Frankfurt Freewalk 2011
Episode 5
2.2日遊海德堡.古堡行



Episode 1:從香港的1.27到德國的1.27

Episode 2:1.27晚間自由行+夜攝大教堂

Episode 3:1.28-2.1之做乜鬼野展覽丫落吧蒲去睇show才是王道

Episode 4:2.2日遊海德堡.舊鎮區

Episode 5:2.2日遊海德堡.古堡行

Episode 6:2.2夜行法蘭克福

Episode 7:2.3科隆自由行.火車總站&大教堂

Episode 8:2.3科隆自由行.動物園

Episode 9:2.3科隆自由行.午&夜行

Episode 10:2.4法蘭克福自由行.亂行篇

Episode 11:2.4法蘭克福自由行.動物園

Episode 12:2.4法蘭克福自由行.博物館行

Episode 13:天堂>地獄 德遊後記



****************************************************************************************************



2/2/2011 WED 海德堡



黎到海德堡,行完舊鎮、走過古橋,就要上一上古堡。話晒地名有個堡字呀。(...)





遠眺古堡




由內卡河古橋出發,橫越舊鎮去得到古堡,中途可以睇埋其他之前未經過的景點。




「好大間教堂呀∼∼∼」




教堂好似冇開門,樓下有檔地攤,細細檔有好多唔同種類紀念品賣。




教堂對出大片廣場,想買野黎到就開心,四圍都係商舖。




「而家先知連傳記都可以有專門店。不過日光日白咁多遊客都唔開門,生意可能唔點好。」




逢遊客區,必定見到門口窗口大大隻中文字「免稅店」的免稅店,的確好多中國人,行左一朝就撞到幾團,不過見領隊旗係正體中文同好守規矩,相信係台灣團 - 梗係啦,大陸自由行一早去晒大商場買名牌,凍冰冰仲同你行舊區咩。


「有樣野好開心:留左德國兩個禮拜、行過咁多地區,從未見過任何舖頭或商場出現過一個簡體字,通通正體。要堅持,千萬不要淪陷。」




好多地方都見到各式神像,唔知咩料,但型的。




睇落以為好近,都要行三四個字先橫渡舊鎮去得到古堡山。




仲要只去得到山腳。上山/上古堡,有兩個方法:一呢,就搭纜車,個車站起得好靚,現代得黎又唔會同地區古老風格唔夾。




二呢,咪自己行上山囉。搭電車話咁快不過差唔多十蚊,行路就十二分鐘(個告示牌話),即係劉Sir咁鬼度縮,梗唔願俾十歐羅啦行咪行囉。




就發現大鑊了。有講你知行十二分鐘,但冇講係行條四十五度角斜路。伏已中。好在知道身廣體胖的劉Sir分分鐘行到心臟病發,沿路除左有扶手仲有長凳做checkpoint俾你抖抖。




幾經辛苦,終於行到頂。


「超!呃人!邊使十二分鐘,我八分鐘就行完喇!」(劉Sir以他最後一口氣大大聲昭告天下)




回首一望,嘩,上冇乜問題,唔好叫我落,好鬼驚會碌左落去。令我諗番起當年去蒲窩(R.I.P.),睇親show都要行條長命斜行餐死。




比預定時間快三分一行完好威水,但唔多掂立即坐低抖抖先。第一次黎到落雪地方冇乜概念,冇為意到一野坐落張長凳,又中伏了成個籮柚濕晒。等人地以為我飲果枝頭先廣場三歐羅買落唔知咩牌子但好好飲的檸檬汁飲到瀨。






古堡瞭望臺窗景




「拍到好似坐緊監」




抖夠,就係時候入古堡了。




真係去到邊都遇著維修工程咁黑仔...




所以唔知入口樓梯天花掛住個鐵網,係工程用,還是本身古堡的守城裝備。




又有窗,又可以目及目及。




「咁大空地又有碌炮,好吸引,但點出去先?」




古堡內室




古堡內室 X 扮晒識影相地玩光圈拉花


(between,我幾滿意的)




行到中間,上樓上大庭必經之路有個售票處,其實係局想上樓上的各位朋友行過買張博物館飛。




向庭院出發




上到古堡瞭望台。








本來想自製全景相,不過冇腳架試幾次都失敗,都係算數。




可惜遇著裝修,破壞晒景觀。






所以都係睇景啦,真係好靚。




終於上到古堡庭院








可惜冇太陽,唔知個日晷準唔準?




古堡冇乜野開,得間醫學博物館,當然要買飛啦。有乜野睇,好唔好睇?


「ZZZZZZZZZZZZ」




俾你睇睇醫學博物館張飛,五歐羅架唔平架,唔係陪同事一家,膚淺的我自己一個一定唔會去。只有話出面好睇過入面。




行完博物館出黎,門口隻德國狼狗更吸引,狼狗就係狼狗行近少少立即撲晒吠晒,主人一叫立即坐低靜晒,唔好過去搞佢呀,後面個警告牌有意思架。




告別古堡庭院




向古堡頂層廣場進發








古堡廣場







不得不妒忌,如此香港最豪豪宅都難求的景致,只係海德堡平民百姓每日落街散步跑步放狗的平常地。




出左廣場有條路繼續上山,點解係我黎到先度度都封路整野?冇得上,只好走人。




喜訊是原來博物館張飛包埋坐電車落山,噉先值番五歐羅,幾驚要自己行落山呀。




纜車班次都幾疏,等緊車發現,頭先係噉吠我隻狼狗排我後面。人狗可以一齊搭車幾過癮。




「...喂,點解架纜車同頭先海報果架相差咁遠?」




車廂有上下兩層,隻狗坐上層,下層有我地同幾個香港人,第一次搭覺得好新奇。




「嘩∼∼∼」


原來唔止得我一個大鄉里出城,成班人睇纜車穿山窿睇得好鬼興奮。




走左兩個景點已經用左成朝,食飯前,再坐巴士去埋又係好出名的大學城。




落車就見到的禮拜堂,出面市中心全部現代化高樓大廈,但舊鎮區保留一致古色古香風格同古建築,這就是保育。




一入到禮拜堂出面塊白雪空地,就有隻好惡的八哥招呼我地。




好似有條例規定帶狗出街一定要加街帶,而禮拜堂空地有晒圍牆欄杆,相信好多狗主鍾意帶隻狗入黎除狗帶任佢地跑黎跑去,隻八哥見自己「地盤」有生暴人就猛咁吠,一行埋去摸佢立即縮晒,摸完拎開隻手又吠過,好玩。





海德堡大學圖書館(好似係)




回頭望教堂(又整路...)





橫渡大學城(個「城」比想像中細亦唔多野睇)




最後,出番去市中心大商場食野。好灰其實,中國菜日本菜泰國菜多土耳其菜都幾間,地道德國菜反而較少,有都得德文唔知叫乜好,所以行極舊鎮都冇心水,返左去車站果頭大商場地下食中東野,就算一樣冇英文起碼有圖,看圖識字落到單知自己叫左咩食先。


四個人每人叫一個餐,我個中東薄餅整到成個橢圓形勁多香料&肉醬,再買多個正常pizza齊齊分,好正好夠味落足料,唔似香港一味落茄汁搶味借機減其他配料(係呀Pizza Hut我小緊你呀),再整多杯咖啡食到飽飽。噉樣簡單一餐,都食左我地六十幾歐羅,歐洲食野真係好貴。仲未計跟住去廁所又要俾五毫子,商場特登請左個黑人做廁所長,想去廁所先俾過路錢,死未。




當初因為落雪日子好多景點四五點閂門,就買左三點九車飛返法蘭克福,本身想搭多次纜車直上山頂亦只得放棄。食完中東薄餅仲有少少時間,去左隔籬百貨公司買野,我話咁快買左一袋,出到門口等同事成家慢慢搶,成日本身冇乜特別,終於臨走一刻就落雪了。




睇唔清因為好細,細細粒好似思樂冰飛埋黎,同期待中的大大舊差得遠,不過其他日子都係落完先出街,唯獨今次身處落雪現場,總叫不太枉海德堡此行,搭車食飯加埋五十歐羅都算啦。




難得黎到第二個城市,十點幾遊到三點九就走好似好快,不過睇古跡睇風景一向唔多係我杯茶,所以唔覺點失望,叫做玩唔足,咪係冇行到動物園囉。所以跟住兩日怒行。




「見到個牌,好難唔諗到『金翅仆街鳥』或者加多個公仔變『THIS IS SPARTA』。」




Episode 6:2.2夜行法蘭克福



****************************************************************************************************



Episode 1:從香港的1.27到德國的1.27

Episode 2:1.27晚間自由行+夜攝大教堂

Episode 3:1.28-2.1之做乜鬼野展覽丫落吧蒲去睇show才是王道

Episode 4:2.2日遊海德堡.舊鎮區

Episode 5:2.2日遊海德堡.古堡行

Episode 6:2.2夜行法蘭克福

Episode 7:2.3科隆自由行.火車總站&大教堂

Episode 8:2.3科隆自由行.動物園

Episode 9:2.3科隆自由行.午&夜行

Episode 10:2.4法蘭克福自由行.亂行篇

Episode 11:2.4法蘭克福自由行.動物園

Episode 12:2.4法蘭克福自由行.博物館行

Episode 13:天堂>地獄 德遊後記