Frankfurt Freewalk 2011
Episode 3
1.28-2.1之做乜鬼野展覽丫
落吧蒲去睇show才是王道
Episode 3：1.28-2.1之做乜鬼野展覽丫落吧蒲去睇show才是王道
28/1/2011 FRI 法蘭克福
在香港劉Sir的生活習慣非常唔健康兩點訓已經叫早，但每次去到外國反而修心養身，之前晚第一日到步九點未夠就訓覺，因為天氣凍唔污糟（反而返到房暖氣超勁，一條毛巾仔都流晒汗呀），日日都係訓最少十個鐘八點幾起身先至沖涼夠晒舒服醒神。沖涼換衫執野時，比我早兩三個鐘起身的同事就會到廚房準備早餐。每日一百歐羅房租包埋早餐，大量火腿煙肉果醬麵包供應自製各式多士，劉Sir這等懶人只需要坐定定等，就有得食了。
各位同事自然相當清楚劉Sir的要求同食量。雙層三文治，指定動作級碎料啦。
這就是我們的攤位了。往時出展跟住老細乜都佢話事，一個3m X 6m攤位可以放到3km X 6km咁多野，但次次出國係得兩個人，砌一次場花十幾個鐘濕濕碎。今次冇老細同行個攤位自己設計，仲得我一個男丁，立即有幾簡化得幾簡化，唔係點樣由十三個鐘砌場縮短到三個鐘？
28/1-1/2五日展覽入面，九成九時間景況都同相入面一樣。一來叫黑仔王劉Sir根本係趕客嗟。二來客真係唔多人流冇乜，編到去最高最偏僻個展館絕對有影響。同最重要：對面間公司同我地攤位一樣咁大、同我地做同一樣產品，但佢地有成班鬼睇場，仲特登大陸派左兩個精通中英法文的靚妹妹過黎。就算唔比較邊家產品質素較高，你係客會揀邊一邊？即係我唔係身為參展商，都一早仆左過去對面檔啦。
不過呢，做得人稱地獄黑仔王的劉Sir對家，俾你搶晒全部客又點下場唔慌好得去邊架喇，第一朝已經出事。外國好關注知識產權同產品專利，佢地開檔冇耐就有人告某件產品侵犯專利，勁大隊場館人員加實Ｑ圍實晒個攤位企滿成條路，黎擺展覽無數次的同事話其實噉形勢好普通，佢撞過一次出埋警察荷槍實彈加成隊電視台crew拍低全個過程，今次槍都冇枝cam又冇台算得乜。但咁大棚人睇落都好似好大單，唔止佢地搞到連對面的我地都大半朝做唔到生意（「劉Sir，查實你都係想噉嗟」），最後傾一輪填填文件再拆左，會場隊人走左之後咪又係裝番上去，有人經過問起咪再拆囉，又拆又裝就搏到懵根本冇野。好失望。仲諗住會封佢地舖添。（「唔好呀！封左佢地即係全部客會過返黎我地呢邊做餐死架！」）
本身已經冇野做又俾對面檔猛咁搶客，佢地俾人告犯專利時更加塞晒成條路其他人想行過黎都埋唔到身，迫我唔做野睇戲嗟，冇花生，好在有薯片。好鍾意食Doritos，不過始終來佬野香港賣得幾貴下好少食。肥佬屋企對面有間小超市，第一日同同事八卦入左去，走果時佢話「入黎乜都唔買就走唔係太好喎！」就買左包Doritos。香港大包裝最平賣十七個半，黎到歐洲都差唔多打埋稅1.75歐羅，但計番兌換率10.5就貴香港少少。立即覺得原來香港賣得好平，返到去立即大手入貨先。
公司部電腦大加重到PK，所以臨飛前問人借部細netbook，部機跟我身又唔入得篋梗搵部細夾輕啦。最抵死唔記得左帶埋公司隻mouse而我同事唔識用trackpad一定要mouse，屋企得一隻無線迫住照拎去，結果隻mouse放netbook旁邊都要無線咁on9。
千山萬水拎部機過黎，梗係要上網做公司野啦，不過呢part再有分曉，黎到歐洲搞上網絕對玩死你，不論時間還是金錢。但，關我鬼事，都係公數嗟，更關心當然係甫頭步就要同各位香港朋友打聲招呼：
「『騎騎』這是身在法蘭克福的劉Sir恥笑在香港的契弟們的聲音」
有姐姐行過派場刊，以防悶到訓著拎黎睇睇提神。作為德國數一數二展覽中心，Messe Frankurt各大小展覽當然長做長有，最吸引梗係五月個Musikmesse/Pro Light+Sound啦，即係樂器／舞台／燈光展，而歐洲尤其德國metal咁興盛自然是重頭戲之一。聽北京李哥講，做空中少爺做到舉家移民黎德國，每年五月總會同公司講展覽果排盡量編佢做stand by更黎睇樂器展，而且唔止居於德國的佢，附近地區同國家的其他內地朋友都會趕過黎，就連北京都有人特登飛黎睇。
無他，到左德國可以順道旅行之餘大把其他show睇，同本身樂器展已經係個明星show，差唔多出名樂隊同結他手都會現身，李哥話睇Gwar最過癮，佢地表演已經黐Ｑ線，黎到樂器展會場一樣玩晒cosplay，同班友真係傻的。佢無數個故事當中，最搞笑係有次去到Kerry King代言個結他牌子攤位，見唔到真人好失望但搵到佢個1:1紙牌好過冇過去影張相先，點知影完發現Kerry King企正佢側邊，拿拿臨捉住影番張啦。黎睇展覽唔同睇演唱會（想睇show，晏晝睇完fair，夜晚咪飛車周圍去囉，德國真係多show到你睇唔晒，你有車的話），現場當然唔會有咩表演啦，為的是同佢地近距離接觸齊齊on99的機會，見得多就會發覺，metal友真係好on9。
黎到法蘭克福擺fair發覺，食野好灰。價錢一定超貴，美國就話正嗟全部垃圾食物劉Sir最愛，黎到德國乜都冇，除非你俾十幾歐羅鋸扒，我想試但太豪又唔知好唔好食（經驗之談多數唔掂）。所以公司一早寄定大量杯麵過黎，自己買合味道都嫌貴，所以黎到德國先發現原來出前一丁真不錯。
好似好折墮，豪使其實都可以，但黎緊做完展覽自己去旅行，梗而家慳到幾多公數就慳幾多啦。同，真係架，出前一丁比會場接近所有野都好食，到頭來唔係折墮，係明智．．．
簡直是一個死城。冇野玩到呢班客人做model俾我地影相。無聊到爆，佢同我地都。
本身李哥約今晚出去，但公事纏身想玩都冇得玩。第一日見到成條玻璃穿過睇到個天個商場，今日終於有機會入去蒲蒲。O2等同於PCCW，街舖只做電話搞上網就要入商場大舖，順便見識外國人服務態度同工作效率。樓下街細舖有成五六個人分開做野，大舖反而大大間得三個人仲要只開兩條龍，有兩個德國佬服侍我，後面排左五六個人，雖則外表好隨和其實大家都有點唔奈煩，因為黎到六七點而佢地八點幾就收工，而且係政府下旨要你準時放工想做都唔俾你做，幾開心你話黎德國做野。但兩個德國佬仲可以「慢慢啦唔使急喎」。就算做又二十八唔做又二十八的香港地好難咁頹咁明目張膽。所以我鍾意．．．如果我黎呢度做野的話。
做完正經野就要搵飯食了。人地商場大之餘留好多公眾空間，有大塊空地俾一家大細排排坐，播埋卡通片幾開心。唔會你冇錢你唔幫襯唔俾生意佢做就乜都唔益你甚至趕你走。
咁大個商場、咁大個消費區，其實正正經經食餐平飯的地方唔多，市集又冇開，好在商場地庫有間Rewe，同超級廣場果類一樣有少少熟食。餐牌冇英文，只好看圖識字．．．
德國，最馳名美食當然食腸仔同漢堡扒／包。
當然唔少得鹹豬手啦。但查實我冇乜大興趣。
一來唔識叫，二來其他野都好貴，三來我真係鍾意食，抵步第一晚一樣係食漢堡包。兩三蚊個同出面市集食差唔多價錢。不過出面街邊檔貨色好食過大集團量產．．．
兩日走黎走去，都係為左搞掂個modem上網嗟。老細永遠覺得你check少check慢半日email已經會冇左幾百萬生意，而香港搞左3G上網買晒野俾晒錢臨上機PCCW先至話原來去到歐洲用唔到（點解香港的顧客服務部永遠只係負責俾人小or嬲人小從來冇真正服務？），有USB modem都要先買張電話卡。之前一晚四圍行，搵到有間電器舖賣25歐羅一張，但入面乜都冇要增值，黎到會場再俾30歐羅，諗住掂啦上上下網斷左線，原來就噉用3G電話卡上網係每MB幾仙歐羅噉計，朝早增完值臨收工就玩完噉就冇左三舊幾水，結果收工蒲都冇得出去蒲就係要搵間O2上台。佢地有兩種流動上網plan，一種25歐羅月費成個月任上，另一種平十歐羅但過左流量quota會變成超慢e.g. 56K，雖然只留個半星期但唔知有幾多quota，反正公數梗係用到最盡玩無限plan啦。
人生路不熟唔同洲份規格制度又唔同，結果走左兩晚、使左八十蚊歐羅，終於成功解決黎德國上網的問題，就算減番三十歐羅冤枉錢都要五舊幾水港紙，雖然速度算快連我一向對3G印象麻麻用落都感覺良好（相信因為廢的不是3G，只是香港的3．．．），仍然十分唔甘心。不過公數嗟粗心咁多做乜，同如果黎會場申請要千幾蚊，仲要只包展覽五日上網，跟住我自己旅行果幾日點算？明點解要咁辛苦要燒咁多歐羅要犧牲埋夜晚唔去蒲劉Sir都肯咁搏命去搞啦。
綜合全個行程，要上台無限上網，包埋張卡可能30歐羅搞掂，點玩都得速度相當快，對德國網絡發展非常滿意，科技國就是不同。之後睇報紙睇到，唔知大陸邊個官去德國訪問，返到中國第一件事就係同傳媒（應該話官媒）講「德國百姓上網非常難」。我笑了。大陸網絡果然全世界最自由。
29/1/2011 SAT 法蘭克福
展覽第一晚冇得玩，食完飯整好個modem上網已經七八點舖頭都閂晒門，出去行左陣吹吹風就返歸訓覺，早在第二日一早計劃好晒節目，就食番件三層煙肉三文治作為開心一天好開始。
琴晚去Rewe食飯，熟食檔隔籬就係超市，臨走買左枝果汁試試人地地方風味。呢隻牌子玩兩溝，會揀芒果溝橙因為得佢最正常，其他溝得好random睇見唔知做乜唔敢飲，不過一枝果汁打埋稅要2.5歐羅，即係同香港食個麥記餐差唔多價錢，就．．．
係咪好慘情呢。琴日lunch食一個杯麵。今日對自己好少少，食兩個。（．．．）兩個人實在太得閒，聽同事講佢同佢老公黎歐洲的過癮野。佢老公份工成日同老細飛黎飛去，台灣人鍾意外國夜生活，但歐洲態度係識講英文平過唔識，老細唔識英文梗搵條靚出馬啦，好多時佢出國做野其中一份職責就係扯皮條，幫老細搵定女問定價準備好晒，到囡囡上房發現唔對路，已經唔關佢事了。通常是但一個黎歐洲出完差都會成家人飛過黎順便玩幾日，有次去荷蘭做完野有個鬼佬朋友招待帶佢地兩公婆四圍玩。鬼佬問想去邊？開門見山地
「一場黎到荷蘭梗係去睇紅燈區啦！唔通黎睇風車咩！」
可能個鬼佬自己都未去過，完全唔知點應佢兩個。聽完佢分享，發覺今次黎德國只打算行下街四圍望同睇睇演唱會，好苦悶。
無驚無險又一日，琴晚處理晒公司野，今晚終於可以去玩了。又係去Berliner街搵李哥老婆。真係好鬼羨慕人地做sales無論點遲七八點一定收得工。人地政府會對自己國民咁好。香港同大陸．．．就算啦，唔使你OT已經人至意盡架喇。
一場黎到法蘭克福，獲得李哥李太熱情招呼，夜晚特登開車出去盛名之舊鎮區Old Town見識見識。位置係法蘭克福中心地帶，基本上由一大堆舊樓爛樓組成故名舊鎮，夜媽媽黎行的確好正。佢地都係第一次黎，就係今次劉Sir遠道而來特別一齊出黎蒲，不過相當隔涉跟住GPS行都搵路搵餐死，盪失完路黎到已經好夜，行好耐至搵到間舖頭仔未閂門可以食餐飯。叫左個麥樂雞薯仔，薯仔勁多但雞仔細細塊，水準只及香港邊舖小販檔，都要五個半歐羅，仲貴過市區黃金時段，果然係旅遊區呀。
未試過日頭黎舊鎮但夜晚應該好玩好多，四周圍都係酒吧而且各有主題連hip hop bar都有，論到metal就有點失望，作為德國國樂之一，全市metal bar可能只此一家Speak Easy Hard N' Heavy（個名真複雜），入左舊鎮成鎮爛樓入面行迷官噉左轉右轉，走到深處某條超陰森冷巷最入棟爛樓就係間酒吧，外面睇完全唔會發現得到，夠晒gothic夠晒metal夠晒underground。
我地係全晚唯三亞洲客人，不過universal language係音樂冇人會介意你咩人咩色，去到大把人撩你傾偈，亞洲人身份絕對有影響，隔籬檯成班人開盤賭我地咩國家黎好好笑。當然唔少得不停播metal，雖然新band新歌為主最緊要冇乜死嗌死chok潮流野依然old-school類主打，一播德文metal歌或者Motorhead、Iron Maiden等經典立即全場大合唱，氣氛一流。同難得德國啤酒唔苦夠清，我唔識飲酒隊左差唔多成L都冇事，計番兩三歐羅一杯／一枝同香港差唔多甚至可能平少少，鍾意飲酒簡直係天堂，唔（識）飲當落去同人吹水同聽歌再睇其他人成班一齊on99已經好開心。
只黎一晚已經見識好多，可看出德港兩地金屬文化之差別與差距 － 單香港連一間正式metal bar都冇已經冇得比啦 － 唔好同我講Hard Rock Cafe算係呀，The Wanch都好勉強。酒吧最多係人就集中講人，初時諗住會係麻甩竇甚至毒男竇，到頭來男都係主女未至於稀有，雖然肥妹唔少但人地鬼妹高大，就算大份metal fashion一著上身你都唔會覺得樣衰甚至幾型，太瘦反而著唔出果種氣勢。唔鍾意肥亦有gothic妹妹，窈窕果班通常著gothic或lolita（當然亦有肥版，當見唔到算啦），只有話歐洲人身材著衫優勢亞洲人比唔上。
仔反而仲多野睇，由後生到阿伯都有而且冇個混吉，差唔多人人都有件牛仔褸或皮褸戰衣縫晒布章，越老戰衣上面patch越多越稀罕是資歷地位象徵，加上臨老仲咁metal仍不放棄，一眾阿叔阿伯更得人尊敬。不止年齡層背景亦多元化，後面圍係另一個國家學生黎旅行，旁邊大班藍領，再過一檯有某機構經理，坐隔籬個係某公司老闆，坐對面個某集團CEO，由好上流到好階層、由好富到好貧都有，但唔會因為我係CEO就睇唔起你做實Ｑ、唔會因為我有錢就睇唔起你窮，原因好簡單之前都講過：metal是種universal language。簡單一晚，見盡重金屬世界之大同精神。
就明白香港點解咁難發展metal。香港金屬人口後生仔女學生哥佔極大比例，想搵個過廿五歲都難，因為好多十幾歲開始聽左一兩年甚至一年未夠已經「聽到悶啦」，好少可聽得持久，深入專注長遠等更不用討論；再者可以好肯定同你講，香港十個聽metal九個窮，最少你好難用「富庶」等字形容（當然，身邊亦有數量未至於罕有的富庶metal友／潮童．．．），集中出身社會與文化中至下層，我聽過有名導演去順昌買古典，我聽過有配音大師去Monitor買darkwave，我聽過有設計名家去Zoo買post-rock，但親身工作七年，我從未聽過加未見過有甚麼本地藝術工作者或電影工作者或文化界中人會買metal，就算聽都只限主流經典而非任何地下樂隊或類型。
當聽metal群眾主要包括學生及低收入人士，大多非抱長遠或深入藝術思維，加上居於香港此全世界最商業化最消費主義城市，事實一是真正獨立樂隊地下樂隊從來得不到足夠樂迷支持，地下精神就是無私出錢出力，香港各位老細們態度則是想我支持你請先有hype，例如簽大公司之後網上人人講，因為我想付出得「值」，亦即當你開始脫離地下，先能夠得到支持地下的我去支持你。此乃長存於香港樂迷間之一大弔詭。事實二是無多少人能夠抽身明鑑何謂商業潮流何謂藝術文化，多年前已提出「香港metal K歌化」一說，在民間在市場metal本質已變到同英皇K歌一樣普及一樣流行，K歌點樣影響全個音樂界發展隨便問位香港metal友都解釋到你知，但自己又將metal當成K歌一樣，點期望本地可以將metal推至藝術本質而非僅僅商業層面之成功？噉都唔係問題，但以「地下音樂支持者」自居同時參與將自己所屬之地下音樂商業化，是否矛盾得過份？難得當局者能夠處之泰然。你可以話歐洲仲大路，metal上埋排行榜。但人地擺到明商業時就係商業、自己係乜就乜有咩野唔係就唔係，香港正好相反，就算其他人加自己明知唔係，都要撐到恆話自己係，衰左咪潛水囉有咩所謂，詳見各大forum。香港metal界我真係未見過大同，酒吧入面所有人無論出身背景口味點樣迴異都懂得互相尊重互相欣賞，香港好多時仍徘徊於鬥分圈子、你唔妥我時我設計陰你。難怪香港metal一直難離一池死水景況。
九點幾坐到十一點幾，得幾個人坐到全場爆滿，開開心心聽歌吹水坐到乜都聽唔到，加上得李哥一個唔使返工（做空中少爺真開心呀每次飛完都stand by幾日即係飛一轉就有幾日dayoff），十一點九坐順風車去火車總站轉單軌電車返歸，十二點幾返到屋企，黎到德國第一次真正疏乎。可惜香港最接近只得The Wanch，如果香港都有如此metal bar，唔飲酒都個個星期落去啦。
話說落吧當晚著住件Pink Floyd《Dark Side of the Moon》（我只帶左兩件衫去德國，所以差唔多日日都係Pink Floyd．．．），酒吧唔係大坐個幾鐘已經坐爆，有個德國阿姑搭我地檯，見到件Pink Floyd寫左張紙俾我，大意係Pink Floyd tribute show，叫我記得去睇。德國的朋友真好人。
個阿姑所講就係呢場The Australian Pink Floyd Show，除左呢隊澳洲tribute band，仲有另一場同樣以Pink Floyd做主題之cover/tribute音樂會，同樣大場開周街貼晒大海報果隻，睇黎呢隊prog-rock經典樂隊非常受歡迎。好可惜開show時我已經返左香港。德國真係好多演唱會睇，遺憾是缺乏時間同門路．．．
30/1/2011 SUN 法蘭克福
頭兩日早餐都食麵包，第三日唔好咁灰啦食好少少啦。好囉食杯麵囉。（．．．）麵包食到悶之餘，原來香港寄左超大量杯麵黎，兩個人食左兩日都食唔晒，而家連早餐都要轉攻杯麵。好在有屋主肥佬無限火腿煙肉供應。可惜我地面皮未厚到敢拎埋去會場，雖然每日十蚊歐羅叫包早餐，但一日清佢成盤煙肉，分分鐘夜晚返到行李俾人掟晒出大門口，因為收埋收埋早餐錢都唔夠俾。
琴晚去wet反而早左起身，食完個麵仲有時間八八肥佬間廚房。歐洲出街食野好貴，佢地得兩個人住自己煮多，唔知點解調味料反而用好多國產貨，好似呢枝「中國名牌白胡椒」，我睇過真係Made in China，仲諗住德國人咁重民族意識會用番自己國家出品。
唯一安慰，係全部國貨通通用繁體字。大陸人自己都有自知之明，就算平時用殘體字，都明白無論鬼佬點樣鍾意中國文化，始終只有繁體字先呃到佢地。
廚房仲有屋主肥佬個返工時間表，好值得香港各位做到死的打工仔參考。五六年前經理黎做展覽，成日撞到肥佬飲醉酒猛咁鬧，同香港相似又係新移民累事，土耳其大量廉價勞工湧入搶飯碗搞到佢開工不足，冇工開咪日日劈酒講粗口囉。今年戒左酒個人健康左脾氣冇左，因為終於加番工時「返好多工」。睇睇佢個時間表，香港同德國對「多」的定義，相距甚遠。
肥佬好似做IT之類，當零售店同超市規定夜晚八點要放工、星期六日可以只開半日甚至唔開，sales都咁舒服寫字樓工星期六日就一定唔使返工啦。唔知點解可以好多日子stand by留屋企等工開，要返工都只得早更8:00-1:00同午更12:00-5:00其中一更，而且可以誇張到一個星期四日stand by最後一日返半晝就走得人。成個月必須返工日子只得十更即係五十個鐘，如果咁好彩stand by日子唔使做的話，成個禮拜可以只返五個鐘工、全個月平均一個星期只做12.5個鐘。而此乃「正常工時」，「已經做得比以前多」。聽同事講佢上年住果戶民宿，做德文教師的女屋主嘆世界嘆得不相伯仲，教書間學校就係屋企隔籬，可以朝早過去教一個鐘書，跟住返屋企抖兩個鐘，再走番過去教第二堂，就放學了。當然總有辛苦工種，好似肥佬老婆做護士，就真係由朝做到晚或者頂通宵更連佢做老公都唔係成日有機會見到面，但可以大概睇到人地國家一個正常打工仔生活係點。同最重要人地工時短、唔使OT、星期六日唔使返工之餘，人工一定高過做到隻狗噉的香港打工仔呀。
仲未講佢地可以將自己屋企出租做家庭旅館。以此居住質素計價錢大多一百歐羅一晚，即係有冇人住房一樣係噉執，早餐整多一兩份冇乜所謂水電暖氣又用唔到佢幾多，要縮數仲有好多方法同事話以前只會俾一卷廁紙你用成個禮拜，今次肯俾兩卷已經好左（可能因為我地第一日已經借新年利是之名俾多十歐羅，有時寄人籬下少少錢真係唔慳得），所以成份租金差唔多袋足幾好搵，每月靠租房已經可以有千幾歐羅收入，分分鐘多過你成個月人工。而佢地個單位唔算大，但價錢只需要幾十萬港紙，而香港單位同尺寸同實用面積同裝修，俾多十倍錢都未必買得到。亦冇可能似佢地將自己屋企變做旅舍，靠人地俾租金幫你供樓。
所以如果可以，真係要移民黎歐洲，展覽會成日俾我地點做乜做物個場地經理就係例子。佢以前北京做IT，每日十幾個鐘由朝做到晚，典型中國打工仔生活。移民黎歐洲做展覽會策劃之後，家住旅遊區，返工就係飛去唔同國家同城市，日頭駐場夜晚同假期去觀光買野，每幾個月放次大假上阿爾卑斯山享受人生。
「走唔甩？繼續乖乖地幫李家打工算啦香港人。」
雖然我唔多介意，但日日lunch食杯麵都幾惡頂，同事決定今日豪少少食中菜。逢到十一二點就會有好多「花園酒家」員工場內推點心車噉推黎推去，一個三送飯盒加包野飲加個生果要八歐羅。結果．．．我都係食番杯麵算。仍未試過一次外國食中餐會似真正中餐或最少唔難食。
「車牌666。型到爆。」
日頭好悶，三十號晚就大件事喇，要去睇show呀。想香港睇metal show睇大band蒜狗掃啦，但一場黎到德國，歐洲最大音樂市場、歐洲metal重鎮之一，唔睇演唱會實在對唔住自己。雖然冬天冇戶外大型音樂節都咁好彩俾我遇得到兩場細fest，今晚成到團全靠移民左黎德國的北京朋友李哥相助。話說Nile去隔籬鎮開show佢都超級想去，但佢做空中少爺近幾日要stand by，咁唔好彩一個電話打黎就冇得玩，所以五點前大家都好緊張，大佬我旨意晒佢架冇佢車我自己一個人冇可能去到。好彩最後安全過關，夜晚等埋佢老婆放工，一齊坐佢架666號車飛過隔籬鎮。
佢話全中國睇最多外國show頭一二位一定有佢地兩公婆份，我絕對唔會唔信，因為真係好狂熱，只要知道有好睇演唱會，無論大細遠近去得到就會捧場，好似聽日星期一除左李哥大家都要返早，但Nile喎！就成班人齊齊去睇show了。當然可以咁自在全因地利，講過德國係歐洲音樂工業大國，metal尤其興盛自然大量演唱會，好似今晚除左Nile仲有Accept同Axel Rudei Pell，三場都係開唔使一個鐘車就到，不過Accept新歌佬同新碟都好勁，聽李哥講新班底開幾多場爆幾多場成個tour一票難求，另一邊Axel Rudei Pell同樣一早賣晒飛反而估唔到佢都咁有叫座力，最後「唯有」黎睇Nile。全因德國地利，香港人想睇metal gig恨極都冇，德國係多到煩睇邊場好，佢兩個去睇show就好似香港人諗唱唔唱K好、揀去邊個場唱一樣咁平常，雖然要自己開車但一程只半個鐘至一個鐘，車程同香港唔差幾遠，真幸福呀。
做空仔飛黎飛去，到另一個國家留幾日，其他crew睇景點買野，佢租架車跟住GPS搵show睇。返工日子餘暇節目係自己睇show，假期就係兩公婆一齊睇，既是生活一大部份，為一場演唱會開車穿州過省幾百公里對佢地黎講好平常，最勁試過一日來回一千五百公里，一早開車夜晚去到睇show，睇完再開幾個鐘車，返到屋企立即撻低，激到爆。同每次開車去睇show都有野玩，因為可以自訂車牌，差唔多係metal友就會整666，好似今晚飛高速公路過隔籬鎮，隔籬平排架車同我地一樣三條六，真係唔使check IP都知佢去邊想做乜。去大show更加壯觀，試過去Wacken Open Air，高速公路沿路睇車牌就知邊個人咩料周圍嗌同人相認，去到成場架架車666。一切一切，香港絕對唔會體會得到。
今場係個意外收穫。本身只預睇到一場show，全靠李哥唔使飛、有車加兩公婆超想睇，先有機會睇到Nile Those Whom The Gods Detest Tour 2011德國某站。六點幾放工返到酒店換好衫等佢地車，雖然全段路四十幾公里仲要飛高速聽落唔係好遠，但遇著多車加撞車（鑊鑊劉Sir出遠門必定出事），守時是德國人的美德所以搭正七點半開始，唔係有意外的話，就唔使遲兩個幾字到了。
一直唔知道個鎮同個場叫咩名，只知道要開大半個鐘車去另一個城入到深郊樹林某荒地一間屋仔個地牢睇演唱會，夠晒underground feel。因為部相機zoom唔夠遠又三四百人迫唔到埋去，加顧住睇show，相就冇架喇，睇字啦。
DarkRise
瑞士death metal，走中板有點兒technical，結他手超勁solo作得好，可惜台下反應好差好靜，本身已經好少人，歌手想影觀眾相台前勁大塊空地得兩三個人fing頭，灰。我覺得唔錯仲買左佢地兩隻碟。有點遺憾遲到睇唔到佢地全場演出，需知death metal一向我鍾意快板勁衝多過中板。
Zonaria
以前聽CD已經唔多鍾意的瑞典band，melodic death版Dimmu Borgir，歌唔夠力亦唔夠張力，現場又玩得麻麻（老實，見過部份香港band表演仲精彩有神過佢地），有點失望。我寧願唔請Zonaria俾DarkRise玩多幾首。音樂唔掂都可以捱到咁多年，只有話歐洲系metal當中，你著到咁black gothic一定有運行。
Dew-Scented
是晚首席opening band，新一代德國thrash/death黎講叫知名度較高一隊，但始終唔識欣賞，出左唔少碟但第一日到今日仍只有「有水準但欠特色」之印象。李哥正好同我相反，佢超迷Dew-Scented正因覺得同其他德國甚至歐洲同類band唔同隻隻碟都有特別，相信是我道行未夠，畢竟thrash少聽非我強項。不過只要玩thrash而有一定水準現場必定好睇，去到Dew-Scented級數更加冇必要擔心，歌冇驚喜但台風好，係鼓佬live體力差少少。
Melechesh
主角出場，好老實我期待佢地以色列folk black多過Nile。為佢地特登開另一套鼓，Nile套鼓超大所以Melechesh鼓佬個位睇落好迷你，不過體能同古怪節奏實在太強，你可以話玩細細套鼓差少少視覺效果同氣勢，但咁細都玩到超多特別野技術野先係高手呀。
Melechesh每次出新碟基本上一定比舊碟激，新碟快一段再轉folk再快玩對比整體唔算好完滿，個人至愛還是Proscriptor告別作、開始加重thrash death的《Sphynx》。因為選曲集中新兩隻碟不太如意，但結他佬包住頭套成個恐怖份子噉出場玩第一首（完第一首除頭套原來長頭髮fing到爆），金曲《Triangular Tattvic Fire》中間結他佬拎枝棍彈結他，加鼓佬一流，仍然非常好睇十分開心。最重要係：有幾多機會睇得到中東metal野呀？如果加埋Orphaned Land就一撚流。 （的確有Nile + Melechesh + Orphaned Land的超強folk metal tour．．．不過唔係我遇得到囉．．．）
Nile
數當代最強death metal樂隊Nile必入三甲，聽CD已經覺得太勁，睇埋live先發覺，係勁到離譜。鼓佬套鼓超大加調聲唔trigger唔電，力水拍子嚇死人，唔多使推聲都好爆仲要準過拍子機，點樣快點樣狠更加唔使講。三個結他佬彈野超複雜之餘三個都做埋歌手高中低音齊齊唱，歌勁難但全隊完全唔甩唔錯穩到黐線，仲要成日嗌同台下玩。最緊要，唔係冇其他band技術同台風及得上，但Nile音樂除超技術death metal再多埃及文化之戲劇性同詭秘獨一無二，加埋超專業推聲玩sampling玩effect玩到癲，佢地絕對係現代death metal極致，睇過，幾乎已無憾。憾在跟Melechesh一樣差選曲，上兩隻碟編曲開始玩doom鍾意爆一輪入超慢，要到新碟先正式成熟，過左頭半場玩新碟歌多之後有點悶場。同好似冇玩到最重要的《Cast Down the Heretic》。不過，單睇技術已經值晒。
十二點左右完show，台上台下齊齊劈酒吹水，我地唯五中國人自不然經常俾人逗，又是一種樂趣，唔係第二日大家要返工，點會十二點九走人咁早？五個人迫埋一架車，車窗水氣結晒冷朦到差唔多睇唔到路仲要深夜黑媽媽噉摸路成個鐘返法蘭克福，又是過癮。
枝鏡得14-42又企得後，冇乜影相因為影唔到加影到好多都太暗或炒，只得兩張。Zonaria話俾大家聽，如何在metal界以造型搭救音樂的不足。
第二張，Dew-Scented。影到冇乜心機，最後三隊放棄。一場演唱會搞到決心買枝新鏡。
好難得見到劉Sir架，成個德國遊得今晚見得到劉Sir真人。身為Dew-Scented hardcore fans的李哥，係全世界第一個買齊佢地全線再搵佢地簽齊名的中國人，一早同佢地熟到攬頭攬頸齊齊劈酒，首先有歌佬同大家一齊影相。左邊兩位係同李哥一樣移居德國做野的北京朋友，跟住係李哥伉儷。
Dew-Scented bass佬。
連Holy Moses都黎左先估佢唔到，相入面係佢地結他佬。不過更想撞佢地歌婆，佢算係初代extreme metal女歌手，而家老左仲有新碟出加仲嗌得，想一睹真面目。
這晚認識到的新朋友Murph Murphington，係個經驗豐富的metal gig sound engineer，今晚幫Melechesh做聲，仲有同其他好多一線出名extreme metal band合作過。最過癮係佢原來曾經黎過中國同人合作做生意搞旅館，不過覺得大陸生意同人風氣唔適合就走左，而家住菲律賓。識少少中文又勁多野講，所以大把水吹好多笑料，好可惜第二日要返工．．．
臨走前買左DarkRise兩隻碟，雖然佢地排第一但老老實實我覺得佢地真係唔錯，是難得結合得到melodic death、technical death同brutal death的出色樂隊。點知跟住先發現中伏：賣得兩隻，但原來出左三隻碟。俾埋最後一隻我呀，我要儲全線呀．．．
1/2/2011 TUE 法蘭克福
來到展覽會最後一天。成個31號跳過因為好平靜，fair完好乖的返房執行李，連飯都懶得買叫同事幫我搞掂。前幾晚去Rewe見到人地食燒春雞幾吸引，全隻四歐羅，半隻加薯條就五蚊，外賣拎到返黎薯條都凍晒稔晒啦，就叫隻全隻燒春雞試試。讀教院year 1已經講落百佳一人一隻燒春雞當飯食的大計，估唔到畢業後咁多年黎到德國先達成。
細個成日去大家樂食燒春雞，KFC叫我食一桶亦完全冇問題，所以覺得食隻雞嗟冇乜大不了，點知問題不在雞，而在於整法。愛飲酒的德國佬鍾意將食物醃到味濃又鹹，隻雞就係鹹得黎勁多油勁多汁，齋飲都飲死你，琴晚食左四隻手腳已經飽晒。最後一日仲有幾個杯麵存貨，早餐就係燒春雞杯麵，但食左雞背已頂到上心口。結果四歐羅燒春雞，大戰兩日，雞胸搞唔掂，未捷。從今以後唔敢再食全雞。
日日朝早同晏晝都捱杯麵，臨尾幾日食完全唔中式的中餐叫好少少，睇落仍然好似好灰。其實都有奢侈少少的，Sam少叫落黎到歐洲記得食Movenpick雪糕，既然我地個館門口就有檔，同事每個晏晝出去打電話返香港時，回程就順手幫我買番杯。雙球三歐羅加多球多一蚊其實都幾貴，不過飯已經食得唔豪加又係公數，下午茶就對自己好少少啦。差唔多每日一杯，感想是歐式雪糕唔太適合我，食雪糕我鍾意硬少少有得趙同較濃味，Movenpick正好相反賣滑同清淡，所以試左幾隻味，後來只叫夠味有得得咬的曲奇。睇黎都係食唔慣貴野，返香港食Haagen-Dazs．．．呀唔係應該係食阿波羅算啦。
最後一日半日搞掂，同事屋企人聽朝會飛黎同佢會合，要買定野俾屋企人所以一早唔見左人，我仲有成個晏晝消磨，周圍走睇睇各大景點日景。
只有第一日覺得凍少少，但跟住習慣左好易適應，天氣夠乾嘛所以同香港最凍日子唔差好多。唔驚人的雀仔就鍾意廣場周圍跳搵麵包碎食。呢隻雀唔知邊度執到好鬼大舊。
冇乜野做加睇定買乜手信，入超市行個圈，但唔買野走好樣衰，濕碎野都要執少少。搵晒成間超市最平係呢隻朱古力批，0.99四個抵立即執包，點知記漏左未打稅夾埋要1.05，等我俾錢時戇居居拎住個一蚊大安旨意．．．好在都幾好食。
特登提早琴晚執行李，全因今晚有show睇。當知道有得黎德國，第一年事當然係立即搵演唱會，幾個月前上網搵到場Neckbreakers Ball Tour 2011，唔知頭唔知路連班底都唔清楚都買左飛先算，當時連黎德國有乜做有乜睇都未知酒店都未訂晒，可見metal多重要。
因為上網買飛所以只有憑A4紙用barcode入場，係個少少缺憾，睇Nile果晚張飛靚到爆當紀念品都得就知即場買飛有著數啦。
本身今晚同之前一樣成班人去，結果被放飛機，農曆新年嘛即係我黎避年嗟人地要過年架。冇車接送要自己一個搵路，人生路不熟特登早好多出發廢事蕩失路，點知原來好近總站搭火車兩三個字就到，不過呢頭幾僻屬於市郊，舖頭都唔多間想行街都冇野行搵食算。
遇到德國的日本城Tedi，一蚊店黎大部份貨色一歐羅搞掂，以歐洲去電話亭打個電話都要一歐羅的消費水平計非常之抵。值得一提係門口個「停車場」，有得俾你泊單車同滑板車，兩種自行車都係當地非常流行之代步工具。來自踩滑板車會俾人恥笑或者歧視的香港，非常羨慕可以認真踩住黎返工放工四圍去仲有專用停車位的法蘭克福朋友。
即住百佳同惠康有超級廣場，Rewe都有City版。個名威左，點知細好多．．．好在都有熟食買，又係叫漢堡，成個包三個幾唔要包平兩歐羅，就三蚊雞買左兩塊漢堡扒行住食。
這就是目的地Batschkapp。佢係天橋底一個火車站入面，一出門口就係火車軌（人地火車站冇閘口的），隔籬係一列工廠、貨倉，完全是地下格。
表演非常多加多元化，Kate Perry玩完，就到Helloween + Stratovarius，從最pop到最underground都有。
早左到路又唔難搵，一面食漢堡扒一面睇人地街同屋有幾靚。
睇見到「嘩」，香港地邊有可能起屋起到咁新奇？
「靚到好似模型噉。」
第一次睇show要搜身入場 － 唔係查袋，係真係搜你身果隻，場內唔少大隻佬型實Ｑ，入到去買野飲都俾膠杯，四歐羅杯可樂飲完還杯拎番兩蚊，保安做到咁足因為個場好多日子係D場黎。比我想像中細，不過作為貨倉改建，迫迫地要入五六七百人唔難，而且有上下兩層，前面好明顯就係俾你fing同撞，行幾級樓梯到上層就係bar同merch counter，你入場為聽歌同玩還是純粹劈酒吹水都冇問題，所以男女老幼乜人都有，後面吧檯前一班麻甩佬就係飲酒傾偈例子，閒來走上前嗌幾嗌fing幾fing，跟住走番去後面講講笑笑，而前面有班男女大學生買幾杯野飲慢慢嘆睇show還是其次，當背景聲同畫係metal而佢地舉止似去cafe多過livehouse更顯場地奇特之處。單見識如此奇景已經值了，香港邊有可能見到丫搵到個正經少少人家去睇indie gig已經難得啦。
Milking the Goatmachine
睇相啦。見到名都知會好過癮。全隊四個人戴晒山羊面具，超鍾意邊彈邊高速頭擰擰，因為用無線咪基本上你都唔知係即場真唱還是有幕後代唱。玩近早期Suffocation式grind death，間唔中攝少少無聊野好似有首歌搵條友著到成隻森林精靈噉出黎跳舞掟野，實在太過癮呢隊live一流，好老實睇左兩場show，佢地係音樂同表演最滿意之一。都只做得到第一隊開場。咁灰。
Manegarm
以前聽碟已經覺得好無敵的瑞典維京black metal，live兩個結他佬其實冇乜特別野做，因為主角係貝多芬髮型拎空心琴的小提琴佬，全隊fing得最勁走動得最多又拉得好，幾首歌小提琴落埋wah，搞掂。超強呀佢地live，遠超我預期。
Equilibrium
對我黎講佢地先係今場主角，新一代folk metal band中最強之一，德國folk metal勢力已有壓倒芬蘭之勢。一隊德國band，黎到主場，玩歐洲民族metal，台下好難唔發癲，超多女女跳晒舞，全場high到爆炸。之前冇乜留意，原來bass係女黎，其他成員個個大隻佬佢鬼咁細粒，人地枝咪set到差唔多佢頭頂，但彈得好仲要走黎走去跳晒fing晒再成日同台下一齊\m/好過癮。metal界需要更多這樣的囡囡。而鼓手好似係新人，講到歐洲folk metal band，佢應該係其中一個最佳鼓手。
好似近全部folk metal band出演唱會，冇keyboard手的話差唔多結他同鼓以外部份都靠播帶。希望可以有次睇到玩埋民族樂器的folk metal live。頂，其實德國好多呢類live band。想睇In Extremo呀。
Legion of the Damned
買飛時冇睇清楚有乜band，當知道有佢地有點後悔買左飛。一隊我從來唔鍾意的荷蘭thrash metal band，有技術有riff但寫歌唔掂，聽左幾隻碟都覺得悶局佔大部份時間。今場set野鬼死咁耐，仲要得一枝結他絕對唔夠，第一首歌同聲已經搞到我想訓，玩三四首歌先得一首似樣，但現場觀眾反應超好，或者因為佢地歌路好德國thrash所以黎到德國玩台下超受。我企到後四分一場，企側邊個鬼妹同個場隔幾十米加前後左右塞滿晒人，都可以發晒癲勁fing頭捧足佢地成場。只有話，極具渲染力的觀眾反應救左隊band。or個癲狂德國妹救左我。
Kataklysm
其實我一直唔明白點解呢隊二線Cryptopsy可以一路咁紅。早期有幾隻碟係正的，是較melodic化的Cryptopsy旋律得黎仍然好恆，但出左好鬼多碟而大部份都唔突出，後來更加變成「proto deathcore」，同差唔多全部碟封面樣衰到爆見到都冇胃口，呢場做headliner絕對搞到我好驚。選曲較新，實在太core太melodic，加上從來唔鍾意live只得一枝結他的death metal band，除非你玩到好勁如Krisiun但而家的Kataklysm差很遠（以前就唔敢講），整體印象麻麻，但其他人相反比LotD時仲要high，我身後有班佬直頭可以跟住一齊唱（可想而知而家Kataklysm詞同旋律有幾core），台下娛樂性豐富。不過返酒店要轉兩次車，趕尾班十一點九就要走人，老老實實唔覺有咩損失。
set場又係搞左好耐因為掛左兩塊Kataklysm banner，我走時仲係新碟banner唔知另一塊係乜，可能我走左之後立即換舊碟banner之後
「而家先正場我地決定玩晒成隻《Temple of Knowledge》！」
就hihi了。（係的話真係要小九Legion of the Damned做乜set場set咁耐）
簡單黎講，今場完全為頭三隊，重點是Equilibrium（bass妹真係好正）同Manegarm（小提琴佬搶晒），而同上場一樣都係第一隊好睇。全場最過癮有個成面鬚包頭巾成個阿叉噉款的阿伯，睇到搖晒fing晒遞晒手超級metal，仲要係長駐panel位好似好有地位，衰在要早走，好想同佢影番張相。睇落應該係metal gig常客黎，可能係metal界猛人黎個阿叉伯伯。
是次德國之旅metal gig環節圓滿結束，三月仲有場Paganfest絕對想睇。可惜。
地鐵站月台當眼處好易搵到Batchkapp海報，經過幾個站都見，個場睇黎非常出名，非常出名的會黎玩又有唔少電野，但metal gig都幾多，其實我德國最後一晚4/2仲有Bring Me the Horizon + Architects + The Devil Wears Prada + Tek-One，本身興趣已唔大，買左今場飛之後隔幾日諗住既然都係metal gig照睇啦，已經話咁快賣晒飛，當時離開場仲有三個月，有見metalcore的潮流魅力加知道班底特別headliner立即明咩事，但睇唔到亦冇乜所謂，好老實我只對應該係最冇人理果隊Tek-One有興趣．．．
可以睇到仲有其他正gig，三月頭有Apocalyptica，年底又Within Temptation，但其實最最最最想睇果場，係我到德國兩三之前的Van Canto。好想現場親身體會9up metal的威力。（當然仲有衝到最前面目及目及歌妹啦，騎騎）
冇印到靚一靚的飛留念，有更正的場刊。入場就會收到一本製作非常之專業的NoizeLetter，一本專講metalfest的小冊子。
呢場就係今晚Neckbreakers Ball。左邊條友乜料就我都唔知，因為成本書得德文冇英文，雖然有好多訪問同專輯介紹，除左band名之外一隻字都睇唔明．．．
Paganfest呀。一向覺得live睇folk metal是一大享受，仲要有咁強班底，重頭的Korpiklanni反而從來唔大興趣，但其他任何一隊尤其Eluveitie、Unleashed同Moonsorrow，都是非睇不可。
另一非常想睇大gig，Power of Metal見名都知power metal底為主，全部冇一隊唔想睇，唔使講出左新碟的三隊Nevermore同Symphony X同Mercneary啦，雖然基本上只得SX新碟真係叫好但通通勁live band黎，Thaurorod唔多出名但佢地隻symphonic power我受，重點始終係重組的Psychotic Waltz，一隊屬第一浪但今時今日仍然冇乜人知道之progressive metal band，某程度上仲幾cult，除左清聲不輸Opeth的歌佬Devon Graves，結他手Brian McAlpin咁多年黎都係坐住輪椅metal。為佢地重組之歷史意義、為Brian McAlpin風采，Power of Metal已夠晒號召力。
仲有年度其他大fest，可惜冇得睇有得恨。不過就算冇份親身參與，都感受得到人地做好呢種音樂份誠意同氣氛，憑書俾到人一份投入感。香港的搞手們，要學習呀。
搭車其實唔花時間等車先耐，十二點幾返到屋企，等左好耐喇，終於落雪。為這天帶來一個完美的結束。