LV


7/5/2006 SUN

今日起要闊別各位朋友&TRHK一個禮拜,因為要起程到美國拉斯維加斯公幹一週,非常好彩趕得切過埋DISAVOWED Live先至出國,除左要放低TRHK一個禮拜,已無牽掛。八點起身九點出門,咁早起身除左因為要食早餐,仲因為要兌美金,即係我得閒遮人地唔係嘛,所以食完早餐就要企定定係找換店門口等開門。十點半返到公司搬篋落樓,加埋一個同事同老細一行三人出發到機場。行程係香港過洛杉磯再轉機去拉斯維加斯,轉一次機算好好架喇本來行程係先到日本東京再過美國再轉一共三程機。一點半起飛,排好Q耐隊check in之後入到閘仲有時間食野,見到香港碩果僅存之一間漢堡王Burger King,但冇食到,因為有間變種肯德基Popeyes大力水手炸雞(但除左個名之外,從食物到裝修完全同Popeye/大力水手無關),又係賣「秘製炸雞」加大量非常不健康油炸食物亦即係劉Sir最鍾意食果d,噉可以咁唔健康,劉Sir又點可以唔食佢地?三條友叫左兩個餐,一個餐又係似足肯德基兩件雞加個薯蓉係個價錢貴過出面肯德基成最少十蚊,好在杯汽水仲要大過七十一大杯裝係多到重手墜手果隻,超抵飲。d雞唔好食(所以機場以外只見到肯德基見唔到大力水手),但個薯蓉超正食過咁多間呢間最好食,所以不斷地搶同埋食,話係三個人夾但實情又係我一個人食一個餐。咁正,早知唔食早餐!

食完雞就到上機時間。我咁大個仔,廿幾年黎第一次搭飛機!(當一條友可以頹到身為香港人廿幾年仍然海洋公園都未去過過海都嫌辛苦,你覺得懶到死的佢會唔會自願出國?)人人都話搭飛機好辛苦,尤其是起飛果時好大鑊
「氣壓好鬼大架,起飛果時個頭同對耳好痛架!痛到你會捉實張凳係噉尖叫架!」
咁大鑊?點知...從頭到尾,完全冇事。甚至係起飛左飛到最頂都唔知唔覺。
「喂點解一d都唔刺激?回水!」
上到機第一件事,即時除鞋除襪拖鞋都唔著赤腳走黎走去惹來眾人鬼&空姐側目。上到黎我就當正係自己屋企架喇!應該話,屋企都冇咁嘆!

今舖相當落本搭國泰,當堂開心到暈,因為坐得舒服服務又好仲要有電視睇!搭成十二個幾鐘飛機冇部電視捱住確係悶到死,基本上近幾個月明珠台大半劇集同節目呢度都有得睇,仲連有線同無線節目都有,但最正都係有戲睇,一開波已經係《金剛》,雖然呢套戲原版到而家新版都冇乜興趣,但反正上畫果時未睇而家又送到上門,冇計,迫住睇埋!睇睇下就有飛機餐食,食薯蓉西菜呢d好味夾唔飽雜食野我最鍾意!最正係超多甜品,有雲石芝士蛋糕!正!我收集晒老細加同事食剩d野同所有甜品一共三舊,一面睇《金剛》一面食,夾埋食左兩個餐!非常開心!(雖然《金剛》確實唔多好睇)
成程機成十二個幾鐘,睇完戲食完飛機餐都仲有九個鐘,即刻聽住THE GATHERING訓覺!正!屋企都冇咁舒服!咁早訓,主要因為要就定美國時差,果邊快香港九個鐘,即係起飛係日頭過到去都仲係日頭,而家要訓定覺先得。老細同同事兩個都係搭長途機甚至搭飛機都訓唔到覺果隻,但我呢d人從來捱慣夜平時訓得少,咁嘆之環境下一訓就訓得著要訓的話一定控制到自己訓覺,所以時差呢家野,永遠唔會係我身上出現,所以一睇完戲已經立即訓到,係飛多四個鐘經過日本因為遇上不穩定氣流拋拋下先拋番醒,不過冇覺好訓一樣咁開心,
「噉先叫做刺激番d!」

訓左五個鐘即係香港九點零鐘起身,即刻印印腳叫空姐整個杯麵黎嘆嘆先!(我地呢d擺到明當呢度係自己別墅)之後再睇多套戲,又搵搵空姐姐姐:
"May I help you sir?"
"Jie jie, tou orr! Tsui geor bui meen chung yau mo k ta yeah sic? Tau sin gor fay gay chen jing ar! Jing dor gor bey or la! Ten gong lay day yau shu go sic tim wor! Chung ng la la lam ling gor lie bay or???"
"...Do you want to read newspapers or magazines?"
"Magazine? Jing ar!!! Or yiu tie Terrorizer! Metal Maniacs dou mo man tie!"
"...or I could help you in other ways?"
"Gum ar...link bo din low bei or da dip peng la! Holland moon!"

「...阿生唔好意思麻煩你癲少陣收一收皮唔好嘈住其他人訓覺丫唔該!」
國泰空姐唔止個個都高佻苗條眉清目秀青春後生靚靚靚靚,服務態度仲好好忝!所以我鍾意國泰!所以我地紅燈山丘中校花搏左條命都要入國泰!(仲記得花姐嘛各位?雖然以當今國泰空姐標準黎講,佢靚左少少但矮左少少又肥左少少又老左少少!))
講開又講,唔知點解個個空姐對住我都係講英文,我講親中文佢地就會"Sorry?"要我講英文先識應。同事曰:
「噉都唔明?一睇你個款成條墨西哥移民噉,唔講英文唔通講中文咩!」


8/5/2006 MON

你地8/5 00:00,即係我飛機上面9/5 9:00am,你地(差唔多)訓果時,我食緊早餐。睇多齣戲之後又訓過,半夢半醒之際空姐又遞水又遞橙汁又派多個杯麵,服務真係好,黑媽媽飲住橙汁聽住THE GATHERING瞌下瞌下確係一大享受,之後再派真正早餐奄列香腸煙肉薯仔班戟,又係好味夾唔飽,一流!我非常厚面皮地拎多一set,跟餐送果個甜品焦糖雲呢拿布甸超超超正,我一個人食左三個仲要每個都加多一盒溝奶茶用果d花奶。搭一程機十二個鐘已經食左咁Q多野!我明白點解d外國人可以咁肥喇!搭長途機d空姐係噉遞野比你迫你暴飲暴食,擺明食肥你!


國泰香港飛拉斯維加斯飛機餐,d「輕膳」真係正到爆!
話係「輕膳」,但食親起碼食兩set,結果仲重過「重膳」!

食完早餐戲又睇晒,同事直頭無聊到摷卡通片、《名曲滿天星》呢d無線節目同好益智果d港台節目黎睇,我繼續聽THE GATHERING訓覺。飛機上面8/5 11:00am亦即係各位(應該)訓緊的8/5 2:00am,終於落機踩場洛杉磯(降落同起飛一樣好大問題:「喂!又話會好痛好緊張好大件事?我乜事都冇喎!回雙倍水!!!」)一向對美國冇乜好感,今舖更甚,基本上個機場純粹係設計比美國人用,落左機之後係完全冇任何圖示同提示叫你去邊度搵邊個部門出關入境,基本上你英文唔得的話過到黎係完全唔知點算,911之後又勁多入境措施查野又慢,首先要好似做美國簽證噉,打左手食指指模再打右手食指(有條友超搞笑唔知係咪唔識聽英文個黑鬼叫佢打指模時佢隊左隻中指俾佢哈哈哈),然後影番張相再填兩張form就得,好似好嚴好反恐,實情超級求祈,即係我過境個款頭髮長又印印腳已經樣衰,我對住果隻鬼坐係度可以印得仲勁過我望住佢直頭好似地震噉款,之後差唔多乜都唔睇係問過幾條問題連d表都唔睇就係噉吸印吸印撕表撕表拜拜 - 點解我知佢冇睇?大鄉里出城的我第一次黎到美國,表格d地名勁多填錯好似「出發地:香港 目的地:香港」,d美國地區同省名又串錯晒,錯到噉款,既然都入到境!可想而知,各位美國朋友絕對有劉Sir咁求祈!所以I love America!
點完相之後再去拎行李,仲型,成個篋比班友掟到凹埋。拎得番d野都未走得,再要過多幾關,先正式出到機場,煩到爆。一出,非常開心,而家洛杉磯係十八度,以為機場入面開左冷氣好涼好舒服?出左機場係更涼更舒服,成個天一舊雲都冇,有風又有太陽完全唔凍非常舒暢,呢種天氣香港都唔知幾多年先出現一次!!
「正呀!正呀!!正呀!!!」
「正飽佢啦你!陣間過到拉斯維加斯度數起碼高呢度一倍,熱死你呀!」

出左機場再到下個閘口做埋最後入境手續,首先黎個熱心人士主動上黎講解指路,
「美國人都幾熱情喎!」
先君子後小人,教完你路之後即時話你聽其實佢係籌緊款叫你捐錢,教完你路,你都唔好意思唔捐啦。睇佢個錢包,呢招似乎幾使得搵到唔少。行多幾步又有人話幫你運行李,以為係機場職員就俾佢裝車,點知行到去目的地放番低:
"Ten dollars please!"
行幾步路就十蚊,超好賺。估唔到而家美國都會噉樣半屈半搶地賺人錢。
「美國幾時變得咁大陸呀???」

去到出關大樓,仍然乜圖示指示都冇,問左幾隻鬼先知道要去邊度報到,不過去得到都冇用,又係乜都唔講去到你都唔知做d乜。首先問個鬼婆去邊度報到,淨係叫你拎本護照出黎
"Let me check for you."
點check法?唔知呢,因為講完呢句之後差唔多我同個鬼婆咩都冇做過,佢已經放我走人。之後撞下撞下入左條隊排隊等check野,繼續得個等字。美國佬實在好鬼健談,大家唔識第一眼見到你都可以無端端同你吹水,三九唔識七迎面行過都可以同你講一大堆野,特別係黑鬼。排呢條隊撞到兩個鬼佬,都係一行埋黎已經好似好熟噉開口講一大堆野,大意都係
"Wa mud yi ga gim cha gum q man gar!"
我呢d無聊人當然係同佢吹水玩盡佢哈哈。或者因為我係玩、睇同聽美國野大而唔係好似各位噉迷日本野大,我同美國人熟易過同香港人熟。入到去檢查站,所有隨身物品都要照X光鞋都要除埋(911果次就係炸藥收鞋底嘛),落機到檢查晒成個半鐘,終於正式入到美國喇!黎過美國,永遠唔會覺得香港野貴,永遠唔會覺得香港人肥。基本上落機開始見第一個美國人無論男女黑白,實Q又好掃地又好警察又好呃錢都好,冇一隻鬼條腰係幼過四十寸。你點肥都好,一過到美國,立即覺得自己原來好X瘦,所以呢幾日我會無後顧之憂地瘋狂食野。同埋,乜叉都好貴,一包香港賣四蚊之薯片,呢度都係賣四蚊,不過係四蚊美金,打埋稅之後升價八倍;去Burger King食個餐,冇七十蚊港紙落唔到樓。所以我咩都冇買冇食,
「貴過香港一倍價錢我死都唔會買!寧死不屈!」
所以最後只食左個幾有興趣的花生醬小麥條,US$0.99。好唔好食?
「...一分錢一分貨啦頂!」
美國人收入多數都係一萬港紙左右(唔計拎救濟金果d啦),生活指數高稅率又高(買親乜都要加銷售稅7.75%,即係買乜都要加一,唔係買平貨減價貨查實好甘),我地睇落好辛苦,但住屋平(五毫子一平方米再加一萬蚊成間屋俾埋你,勁平),最重要果樣日常必需搞掂左,計番又可能冇香港咁大負擔,但冇乜娛樂係真,七點出到去除左食肆乜舖頭都閂晒,冇乜野玩,反而仲多錢,其他野貴左仲有好多地方補番,所以我地覺得超貴,美國佬反而覺得冇乜野,反正放工之後冇乜娛樂,食同購物成為最大消遣途徑,可以狂食狂食狂買,所以一間超級市場淨係停車場都有半個足球場咁大,可以晏晝十幾蚊麥記夜晚廿蚊鋸扒每日如是,可以通街超肥佬勁肥婆見過有隻野八十幾寸腰仲可以彈下彈下噉行坐飛機一個人要坐兩個位去餐廳食野坐卡位係坐低左差唔多要整爛張檯先出得番黎完全唔明點解呢d脂肪生命體仲可以生存到。大家千祈唔好俾美國電影呃左,好Q多美國人肥/超肥/癡肥/太肥,完全同美國戲入面所有男女兩回事,黎過就知道冇可能個個男女主配角都可以咁瘦咁fit得門僮司機行先死先咖哩啡呢d先係肥人,事實上調番轉至係。可能出番大城市會好d,但普遍都係太肥喇。見到有咁多脂肪人存在,當堂全無後顧之憂可以係噉食野,
「食咁多野會肥?唔覺喎!我條腰四十寸咋嘛都未夠五十寸仲係著細碼衫咋嘛!仲話我肥?」

距離轉機仲有一個鐘,買野食野太貴,三條友唯有拎飛機上面呃番黎果副啤牌出黎鋤弟。我呢d一向唔鍾意玩啤牌,甚至係逢同數字有關都唔鍾意玩,鋤弟呢家野已經幾年未玩過喇,係噉比人怒炒(因為玩得太求祈實在冇乜興趣玩),十幾舖之後一贏左第一舖立即
「夠鐘check in喇!唔好玩喇!要起行喇!」
US 8/5 2pm即係HK 8/5 5am,一行三條麻甩佬上第二架機去拉斯維加斯。內陸機好細架,老細都話
「我搭飛機搭左十幾年,都未試過搭架飛機咁細!」
算好架喇,我地隔籬果班機係螺旋槳飛機黎忝呀!


廣闊非常的洛杉磯機場

因為咁細,服務都隨便d。之前國泰有電視,起飛前果d求生安全指南係播片教你,呢度冇電視,只得一個肥鬼婆播錄音帶之後拎d道具出黎跟住錄音帶示範,但基本上唔留意的話,係完全唔知個肥婆d動作係示範緊你知安全帶點扣、有事時點算,因為企到九里遠之外,示範d動作同架飛機一樣咁求祈。起飛之後先發現呢程機冇飛機餐食(已經食上癮喇。我愛國泰!),係得肥婆俾一杯汽水你飲咁簡單(架機咁鬼細,睇個肥婆都只係剛剛好可以係條走廊度過到都覺佢辛苦),窗外面又冇野好睇,冇癮,唯有又訓。


呢塊係臨入沙漠前最後幾滴水。





洛杉磯飛去拉斯維加斯,沿途只有沙山石(ZZZ...)



ZZZZZZ......噉就到左。估唔到沙漠入面都有咁大個城市。

訓左個幾鐘之後終於落機。


「Welcome to Las Vegas!你的假期開始了!」
「好野∼∼∼」

一落機已經
「嘩---」
拉斯維加斯原來好大,出到機場第一眼係成排&勁多&周圍都係的老虎機,好多鬼婆落機第一件事就係打老虎。


打 老 虎

間機場成個商場咁大咁靚,拎行李都要搭無人火車去第二座樓,最過癮係間機場完全唔知點解,free到任何人士&動物都可以入黎。


唔知點解會出現於拉斯維加斯機場行李大堂的小狗乙隻(仲比佢噬左幾啖忝)

一出門口,好晒,頭先洛杉磯十八度呢度剛好炒雙三十六度,好在拉斯維加斯係沙漠區乾熱唔濕晒住都唔易出汗,冇咁辛苦。拉晒行李出外面,首先要搵路去酒店放低d野,有好多轎車兜生意由四十幾到六十幾不等(美金啦當然係!)。



「四十幾蚊搭呢d轎車?貴啦!我地上次黎,搵架超長轎車加個廿零歲超後生靚女司機都係十五蚊咋!」

因為機場去酒店一個字車就夠,使成幾十蚊搭果個零字轎車確係太豪(「但我就係想咁豪喎老細!轎車加廿零歲超後生靚女司機喎!」),理所當然地老細的選擇係搭穿梭巴。有d似香港泥孟的,等齊全車滿晒再由機場出發兜勻咁多間酒店,雖然我地間酒店係最近機場,但因為係兜成個圈去到最遠先再返機場,最近個站反而變左最後一站,一個字車變成大半個鐘。雖然沿途超靚超多野睇,不過我乜都唔知,因為我不斷地ZZZZZZ...(冇錯去到邊度只要有得瞌埋眼我就訓得到,所以我永遠唔使擔心時差呢樣野)


我間酒店


酒店門口唔知乜狗


我間房

終於去到酒店,雖然只係二星級冇乜野食冇乜娛樂,但間房夠大設施又唔差乜都夠,特別係出邊差唔多四十度,入到黎有冷氣涼,即時撻上床唔想郁,訓陣再沖個涼刷個牙,又走出去食野。雖然拉斯維加斯好豪,但我地酒店剛好座落分界線,對面街全部酒店係五六星級,一過馬路黎我地呢邊已經係二三星級,再行落一兩條街已經係貧民區,對比好大。我地呢d當然係向貧民區進發摷野食。因為貧民區住滿墨西哥移民(墨西哥情況其實同中國差唔多,係叫做有錢少少噉解),通街都係墨西哥人甚至有墨西哥電視台,有好多墨西哥野食,又有西餐有日本菜,但三個香港人千山萬水黎到美國,都係食...


中餐。果然大wok。

雖然黎到都要食中菜係幾戇居,美式中菜原來只係落重味精噉解,但抵食真係幾抵食,叫左三味送但查實只叫一味送三個人都食唔晒。因為酒店咩都冇有果d都要計錢,食完飯行定便利店買定野,好多野買連褲都有得買,又買野食又買水,一唔覺意買錯左支梳打水,第一次飲,實在超難飲,完全唔明d鬼佬點樣飲得落肚。好在仲有個雪糕補番。


Big Bopper,呢隻雪糕夾餅超XN正!


除左雪條,仲帶左好多杯麵黎。但係,一個都冇食到。點解?
「弊!記得帶麵,唔記得帶叉忝!」
即時冇宵夜食,只能望麵止餓。我同事直頭餓到發夢都想食杯麵。
「我發夢夢到自己返番去香港公司個pantry度拎叉再返黎美國酒店呢度食杯麵呀!
發夢都發到噉,我真係想食杯麵想到癲左!!!」

黎左一日,發覺拉斯維加斯呢個地方真係好嘆好閒,九成人態度都好好又好玩好笑,人口密度低d屋又靚到爆,不過做野好慢好懶懶閒,馬路超少車d車仲要讓人行先完全唔急(換著係大陸,你過馬路時撞正架車又過,佢實唔Q理你自己鏟左過去先鏟著你係你錯),連d雀都唔驚人,仲要有好多基佬騷舞男騷舞女騷(用到"fun"黎形容真係夠晒fun),最抵死係鹹書通街都有得拎,佢地都唔志在喇反正有賭的地方就會有黃當宣傳益下你又點話!


美國d雀完全唔理人,你行到埋去都廢鬼事睬你。係美國,連d雀都肥過人。呢兩隻算(好)瘦架喇。
「我見過最肥果隻雀,成隻雞咁肥呀!」

(好明顯呢條友係度吹水)


知唔知呢間屋係咩黎?你點都唔會估得到,呢間靚成噉之屋仔係......網吧。



各位男同學,當你去到拉斯維加斯,記得留意街邊呢d箱仔,入面有免費鹹書拎,仲要通街都有呢d箱仔忝!
(但當你真有錢到去拉斯維加斯果陣時,已經唔使貪呢d免費便宜啦)

九點幾返到房,即訓!從未試過咁早訓!我9/5 5am即係你地香港8/5 8pm起身,難得部腦摷到網絡連下斷下噉無線上網(唔帶埋部腦黎,點生存?)上網check check email,又同各位朋友嗲嗲。
「喂!去左邊呀你?call極都call唔到你!」
「咪就係去左美國囉!」
「咁得閒?唔使做咩?」

確係唔使做。真係好鬼得閒。(呢條友過黎公幹都當正自己係渡假噉款,冇得救)摷野玩摷到要搵機打忝。


「嘩!有機打!正!」
冇錯,房入面有得打N64(已經十分outdate了,呢樣野對而家d人黎講只等同於當年之紅白機),
但要俾錢,一隻game US$7.45未連稅。電視有戲睇,又係要俾錢。即係乜都唔使諗。
(又做"Underworld"!但睇都唔係呢度睇啦,搭飛機一二集都有得睇,唔使錢仲有得食住睇!)



冇野做,五點幾走出房影下風景。拉斯維加斯夏天基本上除左朝早日出前同黃昏日落前,萬里無雲。
呢度日長夜短,八點幾太陽先落身五點幾已經開始天光,日頭夜晚差成十幾廿度,淨係六點同七點一個鐘都差十度。
冬天仲正,日頭三十幾度夜晚落雪,我鍾意!

入房撻番低,訓係床吹吹冷氣寫寫呢幾隻字,咁悠閒都唔多想聽嘈野,係噉聽番dpop野,聽王莞之隻《Ivana》《I Love My Name》(出新碟呀快d,最好係成隻碟都好似《雷電》咁反香港流行傳統;其實《I Love My Name》呢隻碟好暗,聽《雷電》時好似聽緊PECCATUM)、《時代》選為05年亞洲最佳唱片之一之陳奕迅《U87》(有水準,但確實唔覺點突出)、謝安琪《Kay One》(呢一隻係我心目中繼劉以達《麻木》同余力機構《快活》之後最愛中文唱片,亦係冇乜邊幾張會每一首歌都鍾意由第一秒到最後一秒都愛到死之專輯)、盧巧音《天演論》(始終受商業性拖累,聽多左有「keep唔住」的感覺)、同最重要的關心妍新碟《Jade Loves》(好好聽!)。如此生活,實在太疏乎了。搞到我已經唔想做展覽,繼續撻係度享下清福算。


9/5/2006 TUE

LV 9/5 7:15am/HK 8/5 10:15pm,老細已經過黎摷人,所以此行我鬧鐘都唔帶,因為知道老細實會一早過黎摷醒。刷番個牙裝裝身就出發食早餐。食乜?



...黎到美國,都係逃唔出麥記魔掌。
「冇得揀架喇!酒店呢頭最平係麥記架喇!」
唔知係我地早定美國真係咁嘆,早餐時間成間麥記五份一滿都唔夠,呢個情況香港有幾可會發生?不過服務真係超超慢。


同香港比,美國麥記早餐選擇多好多。同埋...貴好多。


「你做左麥記會員,拎張會員證食麥記儲分未?」


煙肉McGriddles餐,美金3.49。McGriddles其實即係早晨全餐d班戟入面加醬再烘。
結論係...唔好食。成個餐最正係薯餅同埋香港冇得飲的麥記朱奶。


見到有呢個新野Cinnamon Roll,即刻買個試試。咩黎?


「嘩!咁Q大!漏到嘔!」
原來係成隻手掌咁大之焦糖奶油蛋糕,都只不過係US$1.79,美國真係乜野都要大乜野都要肥!
連打邊爐連擦十幾碟肥牛仍面不改容的劉Sir都食唔晒一個&唔敢(再)食!可想而知幾咁恐怖!

或者有朋友唔知道,其實每個國家麥記除左野食唔同,味道都有唔同,你去歐洲一隻味,去東南亞一隻味,去美國又係另一隻味,而香港同美國麥記最似,因為用料一樣,例如薯餅香港都係用美國薯餅,豬柳又係美國進口。老細食勻咁多國家麥當奴,都係覺得美國麥當奴係最好食,亦即係話香港麥記係全世界最好味之一。香港麥記fans最幸福。但當然,除非香港麥記肯減價or整多超勁多特價promotion,又或者好似呢個trip噉老細包晒我咁多餐麥記,噉我先會繼續支持香港麥記。

八點半食完個早餐就起行去展覽場館set定場等聽日開始,我地酒店行去只係兩三個字,比起官方指定果間五星級酒店仲近。頭先食早餐仲係冇乜太陽又大風好涼爽,隔左個零鐘已經熱到九彩,成個天完全冇雲即係晒到正,好在沙漠區夠乾燥冇乜汗出,我呢d骨頭又賤慣唔會好似同事噉冇汗出散唔到熱焗到同燥到流鼻血,所以黎到呢度真係非常合皮。去到會場先發現,原來今日十一點鐘先開會之後至入得場,咁早黎到根本冇用!冇野做點算?唯有走過去隔籬間五星級酒店賭番幾手。


打 老 虎

五星級酒店,果然好大好豪!呢度比老虎機淹沒都只係酒店賭場入口,行入去仲有超極勁大多賭檯,果d先至戲肉!但係酒店幾多星級對我黎講分別唔大,因為係呢度酒店房二三四五星級都差唔多,d星只係話比你知間酒店有幾大間賭場有幾豪酒店入面有幾多野玩野食,但我呢d張床舒服好訓夠冷氣又夠乾淨已經得,我二星級酒店間房甚至仲大過呢間五星級酒店間房(突然間好自豪於自己住二星級酒店忝)。老虎機絕對係我見過最戇居玩意之一,永遠信唔過機械呢家野我點都覺得一定係set到你永遠贏唔到大獎玩幾十舖先比你贏番幾蚊,好似我呢d冇野做迫住陪同事同老細玩,唔夠半個字已經冇晒身上面所有散紙夾埋差唔多一百蚊港紙。但d鬼佬仍然可以樂此不疲地坐係度入錢篤篤篤篤唔夠半分鐘再入錢篤篤篤篤唔夠半分鐘再入錢...除左篤同埋入錢,乜獎都冇。或者因為太肥唔可以周圍郁,呢樣已經係肥人最大娛樂。
「我發誓,以後一定唔會再玩老虎機,一定唔會比賭場呃我d錢!」
我同事曰。曰完之後,繼續以刀仔鋸大樹心態不斷入錢再拉入錢再拉...結果當然係本都回唔到啦。
「又輸?我發誓,搏埋呢廿蚊之後我以後以後一定一定一定唔會再玩老虎機!!!」
我已經冇佢咁好氣走去開會算。

十一點開會,主要係香港貿發局同各家參展商講解今次展覽重點同要注意地方,基本上冇乜野特別,因為一直只係有個阿叔係度提醒大家
「你地記得要注意...」
注意d乜?完全唔知,因為講極都講唔到要注意的地方是甚麼,總之要注意啦!所以我同全場所有人一樣,最注意就係果度d野食,好Q多麵包同野飲,一飲就半成jar蘋果汁極度開心,包就冇乜興趣架喇只係係噉拎拎左成袋去做lunch,但噉樣做完全唔樣衰,因為連主持人都話
「租間會議室要俾minimum charge,呢d野飲野食我地都係焗住要,最弊我又唔鍾意食,幫幫手清左佢地啦各位香港同胞唔係我地貿發局蝕晒本架!」
起初我係有少少覺得幾樣衰下,但再睇睇其他香港公司,先發現我確實好樣衰:
「唔係卦?你地拎咁少?搞錯呀!」

十二點去到場地開始set場。之後已經冇咩好寫,因為砌足成日 - 真係砌足成日。當人地個個黎美國擺展覽都係帶d主要產品加d相就夠,而我地仲係成間工廠搬晒過黎咁滯,而呢間「工廠」平時搵十幾個人包括幾個工程師一齊砌都要砌四五個鐘而呢度除左老細算半個工程師之外夾埋先得三個人一個人要頂四五個人工作量,就知道,真係可以砌足成日。基本上你地呢一晚訓覺訓幾耐,我就係砌場砌幾耐,十二點開始砌,返到房即刻可以撻低直訓飯都唔使食。邊有時間食飯?食埋的話聽朝邊有精神時間見客?


10/5/2006 WED

一直到五點即係你地八點先起身,好耐未試過訓咁耐(八個鐘呢個正常睡眠時間都叫耐,可想而知我呢d人幾咁唔健康)。又起身寫下野,聽聽KATATONIA仲係doom果幾隻,同埋食雪條。冇錯你地9/5夜晚八點幾果時。我食緊雪條做早餐。(...)


Oreo雪條,又係超XN正!



又係麥記早餐,今次係呢個柳蛋McBiscuit US$3.09,即係香港版豬柳蛋個包變做鬆餅。同樣地,成個餐最正係薯餅同埋香港冇得飲的麥記朱奶。

一連三日之拉斯維加斯傢具展今日九點半正式開始。第一日展覽甚至係成個展覽,都預左會好得閒,因為呢個係傢具展而我公司其實唔算係做傢具,成日流流長仲得閒過香港展覽,純粹坐係度等運到。入到會場set好晒野之後,再過香港貿發局個攤位偷西餅食(我愛香港貿發局,如果好似琴日噉再整多渣蘋果汁我仲開心)。好少人黎問野,但蒲親頭果d都係勁客,我就最鍾意呢d,集中幾個最大粒客賺多d又做少d人好過做十幾幾十個濕碎客,但當然,唔落單俾錢我賺,講到點勁都係流。所以我成日當自己過黎美國係渡假多過出差,雖然仲有d一村人衝埋黎之時間,不過幾多人我都唔理,正如我黎到會場第一件事至最後一件事都係開部電腦係噉偷人線上網(全靠我帶埋自己有得無線上網部腦黎美國甚至帶埋黎展覽,唔係有得上網所有人包括我老細都會悶死),係detect到有十幾廿個無線network,但通常每個要login十幾廿次先比你連到線,仲要超慢果隻,個零兩個字之後(有陣時會耐d,睇你幾時咁好彩比人發現)就會比人截線,之後再偷過第二個繼續上網。既然搞得咁大個展覽,好心就整個免費公共網絡啦!但又唔得&唔會,因為會場入面整左幾台電腦入錢上網,要留番比出面d入錢電腦賺嘛,點會咁好死咁容易比你免費上網!美國咩都係錢、咩都講錢、咩都要錢!
除左偷線上網,就係...寫呢段段記哈哈哈哈。證明我幾得閒。係無聊到隔籬得一個人睇檔果d攤位睇檔條友走左去廁所,我走過去扮野睇檔哈哈哈。實在係太無聊。

因為太得閒,成日唔係上網同寫野,同埋周圍走黎走去搵野做/玩/睇/搞,就係望望參加展覽的各位朋友。一個咁隆重其事之展覽會、一個五萬幾間公司參展之展覽會,搞果班當然要多四正有多四正,但估唔到黎睇果班,亦即係各大公司之採購部同buyer,著老西參加唔見幾多個,個個裝扮可以求祈&causal到爆。有d成個球場飛仔噉款;有d點睇都係hip-hop仔多過似buyer;有個著住件背心噉就黎展覽,對手仲要幾個紋身,十足十世嘉五代d行街action game入面d角色,總之點睇都唔似係黎呢d展覽會而似街邊開片果堆;有d香港/中國/上海妹直頭成個MK行街少女噉款,你以為佢or你去錯地方,但都唔夠一個北京妹勁直頭著到成個lolita噉行入黎,總之你點睇入黎展覽會行黎行去呢班友,冇任何一個令你聯想到係某間大公司採購部高級行政人員。早知我都唔著老西整番件band tee入黎算數。而且好多人都有私家車代步。單車?out啦,電動單車都out埋喇。Segway都唔算咩特別野。而家興電動車,一係超大部可以一坐坐成五六個人成團人好似去旅行噉款,一係細細架後面可以裝多成車野好似去shopping噉,睇呢班友噉樣行展覽法真係嘆到爆。不過又係,成個會場成五六萬個攤位幾個足球場咁大,如果真係用腳行,行足你幾日行到你斷腳都睇唔夠一半,特別係美國呢度咁Q多肥人。有個buyer真係斷左隻腳,唔噉樣坐車睇展覽都唔得啦,有條友仲過癮跟車帶埋一個玩具機械鉗(一支柄一邊係個掣一邊係個鉗拉個掣個鉗就會夾埋果隻古董玩具想當年我都有隻用黎遙距拎汽水飲架!),擺明郁都唔想郁!最正都係有個太后出巡,一個鬼婆坐住架電動車,後面有兩個鬼師奶行路跟住,有乜事完全唔使自己落車出手呼喝果兩個跟班做野就得,真夠架勢!

無驚無險,上上下網又一點。(...)入鄉隨俗,今天開始每日都食不健康食品:


Chicken Strips with Fries US$6.75

今日先黎一個炸雞。呢個會場完全地冇野食,一係就係炸雞熱狗pizza漢堡包呢d超唔健康美國野(I love America!),唔食美國野的話全場得一間個名叫唔知咩Sushi咩咩但係韓國人睇檔的中國飯店(...),但成十一蚊食一個中飯確係太呃錢(佢地又睇得準成場大把中港台韓人比佢地昆喎),我呢d當然唔會比佢昆到(點睇法,果個成百蚊之中式飯盒完全唔覺點中式or好食),所以食呢個炸雞,完全係劉Sir食果d野仲要平多四蚊喎!d雞唔算太過好食,薯片就係超厚超油炸薯片黎,唔好睇幅相好似好細好少,實情成兜野係多到離晒大譜,雞已經好多件,d薯片直頭係多到好似成包卡樂B倒落去噉款,仲要塊塊都好厚,真係食到死。連我呢d暴食症患者肯德基食足一桶都唔覺算係乜都食唔到半個,完全係買一盒六十蚊港紙已經足夠食由lunch食到下午茶食埋晚餐都得!美國果然係一個咩都要大、咩都要多、咩都要抵的國家!我鍾意!I love America!
食下雞趙下薯片上下網(反而冇「做下野」呢樣),四點幾,已經開始陸續有人鬆人。到左五點:
「咦?你地仲未走咩?個場地五點閂門喎!」
「咁早閂咩?仲要咁準時閂?」

奉公守法地朝九晚五,所以我鍾意美國,好食好住好嘆好開心!再次高呼I love America!(「老細!移民過黎美國有咩手續要搞?」)

六點返到酒店即刻撻低(我地呢d人無論任何時間只要有張床一定訓到),訓到我都唔想起身時,八點又比老細刮醒出發搵食。唔知點解,老細突然間好有興趣左地去富豪區搵野食,但唔係去d酒店同高級食肆豪擦,而係去呢d高檔地方搵低檔的「員工食肆」食平野,情況就好似一個鬼佬黎到香港走去尖沙咀搵間大家樂食,有d戇居,同唔識路根本搵唔到,最重要就係:
「想搵平野食,酒店附近貧民區多到食唔晒,使乜黎呢d上流區搵浪費時間精神心機?」
結果最後行番去自己間酒店食,食貴野。(「早知係噉使乜行咁遠,又或者頭先去到富豪區求祈搵間都食到?」)


炭燒肉眼扒US$9.95未連稅
(Sponsored by Heinz Tomato Ketchup)

起初想搵平野食就係想食八蚊甚至七蚊以下,呢個價錢,頭先係富豪區都差唔多。唔知係咪二星級酒店關係,我地酒店成間酒店咁大,個餐牌只係得呢味菜,個廁師都幾嘆喎,每日淨係匿係廚房係噉掟d扒上個燒烤爐再砌d雜菜薯蓉就得。二星級都冇所謂啦,真係整得超好味,冇乜幾何試過鋸扒鋸得咁美味,燒得夠晒炭味,仲要汽水任飲,呢九十蚊港紙絕對係抵!之但係唔係成個trip老細&公司包晒伙食點豪都得,我一個人都未必會食得咁豪!(好明顯如果我係自己一個黎,肯定餐餐公仔麵搞掂)


11/5/2006 THU

幾大嘆下世界先今晚,攤係度聽歌寫野三點先訓好free,特別係睇住老細同同事食兩粒安眠藥都訓唔著,寧捨開心。好明顯老細就係訓唔著冇野做,六點三已經打個電話過黎我地房:
「喂!起身喇!」
「唔係卦?咁早?」
「係呀!八點鐘食早餐丫嘛!」
「噉使唔使咁早呀???」

冇覺好訓的人係寧捨得閒,我地呢d訓得著唯有陪佢玩。七點半起身之後,又係走去麥記。

「...玩野呀?」
冇玩你架。雖然美國麥記多款過香港,但試左咁多日(「兩日遮...」),最好食果隻,係最平的豬柳蛋,不過都要成差唔多廿五蚊港紙,淨叫個包都貴香港一半。原來香港的朋友真係好死幸福,大家記得食多d麥記喇!(...)

食完早餐八點九去到會場,大家坐,坐左好耐。老細問:
「咦?展覽唔係九點開始咩?」
「...係九點半呀老細!」

所以完全唔明白老細咁早摷醒我地做乜,其實八點半先起身都趕得切,絕對冇必要再早兩三個鐘起身,訓唔著除外(好明顯就係有人訓唔著)。仍然係得閒到死的一天。雖然整體上多人過琴日,但又係一村噉衝埋黎之後一粒聲都冇,成日仲悶過琴日,又係勁上網(或者d網絡商都睇化,今日點偷線法都冇人會理會截線),勁寫野,同悶到走過人地檔口坐&搞事&同同事走去人地d攤位度研究其他人d手提電腦(點睇,呢條友都唔係認真過黎公幹)。唔知點解我去親邊度邊度旺,有檔成朝一個人都冇,我一坐低立即四五個阿叉衝左入去,呢個情況仲要接三連四地發生。為左香港,我唯有不斷噉走黎走去唔留係自己公司個攤位,放棄自己公司以拯救香港工業同全港經濟!

我地香港公司放係亞洲展區,呢度每個國家幾行,香港對面係韓國後面係台灣隔籬係中國,基本上成個亞洲區都冇乜人理,唔止我地,其他攤位一樣好得閒,大家都悶,唯有周圍走黎走去搞人地d野,好似對面個韓國佬係噉過黎食我地檔口d朱古力(無論邊一個展覽,我地攤位前面兜糖都係最受歡迎),隔籬個廣州佬同對面韓國友傾偈。好管閒事走埋去,發現兩條友竟然係用緊普通話溝通!
香港人:「甚麼?現在連韓國人都懂得講普通話?」
韓國人:「甚麼?現在連香港人都懂得講普通話?」

原來「港燦唔識普通話」呢家野係世界各地已經根深蒂固,連識普通話的韓國聽到香港人講普通話都會驚,真係灰。大家吹吹水,發現呢個展覽擺左咁多年,今年係反應最差一年,客人最少、最少野做。噉都比我撞正歷屆最頹一年,我都算符碌!

冇野做周圍行,發現於當今世界行商,唔搵番條女棟係度真係蝕底好多,對面韓國充份明白到呢點,所以收視率相當高,而且韓國女仔好多都好靚同好玩得,好似韓國貿發局個大佬就係個靚女黎,長期有成群鬼佬圍住佢,佢又來者不拒逢人都有偈傾,幫韓國果邊拉到唔少客。友善(同靚)呢樣野,某程度上真係好緊要,行晒韓國台灣中國咁多攤位,就知道香港女仔偏偏就係差呢(兩)樣野,雖然其他地方都唔係個個女仔都又靚又好人又好玩,起碼唔會好似香港女仔噉接近100%行過一係見你唔到一係望第二邊一係望上邊cool到爆打個招呼笑一笑都唔會先。
「一拍埋人地度,香港女人立刻冇晒女人味!難怪香港上年四萬對新人,有二萬對係返大陸娶!比著我都會!」
以上係同事同老闆之討論意見,與本人無關,因為佢地討論果時,我走左過對面,同今次展覽的韓國之花影相:


(原來我個頭娘到爆)

呢個完全可以作為「為何現代香港女性及不上其他亞洲地區女性」範例的模範韓國姐姐,叫朴美珠。
「嘩!你點知佢個名架?」
香港展區好多人都問,因為全場咁多香港人得我一個知佢叫咩名。
「劉Sir自有劉Sir的方法啦!你咪理我點知!」(係威係勢噉,但一返到香港對住女仔一粒聲都唔識出,真灰)
對面間韓國公司係賣門鎖,但其實佢唔係呢間公司d職員,長住美國的佢黎呢度係幫手做翻譯,但基本上成間公司都係靠佢做晒,因為全個場最熱情親切就係呢個朴姐姐,永遠都係笑笑笑同埋笑同佢點玩點傾都得,一有人經過九里遠已經笑晒口打晒招呼,佢又鬼咁熱情不斷講講講講,又完全可以用樣靚身材正黎形容(睇過live,你就會知道張相同真人差好好好遠),再加埋日韓女仔式可愛嗲幾嗲又完全冇脾氣,經過親佢地攤位之所有人同鬼實會入去睇睇,所以佢地個攤位係韓國區最受歡迎攤位之一,又基本上全個攤位成七八條仔都唔會/唔使做野講野,都係靠靚女一個包晒拉客招呼送客所有野(所以我曾經懷疑過,其實果間韓國公司全公司班韓國仔都唔識英文先至請翻譯),再睇睇其他一個女仔都冇之公司可以全日都冇一個人入去甚至經過,就知道搵一個活躍好動健談(靚)女同一兜唔知做乜等運到的麻甩佬/仔看門口,差別可以好大,唔止生意上,其他方面都係,就好似班韓國仔冇野做果時,有個好玩好笑又好傾的女仔係度接近冇停過地係噉撩佢地傾偈(冇錯要係個靚女主動撩d麻甩仔傾偈,可想而知佢會幾歡迎),所以佢地公司日日都充滿歡笑 - 比著係我都椿埋去啦!雖然呢位朴美珠小姐相當受歡迎,但同事卻有另一番見解:
「靚佢就真係好靚,但你知啦,韓國女仔成日靠化妝架嘛,信唔過;身材就真係好好,係肥左少少囉(對我黎講佢身材係fit到perfect,冇乜見過有幾多香港女仔及得上先);最難唔順係佢雞喙唔斷嘛!第一日到而家佢差唔多冇停過講野,一日講足八個鐘,雖然樣靚身材正又夠可愛,我一定唔會同佢拍拖,長氣到噉,比佢煩到死都似!」
(又返到香港之後,朴美珠之玉照見光(當然係拎同事同佢d合照出黎,我點會咁戇居拎自己呢張),會計靚姐姐一見到立即大叫
「38D!起碼有38D!仲大過我!我唔制!」
可想而知點解d修身纖體果d生意咁好賺咁易做)

因為老細唔鍾意食美國野之關係,今日大家冇得買野食,一齊留係攤位度陪佢捱杯麵(......)。聽日就係last一日,食完個麵周圍sourcing搵定辦買(冇錯,每次展覽最開心同人人都等都係最後走人d公司係噉賣辦果日),超少人超少野做,唔知點解又到五點鬆人,返酒店撻低番兩個鐘又起身去食墨西哥野。


Les Tocas Suvaes(「...即係咩?」)

因為大家都好奇,
「墨西哥有咩野食?」
呢d野好奇一次就夠,南美野絕對唔岩我呢d食公仔麵大的典型香港人。成兜格格都唔同味,一格係芋蓉,一格係類沙律物體,一格係唔知咩味的炒飯(終於有飯食喇黎左美國咁多日!)(但點解墨西哥會有飯食?莫非因為鄭和下西洋???),最後一格係兩件墨西哥土產肉捲tacos,再加一杯超酸檸水。格格味都唔同又鬼咁濃味,真係頂佢唔順,馳名墨西哥土產tacos都唔覺點正法,最好味or真正入到口,係拎黎伴碟果d炸粟米片。冇錯我呢dcheap仔專食cheap野。Cheap到老闆娘見到都眼冤:
"Ai! Gin lay sic duc gum ng hoi wei, lar! Or yic lay! Or song gau lay yet doi shuk mai pin, dung lay ng sai gum lan cham!"
噉就有成袋免費粟米片食,正!我決定直到走之前,每日都借d倚走過黎黐餐呃粟米片食!


食完粟米片又食雪糕,今日食呢舊密西西比泥,
「X!唔好食!」
睇黎今日冇乜食野運!

「呢樣野,我地計劃左好耐!自從知道左我地要過黎美國,已經雄心壯志,決定一定要搵一晚襯老細訓左覺之後,兩條友走出去蒲一蒲威番夠本!黎到拉斯維加斯,點都要豪佢一豪!唔去嫖都要鋸番幾棵大樹啦!等我摷本書睇搵地方蒲下先!不如我地今晚沿住呢個環城單軌火車沿線黎掃!去完五星級酒店show hand,再上觀光塔睇夜景影相!喂呢度多酒店喎,實多野玩!成世人未睇過基佬騷,你睇過未?有乜理由唔見識下?不過都係唔好喇,我驚我會嘔!」
以上從頭到尾都係同事之獨腳戲。佢妙想天開時,我一早九點幾十點已經訓左,張床太舒服喇,一撻低,已經唔想起身!
「得得得!冇問題!你想點玩都得,千祈唔好叫我起身陪你癲!最多你玩夠五點返黎訓覺時,我襯老細未過黎摷人之前準時六點叫你起身啦!」


12/5/2006 FRI

展覽最後一日,朝早六點二已經有人過黎敲門,除左老細,仲會有邊個?如果你身處呢個情況,距離展覽會開場時間仲有三個半鐘、距離一個正常人朝早起身已經最少個幾鐘(對我呢d黎講直頭係差唔係個幾而係幾個鐘啦),你覺得呢一刻,老細會同你講咩說話?你點都唔會估唔到,六點二走過隔籬房敲人門的老細會係呢個鐘數同開門果條友噉講:
「唔知醒呀?」
「訓唔著呀?訓唔到覺,眼光光到慒左呀你老細?」
開門果位講完之後,即時比人打到爆血入廠。好在,果個唔係我,應門果個係同事,比老細做底果個亦係同事,因為今朝早我五點幾已經起左身,發生血案之時我仲緊涼(冇錯,黎到美國,連劉Sir都早睡早起!好驚呀!)。好在,果個唔係我。換著平時如果真係呢個呢個時間黎摷我起身仲要話我「唔知醒」,相信我答案會同同事差唔多,但會加入更多動詞同助語詞,然後死得更慘。

七點半出動去食早餐(「係囉老細,橫掂都係七點半先起行,七點先起身都得啦點解要六點二起身?」),都係麥記,都係得唯一食得入口的豬柳蛋,好在過埋今日終於唔使食呢個餐喇!(雖然相信返到香港,得閒冇野做時都係走去麥記食豬柳蛋...)九點半開場之前又冇野要執或者準備,琴日九點到已經戇居,但今日仲要再早半個鐘到,點解?噉就真係要問問老細先知喇!
最後一日完全冇人,對面d韓國檔係無聊到要企出走廊派傳單,我地呢邊有人入黎問「有冇facial野賣」(...),有d檔口直頭唔開,已經無聊到要做好多戇居行動浪費時間,好似人地檔口未開檔幫佢開埋睇檔再拎佢張卡片派扮係佢本人(...)。既然大家最後一日見面臨別依依,自然走去人地地盤玩盡佢(多謝晒成班韓國佬走過黎幫我地清晒d朱古力!),除左香港檔名隔籬檔廣州佬(都係阿叔同師奶好玩d),仲有對面d韓國檔,但唔係朴美珠果檔,因為只要有非韓國人&非鬼佬經過佢地攤位,成兜韓國仔就慌死有人搶左佢地個靚女噉不懷好意,心態都幾MK。所以我都係鍾意走去其他一條女都冇得一/幾個韓國佬駐守d攤位玩同吹水。絕對要註明係仔佬之別,兩者真係差好遠,人地間間心態係要幾多生意有幾多生意,唯獨班韓國佬坐定定等你埋黎
「你過唔過黎丫唔埋黎唔俾生意咪算囉我由你好恨咩我!」
韓國佬果份頹糜佬味絕對係冇乜人及得上,我鍾意!

Lunch,又係食杯麵。我打死都唔制!今日最後一日,我點都要食盡佢!非常可惜陲涎已久果檔pizza,今日最後一日居然冇開!只係六個幾美金俾足成五份一個Pizza Hut大餅你,仲要齋睇賣相都知道係超超超超級好食,琴日唔係老細喝住「我唔想食呢度d野你地個個留係度陪我食杯麵」,我肯定出去即擦最少半個pizza!就係因為杯麵累事,今次美國之行食少左呢個pizza,成為美國行污點加陰影!搞到我即時冇心情食杯麵!當堂出去再買個炸雞餐!呢間野唔記得叫彌敦定佐敦,名唔緊要,最重要係d雞好食過肯德基!可惜又係我買完個餐冇耐間野又收左皮,本來走人果時買多個餐返酒店食之計劃又冇行!黎到美國呢d都唔食,唔通真係食杯麵咩!!!

食完個飯又係sourcing時間,今日三點鐘會場閂門,仲有個零鐘就到拆檔時候,到時大把野買!到左最後一日,除左我地仲係飲樣之外間間公司都著便服(平日執到四四正正d大陸女仔一到左今日,全部變番做超級娘,我鍾意!),梗係啦,last一日要拆晒成個檔口走人,仲著晒老西噉款點拆野?不過當然,我地仲可以飲樣,係因為我地真係冇必要著便服返黎(雖然我其實好想有呢個必要),一到三點,人地間間執野拆野做到死,我(只係我,唔係「我地」)姿姿悠悠周圍蒲。
「你班友仔唔使執場咩?」
「一早有人認左頭啦!」

有條樓梯佬(即係賣樓梯啦當然係唔通係話成條樓梯噉款咩)睇中左我檔口,豪俾一舊水美金買晒成個攤位(當然呢個蝕本價俾劉Sir食都唔夠啦),所以可以準時走人由佢任拆自己咩都唔使做,恨死其他公司。噉多時間剩自然要走去人地檔口搵平貨,不過十分失望,行過d檔口一係賣大件阻定野一係賣唔等使野,唔通買部吸塵機運番香港,又或者執一大堆齒輪螺絲返去咩?最後一粒釘都執唔到(不過釘呢家野有得執都唔恨啦,成街都係我都廢事理),係繼食唔到pizza後黎到美國最大失望!但更遺憾係,搞到冇手信俾各位朋友,對唔住!
「你知我不嬲買開cheap野架啦!你唔係諗住貴過廿蚊港紙我會買俾你丫嘛?」

唔係我度,其實本身我一番辛苦,搵到份大禮返黎香港架!


臨走果日抽獎送呢架三百萬波子,
唔覺意豪一豪$35(美金呀)買張抽獎券,
又無端端比我符碌抽到!
「嘩!正!三百萬!唔使做喇老細我!」
「恭喜晒你!不過請留意以下條款:
1. 一定要親身領取呢架車
2. 三個月內不可轉讓
3. 唔可以兌換現金
4. 只限美國本土使用」
「咁大劑?我聽日返香港喇喎!俾現金我得唔得呀?」
「唔得架!一定要收呢架車,冇得轉賣同改拎現金架!」
「...頂!麻Q煩!咁煩我唔鬼要!俾番三十五蚊我!」

將所有野掟晒入篋再推番個篋返酒店,今次美國展覽宣佈圓滿結束,見四點都未到即時撻低。五點幾起身飛的過酒店,唔係走都未玩夠嘆夠邊有咁早走,係去租定部車等聽日最後一日可以周圍去。憑我中學果幾年geo,我成為睇指路仙人,幾條大鄉里望住地圖睇睇路牌搵路搵到癲。


一睇到咁大支Gibson,就知道係Hard Rock Cafe。但我對隔籬間Hard Rock Hotel大興趣d,
因為想知道住呢間hotel係咪晚晚都嘈到訓唔到覺,同埋會唔會訓住覺都要fing頭。

美國車好慢,我地呢個地區馬路又算少車,但好多路都限住時速35公里,搞到我地呢d閒閒地五六七八十米的香港人特別係慣左大陸開到百四五六米的老細非常唔耐煩。又搞一輪大家終於識得睇地圖同睇路,幾經辛苦(&唔知幾多次唔識路行到鬼咁慢比d鬼佬砵),總算安然去到我地美國shopping第一站:


Sears


黎到美國,連實Q都用Segway,行都唔使行!(所以美國人咁肥!)

美國間間超市都係一個停車場已經半個足球場咁大,間超市又係起碼半個足球場大,即係一間超市最少都大到成個足球場噉款,絕對係行餐食,當堂好掛住香港兩個字唔使行晒果d商場 - 美國d超市仲大過好多商場。Sears賣名牌野多,未出發黎美國,各位同事已經落定order一定要黎呢度買牛件褲,款多到爆之餘仲要平香港百幾甚至幾百,一黎到老闆同事即時咩都唔理狂掃番半個鐘。人人都鍾意大牌子,但我呢d著得上身又襟著就得咁求祈,都係鍾意雜嘜衫多d,大牌子野全部都死板,雜嘜野先至夠意思又有創意得多("Yeah hail indie & undergroud!"),呢度又多玩野tee,即掃兩件。然後等...等...等...等極兩條友都未掃夠。
「喂!買夠未呀!食野呀我要!」
立即走左去隔籬間bar食野:



黎到酒吧,食乜?冇酒劈,都係鋸扒:

絕對要多謝老細今次出trip豪包全程膳食啦,呢d野係香港分分鐘一個月都唔會食一次,黎到美國就晚晚都食。都幾貴下,但同琴日酒店個肉眼扒相比,價錢貴左d,賣相衰左d,味道差左d...好懷念酒店個廚師忝!
「老細!呢間又貴又唔掂!陣間返酒店再食多次補番!」
好在呢間野服務超好,成間bar差唔多全部侍應都係超肥婆,得閒會走過黎問d野食得唔得好唔好味,埋單又講到明唔收貼士俾佢都唔要,走果時仲會笑笑口口幫你開門"Have a happy evening!"呢樣野香港一定唔會發生,唔好話侍應幫你開門,阿姐都唔會幫你開,亦唔會咁好招呼問你好唔好食,只會係側邊啤住你心堶掘
「食快d啦X阻住阿姐收工!」

食完野先發現,頭先買野時拎少左袋野!但食完飯已經九點幾閂左門,點算?經一經過間野門口,
「咦?冇鎖到?」
入面熄晒燈一個人都冇,但真係冇鎖到門喎!入到去就見到冇拎果袋野放正係度,擺到明係開定門等我地入拎番!閂左舖都唔鎖門又唔搵人看通宵不設防等我地返轉頭拎,簡直係奇蹟!呢樣野香港一定唔會發生!美國人公民意識層次真係好高!

十點零返到,即訓。你屋企邊有咁大張床比你噉樣手腳伸到長一長大字形撻係度完全冇人騷擾?一撻低即刻訓得著,未試過訓得咁熟,好好好好耐未試過咁放鬆。我需要放假。


13/5/2006 SAT

你地12/5夜晚七點幾即係我13/5朝早四點幾起身,聽下歌寫下野沖個涼執埋行李先六點未夠,寫埋呢段段記之後,食埋最後一條雪條:


吉百利Creme Egg甜筒,其實即係朱古力脆筒,吉百利朱古力包雲呢拿雪糕,中間加舊蛋黃型cream,正!
「不過黎左美國咁耐,最鍾意食都係Big Bopper!」

展覽會做完,留埋今日今晚上機返香港,呢一日理應放假,反而七點幾起行仲早過前幾日展覽時間出門。咁早,去玩去shopping都未有舖頭開啦,點解?唔好問我,問我老細。
首先飛車去機場check ind篋,去到先發現:
"Well, ah lau san, or day bo din low mo lay gi liu wor! Lay hai mai tao do lay mei gok gar?"
冇我資料咁大鑊???
「老細,你冇幫我買回程機票咁大整蠱???」
仲好!最好搞耐d,等我遲多幾日先返香港渡多幾日假!好野!!!(「唔得,你唔返香港,TRHK邊個睇?」)

搞左成個鐘先正式check in完,有餐開喇!


去Jack in the Box早餐,終於唔使麥記喇!好野!(但其實本來架車兜左幾個圈都係搵唔到野食,唔係兜多幾秒見到Jack in the Box,結果都會麥記收場)香港Jack in the Box早就收晒皮,黎到美國一食,
「嘩!正!仲正過麥記!」


Ultimate Breakfast Sandwich US$3.29
(「Sand咩wich明明係漢堡包!!」)

點睇都同麥記一樣,噉點解要食Jack In The Box?
「好食嘛!」
好食過麥記,價錢亦唔係差太多,就係宣傳冇人地咁勁,唔夠抽。如果香港有佢地,我實成日幫襯,
「好食嘛!」

食完個早餐又飛車返酒店退房,嘩住酒店要俾成9%稅!美國呢度真係咩都要錢。再飛車去下一站:


Wal-Mart(我對隔籬間Guitar Center興趣大d)

Wal-Mart係全球無良銷售商代表,所有貨品售價平到仆街,黎到睇一睇,佢地標d價根本係要間工廠唔賺甚至蝕本先做得到,兜個圈已經知道而家生意真係難做。唔知有冇人睇報紙或者雜誌,睇過一篇文係中國多家工廠聯著投文?呢d工廠有個共通點,就係都係同Wal-Mart做生意,都係因為比人壓價壓到太低壓到蝕本,維唔到皮執晒,所以大家一齊挻身指控呢間美國無良超市。係美國買野,同一樣野同香港比未打稅價錢已經可以貴一半甚至一倍,同鴨記更係冇得比(香港人應該慶幸有條鴨寮街),但呢度d價計埋運費運到黎美國幾乎同去中國隔籬之香港買野差唔多,就知道大陸公司同工廠比美國佬壓榨得幾緊要,而其他美國公司同歐洲公司見有錢搵又大家一齊壓,而家中國商家真係太難搵錢,香港同中國公司太難做到生意。話雖如此,黎到呢度我都懶理呢d民族恩怨買野要緊,但當然,我呢d香港都唔會shopping冇乜野(想)買,黎到呢度點平都係一蚊都唔使用。即係又係企係度,等,同埋大叫:
「喂!睇夠未呀?行啦!X悶!」
琴晚老細同同事掃左勁多牛仔褲,點知返到酒店之後打個電話返香港問問,先發現買左果一大棟牛仔褲,全部size錯晒!(永遠都係買大碼一定冇錯的我當然係即刻係側邊幸災樂禍「哈哈哈哈!」)所以今日再去Sears走一轉辦,去到話「買錯size想退貨」即刻俾番錢你,話退就退,外國真係正,之後補番錢換番size再加多幾條,又走人去下一個目的地:


Target

同Sears一樣,Target走高檔路線,睇左咁多間,無論裝潢定係貨種最like呢間。真係好好好大好好好好好多野買,我地呢d當然係走去玩具部同d死靚仔一齊迫(...),見到有d動物公仔超靚用料正質地好又夠精致,點知睇真d:
"Intended for pet use only."
睇到呢句之前,我幾乎想買。原來而家比貓狗玩d公仔仲靚過人玩公仔,本來我都想買隻俾自己玩架,但一諗起好似搶左我隻狗個公仔玩,唔係太開心,玩唔落手,唯有唔買。所以我同我隻狗都好唔開心。

行左成朝,係時候食飯喇。就坐低係Target入面間Pizza Hut擦擦先!

圓形果兩個一個德國肉腸一個芝士好易睇得出,四四方方果個係蜜汁燒雞,樣衰之餘唔好食。唔緊要另外兩個正就得,我一個人包左兩個,加埋勁多汽水揀加任斟(有隻Coke Zero唔知咩黎,但我當然唔試啦試完原來超難飲比人笑就好似我笑我同事唔知邊度搵到隻超甜甜到嘔思樂冰比我笑餐死噉噉就無謂),而呢度三個餅價錢夾埋同香港叫一個大餅差唔多,美國黎講都算OK,最OK當然係唔使自己出錢就有得食咁豪啦!
「老細!唔夠喉!嗌多兩個俾我唔該!」

「仲食咁多?食完飯,係時候做運動喇!」
身體健康的老細話。開始呢個散步減肥行動,即係完全唔識拉斯維加斯d路點走的三條友徒步亂行,見邊度有舖頭就樁埋去。美國呢度唔止超市大,求祈搵間舖頭都大過香港唔知幾多,但去左咁多間,冇乜邊間係有客/多客,好多時入到去,就係見到班友行行企企坐係度唔知做乜,會覺得呢個場面好似爭噉副啤同幾包煙,特別係賣好專門非日用品果d基本上入邊間都冇人,呢個地區人咁少密度咁低但咁多舖頭,都唔知佢地點維皮。雖然好多時我地香港人好恨出國買野,但我呢d去到其他國家根本冇野好買,因為基本上所有我想要果d野都係Made in China(或者南美、非洲、中東呢d落後地區),亦即係好多睇落都係香港一樣有得買仲要平d忝,冇選擇。唯一一樣可以睇睇係CD,美版野,終於唔係Made in China!但同樣地冇乜好睇,有碟買但超少,唔計Rob Zombie新碟最metal果隻(只)係TOOL新碟,雖然TOOL新碟係好想好想買,最後都係空手而回,唔係價錢問題,呢度打埋稅兌番都只係港紙120美版黎講算平,只係我知道我返到香港果日已經大把錢要使大把碟要聽,唯有忍忍手。四十度超高溫烈日下噉樣行成個幾鐘係難頂到勻,仲要因為見舖頭就衝埋去樁下樁下,最後係去到唔知邊度,差少少要截的士先返得番自己架車,夠晒戇居。呢一次美國之旅,有三個得著: 1. 香港地,原來完全唔熱。黎緊七八月,我應該會凍到著長袖衫。 2. 我呢種人,都係唔適合去旅行,因為旅行之最主要環節瘋狂購物與我無緣(除非果度有超大間metal CD舖啦) 3. 同埋去到邊都好,都係匿係酒店張床上面,怒訓。旅行呢家野,真係唔好預我。

差少少要飛的先搵得番架車,晒足成個鐘之後終於可以上車涼涼冷氣,去埋最後一站:


Kmart

又係美國超大連鎖超市之一,裝修好求祈,似一間巨大化之惠康,所以我鍾意(但最鍾意都係Target)。亦因為噉,我呢d市井百姓終於買到野喇,就係狂掃朱古力!上次黎美國經理帶左一隻crossover朱古力返香港,係將M&M、Twix、Snickers呢d朱古力好似醬噉搽上d餅乾度,食左一次之後,絕對返尋味!呢隻香港冇,餓左好耐&恨左好耐,今次黎到美國行到最後呢間超市先有得買,仲要所餘無幾忝睇黎呢隻野美國都超好賣!即時同同事兩個夾埋盡掃晒剩番果十幾盒,再加埋一d好似好好食就買黎當手信之朱古力(好明顯係借手信之名買俾自己食),兩條友夾埋買左成三舊幾水朱古力!
「正!」
行勻咁多間超市咁多間舖頭,有樣野非常容易留意到:除左個個都超肥(真係冇乜見過幾多個瘦人),成個美國 - 最少係成個拉斯維加斯 - 做野果班都係黑人同老人,白人差唔多冇見過。因為d白人一係就做高級專業果d工,一係就辛苦工都唔做直頭唔做野領福利金算,自尊嘛!果真大美國。

掃晒貨再飛返去還車再抬埋最後幾個篋去機場,等上機冇野做,又食。

係呀Burger King呀。因為知道上到機仲有飛機餐食,都係食個雞條算留番個肚,同埋,(又係)飲朱奶。結論係,唔好味。但薯條好過麥記(其實好多間d薯條都正過麥記,麥記薯條查實係最唔好食之一間)。
呢個禮拜已經食勻晒全美最不健康食府。我都可以拍番套《不瘦降之謎》。(但唔知點解,黎到美國飯都冇食過,人人噉炸乜炸物,反而仲瘦左!食油減肥法!)

食完漢堡皇炸雞(呢個組合其實幾荒謬),仲未上得機,拉斯維加斯機場咁多老虎機,老細又打老虎。玩兩舖,一舖贏五十幾一舖贏廿幾,美金我係講緊。我同我同事(即係發晒誓唔再玩老虎機果個)見咁易玩,又玩番幾手,一蚊一蚊噉入,入左幾多蚊都係冇一舖贏到。
「噉先係正路嘛!老細都唔識玩老虎機!真係廢!」

八點十一起飛,非常非常眼訓。


睡眼惺忪地望出機窗,就係噉款。

起飛冇耐已經訓著,訓到之後發生咩事都唔知,直到去到洛杉磯凍醒。十頭已經廿度唔夠仲涼過開冷氣,夜晚加埋勁大風,但得一件短衫band tee的我,懶理,因為好鬼眼訓。做埋最後出境手續,最新奇係有部機個人企係中間之後兩邊會有氣噴出黎唔知checkd乜野,但入時查得鬼咁嚴出時都算求祈,完全係「我美國安全最緊要你其他國家點死唔關我事」的態度。我同同事兩個人夾埋掃左三四百朱古力,好似帶水貨噉每人抽住一大袋朱古力過境(仲要係用超市膠袋忝樣衰到爆),兩個人都係同一個關員睇袋,佢睇完我地兩個都要問句:
"Sei ng sei my gum q dou? Heung gong mo chu gu lik sic?"
"Hand letter! Hand letter!"

臨到上機,當然又要排隊。見仲要等多半個幾鐘,讀緊MBA的同事爆響口:
「呢d係商業策略黎架!佢地係專登一早叫定所有人排隊,等坐普通位果d睇住頭等果d可以入先,頭等果d又睇住坐普通位果d冇得入要等佢地入晒先有得上機,就係要引頂唔順果d人補錢坐頭等!唔係噉樣,點留得住d人坐頭等呀!拿唔係我亂作架!呢d衰野,係國泰老細黎我學校講talk時自己爆響口架!


14/5/2006 SUN

拉斯維加斯夜晚11:30即係香港晏晝2:30pm,就黎要要返香港告別呢個美國假期喇,仲有四個字先飛,已經除鞋除襪訓左。訓下醒下睇睇戲,呢程機勁多正戲睇,有《乜九物七魔衣櫥》(果然係包裝得奇靚的絕廢片),之後食住飛機餐睇《賊壇新人王》,再歷史重演多一野"Project Underworld"一次過睇晒兩集《Underworld》,感想冇改變到,同三月十八號一樣,然後又訓,訓醒再睇《買兇拍人》,彭浩翔實在係繼杜琪峰之後另一個要追之香港導演!訓到夠晒又咁多戲睇,又有得食住飛機餐睇,早餐個肉腸薯粒炒蛋好正!又扮晒野要空姐拎多set我食加飲左差唔多成盒蘋果汁,國泰飛機餐萬歲!應該話,國泰萬歲!以後我要成日出差黎美國,不過剩係要搭飛機呢part就夠!
十幾個鐘飛機,三個人得我一個訓到,老闆飛機上面傷風,同事乾燥到流鼻血,我呢d完全冇事,訓到死左噉款係噉飲飲食食都可以控制到十幾個鐘機只去一次廁所就夠(所以我搭飛機永遠要坐最入個位),所以同行另外兩位都好驚訝:
「你係我見過第一個人會鍾意搭長途機仲搭得咁開心!」
或者,因為我的確唔係人!所以落機之後過體溫計,芒入面人人都係紅色,但我係
「黃色架!!!」

終於回到香港時間。即係,終於放完假。5:20am落機再去拎番行李,好快就搞掂走得,香港機場設施同服務質素都係世界一流,特別係去完美國體驗過果邊超亂超唔掂,令我懷念香港。搭番老細車出旺角轉車,那久違了的香港太陽黃金色的穿雲而至,舒服,唔晒唔熱,我鍾意,香港朝早五點半天氣好似洛杉磯,但如此好天氣過多幾個鐘就冇矣。

七點返到屋企,第一件事,當然係睇睇戰利品先:


呢隻就係傳說中之crossover朱古力餅乾!
有幾好食?講唔到你知!亦都冇得俾你試!
未返到香港已經冇晒咁滯喇!呢兩盒倖存者當然影相之後唔使幾耐已經難逃厄運!


真正買野,只有兩件tee。
呢件,一睇已經知道一定要買啦。
可惜冇「\m/ METAL \m/」呢款。


任天堂官方出品連埋呢個"Nintendo Official Seal",
雖然已經唔係機迷,但呢件tee實在愛不惜手,
帶番好多美好回憶返黎 - 雖然我屋企係PS時代先買機,已經唔算"classically trained"。
如果你唔認得果部機係乜,又或者唔明件tee個意思,恭喜你呀後生仔/後生女!

一早已經好多電話同網上追問:
「死返黎喇你?幾時出黎呀?」
咁想見,晏晝上黎TRHK搵我囉!冇錯,返到黎放低行李執好晒野(順便成個朝早焚晒PANTERA全線,成個禮拜未炸過機喇!),第一件事就係上皆旺睇睇,但一唔覺意撻低左就訓到唔知醒,三點半先知醒已經有契弟打電話黎
「喂仲唔開?」
最後四點幾先飛到。一返黎就有新貨慶賀:

Arising Middle Earth: TRHK0514新貨

呢樣野晨早預左,所以去到美國忍手連TOOL新碟都唔買住,因為呢一批貨實在正得離奇,得架喇呢幾個禮拜大把野執,好彩冇使錢買手信,唔係碟都冇得買!睇一睇條數,而,好似我走左仲多生意喎!早知我就唔返黎住啦!
「(兩位)老細!我(仲要)放假!」