話說7/7傍晚，舍妹放工返屋企，途中見到屋企樓下靈光小學，一樓欄河有隻貓：

唔知佢點上去，因為欄河位最少四米高，可能襯學校開門時偷走入去，跟住窗口或走廊位跳左落欄河，點知唔識得走。

見到佢時七點零，成日走到角落頭，但高得滯想跳落行人路又唔怕，只有有人經過時眼甘甘望住。

返屋企食完飯，十點幾落去仲見到佢，搵唔到路落街，唯有欄河兩個角落頭走黎走去。

就自己眼見，佢已經困左上面最少三個鐘，行過佢下面就會係噉瞄，唔知係咪肚餓口渴或者驚。只有話好彩夜晚冇咁熱。

見佢困左成晚，又怕見人走過就喵最後直頭跳落黎，雖話貓有九命，唔敢講一樓跳落街會發生咩事，就想試試救佢。咁高，屋企木梯上唔到去；間學校個鐘七點幾響到十點幾都冇人應門。既然同一條街街口就係救護站同消防局附近仲有警署，要搵人救隻貓落黎應該好容易。結果，上左一節通識課。

去搵消防時大約十點半左右，應門個消防員話無論你想點做，首先請打999，只有收到報案總台指示佢地先會做野。剛剛好條街迫左架警車，諗住可以直接搵佢地唔使報警？都唔得。雖然架警車同事發地點只差幾步路，規矩就是規矩，車上三個警察即使你噉樣親身報案都唔會處理，點都要先打999，總台再轉接，確定有事先會郁手。換言之，任何動物有關事故，就算消防警察在場，都一定要先打999先有人肯幫你；當然，潛台詞是「多一事不如少一事總台唔call我唔做野」。打完冇幾耐，架警車就開埋黎，「接到線報，黎睇發生咩事。」跟住先開始睇隻貓、拎身份證同電話、簡單落口供，再望望環境，

「我地咩都做唔到，只有通知愛護動物協會黎跟進，不過佢地冇梯，到時再睇情況決定派唔派消防。」

．．．救隻貓嗟，何解都要搞咁多野都要拖咁耐？差人甲自己都話：

「政府野就係咁多部門疊黎疊去咁多手續架喇！」

十一點左右，班警察拎晒資料call左總台就走人，企大半個鐘都唔見愛護動物協會，雖然夜晚有風三十度實在難頂，打電話去問幾時到？

「而家荃灣有隻傷貓，救完佢就會過黎你地土瓜灣呢邊！」

聽落都幾灰。我諗住香港唔係大但亦唔算細，港九龍界每區最少有一架專車卦，睇黎未必咁樂觀，要一架車荃灣救完再出九龍，似乎本地動物福利資源仍相當短缺。太熱上番屋企等，差唔多十二點半至收到電話，終於有架車到 － 仲要好似全車得一個人 － 因為太高放唔到補貓器，決定第二朝等學校開門再黎。即係由報案開始計，搞左兩個幾鐘，都係一事無成。

「呢個故事教識大家乜野叫官僚。好多野靠自己，仲快手過乾手淨腳過靠官、靠政府。」

第二朝再收到愛護動物協會電話講番件事，佢地去過間學校，副校長話隻貓每晚都會自己走上欄河當果度係廁所，佢地都冇符，所以收隊單困貓案當解決。實際上隻貓係咪真係日頭自己周圍搵食、夜晚走上去屙住乘涼就唔知，只係日頭見佢唔到，夜晚都一定見到佢：

第二晚探佢時，撞到學校有個阿sir巡樓，不過佢望幾望都係救唔到隻貓，只話第二朝校工開工時再諗方法。隻貓就同之前一樣，繼續行行企企望黎望去。

你問我，我都係覺得佢意外困左欄河上邊，多過每一晚搵到路自己上去。第三朝返工時經過學校拍門，校工聽完回應基本上同副校長講俾愛護動物協會差唔多，再大家上埋去一樓睇，日頭的確見唔到隻貓，雖然日頭三十幾度仲要太陽曬到正加冇水飲冇野食，的確唔似可以欄河上面捱到咁多日仲可以精精神神走黎走去，不過兩邊都有水渠位，隻貓可能匿埋訓覺同避太陽，所以日頭見佢唔到，同點睇我都唔覺得除左由窗口同走廊位跳落去，會有其他方法自由出入咁方便。只不過學校噉講，就算困死左走唔到又可以點呢？正如報埋警都可以慢慢同你磨搞兩個幾鐘得個桔，就算隻貓真係走唔甩，繼續拗落去都係晒氣，因為到頭來，都係一條貓命嗟，仲要係街貓。

直到今日，每晚經過仍然會見到隻貓想跳又唔敢跳個樣。反而希望可以繼續日日見到。起碼即係隻野仲未死、真係有路俾佢走先。當可能得我同舍妹兩個閒人會理佢時。