Frankfurt Freewalk 2011
Episode 8
2.3科隆自由行．動物園
Episode 3：1.28-2.1之做乜鬼野展覽丫落吧蒲去睇show才是王道
3/2/2011 THU 科隆
上回講到，科隆到步第一件事就係搵郵局寄明信卡，但俾火車站兩個阿嬸老點而行左幾個字冤枉路。衰野永遠一不離二，寄完信睇完教堂，再入火車站問點樣去動物園，有個阿姐企火車時間表水牌隔籬問佢實冇死卦，點知都可以點錯路，第一次點左去左邊，行極唔見有車返轉頭再問，今次點左去右邊，先終於上到車出發。事實證明，有時的確需要歧視一下中年女性，服務態度同效率比後生仔女們差好多。
唔使擔心唔識落車，個電車站就係叫做動物園站。稱為德國最大動物園，的確好大，行到大門首先見到好豪華的植物園。
仲有同樣極大的水族館，包埋昆蟲館同人類學館（睇進化論之類），都好多野睇。
好多野都想睇，不過時間所限，只行左動物園咁大把。水族館同睇蟲仔只有放棄了。
都幾冷清，除左黎果時撞到有班小學生剛剛玩完走人，成個園好少人，我更加係成個動物園唯一一個中國人。噉天氣鬼佬都唔多想黎，做得遊客更加揀去名店區都唔行動物園啦。
動物園入場券是咁的。十四歐羅其實幾貴架，不過見佢有barcode，如果一日內無限出入的話都叫接受到。（我冇試過，但如果得的話，強國旅行團黎到，可能成團人只買一張飛）
有好多唔同雀，同多數放出室外，天氣凍佢地又唔多郁，鍾意打雀的朋友有福了。
黎到動物園有心想學野，不過同外面一樣，乜叉都得德文．．．
出面吹風吹到震，難得有間戶內展館，唔理三七廿一立即鼠入去暖下先。
估唔到咁熱，我諗三十度都有。唔止眼鏡，就連鏡頭都自動加左filter，冇諗過會有地方熱成噉。
熱就必然因為係熱帶館，正確黎講叫河馬館，加少少其他熱帶動物好似鱷魚。
主角河馬得五隻，出面就話凍嗟，做乜間館咁熱都要成堆迫埋一齊？同鱷魚訓覺河馬又訓，好無奈喎。
條溪唔知點解又會零零星星有三隻鴨仔咁得意。似蕩失路入左黎多。
基本上只得三隻鴨會郁，班河馬都廢鬼事睬佢地同你，繼續訓。
唔使過水族館，河馬館都有少少熱帶魚睇。
入面都有少少雀打，可惜枝鏡太短。繼做展覽兩場演唱會之後，再深切體會換鏡的必要性。
其實河馬館仲有室外好大片空地，可惜冬天黎到，只可以睇佢地留守館入面訓覺。
好多鴨仔。估唔到咁凍佢地都可以游水游得咁開心。初時諗住會好似懶惰的劉Sir，天氣一凍就成班縮埋一二邊齊齊訓。
馬達加斯加館。睇得戲多，成日以為馬達加斯加就係獅子老虎班馬之類，點知以上通通冇得睇。
只得一大班我唔知應該點稱呼的馬騮類動物。
有得摸摸或者攬攬佢地應該會好舒服。
好呆滯的鹿仔，叫極佢都唔起身。
犀牛，臭到嘔，影完相即閃。
好似叫藏牛，天寒地凍大隻動物多數訓低唔郁，呢隻肯繞場一周再行過黎俾我近鏡望望，叫做好俾面了。
終於，俾我搵到不枉此行的開心大發現！
其實冇預過會見到，原來動物園有超大個草泥馬專區！
唔止大羊駝，仲有細羊駝仔睇添。
咁大塊地唔係草泥馬霸晒的，中間圍左鐵絲網幾棵樹係地鼠區。
好鬼細隻，不過好鬼活躍，泥地好多窿，間唔中就會有幾隻呢個窿飛出黎，再高速地走去第二個窿縮番入地底，幾得意。
凍絕對有影響，成班一直匿埋屋入面唔多出黎，特別係一大一細兩隻啡色，係有兩隻黑色活躍少少，最少肯走出黎外面俾你近望。
有啡色，有黑色，不過冇白色，有少少失望。
等左好耐好耐，班草泥馬先至走出黎散散步。唔知點解成班迫埋去角落頭。
原來搵食。好難得有機會近距離睇佢地，立即走埋去目及目及先。
班草泥馬好鍾意舔欄杆同樹枝，可能想飲水。大幾隻顧住食唔理人，隻細草泥馬矮得滯冇得食，先得閒睇你條友做乜。
不過班友真係唔理人，一飲完水聽到第二邊有聲就走過去八卦，你點叫點fing手都唔理你。我影佢地差唔多影左百幾張相，都搞唔到佢地肯走過黎或者望實鏡頭，支力，放棄了。
嘩原來有長頸鹿睇，同草泥馬一樣冇諗過有機會。
大笨象冇得出外面行，唯有入佢地個館睇。頂，仲臭過犀牛，入左去唔夠半分鐘已經頂唔順立即閃。
有個島仔住左班馬騮，好無聊排晒隊不斷圍住個島走黎走去。見到有幾隻傷殘，好似中間果隻冇左隻右手，不過隻跛馬騮好似係其中一隻大佬黎。
冇北極熊，不過有企鵝，一影完張相，隻企鵝就屙左篤屎。企鵝屙屎係點樣？想知好簡單，首先買枝沙律醬，打平放檯面，再叫你老母企個樽前面，然後一野超大力捶落樽沙律醬度，就知道了。
而家都唔識分海獅海狗定海豹，本身有幾隻撻落石上面，一見我行埋去，立即成班跳晒入水，想影張靚相都唔得。
好驚人的羚羊仔，見到人會八卦行近，但到你行到好近時就會轉頭走人。
正所謂食飽就屙，影完幾隻馬食野，其中一隻好合作演埋個下集我睇。
我一影，隻馬就屙屎了。
屙一次仲未夠，右邊兩隻，我一影完相，又一齊屙。唔知點解見到咁多動物屙屎。可能因為lunch time，唔覺唔覺玩左三個鐘，見佢地食完屙埋，我都係時候出去搵飯食了。
動物園一出就係萊茵河，不過．．．
萊茵河係好出名，可能動物園地段關係，景觀真麻麻。
想過河唔使搭火車或者船，動物園出面有個吊車站。
你想又肯使錢的話，可以坐吊車過對面岸的。
最後都係冇坐到吊車，一條麻甩佬坐好似有點戇居喎．．．十一點入去玩，出到黎已經兩點鐘，個天仲係好暗，完全冇搵過資料睇科隆有乜好玩，就望住張地圖睇邊度好似好玩就走去邊了。
同，好想搵到地方叉電，之前一晚唔記得幫部相機叉滿電，頭先單影草泥馬都影左百幾張相，兩點咋喎邊夠電捱到夜晚九點半上車。