點著救生衣先,雖然好有娛樂性!個位仲要非常闊落,唔使加多九百八十蚊都有多十寸以上空間!即時拉直成個人,未起飛已經訓左,落機先迫住要起身,但完全唔夠喉,頭先十二個鐘機都冇呢個幾鐘訓得咁舒服,可惜太少!!!


假使按照時間表冇遲,十二點半起到飛,一點半已經拎到行李走人,而家遲足個半鐘三點先正式走得,不過搞掂晒仲要坐機場,因為臨去酒店前老細要見見一個客。內陸機例遲,我地遲左個半鐘,個客本身班機仲遲過我地,相信冇乜可能會比我地早到,想再訓,點知訓得多得滯,一坐低,死,暈暈地添之前十幾個鐘訓到。唯有周圍行浪費時間。機場同兩年前一模一樣見慣見熟,除左廣告唔同之外,需知賭城幾多節目幾多野玩。




BLUE MAN GROUP去威尼斯人出live呀!
「我想睇呀!!!」
同期仲有DURAN DURAN呀!灰!!



差唔多四點,終於見到個客。第一件事,大家走去租架車先。美國乜都要大,機場自然都係,落機要搭火車去拎行李,去行李區隔籬停車場租車都要搭巴士咁遠。今程巴士已經話你聽點解我鍾意美國:司機係個黑鬼,話係巴士司機,但玩到好似節目主持人噉:
司機:「各位,仲有半分鐘就到站喇,開唔開心先?」
各位:「開心!」
司機:「拿,停車之後大家快手快腳拎行李落車,好唔好先?」
大家:「好!」
司機:「你地係咪會遵守規則拎行李,唔會爭先恐後阻住其他人落車同阻住我收工?」
我地:「係!」
司機:「係就好喇!你班友仔記得認清楚行李先拎,唔好拎錯人地d野呀知唔知道?」
班友:「知道!」

笑到我仆街,難得在司機夠癲之餘,班乘客同佢一齊癲,搭左廿幾年車,我第一次試過搭車可以搭得咁開心,真係似去左錄影廠多過坐緊巴士。換著香港一定唔會發生,唔好話唔會有呢d司機,就算真係有司機會噉玩法,班乘客肯定小九佢當佢白痴仔都唔同佢一齊喪!
「所以點解香港(人)咁悶。生活文化已經唔同!」


美國地方大,冇部車徬身好唔方便加嚴重浪費金錢,上年唔租車晚晚同其他人搭的士,一程已經十幾廿蚊美金、一晚搭兩三程,三四個人分幾係野架。雖然租架車唔係點平,
「一個人攬近五十蚊美金一日喎!」(「人」只包括老細冇我份唔好意思)
未包油費喎車租同保險,油而家貴到飛天呀。不過自己有車想幾時出門都得,鍾意邊個地點去先去後點兜都冇問題(「兜」通常係因為唔識路而蕩失路),同買完野或去食飯部車可以當儲物櫃,又唔使驚夜得滯或者偏僻過頭截唔到的士(我老細試過,結果抽住幾袋野行左兩個鐘返酒店,自此見過鬼怕黑),最重要坐得舒舒服服,我指作為乘客的我。所以我絕對支持老細唔搭的士租車的決定。


簽晒文件揀定部車,四點半鐘終於起行返酒店喇。出面氣溫係洛杉磯炒雙廿八度,香港呢個溫度算係涼爽舒服,但拉斯維加斯係沙漠中間開闢個市區兼旅遊區出黎(為(搵)錢,人可以改變一切),雖然空曠有風,同氣候乾燥熱得黎唔算辛苦,但係個天冇雲曬到正好鬼慘。更加慘係出發時俾租車婆老點,我地酒店要上高速公路向西行,佢點左向東,要知道美國一條公路兩個停車點中間可以有半條彌敦道咁長,又唔知定,再發現架車原來交俾我地時冇油,好在搵到個油站,唔係可以好似睇戲噉停架車去公路側邊等人黎救截順風車。單噉樣去錯左個鎮另一頭同搵酒站,已經冇左半個幾鐘。點知油站師傅教路,兩三個字就返到酒店。吹到脹晒。




「我返黎喇!Mardi Gras!」
住番前年同一間酒店,十分滿意,除鍾意在間房好住,
仲令我諗起我最愛doom metal band MAR DE GRISES。




前年住南面,今年住北面,但間房係完全一樣的。
所以懶影相,自己摷番前年張相睇喇,呵呵。



check in好入到酒店房,開始傾生意。
「原來個客真係黎同我地傾生意?」
佢住第二個州,即日搭內陸機來回就係為同老細傾三四個字2008&2009合作計劃。起初見佢一路只係跟住我地、幫我地拖行李截車租車,仲以為佢係黎幫我地做工人添!近六點入到房,六點三四個客趕飛機走人(佢今轉內陸機,十分無聊喎!),當然係我地「順路」兜埋佢去機場啦,頭先蕩失路的好處,係睇定機場附近超市條路點走,送走左個客,就可以立即兜埋去超市睇睇買野。可惜今晚都係買公司野。




Home Depot,中文學名家得寶,百份百傢俱。
即係,悶。ZZZZZ...




Walmart,中文學名沃爾瑪,全美最大連鎖超市。
即係巨大化惠康,不過冇好野食又冇正玩具,灰。



七點幾行完又到搵路時間,可以坐多幾倍時間車個幾鐘先返到酒店果頭,因為d路太蹺蹊,多地方明明前面就係或者轉個彎就到,行到去燈位先俾個牌你話唔可以轉彎or只可以轉某個方向,總之唔俾你直到要兜多幾個圈行多幾條路先去得到,又要好多陰濕位,成日一條直路行行下無端端叫你轉彎,跟住佢講轉啦,點知一轉入左間酒店,原來係酒店d賤格招數屈你入去,搵路出返黎已經去左第二度。d路亂成噉,有地圖都冇用。搵笨的。
「我冇所謂,當沿路觀光。好在我唔係開車果位!」


八點九終於去番酒店果頭,出現另一個問題:食乜好?已經好夜,美國佬七八點已經收檔(真幸福),加上我間酒店果頭係窮區冇野好食,老細唔食得太美國d野(個個劉Sir咩),只好經過市集區就停車,冇檔口開或者冇野好食上番車繼續搵。有間韓燒超正,勁靚果隻!只係睇睇餐牌,食個燒肥牛都可以收你六十幾蚊美金(...不過賣相真係好吸引同好大盤的),兩條友埋單收到你幾舊水絕對唔奇(美元呀講緊),老細肯咩?結果去韓燒隔籬間日本壽司吧,通宵營業。野食唔得(心得:去鬼佬地方,千祈唔好食亞洲菜,保證你食唔出係亞洲出品),不過
「在場囡囡質素同食物完全成反比!」
順便,講講在美國的囡囡見聞。對美國民族歷史冇乜研究過,但拉斯維加斯可以搵到大量疑似越南同東南亞地區亞洲人,而且睇落仲幾有米,同唔知點解外國長大的亞洲囡囡,身材一定比東方長大的好,大家都係亞洲人丫照計?
「例子請參考前年遇到的朴美珠!」
當然唔係個個都靚,相信好多東南亞地區囡囡唔會係香港人口味,但靚果d真係可以好靚(唔知呢間壽司吧d女侍應係咪真係日本人?),而無論個樣得定唔得(well,相差可以幾極端下),共通點係一定有身材,好fit同好勁果隻,有曲線得黎又唔會好似美國人超勁恐怖地肥。如評分準則係樣靚一分、身材好一分,拎兩分的居美亞洲囡囡多不勝數,而差極都可以有一分,樣衰都有身材補救,真係冇乜見過幾多零分。對比香港地,落街行一個字,可以有四分鐘係零分。
「離開香港走一轉,任何地方都好,都可以明白點解香港男性成日咁灰,對於女性外表。都未講內涵。難怪香港男人鍾意日本妹韓國妹台灣妹大陸妹,都唔鍾意港女啦!」


食完飯冇野玩喇(去賭場咩!我都想呀!),加上老細在旁,唯一下場係返房。今年無奈地,次次出trip都係租兩間單人房、我同老細每人一間,點知今年酒店果邊話「信用卡過唔到數」,結果得一間房兩個一齊住。
「放心,睇過就知間間房都有兩張床,唔使兩個訓埋一張咁灰。」
同老細一齊住,慘在冇得焚機之外,仲返到房都要繼續做野。今年偷到線上網,即係夜晚係房都要遙控番公司部電腦睇email做文件,大家見到劉Sir online的時候,就係佢灰緊的時間,大佬做左成日野夜晚唔想郁呀大佬。唯有食朱古力洩憤。




機場食過一次呢隻Reese's Fast Break好鍾意,
返到酒店繼續,可能因為我鍾意食花生醬卦!
Fast Break根本就係條形朱古力花生醬!甜到漏!




食雪糕最鍾意食Cookies & Cream,朱古力見到有,即買啦。
結果?冇曲奇,又冇忌廉,入口似食綿花糖。
好在香港見唔到呢隻牌子。唔係實俾我唱衰。



食住朱古力上上網,聽歌之餘又寫下野,老細在唔在場我都當正自己渡緊假頹到爆架喇。做左陣實在頂唔順,十點未夠立即撻低...




5/5/2008 MON

...然後四點幾起身。同老細一間房除左好多野唔做得,仲有大量問題,例如老細時差極其嚴重,四點幾彈起,就係因為佢訓唔著,走黎走去摷安眠藥,摷鬼醒左我。俾佢搞醒時仲以為已經好早五六點(老細在香港的標準起身時間),等我訓多陣自然醒時驚遲過龍,點知先至係美國五點幾。
「所以每次黎到美國都覺得自己好健康。在香港我永遠唔會如此早睡早起。」


名乎其實地晨咁早,沖個涼先,琴晚臨訓前冇沖到,雖然經歷左十四個鐘機同N個鐘車河,天氣涼爽又唔濕,比你想像中乾淨得多,就算一晚唔沖涼都接受得到。反正大把時間慢慢沖,出到黎先六點幾,撻低上多陣網細細聲地聽歌仔寫寫野,食住朱古力好開心:




仲係佢。我已經大量入貨,細條唔夠食食帝皇裝。
食慣左,就唔覺甜過頭。真係好正。



老細七點鐘先起身,八點去食早餐,例牌麥記架喇年年日日都係。見到有個肥仔著IMMORTAL,唔係老細在場一定衝過去同佢一齊合照加尖叫
「MMMEEETTTAAALLL!!!」
八點半食完,十一點先要到會場開會,仲有兩個半鐘。點算?
「咦?唔係十點半咩?」
原來老細睇錯鐘以為好晏(這就是叩藥過頭了),結果早餐過後,大家返酒店房,繼續上網...
「無Q聊。訓多個鐘好過啦。」
到真正的十點半先至出發去開會地點。




大會指定酒店Hilton




五星級酒店,對出已經係當地景點觀光塔




酒店更加係唔使講咁大咁豪啦




拉斯維加斯之王Elvis Presley



年年拉斯維加斯展覽都係香港貿發局帶隊,即係大機構就係要面d,所以永遠叫你同佢地一齊住會場隔籬的五星級Hilton,只係貴到飛天,據聞今年全隊人只得兩個人住,其他一係住另一間次選四星級,一係好似我地自己出面搵酒店,平差唔多一半呀大佬。展覽六號開始,之前一日係briefing同派入場證,地點自然又係貿發局主場Hilton,卜個會議堂同你講展覽指引,不過年年都係果d,同只係照住派俾你本notes照讀,聽同唔聽甚至出唔出席係冇影響的,但係梗係要黎啦,有我免費任飲任食喎!雖然得d麵包西餅之類!
「但係今年唔多得!點解冇果汁飲?搞到我唔多飲咖啡都要迫住飲!」
因為係最低消費,擺到明係任你拎,拎成個膠袋成盤麵包倒落去帶走都得,只係唔多掂今次d野食,連我咁貪小便宜食完兩件加兩杯咖啡已經收皮,就知道幾失望了。我會向貿發局方面投訴今次安排,反映下一年展前會議應該大家一齊飲茶or打邊爐。


開完會(應該話食夠飲夠),十一點半過會場,出奇地近會議堂一出側邊個出口再行前一個門口就到。第一件事梗係睇睇
「有冇送錯野?」
上年奧蘭多速遞公司將我地個攤位編號同人地調亂左,結果全部貨去左第二個展館,食埋lunch兩點幾先開始郁手,今次呢,只係送過左兩個攤位咁大把嗟!進步左好多架喇!對一對數,有五大箱,每箱都差唔多兩米乘一米。老細好輕鬆地講:
「上個月去四川,三個人砌左三個鐘搞掂,今次美國得我地兩個,六個鐘應該得啦!」
即時灰爆了。自己個攤位有兩格大,六個鐘果然得,但,今年我地公司加開第三格。即係,再三個鐘唔該。十一點半砌到九點未停過手,終於只差少少手尾。上年兩點砌到八點半走係因為有客約左食飯所以停,第二朝去到會場先繼續;今年九點完,唔係因為砌得晒,而係頂唔順走人。我地對面果間美國公司,個攤位大我地公司一倍半,但有十幾個鬼佬一齊砌場,同成個檔口夾夾埋埋都冇我地咁複雜咁多野。見我地得三格大,但有成二百幾樣產品要砌,之餘得兩個人,評語係
"Don't wear a big hat if you don't have a big head."
所以「砌完」立即返房沖涼訓覺飯都唔食。太過支力。你好似我噉玩一鑊就知有幾好玩。




6/5/2008 TUE

起身已經近七點,唔似喎老細通常五六點就起身再順手摷醒其他人同佢一齊早起,估唔到今日我起身時佢都未起。知有幾支力啦。開開部機睇睇先...

「...灰。」
估唔到連部機都贈慶,無故死機。冇得聽歌好慘,大佬我部mp3機用電腦叉電架!最慘梗係冇得打野上網,兩日黎影埋好多相又冇左!可能因為咁唔開心,換衫時剃鬚 - 我係old-school地用剃鬚刀唔用電鬚刨的,夢想係擁有一把上海飛髮佬見血封喉摺式剃刀 - 一刀,狂標血,件恤衫染到成領紅,睇睇塊鏡,覺得自己個樣好似brutal deah,唔係老細在場,即時拎部相機出黎影低佢啦,
「第時我地METALLORD出碟可以用黎做封面!」


著好衫善好後(即係由brual death metal變番做glam metal),七點三,離入場時間仲有九個字,拎老細部機check個email先。免費野就係免費野,條線實在係超慢,我俾柒個超佢。我需要做的動作,只係連番去公司部電腦>開個Outlook>開個email>send個file去自己個Hotmail咁簡單,都用左我半個鐘,平均一個動作耗時7.5分鐘。之後熄左公司部機用番美國條線上Hotmail download埋個file落USB,半個字唔使搞掂。過程中當然會搵d野做攝攝時間,就係食朱古力:




個牌子Hershey,認住佢,你跟住劉Sir,就會成日見到呢個名。
Skor賣相幾吸引,咬落質地似洛加杏仁糖脆脆地,
不過超甜加勁痴牙,連劉Sir都話惡啃!



原來計劃係七點半出發食早餐,而家噉樣俾部腦搞一搞七點九,遲過頭又唔想行咁遠,自己間酒店搞掂算。所以點解劉Sir成日遲到。遲到係有道理的。
「唔係今次咁遲,我點可以黎拉斯維加斯兩年黎第一次早餐唔係食麥記?」




Cheddar Cheeze Bacon, Fried Egg, Mash & Sandwich
US$6.75 (tax not included)



見到個名,以為好似香港茶餐廳貨色俾個煙肉炒蛋加個餐多你算,點知炒蛋係三蛋,薯仔大量,煙肉撈埋芝士食到你滯,餐飲仲勁係俾成渣咖啡你任斟,「渣」我講緊係你見人去波d侍仔斟野你飲成尺高果d大茶壺,我加老細兩個人怒飲都飲唔晒成渣咖啡,難怪收你酒店價五十幾六十港紙 - 話時話,麥記早餐平極都近三十(幾)港紙一個呀美國!份量多過你去香港茶餐廳食餐晚飯,仲要多料到半個已經飽,又任飲,美國周街不論男女大量四五十寸腰以上,因為美國擺明食肥人係唔係都俾多你,我連去麥記拎杯水,香港你問呢搵隻細杯仔斟滾水俾你,美國人係拎隻大汽水杯,加半杯冰之後斟滿凍水當正汽水噉俾你。加上你香港地食早餐,背景播住(唔多想聽的)任何一首K歌。我今朝食緊芝煙三蛋時,係聽BON JOVI《Have a Nice Day》。
「I love America。」
跟住果首係RAMMSTEIN《Amerika》。


食得太滋味,結果八點半先到會場,有點肴底,因為今年個攤位玩到好大。上年展覽臨完撞到個貴客,聽老細講係我果行(唔係metal!)傳奇人物之一,退隱左一輪想重出江湖,撞到我地決定一齊合作,今年租場特別租多一格俾佢地公司擺,只係全部錢同貨人手苦力我地出,
「希望我地唔會做左水魚。」
想早d去到會場,因為琴晚砌到盡都未砌得掂,個客話今朝一早會黎收場,更大劑係好多貨黎到美國呢邊開左箱先發現整錯做錯(永恆的Made in China定律),錯之餘又有d野唔見左,好肴底唔知點樣面對個客,因為個攤位係佢地設計,設計果個仲要係公司最大粒其中一個!好在見面時發現佢唔得閒冇黎到,而搵左另一個高層黎睇,口震震同佢講:
"Many problems...this one bad...that one lost..."
"No big deal!"

之後佢地自己成個檔口執位,執到同本來個設計完全兩回事。好在設計師冇黎到。如果佢見到佢落單d貨做成噉、個攤位搞成噉,下場會比今朝剃鬚更brutal death。


有關心時事的朋友,都會知道今年美國局勢唔多穩定,經濟又差,牽連全球大家生活。作為地球一份子,劉Sir當然有受影響啦,就係好鬼得閒囉!全會場分南、中、北館,前年前中館擺好生意,事隔兩年,今年全部亞洲參展商即係中國台灣香港泰國印度馬來西亞等等等等,全部被迫遷最遠僻得黎細的北館,大美國保護主義嘛!經濟唔好消費意識低,廠家自然少生意,加上展覽地點咁差,即係展覽我敢講自己做得多,都未試過有一次冷清到噉,係可以全個鐘接近冇人經過果隻咁差。
「唔太明白?如果我形容為『有TRHK咁靜/咁差』,應該較容易想像。」
會場上唔到網,偶然偷到條線上一陣幾個字就會俾人截斷,又冇客,同老細你眼望我眼(灰),唯有吹水渡日辰。老細自然係講番隔籬檔口位大老細的故事。話說佢地間公司以前美國非常出名,係行內數一數二大公司,去中國勁搵工廠訂貨,可以一個月出五六十隻貨櫃。
「即係幾多?」
「工廠賣一隻貨櫃去美國,總金額達五六萬至十幾萬美金以上,美國收到貨之後,可以用工廠價雙倍甚至三倍價錢賣出去。」

一個月有百幾萬美金訂單,d工廠梗係立即接單,但要生產咁大量自然要擴充廠房。點知今年落完咁多單,第二年立即一張單都唔俾搵第二間做,間廠投資左咁多之後突然冇左個大客,每個月支出勁大又搵唔到咁多單維唔到皮就執,當年佢地令到好多大陸工廠執笠。我地側邊睇檔條友就係間公司大老闆之一,當年真係叱吒風雲,賺夠再用八億美金將間公司賣左俾人,住三千尺大屋(講真,八億身家間屋先三千尺,唔夠氣勢喎),然後做第二d生意又係撈到風生水起,近幾年諗住重出江湖入番呢行,上年撞到我老細,就搞到噉了。
「老細,人地咁惡,你仲黐埋去?」
「...鬼叫我請著世紀黑仔王劉Sir!」


做展覽目的梗係搵客兜生意啦。客分兩種,一種係新客,一睇以上市道形容就知唔使理啦;另一種係舊客,做慣做熟同對開果堆黎探探班睇睇有冇新野。其中一個客都算係我跟左最耐,入左呢間公司做開始傾傾到而家仲傾緊(只係傾得成的單,接近零...),成年幾冇見,終於美國撞番。初初碰頭,大家唔認得對方,佢留到成面鬚,劉Sir個貓樣大家都知啦。
"Lay holland chi Steven Spielberg!"(這句是真的)
"Lay dou holland metal ar!"(這句明顯地是假的)
傾傾傾傾傾,傾完走左第二個又黎,今次黎美國,可以話就係為同呢d老朋友見面。係噉的話,唔擺展覽都得啦。無鬼聊。


得閒到爆,又偷唔到線上網,唯有出去亂咁行,老細都默許了,佢都知道有幾頂唔順。我地北館係亞洲廠商集中營,見親都係東方人樣,
「雖然參差,但你想要這樣的質素,都唔係少的!I love China!」
只係第一日,已經全部人睇淡今次展覽,人流都冇,何來生意?大陸果邊空群而出地去人地地頭踩場,擺明入黎唔係幫襯係炒野,大模斯樣地睇、拎起手研究甚至拆開睇內部構造,除左成件產品拎走之外全部做齊,民族習性也(外國人唔妥中國人、香港人都唔認自己係中國人,係有原因的);香港區比較斯文,都係走去附近其他港商度大家圍埋玩下吹水,我見過有一個攤位可以出現近十個人十足開party,仲聽到有人計劃聽日(即係展覽第二日/尾二一日)帶埋部電腦落黎一齊睇DVD(灰)。自己展館冇野好睇,其他展館又太遠唔想郁,好在上年撞到的一班姐姐仔今年又有同我地一齊擺展覽,得閒無事就鼠過去人地度玩,因為佢地攤位正正係貿發局會場辦事處隔籬,可以名正言順地「去借電腦用」,點知「間電腦房幾十人排緊隊喎!」就去左搵姐姐仔了。姐姐仔果邊包括designer一個(職責:「去睇人地設計」終日行街不知所蹤)、真正做野的姐姐仔乙個同經理一名。今日傾過先知道,原來經理同劉Sir一樣師範出身,係師姐黎!小一到中七教過晒,結果發現,
「都係唔教書好...」
就抽身了。可想而知一畢業立即收左皮的劉Sir幾咁所見略同!


玩完走番過貿發局,得閒無事搞搞事的劉Sir又投訴:
「搞錯!上年會場有免費麵包同西餅食,仲有免費枝裝水任拎!點知今年乜都冇!你地貿發局點做野架!信唔信我下年唔黎丫喇!」
雖然最後一個正正係大家所希望,只係當下條友實在太煩,最後嘈到香港區最大粒個話事人都頂唔順佢,成大袋水十幾枝塞住佢把口。
「鬧事的參展商有水飲 。你地冇!」
返到自己檔口,連老細都唔見埋,悶嘛大佬出去行個街好過啦。雖然部電腦上唔到網,不過我仲有隻手指,一指徬身玩乜都得,想寫野得,想睇漫畫得,想打機都得...得左!
The Last Stand 2!攻略本,即將上市!」
打到天昏地暗!得X閒到嘔!一面打,一面食飯盒,今年食中餐,官保雞丁飯盒一個,承專六個半美金唔該!
「冇計!鬼叫北館冇野食,唔食中餐就要食睇見都唔掂的pizza!前年中館激正呀!」


美國有樣好,非常準時收工,講到明五點完展覽,五點打鐘即走,留耐d都冇用d客仲走得急過你。經劉Sir放出風聲「我老細有車」,雖然好多人唔妥佢,都有好多人企圖或意圖同佢拉拉關係,你知道美國搭的士幾麻煩加使你幾多錢就知。因為一部車裝得五個人空間有限,唯有請每間公司派出一位女性代表,每人有五分鐘時間發姣嗲我老細,嗲得掂我老細果間公司可以徵用我地架車,評判的職責當然落在劉Sir身上。結果因為其他人不屑與劉Sir為伍,班姐姐仔不戰而勝,佢地剛剛好有三個人霸晒架車十分開心。出發前有幾袋野要拎番酒店,三位姐姐住四星級酒店,入到黎睇睇我地間兩星級酒店房,發現自己間四星房細之餘殘殘之餘設備唔好,始終我地果間近motel多過hotel,而且本來設計係可以當埋單位租俾人長住,間格同設備齊全過酒店先啦!
「好慘呀!我地房連雪櫃都冇!居然住得衰過劉Sir,你叫我點見人!」
乜都唔理的劉Sir,入到房等老細放低晒野再出發的空檔,立即飛身上床撻番陣先。因為劉Sir的睡相實在太猥瑣不雅,姐姐仔都頂唔順,閃卡不便在此公開,謹請見諒。


大家等老細開車等得好心急,一場黎到美國,唔去行下玩下買下野好對唔住自己嗟,
「真係黎美國做野咩老細!」(...)
平時懶,不過講到玩就一定做足功課,晨早問晒人查晒地圖搵定去邊度好!第一站就係:




Sears

非常老實,唔係同行有姐姐仔,一定唔會黎Sears,因為賣家品電器多,其餘半間舖賣衫,最出名係Levi's牛仔褲,款多之餘可以平香港一半,衰在我冇興趣呢。但都叫做前年唔計朱古力唯一有收穫連我唔多買衫都買到兩件,黎捧捧場啦。不過捧場還捧場,買都係冇野買,
「d衫同兩年前黎睇一樣款,搞X錯!」




JCPenney

「呢間係美國名店,好出名架!」
穿過Sears入到商場,經理姐姐見到個招牌曰。睇門口已經明,美國人買野好古怪,第一件事睇價錢最緊要夠cheap,只係價錢cheap完質素一齊cheap,所以賣埋d衫唔係勁殘就係d款勁out,睇頭先Sears兩年都冇入新衫就知啦!JC Penny賣時裝新潮d,幾位姐姐仔經過即時衝入去,劈低兩條麻甩佬門口等佢地。唯有周圍望望商場入面有咩好睇啦。地圖話有幾間賣game同玩具,不過太遠喇去唔到,附近都有幾個地攤可以兜下,賣d都係低檔濕星野好似電話套、電話繩、玩具車之類,不過有個現象好有趣:開大舖果d都係外國人,而呢d細規格地攤檔接近全部係非白人如亞洲人同黑人開,就係開果班係外國人,都係後生仔女似年宵擺檔心態多過搵錢。某程度上,顯視美國內種族階級問題仍然嚴重。




Target
(明顯我對後面玩具反斗城興趣更大)

一條街有幾間shopping mall,走完Sears果個,再上車飛去街尾就到另一間,不過同一條街都要搭兩個幾字車先到。Target係我美國最鍾意超市/百貨公司(在美國大區,這兩樣野基本上已合二為一了,比香港的超級廣場更超級),多野睇裝修又靚好好行,但一分錢一分貨,價錢亦貴過人地少少,咪當俾加一服務費囉。老細黎到自然係買貨「參考」,即係以前我地都會買好多返香港,而家面皮厚左,加上日頭見得多大陸同胞的所作所為,買都廢事買直頭拎部相機出黎怒影相算。
「原來咁爽。搞到我突然好嚮往做大陸人添。」
自己野?冇。實在冇野好買。第一件事衝去零食部。零好野食。第二件事,唔使問劉Sir,玩具部。




時值《賽車小英雄》上畫,自然怒谷。




《變形金剛》時比,規模細好多。




變形金剛唔係冇,只係事隔一年得番好少,
迫到去到變形專櫃,變形金剛同變形俠醫一齊...




美國超市傳統,部份商戶會有獨家版本,唔去佢地度買唔到,
只係見到的Only at Target貨色,吸引力不足。
去美國時差唔多時候出電鍍銀版星星叫,可惜撞唔到,
唔太鍾意星星叫,但個鍍銀版靚到我都想買,就知有幾靚。




唯有賽車小英雄啦。但冇咩執得落手。



隻頭盔好似好過癮,戴住打側個頭會有跑車轉彎聲,不過細路仔碼,我戴的話一係個頭爆一係個頭盔爆。車仔唔算特別鍾意玩,遙控車就話,就噉碌碌下細個玩好開心,記得以前好鍾意頭跟尾地屋企砌車龍廁所砌到出大門口,大個左就覺得冇乜癮了。只係美國為谷套戲款又多又賣到好平,齋玩都好多有d係推出去會射野,有d行緊時會轉彎or飛起玩花式,而Hot Wheels出品普通版火柴盒車一隻車仔連機關一件US$2.99,打埋稅先廿五蚊港紙左右,香港都未必得啦呢個價,所以有點後悔,因為雖然少少樣衰夾老土,其實我幾鍾意Speed Racer。但有個奇怪發現:
「咦?《Iron Man》上畫冇幾耐嗟,點解一件玩具都搵唔到?」
我對MK1好大興趣架。



唔覺唔覺太陽差唔多落山喇,行晒呢頭幾間大商場,係時候食個飯先。呢樣野永遠最高難度,唔係貴就係太西洋唔多受(劉Sir除外)。上車亂行一輪,撞到好野!




New China Buffet




新 中 國



齋睇個門面都知正啦!加埋個價錢,夠吸引!美金七個九毫九有自助餐食喎,普通一餐晚飯都要呢個價啦,加埋係中國菜,唔會食唔落卦我地香港人?只係肴底,點知係咪整黎呃鬼佬果d中餐,入到去原來係叉燒漢堡?我地企係門口觀察左一個字,頭兩個出黎的顧客係中國人(卦,果類啦),第三個係個鬼佬,抽住兩大袋。即時衝上前問問:
"Ho ng ho sic?"
"It is good!"
跟住上車走人,佢架車,係Benz!大佬Benz富豪都黎呢間食,冇死喇卦!




入到去,第一樣見到,係大量扭蛋機...
唔好笑呀,好多鬼佬玩架!




「就這是傳說中馬可孛羅從意大利引入中國的披薩?」




「?????」




唔怪得叫中國,即係new-school中國菜噉解,
用中國住家手法煮西餐。我已經放棄當正西餐食算。



唔好理中定西,最緊要好食。得唔得?由左至右、上向下地食落去。牛肉雲吞(卦,包到噉樣,我都唔知仲算唔算雲吞?),難食:雲吞對上隻炸餃子,睇顏色都知道用左成罐酒去醃,d油多到油味遮晒完全食唔出餡味;兩舊牛肉雲吞中間兩粒,我初時以為係煎釀三寶炸魚蛋,點知食到入口先知道,係meatball,睇睇我上年奧蘭多展覽幾日就知乜野係meatball,不過呢度難食幾倍,諗住扮山竹牛肉呃鬼佬?再行落d,左邊成舊粉團噉樣果舊,我以為係炸豆腐先拎,點知原來真係粉團一舊,咬左一下,立即掟落垃圾桶;粉團右邊係炸石班,食完令我好懷念香港快餐的石班。結果,只有薯條同pizza好食,pizza係最簡單茄汁加芝士果隻,但反而整得好食過任何一樣野喎。
「叫左你去美國,打死都唔好食亞洲菜架啦。」
其實呢,睇番門口個牌坊,有寫到明係「New York Style」,就算你唔知甚麼是「紐約式中餐」,都估到唔慌好野啦。但係,冇計,迫住要被昆。
「而家美國中菜館開得仲多過麥記,你知唔知?」
真可謂黃禍也。


食左兩碟,搞掂,收得皮,反觀幾位姐姐仔可以擦足四五碟,令平時返工日日幫幾位女同事清幾個飯盒的劉Sir自愧形穢。快手快腳出去食甜品算啦。




「...我打死都唔會掂右下角果盤屎色野。」




「好在,仲有軟雪糕!」



正餐食兩轉,甜品一樣食兩轉,第一轉食者喱糖,超酸,同我今日之前未食過咁稔的者喱,篤一篤就爛,拎得高少少又散開跌番落去,成功擺得入口時,夠者喱應該剩番唔夠五份一。最容易的食法,係索性攪鬼爛晒佢,然後當思樂冰飲。好在仲有軟雪糕打一打救我,味道掂,不過質地好得意,硬身的軟雪糕食過未?今餐真係見識不少,這頓new-school中西fusion自助餐。但最「西洋中國」的好戲,在後頭:




幸運曲奇!




中間暗藏紙條一張...




一面提醒你,黎緊六合彩買咩號碼...




另一面,係是日運程。



唔知有幾多人食過?香港地冇乜機會,但美國你去親唐人餐館必定有。照這樣的推理,出現在唐人餐館,理應屬於中餐一種啦。但你發現在美國以外,冇幾多地方找得到幸運曲奇,中國更加係見都唔會見到,除左出口食品工場。Why???點解會出現中國冇得食、中國人唔識的中國食物?點解香港有得買六合彩,反而冇得俾我食幸運曲奇捉路?點解d是日運程句句都可以咁戇居?點解幸運曲奇可以咁難食,食過咁多次,次次都想大叫回水?不過,我對幸運曲奇,有份情意結。因為一隻game。有機會,又有故仔講。


「同,點解住外國大的亞洲囡囡,身材真係可以勁咁多?」
新中國的老闆娘同各位女侍應,身形超級窈窕,但無論幾瘦心口一定相反地大,大到你覺得係塞野塞出黎都有(係都唔奇,吸引鬼佬顧客?),就算派全舖上圍最差果個黎香港,由柴灣行到去荃灣,沿途身材勁得過佢相信冇幾多個。就係咁恐怖,咁日本動畫feel。
「點解?????」
假狗成份居多,我話。鬼佬鍾意嘛。(我都鍾意,呵呵)




沒有共產黨 就沒有新中國
今晚之前,我從不知道原來自己這麼愛國



黃昏入席,散席已經天黑,作為男士自然要有番d紳士風度,送埋幾位姐姐仔返酒店啦!經理姐姐曰:
「咪扮野!係頭先餐新中國我請晒全場,你先死死地氣要車埋我地返酒店咋!」
大會指定的酒店有兩間,一間講左係會場隔籬的Hilton五星級,另一間係四星級酒店,位於拉斯維加斯消費大道,條消費大道只係我地酒店落一條街,不過一街之隔已經兩個世界,我地果邊係貧民窟,佢地酒店果條街,豪到hihi:










全城最大最旺酒店,集中晒呢一條街,行幾步路就一間賭場。
每逢夜晚,街上面旺角咁多人。








威尼斯人
(電視廣告係BLUE MAN GROUP live!)










永利






靚女們住的大酒店Circus Circus




聽個名、睇個招牌,都知係開俾小朋友的theme hotel



格局真係成個馬戲團噉,酒店側邊仲要有個太空館加文化中心加埋咁大的兒童樂園,據聞係超極勁好玩,假如你係五歲以下。老細對Circus Circus的評語,係如果一家大細入去會超級開心,但大人入去又唔賭的話會好冇癮,因為歷史悠久入面太殘舊,單住絕對唔夠四星水平,睇之前幾位姐姐仔點樣品評我地間二星motel就知啦,而間酒店係成條拉斯維加斯大道最尾果間,某程度上睇得出而家江湖地位。但相信我住會超級開心。肯定晚晚去兒童樂園同d小朋友爭野玩。同埋,為呢條大道如此光景,值得。




7/5/2008 WED

十點未夠就訓,五點鐘起身,無聊一輪撻低繼續,七點正式彈起身,好舒服訓酒店真係,唔使鬧鐘自然會醒因為實夠訓,而且就算你唔起,老細慣左晨咁早起身,你唔起佢五六七點都自然會搞醒你。今日會場九點先開場,可以慢慢睇埋email,七點九先出發去麥記食早餐。好多人投訴劉Sir個網成世白底黑字好悶,今朝搞搞新意思,整番個picture diary先:




唔係玩野,真係三九胃泰。黎美國前病左兩星期醫生都睇兩次,
肴過底病到上唔到機到,老細都睇到灰,摷佢個藥袋醒左盒野過我。
其實到美國已經病好,不過有得食照食,
臨訓前兩粒,當安眠藥;訓醒後兩粒,當糖食。
「吹咩。」




要食藥,梗要搵水送。真係當糖趙咩。。
睇落細細枝,但勁多,兩個人平日飲水加食藥咁多日都飲唔晒,先賣
US$0.28
呢個價,香港買枝細水都未必得。
終於搵到有野平過香港了。




我間房一出,轉左對正就係永利,同葡京果棟一模一樣,
但比葡京再多一棟Encore。睇落「一街之隔」咁近,
但行的話行足你半個鐘九個字先去到。




前往麥記食早餐途中,經過這座豪宅。
正正我酒店隔籬,級數已經差咁遠。




去到麥記,
「咦?新野喎!」




「南派雞扒鬆餅?香港未見過!整個先!」




Southern Style Chicken Biscuit Set Breakfast
US$3.09 (tax not included)



坐低食住個早餐慢慢講。又會咁好彩俾我撞到麥記出新餐,只係唔好期望咁高,美國佬口味同香港人好唔同。好似香港食包有麵包同軟鬆餅兩種,美國唔知點解唔流行,以硬鬆餅同甜餅為主,前者淡加硬後者稔得黎勁甜,我食開麥記都唔多頂得順。呢個南派雞扒,想食包要十一點後先有,早餐只提供鬆餅,有點猶豫但香港冇機會試,加上唔使自己俾錢(此乃最重要也),整個玩下無妨。入口,比想像中好得多。塊雞似雞記早餐d雞扒,但鬆脆d冇咁硬,鬆餅就噉食一定唔好食架喇乾啃惡頂,但加埋塊雞一齊趙個味就好正。
「衰在細。」
呢樣野,第一朝已經發現。以往美國野賣點係要幾大有幾大,老土加cheap唔緊要平得黎大大份就得,但今行麥記除左薯餅同野飲冇變,d包明顯地縮細左?因為經濟唔好,節流抗通脹?雖然經濟人人都話差,但美國通漲方面反而控制得住,香港平通全港九的大家食都可以加價50%啦!其他野食加得仲黐線!
「不過你要記得,美國佬未加價未通漲,物價已經高到有點恐怖,美國麥記一個包的價錢,分分鐘夠你香港食個餐!」




唔夠飽,食多塊曲奇餅先,勁吸引喎張相!




有特別紙袋包裝架。得唔得?




「......」



慢慢食啦當然又係。但抵死在,食之前俾錢個故事。話說張相都睇到寫住賣一蚊,噉我諗住買一塊啦,打埋稅個一即係八個半港紙,都幾貴,但麥維他消化餅咁大塊喎香港麥Cafed曲奇餅先得一半,冇乜機會,玩下啦。但俾錢時,收錢個阿禪話一蚊三塊,買一塊個半。歪?
「道理如此。」
出自阿禪口中的,果真禪語也,摻透後,我只好買三塊。噉計番兩個幾一塊大大塊又幾抵食的。張相非常滋味,拉開中間有狂多朱古力醬,點知我食時,首先塊曲奇係稔的唔係脆的,軟餅黎。其次搣開佢,乜叉朱古力醬都冇,朱古力粒就有,小。算幾好食,不過,我係想食朱古力夾心餅呀。
「同麥肯雞的芝士波一樣,俾個樣呃左!」




香港加州紅有Red Box,美國麥當奴都有Redbox,
全自動租帶,一蚊租一晚,七蚊買二手。
以美國物價指數計,租同買都屬於超值價。




起程到會場,途經個油站,叫Speedee Mart。




睇落,佢係一個油站。其實,佢係一間便利店。
夜晚臨返房,有咩飲飲食食生果朱古力要買,都係靠佢。




估唔到除左metal,而家連品客薯片都要extreme。






正乎?我酒店座落貧民區,周街都係呢d鹹書櫃,
「亞洲」、「黑人」、「幼齒」、「高價」等分晒類,免費任拎。
本來想拎幾本返香港做手信。不過驚過唔到境。肴底也。




酒店行一兩個字,就到會場拉斯維加斯會展。超勁大同豪。




首先係南館,有兩三層,全場最大。




南館主要做花園,即係木檯木凳、掘泥泵水、種花種草之類,
香港人唔會想像得到架喇。叫你屋企搵個花盤都難啦,何況花園?




前往下個館途中,會經過穿梭火車站。




穿梭火車由站到車全無人操作,貫通會場同旅遊區,
因為攝影技術所限,等極撞唔中有車埋站時影到,附送火車兩架,
請自行腦中Photoshop將列火車同個車站拼埋:





「冇錯!去到邊度,都避唔開永利!」




對這間store我殊大興趣。好想去槍械/軍備展見識見識。真係有的。



去下個站途中,有野笑:

祖國同胞可以大聲嘲笑回美國人了




我個場,係遙遠的北館,睇見都唔覺果隻。




北館前係中館,全場第二大,前年就係擺呢個館。
上年門口抽獎送架三百萬波子(我中左獎!),今年經濟唔好冇獎抽,
門口泊晒d爬山車四驅車,變得好metal。




...其實又唔多metal。真正metal,得一架...




No Fear!!!




即係類似紅牛的西洋力寶健,我都係第一次見,但件tee勁多人著!
車尾有兩個典型超美式囡囡,即係牛仔帽牛仔靴加勁短牛仔褲,
件tee勁大領口加勁低,腰位縛到上心口,睇戲打機成日見,
向路過的朋友免費派No Fear,如果你係buyer仲有No Fear tee送!
人地行埋去,係問姐姐仔拎野飲拎tee。我行埋去,係問姐姐仔
「架貨櫃車識唔識變形?」



來到展覽第二天,終於有番多少野做下。今年過黎美國,有幾個客都話順便過黎探探,「順便」有兩種,一種係本身有黎擺檔或者年年都行,另一種係同公司講「我要出差睇fair」之後借公職之名黎賭城大殺三方。開左檔冇幾耐已經有第一個客黎到,上年奧蘭多撞到,之後傾足成年終於落單,有件貨趕緊(所以你見平時上網渡日的劉Sir臨去美國果期日頭終於會忙囉),佢公司又有擺攤位,大家見面開個會傾傾黎緊有乜計劃。佢黎左北館探我,我又跟番佢去南館見晒佢全公司所有人,跟住成間公司最大果幾個成隊人走番過去北館睇多次傾多陣,
「死乜你地返工真係咁認真做野架?」
其中一個大粒佬,四十幾歲,好矮個樣又老,但身材超級魁梧,聽佢講佢日日做gym,個人矮過好多香港十幾廿歲靚仔,但一比身型殺晒冇見過幾多香港人有佢咁高而可以有佢咁壯,亦係我黎美國見過最大隻最健康美國人之一,見到佢好似見到武俠小說d人物。同埋,令我諗番起
「魁!男墊!」
當年我地八三三三條友,試過一借借十幾期上房刨,癲到我唔使返學果日都專登土瓜灣搭車返大埔買桶雞上去一齊刨咁癲。佢個誇張得不合理的身型,帶回這些美好回憶矣。

場館有好多高球車免費俾你坐,雖然南館過北館行個幾字就到,班友諗過包幾架車去,美國佬懶嘛,但搵極都截唔到,因為美國唔係得佢地懶,成國都係懶人,懶人就痴肥,全部車俾大份到斜路都行唔到果d肥人霸晒。都好,行返去可以途經架No Fear貨櫃車,問姐姐仔拎番罐:




NO FEAR
Super Energy Supplement



味道有d似沙士,不過加重甜味(美國佬乜野都要濃味),係咪真係咁超能量唔知亦感覺唔到,不過飲落唔錯,大前提係你同劉Sir一樣鍾意食甜野飲甜野。成村人一齊飲住No Fear一面傾生意,黎呢d展覽,都係搏扑得中一個好似佢地呢種長情客同大客。傾完,已經可以等上機,
「就係咁靜!拍得住TRHK咁靜!」
話咁快又到食飯時間,琴日賣飯盒個阿叔今日冇黎兜生意,老細食杯麵,反正大把時間,我決定走出去搵食,北館唔止生意灰,連食都灰。前年有檔食過一次好鍾意,今餐決定回味。




Krispy Chicken Tenders




有單你睇有數你計:雞條4.75、洋蔥圈2.50,
會場食野好在包埋稅,但冇野飲已經7.25,六十蚊港紙喇大佬!



間野叫佐敦,唔知咩料但睇個款應該又係幾出名的連鎖(垃圾)食府,個炸雞非常鬆軟好食,上次有得跟薯片,係香港搵唔到真正原個薯仔切厚片黎炸的真真薯片,厚得黎脆又好食仲超多多到食唔晒果隻,今年只得洋蔥圈,都OK但好懷念果次齋食薯片都食到飽,冇幾多次我叫正餐食會多到食唔晒,冇得encore薯片好遺憾。食飽飯梗係要散散步,昨日大家談論得興高采烈的DVD鑑賞大會未有出現,因為dDVD要「留番搭飛機睇」(冇計,今年聯合航空真係好廢),反而大家心協力,難得有公司有客人光臨,附近其他攤位d人會走埋去幫手,自己冇客又冇野做嘛大佬,所以經常出現幾間公司服侍一個客的情況,令好多外國客人覺得我地香港人好客、對來賓熱情,查實係,我地都唔X想的...唔係噉樣,我地就會同好多大陸同胞睇齊。




勤力的內地參展商



去人地d攤位呃左個蘋果食(飯後果嘛),周圍行下又睇睇email,無聊左九個字,返到自己檔坐一陣又鼠番去出,全日每個鐘頭平均唔夠十五分鐘可以係我攤位見到我。悶嘛大佬。見到有個上海佬踩住架滑板飛黎飛去,原來佢間廠做滑板,自己冇攤位但踩住塊滑板流動宣傳,場租都慳番,幾乎悶到搶佢塊板黎玩。頂唔順,又走去搵姐姐仔玩。大家都悶嘛大佬。




我負責做model俾人影相。






呢幾幅相擺上MSN,必定溝死女。(...)





公司冇(乜)(靚)女同事,好灰的。



我檔口隔籬同我地一齊擺檔班鬼佬,有個身家八億住三千尺大屋仲要勁靚仔的太子爺消息傳出,好多姐姐仔慕名走過黎拜訪,不過冇幾多次撞到,冇計啦人悶鬼都悶,我見最多佢的時候,都係佢走到好遠(疑似同條囡」)煲電話,一煲幾個字半個鐘果隻;一係走左去貿發局度借用電腦上網,總之唔係睇檔啦,雖然真係睇唔睇都冇乜分別,靜到黐線。所以平日閂館半個鐘前已經唔見人要我地幫手執手尾的佢,今日一早唔見左。原因相當明顯,佢留低左呢張野係檯面:




「呢間野,我見過!勁大間勁豪!」
不過,未入過,遺憾也...



好在我都唔弱。會場都知我地辛苦架喇,為坐成日一個客都冇,為息民憤,今日整左個餐聚茶會,完場後獲邀請者可以免費入場怒飲怒食,我黎過咁多年如此尊貴,梗係有人醒張私人請柬:




係。這就是請柬。真簡單。



因為今晚我地有約,咁蹻有個茶會可以消磨時間,老細非常開心,我就唔多。上到去已經全場爆滿,我地係第一&第二個出現的非亞洲人,初時有點期待,但野食只得生果連麵包都冇件,飲呢如果你飲酒就會好開心因為啤酒貴酒大量任飲,老細見得生果照狂食,大佬我唔飲酒又真係入黎想食野,冇咁好氣出番去周圍行算。我公司美國有個律師合作左幾年,佢見我地黎拉斯維加斯,特登出黎搵我地食飯,由洛杉磯經陸路過拉斯維加斯,我地(老細嗟)食完生果佢都未到,再返酒店房訓陣六七點,終於出現喇。我地洛杉磯坐飛機過黎拉斯維加斯個半鐘,佢飛車全程七個鐘似返工多,唔怪得要勁大架越野車啦。首先,shopping時間。因為酒店、消費區同會場全部城中包晒,其他地方除左城南機場,只間中搵野買時去過,今晚律師帶我地去西面,首次go west。佢話佢今次先係第二次黎拉斯維加斯,已經認得晒大部份路唔使地圖或者GPS,但坐佢車坐左幾個字左轉右轉我都唔知去左邊跟唔到,美國佬玩開車每日閒閒地五六份一時間車上過,果然路面觸覺唔同過人。黎到西面,係為左間「上流超市」:




Costco




超大。大到影唔晒。齋個入口已經好Q大。




出面停車場細過人地,但入面大人地好多。




因為根本係個倉庫黎,地方大,貨物都要堆幾層高。
自從玩具反斗城唔做大型玩具,香港冇地方賣呢類巨型野。




呢行全行,都係賣雪藏野。仲要係一種雪藏野。
賣雪糕一行。賣凍肉一行。賣蛋糕一行。每行都咁大咁多。




而且每一種貨品都有自己條街,一條街,多過香港一間百佳惠康。
美國人最注重排場。唔好理有冇需要。最緊要有、最緊要俾你見到。




美國超市,係將超級市場同百貨公司合併,所以乜都搵到。




「有理由買番部Wii了。」
Target: Force,Wii又再多一隻唔玩唔得正game!
「幾時出《Metal Band》先?」




之後,到手信時間。當然係朱古力,自己有得食嘛。
齋朱古力一款,都擺滿一條街。睇零食都睇餐死。



第一次黎到城西,亦係第一次黎到Costco,久仰大名,但幫襯過之後先知道,大得恐怖,名乎其實開倉。可以話佢係間購物俱樂部,行會員制,但唔同工聯會之類非會員都入得去只係買野冇折,門口有幾個實Q睇住,冇會員證趕你走,就連買完野出去都要實Q睇多次證加對埋單睇你買左乜野有冇多有冇少先放你走。我老細有證,不過會員分好多級,佢果級係可以入場但唔買得野果種(噉有乜用???),當然我地個律師係最最最高級會員啦。初時我以為行得會員制加非會員唔入得去買野一定好勁,點知場內客人,師奶阿嬸帶埋細路陷家大細果隻,佔總人數八成以上...即時覺得老細張「入得場唔買得野」的所謂會員證冇乜料到,
「師奶都不如!」
不過價錢冇想像中咁平,因為係走高檔路線,價位自然要標得高過人先似樣,你俾錢買都係買身份地位買排場嗟,同一類產品其實出面大把加平d添啦。你諗得出想買要買都有,就連普通藥水藥丸都擺滿成條街,一隻藥十幾隻牌子,仲要逐個牌子幫你除番開一粒藥丸平均幾錢咁型。

有兩樣野搵唔到,一樣係玩具(嗚嗚嗚),地方咁上流同入黎都係大人老野多,又點會有玩具賣丫失望。另一樣係metal。有勁大個CD區,但因為拉斯維加斯好多中美同南美人口,大量南美音樂&雜錦碟,rock都有超多你耳熟能詳的metalcore同emo,但「真正metal」呢,一隻都搵唔到唔好意思。另一樣多係衫,但學我個律師話齋,買衫幾大唔好美國買。美國人心態係唔靚唔緊要唔新唔緊要,最緊要夠平,所以質素同款式兩樣都冇,但最死係價錢唔係平得去邊,同一件衫香港女人街相同價錢買得到,不過係港幣加唔使打稅,平八倍。難怪律師成日飛黎香港。又,成個倉咁大咁多野,知唔知最受歡迎產品係乜?我見到有家人推左成車,合味道杯麵。笑到我仆街。笑住出去,原來行左好耐,已經天黑。




律師架車對面,有個超肥黑鬼泊左架超大房車。
即時影低,個車牌型爆。如果你明的話。



八九點鐘,係時候搵餐飯食。今晚律師請食飯,大家唔知食乜好(我唔好意思開口啦,幾大都話去食自助餐架我!),律師車左大家去食:




千足




...隔籬果間泰椒至係。




頭頂,就係觀光塔。睇得多,一次都冇得上。



原因,係個律師娶左個泰國人。劇情係本來佢娶左個鬼妹,但後來離左婚,跟住揀左而家個泰國妹,在我們香港人眼中,超級平庸泰傭一個。不過佢鍾意,仲連仔都生埋。吹脹。
「外國人眼光同口味,我們永不會理解得到。」
泰國野我一向冇乜興趣,我係鬼佬黎,美國野勁肥勁炸才是皇道。叫左個黃咖哩飯,碗湯叫唔知乜叉雲吞湯,超勁多味精仲無端端有幾粒叉燒吹到脹晒(做左廿幾年人,第一次試過飲湯飲到叉燒,相信之後幾十年都唔會再試得到另一次),好在除左碗「叉燒雲吞湯」,個飯似番樣。不過我懷念琴晚7.99多。
「披薩!!」




8/5/2008 THU

因為飯局,所以遲左返到酒店成十一點先訓,好在老細冇搞事七點半先起身。或者老細都廢事搞,前兩日晨早去到會場,坐左成日都冇乜人,今日最後一日更加唔使多講。隔籬對八億身家父子,太子爺唔知去左邊,剩低阿爸係度睇報紙,同玩報紙d填字遊戲同數獨。連大老闆都係度玩暗傳聖旨,下屬如我怎能不領旨出去玩埋一份?
「小朋友,有冇讀過《楊修之死》?」


真係好鬼悶。去到姐姐仔度發現有部對講機,拎起黎玩一大餐,夠鐘食飯。最後一日又係中餐,十蚊三個送加枝水同個蘋果,對比前日少一個送收少三個半,座地起價喎班友!好在今日last day早兩個鐘完三點收工,唔係真係唔知點捱到尾。隔籬檔野,晨早已經收工,經過左三日合作,我敢講我工作效率同會話能力唔會差得過佢地,即係我輸蝕在身家冇八億咁多囉。
「老實講,真係睇唔出佢似做過幾十年生意、手上流通過幾十億美金的大人物,做野咁鬼生疏。」
「梗係啦!俾你有八億美金,你仲會唔會自己落場落手做咁白痴?梗係俾錢叫人做啦使自己郁手?咁多年慣左唔使做,係噉架喇!」

三點收館,好多人特別大陸台灣一點未夠已經開始執野,今年個展覽灰爆嘛大佬早走早著啦。全場只得我地遵守大會規則,未到三點都唔執野,唔使諗都知唔係有原因唔會咁好死啦,劉Sir咁懶。上年展覽最後一日有個客一次過買晒成個攤位,要幫佢將全部野還原番做一箱箱,結果兩點幾執到六七點先執得晒,最仆街係包晒之後佢先話唔要,唔講粗口唔得。今年又係有個客傾傾下決定買晒全部辦,好在叫做有落場拆野搬野叫做幫過少少手,同今年冇上年咁多野四五點包晒,其實可以早番兩三個鐘,問題係要搵工人幫手運出去,而工人要三四點先做工,迫住要等佢地開工先可以開始包。早得過上年就得啦,又要包野包五六個鐘好灰架大佬。執完貨又要等運貨,對住成班美國人好多野睇,次次拆場全場乜人都搵到,勁後生有勁老都有阿嬸都有,d阿嬸仲要超健碩爆晒肌肉果隻,美國勞動界對年齡性別種族冇任何歧視。你要metal友大把,勁多band tee同疑似band tee即係黑色底印鷹呀軍事野呀大大句愛國口號果d,見到個超勁肥/大隻鬼佬著住件METALLICA開住架叉車,真係好Qheavy metal架。而且唔知點解佢地好鍾意玩野,band tee皮褸鎖鏈戴晒釘算碎料,有個阿叔日日見佢都係扮海盜,右眼戴住個眼罩做獨眼龍,係日日&行到邊都都噉款喎,衰在冇同佢影相,有點遺憾。雖然美國metal九十年代初近中nu-metal開始已經唔多係我杯茶,但講到形式文化美國佬真係非常rock非常metal,肌肉脂肪汔油香煙啤洒黑超皮褸電單車大貨車我鍾意,當然唔少得頭先No Fear果dmetal牛女。我應該留在美國生活。


執晒野差唔多六點,又係等,因為今晚律師再黎食飯,執完野再去出面No Fear度坐低等等(可惜人地一早收晒工走晒,冇得飲),又見到律師架越野車。今日六點算好早太陽都未落山(正常七點幾先黑晒個天),食飯早得滯,梗係先去濕個瓶啦。




呢間野我都未去過,聽律師講,貨色係cheap&廢到旺角都唔賣。
「掂!聽到都知我一定鍾意!」




Big Lots隔籬間Kmart先係重點。美國咁多超市,
除左Target之外最鍾意Kmart,夠多之餘夠平又好行。




以上純粹無聊。d雀都唔驚人。個城真懶。



對Kmart我好大期望,因為路線冇Target咁高檔,價位同產品風格近番我鍾意果類,更因為上年隻朱古力搵晒咁多地方得Kmart有得買,今年美國行最後一站喇大佬再買唔到真係會好灰架。但,結果都係冇。行勻全個拉斯維加斯,都搵唔番果隻朱古力。估唔到連朱古力都會OOP。
「相信原因,係世界黑仔王劉Sir食過。」
同樣睇睇有乜玩具,唉變形金剛真係好慘呀已經幾近絕跡。
「又係見唔到《Iron Man》喎。點解?」
最後空手而回,本次美國行濕瓶方面正式收皮。不過老細買到勁多野,多到特登買多隻篋裝貨返香港,搞到我想過埋去隔籬Big Lots都唔夠時間,冇得見識佢地d野可以點樣「cheap到連旺角都唔賣」,美國冇幾可有呢d仲死過女人街&鴨寮街的地方,見識唔到又係另一個遺憾。
「頂。今次黎拉斯維加斯,好似乜叉都遺憾。」


所以,老細都識做架喇,琴晚律師請食泰國野,今晚佢請客,終於有得食自助餐!第一件事,大家搵間靚酒店先。又跟律師遊車河,住黎住去都係貧民區,呢幾日真正見識到賭城有幾大有幾豪,真係睇到嘆為觀止。有間酒店擺到明玩theme叫埋自己金銀島,門口一出有兩隻海盜船,每日有幾場維京鬥海盜表演,背景音樂係WINDIR。經過有間門口賣緊廣告,STONE TEMPLE PILOTS今晚去佢地酒店開演唱會。
「原來佢地仲有?仲以為VELVET REVOLVER之後佢地散左唔再玩添!復出?」
最後,可能個律師係IRON MAIDEN同RUSH fans,揀左去Rio。今次一行最後一晚,終於可以享受到賭城的奢華。間酒店首先超靚,跟住超大,入到去,豪到爆。




賭場。一角。



拉斯維加斯周圍都係賭,每間酒店不論大小實有個賭場(幾部老虎機拍埋已經=賭場架喇在宣傳角度黎講),就連便利店雜貨舖都要放幾部老虎機,但唔好睇少,超勁多人玩,分分鐘成間舖搵錢最多就係果幾部老虎機。入到去賭場,行左兩三個字仲未行晒,五星級就係唔同,單個賭場已經大過我住間酒店,果真大到黐線。行極行唔完,全個賭場賭檯唔多,因為真係豪賭另有貴賓房,佔地九成九係老虎機,乜主題都有連變形金剛都有得拉吹佢唔脹,勁多鬼坐低慢慢拉。我到而家都唔明老虎機到底有乜好玩,齋坐低入錢再拉之後贏錢or輸錢,當然係輸多,坐一輪輸晒錢就走人,但當你見到七十一都有得拉老虎機,就知道外國人幾咁受呢樣野。
「所以要賭,千祈唔好黎拉斯維加斯,得老虎機悶死你!去葡京有得玩百家樂,好玩好多!」
老細曰。乜野係百家樂?死,覺得自己好膚淺添,但驚俾老細笑,唔敢問。
「百萬死亡我就識嗟。」
有賭的地方,自然有女,全場超多囡囡,全身同齋著底衫褲差唔多,索可以超勁索,唔索呢...即係中國人同美國人審美眼光係好唔同的我只有話。囡囡的職責除左俾人目及,同傳酒做接待,仲幫各位貴客按摩,見到張賭檯個客坐係度賭緊廿一點,有條囡囡企係度訓晒上佢背脊用全身同佢按摩。有錢就係唔同d,你想幾豪都得。唔想賭,仲有大把其他野玩,Rio賣點係舞男,有隊所謂全球最紅澳洲舞男常駐呢度,仲開左勁大間專門店齋賣佢地d相同商品,賭場中間有個台可以同佢地影相,個個超勁大隻周身肌肉,一上到台成班齋著條底褲的壯男會圍埋黎擺晒d好型的姿勢,敬業樂業架!同佢地影果班梗係師奶阿嬸啦唔通我咩,不過唔係平,四舊水一張。
「都唔明有乜好影!仲要咁Q貴!」
「如果四舊水有得噉樣同Kawaii影相,你影唔影先?」
「影!影影影!!」


由入到酒店、穿過賭場到去到餐館,行左四五個字都有,接近一條直線喎全程係,知道間酒店有幾大嘛?目的地。餐助自。




餐 助 自



同香港非常唔同。入場先俾錢,排隊搵部機篤人數收費之後入錢,一個成人US$24.4加稅US$1.86,其實好平,但足夠令老細入錢時手震加多幾滴眼淚。但入到去,就知道根本唔需要計較入場費幾多。場內有幾個廚房一字排開,由一邊行到另一邊夠行你成個字,呢一個字入面俾你睇晒食盡五大洋七大洲 - well,誇張左少少,不過你諗得到的大國同盛行地方菜式,通通有齊。場中間做甜品,唔使講其他廚房,單係個甜品角已經大過好多香港酒店自助餐成個區,甚至單甜品款式,多過香港一個自助餐全部菜式夾埋。五星級酒店,排場已經唔同過人。野食得唔得?即係平時怒食,而家見到咁多,反而唔知應該邊度開始入手,試左幾輪,掂喎d野食真係,起碼d中國菜你睇見同食落相信真係來自中國先啦,而且廚師手勢好!最好食果道菜,唔好意思,又係劉Sir至愛咖哩角(...),個樣係正宗印式,但唔知點解印度冇,我係要去中國即係「餐助自」招牌下面先食得到...但總體黎講,一很流,無論排場還是食物水準,香港我只有一次食半島及得上,但半島一餐收你近六百,呢度加埋稅先二百港紙多少少,邊有得比呀大佬。你夜晚食唔夠,朝早仲有得食自助餐喎,先收你六七蚊,我酒店食個煙肉蛋都要呢個價,你黎得五星級呢d上流地方,佢都唔志在豪呢d雞碎俾你。而且晚場唔止有得食,搭正九點,有pole dance睇。一很流。食完今餐,返到香港唔再需要食自助餐。


唔係聽朝要四點幾起身加上機,肯定怒食更多。食自助餐果度有四份一係中國人,中國越來越富強了,但不包括我。九點幾食完,坐番律師架越野車返酒店,回程有得遊車河,由西面兜到北面去到南面。拉斯維加斯社會階層分佈,城中係展區,城西富,城北多女(八億太子爺一收工就去果間Sapphire就係北面),城南機場,城東窮。難怪次次跟住老細,唔係去城中就係去城東。送到我地返酒店落車之後,律師帶埋佢個泰國老婆返去城西瘋狂購物。我地一齊執行李,執到十一點幾訓覺。在此要特別鳴謝律師今次出黎搵我地,先有得真真正正嘗試過過賭城生活,佢唔出黎的話,相信我同老細兩個仲係滯留城東,又係新中國七個九毫九搞掂。今晚,值晒今次黎美國咁多日夜。




9/5/2008 FRI

晚晚訓六七八個鐘,今日十一點訓四點起身,得五個鐘,黎到美國第一次唔夠訓,因為今朝趕八點幾機,(話)兩個鐘前check-in,加上老細要還車,搞到要咁早。五點鐘出發,臨走前,為最後的凌晨光景留個念:





雖然還車處正正機場隔籬,但係我加老細兩個人四隻篋,我一隻,老細成三隻!仲要激重,如果還左車,要拉住四隻篋行大段路加搭穿梭火車過番機場,好戇居喎。
「不如噉啦!我去還車,你拎晒我地d行李去排隊check in先!」
老細果然係老細,果真英明。掟低四隻篋之後搵左架車仔,就走左了。幾隻篋一架手推車,裝到上去行幾步跌晒落黎,鬼佬見到都笑。點解唔分開兩架車裝?
「三蚊架呀大佬。」
好賺到機場,拎架車仔咁少野都要收你錢,仲三蚊喎唔係少喎!老細搵番黎果架都係執人地用完掟埋一二邊果d。當我成功推到入去排到隊,老細就出現了。
「時間剛剛好喎老細你真係!」
雖然我地已經叫做早,六點未夠排到隊,但條隊已經係恐怖地轉左幾個彎,龍尾望唔到counter咁遙遠。其他香港團友七點幾先出現,六點未夠已經排緊的我不禁沾沾自喜,因為我地咁早排都要排到差唔多第百幾個位,佢地咁遲到,去到二百幾號籌都有!仲唔死?點知真係死唔去。距離上機一個鐘,機場突然新措施,先分流加開兩三條線,之後所有半個鐘至一個鐘內上機搭客唔使排隊,可以直接去櫃檯報到。枉我一番好心覺都唔訓一早起身黎排隊。
「頂你個肺!又唔見上年我遲時開快線俾我,等我唔使遲上機?


同埋,發現自己蝕底左。原來機場有輪椅服務。唔係俾殘疾人士用,係俾肥人用,美國人幾肥你知唔知,有d真係肥到好恐怖企起身都有難度,如有需要可以向機場申請輪椅,會有專人幫你推車推行李,仲免排隊直接過關。
「早響啦。早知我都開架車玩下啦,專人服侍又逢關過關咁爽。」
因為有快線加分流,入到閘,仲有大把時間,食多個早餐都夠。




...都係果幾間架喇。仲有乜野可以揀丫美國?與大力水手同樣好頭好尾道理,
今年,同前年一樣,臨上機離開拉斯維加斯,告別作係Burger King。




煙芝蛋包加薯蛋&朱古力奶,未連稅US$7.19。
齋食薯仔都飽。很多。



回程冇咩麻煩事,第一程機LV到洛杉磯準時上準時落,加上內陸機間架舒服好坐,我對聯合印象好左少少...係少少咋。十點三落機等下程,有兩個幾鐘時間,雖然機場冇咩好睇,唔行下都唔得啦訓都訓到悶。有幾間賣書同報紙雜誌,本身諗住買認真音樂書,點知,大鑊:




「澳雪。」



香港書局賣書。美國書局都係,但賣埋漫畫,雖然應該叫做圖畫小說graphic novel,感覺上高層次一點的。唔係多,個架唔大同得三層嗟,但睇個架都見到,有一半以上係日本漫畫,日本文化已經深深入侵美國,就連一d美國漫畫而家出品或翻印,都唔似平時大大本出,而要縮印成日本漫畫噉細細本,因為新一代美國人已經好似我地香港人,係睇日本動畫漫畫大,拎上手要細細本個size先有親切感。但我仍然死忠追美國漫畫,間書局有好多驚喜,買完一本又一本,唔係要上機,分分鐘見到所有執晒。


買完坐低即睇,十二點二上到機一點起飛,除左有時聽下歌訓下覺,全程睇書。影多兩張相交差就拜拜:





因為,程機同d雲一樣,冇野好寫。睇書好過。




10/5/2008 SAT

最後一程機,搭得非常之唔聚財,覺訓唔好,專注睇書同聽歌,搭過幾次飛機,冇邊次會及今次咁唔開心,唔舒服又冇野好食。
「我發誓,如非冇得揀,永不再搭聯合。」
好在衰極都有樣野好,就係準時,同香港人工作效率實在高(香港是一個極端的地方,差的可以比大陸更差,但好又可以好過世界上好多大國家),六點十落地,極速半個鐘已經出到巴士站等上車,搖一輪巴士九點三就返到屋企,久違了。雖然成日講到香港點衰點灰點戇居,去外面走一走,即時知道自己幾咁渺小同知道天高地厚,同能夠體會到點解我地眼中「食晒屎」的香港,仲係好多外國人眼中「世界上最好城市」。有時我地應該為大家身處這個小城市的成就感到自豪,雖然我自己都覺得香港地好還好,撐唔落的部份比撐得落的多(好多)...


不過,返到黎香港就算啦。我都想好似美國噉一返到房立即撻上床咩都唔理,但身在香港地冇可能咁得閒,清過行李(最爭執行李&清行李),又要立即整機,部電腦由當初壞Window,變成而家機都開唔到,都唔知係咪上機過關時d海關關員隨手一掟掟壞左,定膊機上面凍過頭機入面積左水,總之灰啦。最後,即時衝出去拎番本《紙談音樂》,梗係有野睇啦:

EVOCATION《Take Your Soul》@re:spect Issue 11



除左抖番抖,唔少得係睇睇此行收穫有幾豐富。絕對唔。但貴精。




「邊個話一定要用膠袋?」


每次去美國,最難諗就係買乜野手信返香港俾同事,之但係唔買會死人架俾人鬧死架!有個同事就係上年出左差冇買野返公司,俾會計靚女唱足一年!始終靚女包養我每日早餐,為保生計,都係買d野返去交交差好,只係美國實在冇野好買,貴野唔好搵我亦冇錢俾,cheap野較適合,結果全部Costco搞掂。

大公司就係唔同,唔用膠袋用硬卡紙盒,加多個手抽俾你方便運送。因為d超市你冇車冇乜可能去到,每次肯定買好多野買定最少半個月所需,一出門口已經係露天停車場即時掟上車走人,膠袋都冇乜用啦成個盒俾你最實際。而且大家買完野行埋一齊,
「乜你咁cheap呀仲用膠袋?我用紙盒啦已經!」
好似個盒仲適合當手信多過d野食!




Reese's Fast Break


咪睇劉Sir日食夜食,我日日買朱古力同零食,就係為左試出邊隻最好食,決定買邊種返香港做手信(well,即係等我返到香港都有得繼續食啦),結果係Fast Break。雖然怒甜,不過花生醬真係好好味,Costco見到有boxset買一盒三十二包,旋掃。返到香港開個盒睇睇先知道,原來boxset唔係條裝,而係蛋撻形的朱古力餅,一包兩塊即係一盒成六十四件。只係呢個蛋撻version比條裝更甜,我已經係好食甜之人,食左一件已經甜到喉嚨痛。
「所以話美國人真係乜叉都要extreme。」
熱愛美國的劉Sir都頂唔順,其他同事更加唔使講啦,成盒放左入雪櫃冇人理,等劉Sir一個搞掂佢。

我研究過,呢隻朱古力撻最好食的方法,係開一包兩隻撻掟落杯,之後倒粉(任何,公司最多係奶茶同咖啡),加熱水攪勻&攪溶,自製朱古力咖啡/奶茶花生糊。仲研究緊個更extreme的食法,就係幾隻放入微波爐,熱溶成朱古力花生醬搽麵包,麵包淡口中一中和,照計唔會太甜仲幾好食。值得一試,老細肯俾我噉樣玩公司部微波爐的話。

「後來先知道,原來呢隻Reese牌,都屬於Hershey!香港到美國日日都係食Hershey出品,我真係逃離唔出佢地魔掌!」




一百卡路里套裝


此乃西洋馬仔也。一盒有三十二條,包括三款餅乾,有大家見慣見熟的Oreo同Chips Ahoy變身米餅,盒面寫住一百卡路里,講緊食晒成盒先一百,定一條已經一百?(似後者)會揀,因為Oreo果隻真係十分地好食,可惜另外兩隻...

「即係又係買俾自己食的。」




精選日本城拖鞋乙對


拿拿拿呢個先係大獎呀!鑑於美國佬的自大同麻煩,每次出入境寧捨麻鬼煩,過關手續包括除鞋。而且每程機要逗留飛機上十幾個鐘,為左舒服,我去美國同返香港都係著拖鞋。(係,我承認方便為次,劉Sir鞋都懶著的惰性才是主因...)因為屋企對拖鞋太殘,出發前去日本城行左個圈,見到呢對好似幾靚又只賣十二蚊已經唔需要考慮。當然,而家經劉Sir著過,加上同佢一齊坐飛機上過天再踩盡美國麈土返到香港,即時升價萬倍啦!

「底價$77,每口價$7,立即購買價$777.7!請大家踴躍競投!」



買俾人地的手信幾求祈,敷衍交差就算。買俾自己果d就正喇。今年好在回程洛杉磯等轉機有個幾鐘空檔,唔係唔會執得到咁多正野:




V for Vendetta
Retail Price US$19.99 + Sales Tax US$0.16 = US$20.15


電影版當年唔知點解居然冇去到睇,照計我一定會去睇喎故事吸引加上《Matrix》導演!而家見到原著,唔理咁多立即買番本,由等上機睇到上左飛機睇到落機搭巴士返到屋企,近十個鐘頭先睇晒序同漫畫部份,仲差個跋。真係好好好睇,唔知電影版會改成點?有少少擔心,因為原作者係英國人,電影變成荷里活出品,分分鐘改頭換面晒變左講美國大美國。或者睇完漫畫版就夠。

《V for Vendetta》作者係Alan Moore,一個英國作家,作品包括《LXG》,內容探討人性、心理、現實,風格黑暗反傳統。《V for Vendetta》同《LXG》已經殺晒,仲未睇佢其他名作,已經知道呢條友冇得走值得追全線。所以坐低睇左《V for Vendetta》冇幾耐,立即走番入間書局買埋佢另一本名作,一本史上最重要美國漫畫:




Watchmen
Retail Price US$19.99 + Sales Tax US$0.16 = US$20.15


有幾重要?《Watchmen》係Marvel對頭DC出品,但連Marvel大佬Stan Lee,都開口點名講到明
「《Watchmen》係Marvel以外我最愛漫畫。」
Alan Moore 1986年出《Watchmen》,佢作為英國人,用一本漫畫,顛覆晒之後十幾廿年美國主流漫畫、英雄漫畫發展路向,已經唔可以當成漫畫黎睇,係真正文化鉅著。資料顯示2009年會改編成真人電影,而家有機會遇到,買埋備課。呢d經典,早晚都要收藏番。再經過十幾個鐘,五體投地,服晒。Alan Moore太神。已經唔止係漫畫咁簡單。

「題外話:八十年代除漫畫亦係metal黃金時代,《Watchmen》出版之1986年亦係metal最輝煌其中一年!metal中人向來同漫畫關係密切,可想而知生活在當年美國,會是何等瘋狂!」




Marvel Zombies
Retail Price US$19.99 + Sales Tax US$0.16 = US$20.15


DC從來唔係我杯茶,當中只鍾意蝙蝠俠、另類反英雄派角色同非主線出品(上面兩本《V for Vendetta》同《Watchmen》都係DC發行),就係因為佢地冇Marvel咁天馬行空,例如上面。即係我都唔使講野,你見到個封面都知道本野會有幾正。故事講Marvel世界突然全部英雄變晒食人喪屍。一句已經知道你冇得唔睇呢本漫畫,睇《Marvel Zombies》之前從未諗過有作者有公司可以將自己班角色玩到咁黐線,仲要係好睇到黐線:《Marvel Zombies》係我最愛漫畫之一。呢個只係正傳,全系列仲有兩個前傳、續集同其他crossover,連封面都出到一本特集(你話插畫得個睇字?喂,值啦,d喪屍封面正成噉!)。我有心追晒,可惜去美國時未出齊。睇仲有冇機會啦。


其實唔止咁少,好似仲見到Frank Miller《Sin City》五本,未連稅已經六十蚊美金,而且我相信就算執晒呢五本都未齊晒全個故事(電影版其實只得原著整體好小部份),佢另一本名作《300》都有,睇完套戲,確有動機想執埋漫畫版。又見到幾本蝙蝠俠,都有興趣,因為漫畫家中其中兩個我的最愛就係Alan Moore同Frank Miller,唔係因為佢兩個,就唔會有我地而家睇緊的美國漫畫、唔會書局都有得買漫畫咁被認真對待(你有冇見過香港有書局會擺賣港產漫畫,非益智果隻?)。DC中較鍾意係蝙蝠俠,就係因為蝙蝠俠曾經經過佢地神來兩筆,始終作為漫畫角色,反英雄、負面、黑暗、充分缺憾先好睇。要講故仔同歷史可以有排講,不過呢度一定唔適合。搵機會啦。或者,下次拉斯維加斯時,如(還)有可能?


「而且,都未搵到metal野買。齋metal、變形金剛同漫畫,令我想立即再飛返美國住番一頭半個月。當然,要出公司數先襟計。」



不過,點敢唔返,即使我幾想留低?萬幾樣野跟,就算日頭份工唔理(都幾忙架近排),夜晚都死。第一份禮:

Project Unleashed 2008 by TRHK

Featuring:
CELEBRANT (Belgium Blackened Death Metal)
RUDRA (Singaporean Ethnic Death Metal)


呢壇算小事。跟住,先大碌。


Chili Band Show 2008
(暨BLACKWINE新歌發佈會!!)

場騷搞手當然唔係我 or TRHK。只不過呢,幕後大把野要我跟。仲要落到機先收到通知,原來咁精彩。總之,記得去睇騷啦。跟住仲有。借BLACKWINE一句:

只是前瞻 是個開始