Frankfurt Freewalk 2011
Episode 12
2.4法蘭克福自由行．博物館行
Episode 3：1.28-2.1之做乜鬼野展覽丫落吧蒲去睇show才是王道
4/2/2011 FRI 法蘭克福
行完動物園，決定過美茵河對面岸，因為Frankfurt Card包晒車錢，今次唔自己行電車搞掂。第一次過對面岸，迎接我的是一間二手唱片舖，唔計大商場大舖頭，係法蘭克福第一次撞到的CD舖，唔少正野，不過正在路途中加黎緊仲有排行，就只作觀光未有購物。或者下次有機會掃掃貨。（不過到時應該已經唔記得左間舖位置）
規劃得相當好，大多數博物館都位於沿岸，過左河之後直線由頭掃到落尾就可以。不過黑仔就係黑仔，專誠黎到睇人地博物館，唔代表人地一定俾你睇，好多間好似唔憂做放冬節假，睇，就自己睇外面啦（雖然都好靚）．．．
即係以為科隆河邊成班雀仔好壯觀。法蘭克福條河，直頭有大群鵝游水散步。
之前隔岸望就望得多，終於近距離見一見大教堂。
望番對面岸，亦係第一次由咁遠距離如此角度，睇睇成日走的彼方。
途中見到個花園，不得不入去遊覽。唔大只半個石地足球場左右，好多間洋房加幾間公司／寫字樓，大家共用中間草坪，仲有晒小路連接各建築。入去行左好耐都冇人趕，跟住仲見到有人入黎放狗，似乎係個唔介意益埋附近街坊的商住兩用地帶。好羨慕人地可以有咁多美輪美奐公眾空間。
又係對地圖比例冇乜印象，心諗地圖望落兩點好近，實際上都要行幾個字先到。這是世界文化博物館。
冇人、冇燈、冇開門，去到門口見到張告示，雖然冇英文，我都大概估到佢想講乜野．．．
繼續行多陣到街口，就到最大興趣的德國電影館。好可惜，離遠見到咁大陣仗，就知道又冇行。
初時以為見到就係電影館外牆，原來全部掛畫黎，包住晒唔會俾你見到裝修緊的內籠。人地裝修都咁多野玩，香港工地一班學學野啦，次次起樓維修圍板只識得賣廣告。
德國建築博物館，又係好想睇，雖見入面有人影燈光，但好似又冇開門．．．
唔記得左呢間係咩館，總之知道佢冇開啦。
最後，終於俾我搵到一間開門做生意的博物館：
法蘭克福電訊博物館。
係，我認，唔係因為門口呢隻電訊神獸，我未必會咁留意，更加唔會入去。入場券都要三歐羅架。
雖歷史文物為主，都有唔少以電訊為題材的藝術品。
雖然門口好樣衰，但原來入面好靚，又係玩德國建築常見的多種素材拼合同圓形主題，個玻璃大天花正呀。
見到呢個德英日語告示，有點不解，照計日本人咁守規矩唔會亂推門自出自入，點解會用日文？原因可能係1) 鬼佬唔識分日本人同中國人or日文同中文（其實好普遍），或者2) 旅行會入博物館的亞洲人大多係日本人，大陸人會入博物館的嗎？
其實，好悶，同好少野睇，展品只放兩層，加上又係只得德文（叫人唔好亂開門個告示牌有日文，已經是一個突破了），兩三個字就行完，但入到黎行完動物園又未食野，順便坐低食埋lunch啦，雖然已經是下午茶時間。黎到德國最後一日先首次食熱狗，價錢EU2.3，加埋杯可樂兩歐羅，一個下午茶都要四十幾港紙。好在熱狗好食，同德國可樂味淡好飲，最正是茶水間請個後生女收錢整野食，唔知係咪大學生兼職，重點除左靚同一口流利英語，仲有擺明叫你睇的deep cut，鬼妹真係冇所謂有好野咪俾你睇囉。所以這四十幾蚊，我是俾得心甘名抵的。
食完熱狗繼續上路，一連經過幾間博物館，唔知點解好多同歷史有關，唔同地區或年代都有，不過歷史白痴我冇乜興趣，問題係我想睇的唔開，唔想入的就燈火通明．．．
河中間大橋，行左大半個鐘終於到達。如果唔係未行晒博物館，我會過橋行番過對面。
這是河邊的行人徑兼單車徑。加上唔太大風唔太凍的天氣，行得好舒服。
呢間靚到喊，好想入去睇睇，照道理係博物館，但睇地圖個名好似唔同，驚入錯俾人笑，睇睇外面就算。
今日過左河先知，原來自己住果邊有咁大座樓。
終於行到尾，經過更多博物館，但絕大部份冇開門，唔係放假就係裝修，甚至見到有間話搬左。難得咁有興致黎觀光，點知兩邊岸行晒只入得一間，要我白行一趟。好在景色靚，平常心散步都OK的。
搭番車過對面，回到經常經過的巨型歐羅標誌，落車就行左去隔籬個花園。結果，明明已經企側邊，都冇影到地標的中央銀行。
來來去去都係行幾條街幾個區，見最後一日，又走走免稅店街，順便同李哥老婆道個別。今日係年初二，佢地已經要開工了。再行多次附近的舊樓古蹟。
口痕想食杯雪糕，嘩最平都四五歐羅一杯，拍得住fairground。同一價錢夠少少地食一餐。歐洲食零食同小食好奢侈。
對面岸河邊好多鵝，呢邊呢，就係鴨仔地盤。
所以話人地生活環境幾好，就算裝修起樓，都盡量包裝得靚一靚，等街坊途人覺得舒舒服服。
人地生活真係好悠閒好慢，想過馬路，都請你自己手動轉綠燈，我同同事初到貴境時就試過戇居居企馬路邊等餐慒，先知道原來要自己按掣轉燈，雖然唔轉燈其實都冇問題，因為好多馬路都有班馬線，少車的話好多時司機唔介意停低讓你過先。人地慢到一個地步，係電梯連閂門掣都冇，快開的香港人黎到絕對唔會慣。
睇見兩張海報，估唔估到sell緊乜？是下一個目的地漫畫博物館。
人地普通住宅都可以起得咁風格化，望番香港外牆設計得個悶字的香港，你仲有乜好講丫。
最想睇的漫畫博物館，剛好是遊晒河岸兩邊一個大圈最後一點，就留番佢做壓軸。
似乎同我想像中好唔同，德國的漫畫看來相當益智。
點知，又閂左門。明明開晒燈，但門鎖左，拍門又冇人應，千里迢迢黎到，我反應門上面睇到晒。
有個幾特別的石公園，似圍牆遺跡，唔知係咪以前打仗淨低。
石公園隔籬間大屋，好型。
睇漏眼的現代藝術博物館，亂行先俾我發現，原來呢頭仲有一間。不過對藝術已經冇乜興趣，仲要擺明睇完都冇得解唔會明的現代藝術，放棄。
最後，今日博物館之旅就在不快之中結束。早知冬季咁多家唔係放假就係閉館維修，我就唔特登走咁多路摸門釘啦。其實睇地圖，仲有間好想行，就係納粹黨文件庫，不過要行番入內陸區而且位置相當難搵，加上唔知係咪公開俾遊客入去，留番下次啦。
最後一日仲有個重要任務：買手信返香港。所以一定要返去名店街，唔買名牌都要搵間超市入貨。有個阿返帶住隻侏儒馬，唔知講乜，不過幾得意，就俾左一歐羅俾佢，佢話「會用黎買蘿蔔餵隻馬仔。」
晚餐火車站搞掂，住站側酒店好處係唔使食酒店貴又唔好食的西餐，火車站任你掃大把選擇。買左兩塊pizza，又唔算特別好食，味道較濃同你覺得唔會同香港食開一樣有點不同，但一大一細兩塊夾埋，都收左我八歐羅。
每次出國擺fair買手信是個難題，要滿足公司咁多人又要平，而且好多時買完未必人人鍾意，好似次次去美國一定係買糖買朱古力，因為冇得揀，但到頭來多數冇人要自己啃番，德國就好彩特產是腸仔，老土一回事掃一大堆返去等各位朋友自己爭餐飽算唔使煩。正價貨都幾貴，但超市會將仲有一至三個月過期的雪藏貨做特價，一份只需要半價1-3歐羅，反正拎到返香港大家都立即整黎食架啦，同我從來唔覺得雪藏野過期會唔食得（話時話，屋企仲有樽過左期兩年的士多啤梨jam，而家仲keep住得閒拎出黎整麵包食，都食得好地地），各位同事，咪問點解唔買乜乜乜做手信，食腸啦你地。
最後一日，終於俾我搵到百事。可樂做到好大四處都有，一直奇怪點解冇其他品牌如百事，入到超市先知，原來百事呢個品牌在德國賤過地底泥，可樂細枝裝要兩歐羅，但旁邊一樣大細的百事居然三毫子歐羅有找，就算打盡稅當紙水極高，計到盡都唔使港紙四蚊仲平過香港，而且同可樂一樣比香港味淡，本身已經係百事fans加鍾意溝淡再放氣先飲，這德國味百事簡直是完美，仲要平到香港都比唔上，逗留德國兩個禮拜，樽百事係我覺得最物有所值的極品。
點懶都好，第二朝上機，今日點都要執埋行李先訓得覺。執到支力撻上床ＺＺＺＺ，咦有點唔對路，酒店對正火車站樓下就係的士站，但點解硬係好似特別嘈？起身望望先知，頂，間房成隻窗跌左出黎，唔怪得咁嘈。間酒店收得咁貴服務仲要咁唔掂，唔係早餐多加好食真係投訴爆佢。好在只需要訓多一晚。