劉Sir返工吞pop指定餅乾
做過咁多份工，唔計玩多過做的夜職，最開心必定係第二份日職。因為全公司都係癲的。大家每日做最多的兩件事就係玩同埋食，不論老細在或不在，一切如常。幾位同事的嗜好是發掘新零食，大家得閒無事就周圍走摷新野，又落超級市場睇有乜減價貨。多得同事帶契，令我愛上左呢隻餅：
Kid-O餅，一包有八塊。
到底個名係O定0，我食左咁多年都唔多清楚。
據聞餅廠個老細好鍾意打街霸Zero囉。
有乜咁好食？我地打開睇睇：
典型梳打夾心餅中間夾層醬，
佢正在俾夠三塊餅你，睇見都覺俾足料。
特別在一般餅一開二，佢一開三，
一啖三份一塊剛剛好，又唔怕咬時碎晒，
同方便我開發自家食法。好多野玩架。
最值錢係入面層醬。包裝話牛油味，
但食極唔覺點牛油法，話忌廉可能較正確。
好味在十分甜，而我向來鍾意甜食，
但唔會甜得太過份，而且食落肚唔膩，
所以往往一次唔吞番五六塊甚至成包唔收手。
其他版本有禮盒裝，一盒有三十六塊，不過只見過一次。
其實仲有一個大袋裝八包的批發裝，同樣可遇不可求。
批發裝冇得出鏡，梗係一早俾我肢解左啦。
請睇睇Kid-O家族，多麼龐大。
一次同事到韓國做展覽，仲發現到佢遠親．．．
原來除左黃色仲有綠色。
黃色係牛油，綠色（話）係檸檬。
黃色話牛油但食落口唔係，冇緊要，起碼好食；
死在綠色同樣唔係所講隻味，但酸到死唔知點噉，
食左一塊，立即成包俾左人。好Ｑ難食。
「黃色才是皇道。」
我講到咁好食，不過全公司好似得我同引進呢隻餅位同事兩個人識欣賞，其他個個見到隻餅講句「都唔知有乜好食」就掟俾我，這是好事來的。公司隔籬係汽水廠，耐唔耐全公司就會走過隔籬係噉勁掃，我最常買係維他朱奶同雀巢咖啡，鍾意一係Oreo式浸住食，一啖三份一塊餅再一啖朱奶／咖啡，兩種味撈埋好正架，而且三份一塊份量剛剛好！通常兩塊餅夠送一包朱奶或一罐咖啡，當一日早餐加下午茶玩兩次，一包餅夠捱四日架！
包裝寫產地菲律賓，另有多種語文解說，睇黎隻餅風行全亞洲，只是香港想搵唔係容易。我入呢間公司開始食，食足兩年都係要同事托佢觀塘做野ｄ朋友日日lunch行批發舖，仲要唔係話次次買到，因為鑊鑊到貨全觀塘一齊落去搶，我連打電話去批發問拎貨都試過但冇行，更甚去九龍城逐間批發舖行，美食節問埋會場賣菲律賓野ｄ檔口，居然冇一間知道呢隻餅。居然可以underground到噉？只有靠耐唔耐同事搶到幾包返黎分俾我，同間中自己撞到。至於綠色果隻，真係頂唔順非常難食，不過想研究都冇機會，因為我只食過一次，仲要係有個同事去到韓國擺展覽，係韓國買番黎當手信我先食得到！
「咁難食，唔怪得香港未見過有得買啦！但唔知點解，個個同事都唔鍾意食我最愛的黃色，反而綠色我覺得唔掂，佢地就話好食！」
隻餅咁令人愛戴，唔止因為好味道架，仲有賣得平。想當年一包賣五蚊左右，除番每塊餅六毫幾子，超級抵食，呢個係除好味道之外另一我勁買原因，你時時食一包六塊餅兩個幾話咁快食完，佢一包八塊，好似上面噉四日抵八餐，絕對抵過其他好多小食。有段時間觀塘搶唔到貨餓左好耐，好好彩某次行華潤見到禮盒裝賣廿五蚊，三十六塊除番每塊近七毫子，不過果期周圍都搵唔到，冇計啦「貴」都要食！好在跟住同事搵到有間有大膠袋批發裝賣，四十蚊有六十四塊，即係一塊六毫二五，係買過最抵一次。
後來經濟大仆特仆，罐頭可以加價100%，有乜野唔可以？唔知點解呢個低潮時候，反而多左地方賣呢隻餅，見過連OK都有得買，pop晒了。可惜價錢大件事，閒閒地加價近五成而且海鮮價，OK所謂「減價」賣到六個半七蚊，真係買唔落手。終於有日船務師奶行街見到有得買，六蚊包加巨量存貨，機會難得立即傾家盪產大手收購！
「同我買夠百五蚊！去盡佢！」
「足足二百塊餅！場面夠唔夠壯觀先！」
「Epic。」
噉樣執一劑，夠食過年。／夠食過世。出手咁重是有必要的，我發覺成日遇到大量underground零食，係好味，不過往往食過一兩次就再見唔到。雪夾糕就是絕佳例子，事隔多年仲係朝思暮想，間唔中落公司樓下超市冰櫃睇有冇返貨，但相信已經絕版了。就連06年睇《恐懼鬥室》時狂擦的意大利芝士卡樂B，都再等多兩年幾，到08年底、09年頭以芝士火鍋味借屍還魂先再有得食。近得多世紀黑仔王劉Sir向來冇乜好結果，所以Kid-O應該會好快執笠，假如我做唔到佢香港區代言人，相信要收購左間廠，第時先繼續有得食。